ດ້ວຍທ່າໄດ້ປຽບຈາກການນຳໃຊ້ກໍ່ຄືຄວາມຕ້ອງການສູງ, ໝວດສິນຄ້າໃຊ້ສອຍໂດຍໄວຢູ່ ຫວຽດນາມ ຫຼື ສິນຄ້າປະເພດ FMCG ໄດ້ພັດທະນາດ້ວຍຄວາມປະທັບໃຈທັງຢູ່ເຂດຕົວເມືອງ ແລະ ຊົນນະບົດ. ມີຜະລິດຕະພັນຫຼາຍປະເພດຄື: ນຳ້ນົມ, ເຄື່ອງດື່ມແອລກໍຮໍ, ນຳ້ຫວານ, ເຈ້ຍປື້ມຂຽນຂອງນັກຮຽນ… ໄດ້ ແລະ ພວມຄອງຕະຫຼາດພາຍໃນປະເທດດ້ວຍອັດຕາສ່ວນສູງ. ນີ້ແມ່ນກາລະໂອກາດອັນໃຫຍ່ຫຼວງໃຫ້ແກ່ບັນດາວິສາຫະກິດຜະລິດໝວດສິນຄ້າປະເພດ FMCG, ຍູ້ແຮງການຜະລິດ, ເປີດກ້ວາງຕະຫຼາດ, ຊອກຫາກາລະໂອກາດເຕີບໂຕໃນສະພາບການເຊື່ອມໂຍງຢ່າງເລິກເຊິ່ງ, ກ້ວາງຂວາງໃນປີ 2016. ບົດຂຽນ “ໝວດສິນຄ້າປະເພດ FMCG ມານະພະຍາຍາມຄອງຕະຫຼາດພາຍໃນປະເທດໂດຍໄວ” ຂອງ ຈູງຖູຍ, ນັກຂ່າວ VOV.
ຕາມການຄາດຄະເນແລ້ວ, ໃນປີ 2016, ຍອດລາຍຮັບຂອງໝວດສິນຄ້າປະເພດ FMCG ຈະຂຶ້ນເຖິງ 140 ລ້ານ USD, ແຕ່ໃນສະພາບເຊື່ອມໂຍງຢ່າງເລິກເຊິ່ງກ້ວາງຂວາງ, ບັນດາວິສາຫະກິດທີ່ຜະລິດສິນຄ້າປະເພດ FMCG ພວມປະສົບກັບຄວາມຫຍຸ້ງຍາກບໍ່ແມ່ນໜ້ອຍຄື: ກຳລັງຄວາມສາມາດດ້ານການເງິນຍັງອ່ອນ, ສິນຄ້າຫຼາຍປະເພດຕ້ອງອີງໃສ່ແຫຼ່ງວັດຖຸດິບນຳເຂົ້າ. ນອກຈາກນັ້ນ, ໄລຍະຈະມາເຖິງເມື່ອບັນດາສັນຍາການຄ້າເສລີມີຜົນສັກສິດ, ປະລິມານສິນຄ້າດ້ວຍຈຳນວນຫຼາຍຂອງຕ່າງປະເທດຖືກນຳເຂົ້າ ຫວຽດນາມ ຈະເປັນຮົ້ວກີດຂວາງ ແລະ ເປັນສິ່ງທ້າທາຍອັນໃຫຍ່ຫຼວງຕໍ່ກັບບັນດາວິສາຫະກິດທີ່ຜະລິດສິນຄ້າປະເພດ FMCG . ທ່ານນາງ ເລທິຮ່ວາງອ໋ຽນ, ຜູ້ອຳນວຍການສື່ສານ ແລະ ໜູນຊ່ວຍດ້ານການຕະຫຼາດບໍລິສັດ Nestle ຫວຽດນາມ, ຖືວ່າ:
“ບັນດາວິສາຫະກິດແຈກຢາຍຜະລິດຕະພັນ, ກໍຄືບັນດາຮ້ານຂາຍຍ່ອຍຕ້ອງເພີ່ມທະວີກຳລັງຄວາມສາມາດແກ່ງແຍ້ງ. ບັນດາຮ້ານຂາຍຍ່ອຍທີ່ເຄີຍດຳເນີນທຸລະກິດຕາມແບບດັ້ງເດີມ ປະຈຸບັນໃນໄລຍະຫັນເປັນທັນສະໄໝ, ຕ້ອງໄດ້ຮັບການກໍ່ສ້າງເພື່ອສາມາດຕອບສະໜອງໃຫ້ແກ່ການຫັນເປັນທັນສະໄໝ ກໍ່ຄືທ່າອ່ຽງການປ່ຽນແປງຂອງຜູ້ໃຊ້ສອຍໃຫ້ໄດ້.”
