(vovworld) - ຍູ້ແຮງການເຄື່ອນໄຫວສົ່ງເສີມ, ປັບປຸງສະພາບແລດລ້ອມແຫ່ງການດຳເນີນທຸລະກິດ ເພື່ອສ້າງບາດກ້າວບຸກທະລຸໃນການດຶງດູດເງິນລົງທຶນ, ພິເສດແມ່ນແຫຼ່ງເງິນລົງທຶນໂດຍກົງຈາກຕ່າງປະເທດ (FDI), ແມ່ນບຸລິມະສິດແຖວໜ້າ ເພື່ອແນໃສ່ສ້າງກຳລັງແຮງໃຫ້ເສດຖະກິດຂອງນະຄອນຫຼວງໃນໄລຍະຈະມາເຖິງ. ນີ້ກໍ່ແມ່ນສານເຊິ່ງການນຳນະຄອນຮ່າໂນ້ຍ ຢືນຢັນທີ່ກອງປະຊຸມສົ່ງເສີມການລົງທຶນເຂົ້າຮ່າໂນ້ຍ ທີ່ຫາກໍດຳເນີນຢູ່ຮ່າໂນ້ຍ.
(ກອງປະຊຸມສົ່ງເສີມການລົງທຶນເຂົ້າຮ່າໂນ້ຍ)
ນັບແຕ່ຕົ້ນປີ 2016 ມາຮອດປະຈຸບັນ, ຍາມໃດຮ່າໂນ້ຍ ກໍນຳໜ້າທົ່ວປະເທດກ່ຽວກັບການດຶງດູດເງິນລົງທຶນ. ໄລ່ຮອດທ້າຍເດືອນ 05/2016, ຮ່າໂນ້ຍ ໄດ້ດຶງດູດເງິນລົງທຶນຕ່າງປະເທດທີ່ຈົດທະບຽນໃໝ່ຕື່ມອີກ 1,6 ຕື້ USD, ເພີ່ມຂຶ້ນທົບ 3 ເທົ່າເມື່ອທຽບໃສ່ໄລຍະກ່ຽວກັນ ແລະ ຫຼາຍທົບ 1,5 ເທົ່າເມື່ອທຽບໃສ່ປີ 2015. ຈຳນວນໂຄງການທີ່ໄດ້ຮັບອະນຸມັດລົງທຶນ ແລະ ໄດ້ຮັບໜັງສືຢັ້ງຢືນຈົດທະບຽນລົງທຶນກໍເພີ່ມຂຶ້ນ 3 ເທົ່າເມື່ອທຽບໃສ່ໄລຍະດຽວກັນຂອງປີ 2015, ດ້ວຍຍອດເງິນລົງທຶນເພີ່ມຂຶ້ນກວ່າ 2,4 ເທົ່າ. ໃນໄລຍະຜ່ານມາ, ນະຄອນຮ່າໂນ້ຍ ໄດ້ມານະພະຍາຍາມປັບປຸງສະພາບແວດລ້ອມແຫ່ງການລົງທຶນ, ດຳເນີນທຸລະກິດ ແລະ ບັນລຸໄດ້ໝາກຜົນເປັນໜ້າຊົມຊື່ນໃນເບື້ອງຕົ້ນ. ປະຈຸບັນ, ຮ່າໂນ້ຍ ພວມຢືນອັນດັບທີ 24 ໃນຈຳນວນ 63 ແຂວງ, ນະຄອນໃນທົ່ວປະເທດກ່ຽວກັບການປັບປຸງສະພາບແວດລ້ອມແຫ່ງການລົງທຶນດຳເນີນທຸລະກິດ. ຄຽງຂ້າງເລື່ອງຍູ້ແຮງວຽກງານສົ່ງເສີມການລົງທຶນ, ຮ່າໂນ້ຍ ພວມຍູ້ແຮງການປະຕິຮູບດ້ານບໍລິຫານ ເພື່ອແນໃສ່ແກ້ໄຂຄວາມຫຍຸ້ງຍາກໃຫ້ບັນດາວິສາຫະກິດ, ນັກລົງທຶນ, ໂດຍສະເພາະແມ່ນບັນດາລະບຽບການບໍລິຫານກ່ຽວກັບດ້ານພາສີອາກອນ, ປະກັນສັງຄົມ, ທີ່ດິນ, ການບຸກເບີກໜ້າພຽງ. ມີນັກລົງທຶນຫຼາຍຄົນ ແລະ ວິສາຫະກິດໄດ້ຖືວ່າ: ບັນດາຄຳໝັ້ນສັນຍາຢ່າງແຮງກ່ຽວກັບການປັບປຸງສະພາບແວດລ້ອມແຫ່ງການລົງທຶນຂອງຮ່າໂນ້ຍທີ່ກອງປະຊຸມສົ່ງເສີມການລົງທຶນຄັ້ງນີ້ ຈະສ້າງບາດກ້າວບຸກທະລຸເພື່ອໃຫ້ວິສາຫະກິດ ແລະ ຮ່າໂນ້ຍ ພ້ອມກັນພັດທະນາ. ທ່ານນາງ ຫງວຽນທິຫງວຽດເຮື່ອງ, ປະທານສະພາບໍລິຫານ ບໍລິສັດຫຸ້ນສ່ວນລົງທຶນ PNG Holldings ຫວຽດນາມ, ສະເໜີວ່າ.
