(vovworld)-ໂຄງການກັ່ນນ້ຳມັນ ງີເຊີນ, ເຂດເສດຖະກິດ ງີເຊີນ - ແຂວງ ແທງຮວາ ຫາກໍເລີ່ມລົງມືກໍ່ສ້າງເມື່ອວັນທີ 23/10/2013, ດ້ວຍຍອດຈຳນວນເງິນລົງທຶນກວ່າ 9 ຕື້ USD, ນີ້ແມ່ນໂຄງການລົງທຶນໂດຍກົງຂອງຕ່າງປະເທດ (FDI) ໃຫຍ່ກວ່າໝູ່ຢູ່ຫວຽດນາມ ນັບແຕ່ກ່ອນມາຮອດປະຈຸບັນ. ເລື່ອງລົງມືກໍ່ສ້າງໂຄງການຈຸດສຸມນີ້ ກໍຄືການດຶງດູດທຶນ FDI 15 ຕື້ USD ໃນ 9 ເດືອນຜ່ານມາຂອງທັງປະເທດ, ແມ່ນລື່ນກາຍຄາດຫມາຍທີ່ໄດ້ວາງອອກ, ສະແດງໃຫ້ເຫັນວ່າ ຫວຽດນາມ ຍັງຄົງແມ່ນສະຖານທີ່ດຶງດູດນັກລົງທຶນ.
ພິທີເລີ່ມລົງມືກໍ່ສ້າງໂຄງການກັ່ນນ້ຳມັນ ງີເຊີນ
ພາບ:internet
|
ໂຄງການກັ່ນນ້ຳມັນ ງີເຊີນ ແມ່ນໂຄງການກ່ັນນຳ້ມັນປະສົມແຫ່ງທຳອິດຂອງຫວຽດນາມ (ໃນນັ້ນ Petro Vietnam ປະກອບທຶນ 25%, ບໍລິສັດກັ່ນນຳ້ມັນສາກົນ ຄູເວດ 35%, ບໍລິສັດ Idemitsu ຍີ່ປຸ່ນ 35%, ບໍລິສັດເຄມີ Mitsui ຍີ່ປຸ່ນ 4,7%) ດ້ວຍຂອບຂະຫນາດໃຫຍ່ ແລະ ມີສະມັດຕະພາບການຜະລິດປະມານ 200.000 ຖັງ/ວັນ (ເທົ່າກັບ 10 ລ້ານໂຕນ/ປີ). ນີ້ແມ່ນຫນຶ່ງໃນບັນດາໂຄງການຈຸດສຸມກ່ຽວກັບການຮັບປະກັນພະລັງງານແຫ່ງຊາດ. ເມື່ອນຳເຂົ້າໃຊ້ການໃນປີ 2017, ໂຮງງານດັ່ງກ່າວພ້ອມກັບໂຮງງານກັ່ນນ້ຳມັນ ຢູງກວດ ສາມາດຕອບສະຫນອງປະມານ 70% ຄວາມຕ້ອງການນ້ຳມັນຢູ່ພາຍໃນປະເທດ ແລະ ສະຫນອງນ້ຳມັນໃຫ້ແກ່ຕະຫລາດພາຍໃນກໍຄືສົ່ງອອກຕ່າງປະເທດ. ທ່ານ Korumuri Shimmura ຜູ້ອຳນວຍການໃຫຍ່ບໍລິສັດກັ່ນນ້ຳມັນ ງີເຊີນ, ເຈົ້າຂອງການລົງທຶນ ໃຫ້ຮູ້ວ່າ:
“ນີ້ແມ່ນໂຄງການລົງທຶນໂດຍກົງຂອງຕ່າງປະເທດໃຫຍ່ກວ່າໝູ່ນັບແຕ່ກ່ອນມາຮອດປະຈຸບັນຢູ່ຫວຽດນາມ. ຜົນສຳເລັດຂອງໂຄງການຈະແມ່ນປັດໄຈສຳຄັນເພື່ອດຶງດູດການລົງທຶນເຂົ້າຫວຽດນາມຕື່ມອີກ. ໂຄງການນີ້ ປະກອບສ່ວນຮັບປະກັນພະລັງງານ, ປະຕິບັດຍຸດທະສາດພັດທະນາຂົງເຂດກັ່ນນຳ້ມັນຂອງອຸດສາຫະກຳປຸງແຕ່ງນ້ຳມັນ ແລະ ອາຍແກສ. ຜ່ານໂຄງການນີ້, ບັນດານັກລົງທຶນຍີ່ປຸ່ນ ແລະ ຄູເວດ ຈະເປີດກວ້າງບັນດາກົນໄກດຳເນີນທຸລະກິດຢູ່ຫວຽດນາມຕື່ມອີກ.”
