(vovworld)-ສະພາບຕະຫລາດອະສັງຫາລິມະຊັບໃນເດືອນຕົ້ນປີ 2014 ນີ້ແມ່ນຕ່າງກັບຄວາມສະຫງົບງຽບໄລຍະດຽວກັນຂອງປີກາຍ, ເມື່ອສະຖານທີ່ຕິດຕໍ່ຄ້າຂາຍອະສັງຫາລິມະຊັບຕ່າງໆໃນບັນດານະຄອນໃຫຍ່ຢູ່ຫວຽດນາມ ມີຄວາມຟົດຟື້ນຄືນໃໝ່ ດ້ວຍກຳລັງຊື້ເຮືອນຢູ່ນັບມື້ນັບເພີ່ມຂຶ້ນ. ສິ່ງດັ່ງກ່າວບໍ່ພຽງແຕ່ສ່ອງແສງໃຫ້ເຫັນການຟື້ນຕົວຂອງພື້ນຖານເສດຖະກິດເທົ່ານັ້ນ ຫາກຍັງສະແດງໃຫ້ເຫັນບັນດານະໂຍບາຍແກ້ໄຂຄວາມຫຍຸ້ງຍາກໃຫ້ແກ່ຕະຫລາດອະສັງຫາລິມະຊັບ ດ້ວຍບ້ວງເງິນຫນູນຊ່ວຍລວມມູນຄ່າ 30.000 ຕື້ດົງຂອງລັດຖະບານ ໄດ້ເສີມຂະຫຍາຍປະສິດທິຜົນໃນເບື້ອງຕົ້ນ.
ພາບປະກອບ:internet
|
ວົງການຜູ້ຊື້ຂາຍອະສັງຫາລິມະຊັບຄາດຄະເນວ່າ ປີ 2014 ແມ່ນປີເພີ່ມຄວາມສາມາດຊຳລະສຳລັບຕະຫລາດອະສັງຫາລິມະຊັບ, ເພາະວ່າ ຜ່ານໄລຍະທີ່ການຕິດຕໍ່ຄ້າຂາຍອະສັງຫາລິມະຊັບຢ່າງຊັກຊ້ານັ້ນ, ບັນດາເຈົ້າຂອງລົງທຶນເຫັນດີຕັດແຍກເນື້ອທີ່ດິນຫລືຂາຍດ້ວຍລາຄາເທົ່າກັບເງິນລົງທຶນໃນເບື້ອງຕົ້ນເພື່ອເກັບເອົາທຶນຢ່າງວ່ອງໄວ. ພ້ອມກັບເລື່ອງລັດຖະບານສະຫນອງບ້ວງເງິນຫນູນຊ່ວຍ 30.000 ຕື້ດົ່ງ, ໃນນັ້ນ ຮຽກຮ້ອງທະນາຄານສະຫງວນໃຫ້ຜູ້ທຸກຍາກ, ພະນັກງານ, ລັດຖະກອນໄດ້ກູ້ຢືມເງິນເພື່ອປັບປຸງເຮືອນຢູ່, ຊື້, ເຊົ່າ ຫລືເຊົ່າຊື້ ໄດ້ເຮັດໃຫ້ຄວາມຕ້ອງການເຮືອນຢູ່ເພີ່ມຂຶ້ນຢ່າງວ່ອງໄວ. ນັບແຕ່ຕົ້ນປີນີ້, ບັນດາສະຖານທີ່ຕິດຕໍ່ຄ້າຂາຍອະສັງຫາລິມະຊັບຢູ່ ຮ່າໂນ້ຍ ແລະ ນະຄອນ ໂຮ່ຈິມີນ ໄດ້ມີລູກຄ້າຫລາຍຄົນມາຕິດຕໍ່ຄ້າຂາຍ. ທ່ານນາງ ຫງວຽນທິງຽບ, ບໍລິສັດນາຍໜ້າອະສັງຫາລິມະຊັບ ດ້າຍອານ ໃຫ້ຮູ້ວ່າ:
“ນັບແຕ່ຕົ້ນປີ ຈຳນວນລູກຄ້າມາຕິດຕໍ່ຄ້າຂາຍຢູ່ຫ້ອງການນັບມື້ນັບຫລາຍ, ເພາະວ່າ ດ້ວຍບັນດາໂຄງການທີ່ພວມປະຕິບັດ, ລູກຄ້າໄດ້ຊື້ເຮືອນຢູ່ຕາມຄວາມຕ້ອງການຂອງຕົນ. ດ້ວຍນະໂຍບາຍໃຫ້ກູ້ຢືມບຸລິມະສິດ, ມີຫລາຍຄົນບໍ່ທັນມີເງິນພຽງພໍແຕ່ກໍສາມາດຊື້ໄດ້ ແລະ ເມື່ອມີເງິນພຽງພໍແລ້ວ ເຂົາເຈົ້າຈະຄ່ອຍໆເບີກຈ່າຍ.”