“ຂ້າພະເຈົ້າປາດຖະໜາວ່າເວລາເຮັດລະບຽບການບໍລິຫານຂະຫຼຸດລົງເຄິ່ງໜຶ່ງ. ແລະ ເມື່ອເວລາເຮັດລະບຽບການບໍລິຫານແລ້ວ, ໝາຍຄວາມວ່າມັນໄດ້ຊ່ວຍໃຫ້ວິສາຫະກິດປະຢັດລາຍຈ່າຍໃນການລົງທຶນ ແລະ ສ້າງແຫຼ່ງລົງທຶນໃໝ່”.
ໃນໄລຍະ 2016 – 2020, ຮ່າໂນ້ຍ ໄດ້ວາງຄາດໝາຍສູ້ຊົນຢືນແຖວໜ້າກ່ຽວກັບການດຶງດູດເງິນລົງທຶນ. ເພື່ອປະຕິບັດຄາດໝາຍດັ່ງກ່າວໃຫ້ໄດ້, ທ່ານ ຫງວຽນດຶກຈຸງ, ປະທານຄະນະກຳມະການປະຊາຊົນນະຄອນຮ່າໂນ້ຍ ໃຫ້ຮູ້ວ່າ, ຮ່າໂນ້ຍ ຈະນຳໜ້າທົ່ວປະເທດກ່ຽວກັບການລົງທຶນດຳເນີນທຸລະກິດ, ຕາມທິດໂປງໄສ, ສະດວກສະບາຍ ທັນສະໄໝ, ສະໜິດສະໜົມ ແລະ ມີວິຊາການ. ກໍ່ສ້າງອຳນາດການປົກຄອງທີ່ໃກ້ຊິດສະໜິດສະໜົມເພື່ອຮັບໃຊ້ປະຊາຊົນ ແລະ ວິສາຫະກິດ, ອຳນາດການປົກຄອງຈະສ້າງຄວາມສະດວກໃຫ້ວິສາຫະກິດດຳເນີນອາຊີບ. ການນຳນະຄອນຫຼວງຮ່າໂນ້ຍ ກໍຢືນຢັນວ່າ, ຈະນຳໃຊ້ເວລາ, ສ້າງການຫັນປ່ຽນຢ່າງຈະແຈ້ງທີ່ສຸດ ເພື່ອຮອງຮັບ, ໝູນໃຊ້ບັນດາແຫຼ່ງທຶນຢູ່ພາຍໃນ ແລະ ຕ່າງປະເທດ ເພື່ອຮັບໃຊ້ໃຫ້ແກ່ການພັດທະນາເສດຖະກິດ, ສັງຄົມຂອງນະຄອນໃຫ້ມີປະສິດທິຜົນ. ທ່ານ ຫງວຽນດຶກຈຸງ ຊີ້ແຈ້ງວ່າ.
“ຮ່າໂນ້ຍ ຈະດຳເນີນການປະຕິຮູບລະບຽບການບໍລິຫານຢ່າງແຮງ, ຮອບດ້ານໃນທຸກຂົງເຂດ, ໃນນັ້ນມີຂົງເຂດທີ່ກ່ຽວຂ້ອງເຖິງການສະໜອງໜັງສືອະນຸຍາດລົງທຶນໃຫ້ບັນດາວິສາຫະກິດ. ນະຄອນໄດ້, ພວມ ແລະ ຈະປະຕິບັດການສ້າງໂຄງປະກອບອົງການຈັດຕັ້ງຮາກຖານ, ພະແນກ, ຂະແໜງການທັງໝົດຄືນໃໝ່. ພວກຂ້າພະເຈົ້າສ້າງບັນດາກົດລະບຽບ, ຂັ້ນຕອນບົນຈິດໃຈຫຼຸດຜ່ອນເວລາເຮັດລະບຽບການບໍລິຫານ ແລະ ອອກໜັງສືອະນຸຍາດ. ປັບປຸງແບບແຜນເຮັດວຽກ, ພິເສດແມ່ນວິທີເຮັດວຽກຂອງທັງກົງຈັກບໍລິຫານ, ເພື່ອແນໃສ່ກ້າວໄປເຖິງການປະຕິບັດທຸກລະບຽບການບໍລິຫານຜ່ານປະຕູດຽວ”.