ທ່ານ ຫງວຽນດີງຊືງ, ຮອງປະທານຄະນະກຳມະການປະຊາຊົນແຂວງ ແທງຮວາ ໃຫ້ຮູ້ວ່າ, ໃນໄລຍະຈະມາເຖິງ ທາງແຂວງຈະ ລົງທຶນປະມານ 4 ຕື້ USD ເຂົ້າເຂດເສດຖະກິດ ງີເຊີນ. ແຜນນະໂຍບາຍຂອງແຂວງ ແທງຮວາ ພຽງແຕ່ຮັບບັນດາໂຄງການເສດຖະກິດຈຸດສຸມ ເພື່ອເສີມຂະຫຍາຍຄວາມສາມາດບົ່ມຊ້ອນທ່າໄດ້ປຽບຂອງທ້ອງຖິ່ນ, ປະກອບສ່ວນຫັນປ່ຽນໂຄງປະກອບເສດຖະກິດ, ເພີ່ມມູນຄ່າວົງເງິນສົ່ງອອກ, ສ້າງວຽກເຮັດງານທຳໃຫ້ແກ່ຄົນງານ. ກ່ຽວກັບບາງໂຄງການຈຸດສຸມຂອງເຂດເສດຖະກິດ ງີເຊີນ,ທ່ານ ຫງວຽນດີງຊືງ ໃຫ້ຮູ້ວ່າ:
“ຈຸດໝາຍຂອງຄະນະພັກ, ຄະນະກຳມະການປະຊາຊົນແຂວງ ແມ່ນສົ່ງເສີມການກະກຽມສຳເນົາເອກະສານເພື່ອລົງນາມໃນບັນດາເອກະສານຮ່ວມມືກ່ຽວກັບການລົງທຶນ, ລົງນາມໃນບັນດາບົດບັນທຶກຊ່ວຍຈຳກ່ຽວກັບການລົງທຶນ ແລະ ພິເສດ ແມ່ນຊຸກຍູ້ບັນດາລະບຽບການເພື່ອມອບຫນັງສືອະນຸຍາດລົງທຶນໃຫ້ແກ່ບັນດານັກລົງທຶນພາຍໃນປະເທດ ແລະ ຕ່າງປະເທດ. ບັນດາໂຄງການຈຸດສຸມຄື: ໂຄງການໄຟຟ້າໃຊ້ພະລັງຄວາມຮ້ອນ ງີເຊີນ ເລກ 2, ໂຄງການລົງທຶນກໍ່ສ້າງພື້ນຖານໂຄງລ່າງເຂດອຸດສາຫະກຳ ລາມເຊີນ - ຊາວຫວ່າງ, ພິເສດແມ່ນມອບຫນັງສືອະນຸຍາດລົງທຶນໃຫ້ແກ່ບັນດາໂຄງການລົງທຶນກໍ່ສ້າງກຸ່ມທ່າກຳປັ່ນ ງີເຊີນ.”
ຄຽງຄູ່ກັບໂຄງການ ກັ່ນນ້ຳມັນ ງີເຊີນ, ຢູ່ເຂດເສດຖະກິດ ງີເຊີນ ຍັງມີຫລາຍໂຄງການຈຸດສຸມອື່ນໆທີ່ສ້າງກຳລັງຫນູນໃຫ້ແກ່ການພັດທະນາເສດຖະກິດສັງຄົມຂອງທ້ອງຖິ່ນກໍຄືຂອງເຂດ ແລະ ປະເທດຊາດຄື: ໂຄງການໄຟຟ້າໃຊ້ພະລັງຄວາມຮ້ອນ ງີເຊີນ ເລກ 1 ລວມຍອດມູນຄ່າລົງທຶນ 22.000 ຕື້ດົ່ງ, ໂຄງການໄຟຟ້າໃຊ້ພະລັງຄວາມຮ້ອນ ງີເຊີນເລກ 2 ລວມຍອດເງິນລົງທຶນ 2,3 ຕື້ USD ໂດຍກຸ່ມບໍລິສັດຮ່ວມ ທຸລະກິດ Marubeni - ຍີ່ປຸ່ນ ແລະ ກຸ່ມບໍລິສັດ Kepco ສເກົາຫລີ ລົງທຶນ. ທ່ານ ເຈີນຮ່ວາ, ຫົວຫນ້າຄະນະຄຸ້ມຄອງເຂດເສດຖະກິດ ງີເຊີນ ຖືວ່າ: ໂດຍນອນໃນເສັ້ນທາງຄົມມະນາຄົມເຊື່ອມຕໍ່ພາກເຫນືອ-ພາກໃຕ້ ແລະ ທັງມີທ່າກຳປັ່ນນ້ຳເລີກ, ເຂດເສດຖະກິດ ງີເຊີນ ພວມມີເງື່ອນໄຂສະດວກຫລາຍຢ່າງເພື່ອດຶງດູດນັກລົງທຶນ.