ຄວາມຈິງໃຫ້ເຫັນວ່າ: ໃນສະພາບຫຍຸ້ງຍາກລວມຂອງພື້ນຖານເສດຖະກິດ, ແຕ່ເມື່ອຜັນຂະຫຍາຍບັນດາມາດຕະການຂອງລັດຖະບານກ່ຽວກັບການແກ້ໄຂຄວາມຫຍຸ້ງຍາກໃຫ້ແກ່ຕະຫລາດອະສັງຫາລິມະຊັບ, ເປັນຕົ້ນແມ່ນເລື່ອງເຮັດລະບຽບການ ກູ້ຢືມເງິນຢ່າງງ່າຍດາຍ, ໄດ້ເອື້ອອຳນວຍຄວາມສະດວກໃຫ້ແກ່ຜູ້ຊື້ເຮືອນຢູ່. ຕາມນະໂຍບາຍໃຫ້ກູ້ຢືມໃນບ້ວງເງິນຫນູນຊ່ວຍ 30.000 ຕື້ດົ່ງຂອງລັດຖະບານ, ຜູ້ຊື້ເຮືອນຢູ່ສັງຄົມ ພຽງເບີກຈ່າຍ 20% ມູນຄ່າຂອງເຮືອນຢູ່ເທົ່ານັ້ນ, ຈຳນວນເງິນທີ່ຍັງເຫລືອແມ່ນເບີກຈ່າຍຕາມແຕ່ລະໄລຍະ, ຕາມຄວາມຄືບຫນ້າຂອງໂຄງການ. ໂດຍກຳໄດ້ກາລະໂອກາດດັ່ງກ່າວ, ມີຫລາຍຄົນໄດ້ຕົກລົງຊື້ເຮືອນຢູ່ ເພື່ອຊົມໃຊ້ບຸລິມະສິດດັ່ງກ່າວ. ເຖິງວ່າ ສະສົມໄດ້ຈຳນວນເງິນພຽງ 200 ລ້ານດົ່ງ, ແຕ່ອ້າຍ ຫງວຽນວັນຮ່າ ຍັງຄົງຕັດສິນໃຈຊື້ເຮືອນຢູ່ ເມື່ອໄດ້ຮັບຂ່າວວ່າ ອັດຕາດອກເບ້ຍກູ້ຢືມເງິນເພື່ອຊື້ເຮືອນຢູ່ຖືກຫລຸດລົງຍັງເຫລືອ 5% ແລະ ໄລຍະກູ້ຢືມອາດຈະແກ່ຍາວແຕ່ 10-15 ປີ. ອ້າຍ ຫງວຽນວັນຮ່າ ໃຫ້ຮູ້ວ່າ:
“ຂ້າພະເຈົ້າຢາກຊື້ເຮືອນຢູ່ມາແຕ່ດົນແລ້ວ, ແຕ່ຕົ້ນປີນີ້ຈຶ່ງຕັດສິນໃຈຊື້ ແລະ ຄາດວ່າຈະກູ້ຢືມປະມານ 70% ມູນຄ່າເຮືອນຢູ່. ຂ້າພະເຈົ້າກໍໄດ້ຊອກຮູ້ບ້ວງເງິນຫນູນຊ່ວຍ 30.000 ຕື້ຂອງລັດຖະບານແລ້ວ ຈຶ່ງຕົກລົງຊື້ເຮືອນຢູ່, ເພາະວ່າ ບັນດາຜູ້ທີ່ມີຄວາມຕ້ອງການຊື້ເຮືອນຢູ່ຄືຂ້າພະເຈົ້າ ລ້ວນແຕ່ຖືວ່າ ນີ້ແມ່ນກາລະໂອກາດດີທີ່ສຸດ.”