ນັບແຕ່ເດືອນ 06 ນີ້, ນະຄອນໄດ້ສ້າງກອງທຶນໜູນຊ່ວຍວິສາຫະກິດດຳເນີນອາຊີບ, ປະກາດໃຊ້ກົນໄກສົ່ງເສີມຄອບຄົວດຳເນີນທຸລະກິດ, ຈົດທະບຽນການເຄື່ອນໄຫວດຳເນີນທຸລະກິດຖືກຕາມກົດໝາຍວ່າດ້ວຍວິສາຫະກິດ, ສູ້ຊົນຮອດປີ 2020 ນະຄອນຈະມີວິສາຫະກິດສ້າງໃໝ່ກວ່າ 200.000 ແຫ່ງ. ເພື່ອຫັນວຽກງານປະຕິຮູບດ້ານບໍລິຫານເປັນລະອຽດ, ຮ່າໂນ້ຍ ໄດ້ປະຕິບັດການຫຼຸດເວລາຈົດທະບຽນສ້າງຕັ້ງໃໝ່ໃຫ້ວິສາຫະກິດ ຜ່ານອີນເຕີແນັດ ພຽງແຕ່ໃຊ້ເວລາ 2 ວັນເທົ່ານັ້ນ, ຫຼຸດລົງ 1 ວັນເມື່ອທຽບໃສ່ຂໍ້ກຳນົດ. ສຳລັບວິວັດການແລກປ່ຽນຜ່ານອີນເຕີແນັດ, ປະຕິບັດການເຊື່ອມຕໍ່ກ່ຽວກັບໜັງສື່ຢັ້ງຢືນຈົດທະບຽນດຳເນີນທຸລະກິດ, ແມ່ນຫຼຸດລະບຽບການບໍລິຫານກ່ຽວກັບການລົງທຶນລົງ 40%, ການແຈ້ງເສຍພາສີຜ່ານອີນເຕີແນັດບັນລຸໄດ້ 100%, ຫຼຸດຜ່ອນເວລາເຮັດລະບຽບການບຸກເບີກໜ້າພຽງ.
ດ້ວຍບັນດາຄຳໝັ້ນສັນຍາກ່ຽວກັບການປະຕິຮູບດ້ານບໍລິຫານ, ດຶງດູດທຸກແຫຼ່ງກຳລັງໃນການລົງທຶນພັດທະນາ, ມາຮອດປະຈຸບັນ ໄດ້ມີ 70 ນັກລົງທຶນຈົດທະບຽນເຂົ້າ 52 ໂຄງການຮຽກຮ້ອງການລົງທຶນ ໂດຍນະຄອນຍົກອອກມາ. ໃນນັ້ນມີຫຼາຍໂຄງການໄດ້ສຸມໃສ່ເຂົ້າໃນຂົງເຂດຄື: ກໍ່ສ້າງພື້ນຖານໂຄງລ່າງ, ລະບົບຄົມມະນາຄົມ, ລົງທຶນພື້ນຖານໂຄງລ່າງໂທລະຄົມ, ເຕັກໂນໂລຊີຂໍ້ມູນຂ່າວສານ, ລະບົບລະບາຍນ້ຳ, ກໍ່ສ້າງບັນດາໂຮງໝໍທີ່ມີຄຸນນະພາບສູງ…
ໃນຂົງເຂດດຶງດູດການລົງທຶນໂດຍກົງຈາກຕ່າງປະເທດ, ຄິດໄລແຕ່ກ່ອນມາຮອດປະຈຸບັນ, ຍອດເງິນລົງທຶນ FDI ທີ່ລົງທຶນເຂົ້າຮ່າໂນ້ຍບັນລຸກວ່າ 22,3 ຕື້ USD, ດ້ວຍໂຄງການລົງທຶນກວ່າ 2.723 ແຫ່ງຂອງບັນດານັກລົງທຶນທີ່ມາຈາກ 65 ປະເທດ ແລະ ເຂດແຄ້ວນໃນໂລກ. ສິ່ງທີ່ໜ້າສົນໃຈນັ້ນແມ່ນ, ຮ່າໂນ້ຍ ໄດ້ ແລະ ພວມນຳໃຊ້ກາລະໂອກາດ, ທ່າແຮງເປັນໃຈກາງຜະລິດ ແລະ ການຄ້າແລກປ່ຽນຕົ້ນຕໍ່ຂອງເຂດພາກເໜືອ, ເພື່ອປ່ຽນທິດ, ດຶງດູດແຫຼ່ງເງິນລົງທຶນເຂົ້າໃນຂົງເຂດເຕັກໂນໂລຊີທີ່ມີມູນຄ່າເພີ່ມສູງ, ໃຊ້ພູມປັນຍາສູງ. ແຜນນະໂຍບາຍຂອງຮ່າໂນ້ຍ ແມ່ນສ້າງການພົວພັນຄູ່ຮ່ວມມືກັບບັນດານັກລົງທຶນເພື່ອພ້ອມກັນພັດທະນາ, ນຳຮ່າໂນ້ຍ ກາຍເປັນສະຖານທີ່ລົງທຶນທີ່ປອດໄພ ແລະ ບັນລຸຜົນສຳເລັດຂອງບັນດາວິສາຫະກິດທັງຢູ່ພາຍໃນ ແລະ ຕ່າງປະເທດຢ່າງແທດຈິງ.