“ຫວ່າງແລ້ວນີ້ ລັດຖະບານ, ກະຊວງແຜນການ ແລະ ການລົງທຶນ ໄດ້ອະນຸຍາດໃຫ້ເປີດກວ້າງເຂດອຸດສາຫະກຳ ດ້ວຍຂອບຂະຫນາດ 45.000 ເຮັກຕາ ແລະ ໃນການວາງແຜນກຳນົດຈະເປີດກວ້າງບາງເຂດອຸດສາຫະກຳສະອາດ, ເຂດກະສິກຳອຸດສາຫະກຳສູງຕື່ມອີກ ແລະ ບາງບໍລິການເພື່ອຮັບໃຊ້ເຂດເສດຖະກິດ ງີເຊີນ. ປະຈຸບັນ ເຂດເສດຖະກິດ ງີເຊີນ ພວມສຸມໃສ່ປັບປຸງສະພາບແວດລ້ອມແຫ່ງການລົງທຶນ, ຫນູນຊ່ວຍບັນດານັກລົງທຶນແກ້ໄຂລະບຽບການບໍລິຫານ, ບຸກເບີກຫນ້າພຽງຢ່າງວ່ອງໄວ ເພື່ອ ສາມາດປະຕິບັດໂຄງການຕ່າງໆໃນທັນທີໄດ້.”
ຕາມທ່ານ ຫງວຽນວັນຈູງ, ຮອງລັດຖະມົນຕີກະຊວງແຜນການ ແລະ ການລົງທຶນຫວຽດນາມແລ້ວ, ເຖິງວ່າ ເສດຖະກິດໂລກ ຍັງປະສົບກັບຄວາມຫຍຸ້ງຍາກ, ກະແສທຶນ FDI ໃນທົ່ວໂລກບໍ່ທັນຟື້ນຕົວ ແລະ ບັນດາປະເທດໃນພາກພື້ນ ພວມຍູ້ແຮງດຶງດູດການລົງທຶນນັ້ນ, ແຕ່ ຫວຽດນາມ ຍັງຄົງດຶງດູດບັນດານັກລົງທຶນຕ່າງປະເທດ,ໃນນັ້ນ ມີໂຄງການກັ່ນນ້ຳມັນ ງີເຊີນ - ຊື່ງແມ່ນໂຄງການ FDI ໃຫຍ່ກວ່າໝູ່ນັບແຕ່ກ່ອນມາຮອດປະຈຸບັນ ສິ່ງດັ່ງກ່າວໄດ້ພິສູດໃຫ້ເຫັນຢ່າງຈະແຈ້ງວ່າ.
“ການດຶງດູດບັນດາໂຄງການຈຸດສຸມ, ໃນນັ້ນມີໂຄງການກັ່ນນຳ້ມັນ ງີເຊີນ ສຳລັບພາກພື້ນ ແລະ ທົ່ວປະເທດໃນໄລຍະຜ່ານມາແມ່ນຕັ້ງຫນ້າທີ່ສຸດ. ໃນຈຳນວນໂຄງການລົງທຶນດັ່ງກ່າວສ່ວນຫລາຍແມ່ນຂຶ້ນກັບບັນດານັກລົງທຶນສຳຄັນຂອງຍີ່ປຸ່ນ. ແທງຮວາ ໄດ້ດຶງດູດບັນດານັກລົງທຶນຢ່າງຖືກຕ້ອງຕາມແຜນນະໂຍບາຍ, ນະໂຍບາຍດຶງດູດການລົງທຶນ. ນີ້ແມ່ນບັນດານັກລົງທຶນຊື່ງພວກເຮົາສາມາດຮ່ຳຮຽນເອົາບົດຮຽນກ່ຽວກັບເຕັກໂນໂລຊີ, ກຳລັງຄວາມສາມາດຄຸ້ມຄອງ.”
ເມື່ອໂຄງການກັ່ນນຳ້ມັນ ງີເຊີນໄລຍະ 1 ຖືກນຳເຂົ້າໃຊ້ການໄຕມາດ 1/2017, ສະມັດຕະພາບຜະລິດນຳ້ມັນດີບຈະບັນລຸ 10 ລ້ານໂຕນ/ປີ ແລະ ໄລຍະ 2 ຈະຍົກຂຶ້ນເຖິງ 20 ລ້ານໂຕນ/ປີ. ພາຍຫລັງໄດ້ຮັບການກໍ່ສ້າງສຳເລັດ ແລະ ນຳເຂົ້າເຄື່ອນໄຫວ, ໂຄງການດັ່ງກ່າວບໍ່ພຽງແຕ່ປະກອບສ່ວນຮັບປະກັນພະລັງງານແຫ່ງຊາດ, ຮັບໃຊ້ພາລະກິດຫັນປະເທດຊາດເປັນປະເທດອຸດສາຫະກຳ ແລະ ທັນສະໄຫມເທົ່ານັ້ນ ຫາກຍັງຂະຫຍາຍອອກຢ່າງກວ້າງຂວາງ ແລະ ສ້າງບາດກ້າວບຸກທະລຸໃຫມ່ໃນການດຶງດູດນັກລົງທຶນ, ພັດທະນາເຂດເສດຖະກິດ ງີເຊີນ ແລະ ເຂດໃກ້ຄຽງ.