ປີ 2014, ວົງການຜູ້ຊື້ຂາຍອະສັງຫາລິມະຊັບ ຕີລາຄາວ່າ ແມ່ນປີທີ່ຕະຫຼາດອະສັງຫາລິມະຊັບຟື້ນຕົວຄືນໃຫມ່, ພິເສດສຳລັບເຮືອນຢູ່ສັງຄົມ ແລະ ເຮືອນຢູ່ໃຫ້ແກ່ຜູ້ມີລາຍຮັບຕຳ່ ດ້ວຍລາຄາສະເລ່ຍຈາກ 700 ລ້ານເຖິງ 1,5 ຕື້ດົ່ງ ແມ່ນມີຫລາຍຄົນເລືອກເຟັ້ນ ແລະ ພວມມີທ່າອ່ຽງເພີ່ມຂຶ້ນ. ທ່ານ ຈີ້ງວັນກວຽດ, ຜູ້ຊ່ຽວຊານໃນຂົງເຂດອະສັງຫາລິມະຊັບ ໃຫ້ຂໍ້ສັງເກດວ່າ:
“ຕະຫລາດອະສັງຫາລິມະຊັບໃນໄລຍະຜ່ານມາ ໄດ້ຜ່ານໄລຍະຢຸດສະງັກແລ້ວ ແລະ ສະພາບຕິດຕໍ່ຄ້າຂາຍໄດ້ຟື້ນຕົວຄືນໃໝ່ ດ້ວຍຫລາຍຄົນຊື້ຂາຍເຮືອນຢູ່ສຳເລັດ. ການຊື້ຂາຍ ບັນດາໂຄງການໃຫຍ່ລະຫວ່າງບັນດາວິສາຫະກິດນຳກັນກໍໄດ້ດຳເນີນຄືນໃໝ່. ສິ່ງດັ່ງກ່າວສະແດງໃຫ້ເຫັນວ່າ ພື້ນຖານເສດຖະກິດເວົ້າລວມ ແລະ ຕະຫລາດອະສັງຫາລິມະຊັບເວົ້າສະເພາະ ໄດ້ມີນະໂຍບາຍ, ຍຸດທະສາດ ຢ່າງຖືກຕ້ອງ ແລະ ສິ່ງສຳຄັນກວ່າ ນັ້ນແມ່ນຜູ້ໃຊ້ສອຍ ຢາກຊື້ເຮືອນຢູ່ ໄດ້ມີຄວາມເຊື່ອໝັ້ນຕໍ່ຕະຫລາດອະສັງຫາລິມະຊັບ.”
ຕາມການສະຖິຕິຂອງກະຊວງກໍ່ສ້າງຫວຽດນາມແລ້ວ, ປະຈຸບັນ ທັງປະເທດ ມີ 124 ໂຄງການເຮືອນຢູ່ ສັງຄົມໄດ້ຮັບການຜັນຂະຫຍາຍດ້ວຍການກໍ່ສ້າງເຮືອນຢູ່ ປະມານ 78.700 ຫລັງ. ດ້ວຍຄວາມຕ້ອງການຫຼາຍ, ລາຄາຕຳ່, ເຮືອນຢູ່ສັງຄົມຍັງຄົງສືບຕໍ່ ໄດ້ຮັບ ພັດທະນາຢ່າງແຮງໃນປີນີ້.
ລັດຖະບານກໍພວມສຸມໃສ່ປະຕິບັດໄລຍະ 2 ໂຄງການຫນູນຊ່ວຍເຮືອນຢູ່ໃຫ້ແກ່ຜູ້ທຸກຍາກ ດ້ວຍກວ່າ 500.000 ຄອບຄົວທີ່ທຸກຍາກໄດ້ຮັບການຫນູນຊ່ວຍແຫລ່ງທຶນ. ລັດຖະບານ ຍັງປະຕິບັດບ້ວງເງິນຫນູນຊ່ວຍສະຫງວນໃຫ້ແກ່ຜູ້ມີຄຸນງາມຄວາມດີຄໍ່ການປະຕິວັດ ປະມານ 70.000 ຄົນ ຫລື ຄອບຄົວທຸກຍາກ 60.000 ຄອບຄົວຢູ່ເຂດທາງທິດເຫນືອພາກກາງ ຊື່ງແມ່ນແຫ່ງທີ່ເຄີຍຖືກປະສົບກັບພາຍຸນຳ້ຖ້ວມ. ນີ້ກໍແມ່ນບັນດາບາດກ້າວບຸກທະລຸເພື່ອໃຫ້ຕະຫລາດອະສັງຫາລິມະຊັບໃນປີນີ້ຟື້ນຕົວຄືນໃຫມ່ ສ້າງທ່າຟື້ນຟູ ເພື່ອພັດທະນາເສດຖະກິດສັງຄົມ.