ພາບປະກອບ
|
ປະຈຸບັນ, ຫາກໍ່ມີ 54% ຈຳນວນວິສາຫະກິດທີ່ຂາຍສິນຄ້າປະເພດ FMCG ມາຍັງເຂດຊົນນະບົດເທົ່ານັ້ນ. ໃນຂະນະນັ້ນ, ຢູ່ຕະຫຼາດເຂດຊົນນະບົດໃນປະຈຸບັນ, ພັດມີສິນຄ້ານຳເຂົ້າຈາກຕ່າງປະເທດພັດກວມອັດຕາສ່ວນສູງພໍສົມຄວນ. ຖ້າຫາກບໍ່ມີມາດຕະການແກ້ໄຂເພື່ອຍາດເອົາຕະຫຼາດເຂດຊົນນະບົດຄືນ, ວິສາຫະກິດພາຍໃນປະເທດຈະປະສົບກັບຄວາມຫຍຸ້ງຍາກທີ່ສຸດ. ນັກຊ່ຽວຊານດ້ານເສດຖະກິດ ເລດັງແຢງ, ປະກອບຄຳເຫັນວ່າ:
“ຕ້ອງປະເຊີນໜ້າກັບການແກ່ງແຍ້ງຢ່າງຂ້ຽວຂາດດັ່ງນັ້ນໃນບັນດາຂົງເຂດກ່ຽວກັບຜະລິດກະສິກຳ ແລະ ອຸດສາຫະກຳ, ນີ້ແມ່ນຂະແໜງສິນຄ້າທີ່ມີກຳລັງຄວາມສາມາດແກ່ງແຍ້ງ ແລະ ມີຄວາມກ້າວໜ້າດີທີ່ສຸດ. ພວກເຮົາຕ້ອງຍ້ອນຮັບຮູ້ການແກ່ງແຍ້ງ, ຢາກເຮັດໄດ້ຄືແນວນັ້ນບັນດາວິສາຫະກິດ ຫວຽດນາມ ຕ້ອງຮ່ວມສຳພັນ, ຮ່ວມມືນຳກັນເພື່ອສ້າງເປັນລະບົບມູນຄ່າ, ເພື່ອຈຳໜ່າຍສິນຄ້າຂອງຕົນໃຫ້ດີກ່ວາອີກ. ດ້ວຍວິທີດັ່ງກ່າວຈຶ່ງສາມາດຄົງຕົວໄດ້ຢ່າງໝັ້ນຄົງໃນຕະຫຼາຍພາຍ, ການມີໜ້າຂອງສິນຄ້າປະເພດຕ່າງໆທີ່ຂຶ້ນກັບບັນດາປະເທດ ອາຊຽນ.”
ປະຈຸບັນ, ມີຜູ້ໃຊ້ສອຍພາຍໃນປະເທດ 80% ເຊື່ອໝັ້ນຕໍ່ຄຸນນະພາບ ແລະ ໃຫ້ບຸລິມະສິດສິນຄ້າປະເພດ FMCG ຂອງ ຫວຽດນາມ ຄື: ນົມສົ້ມ ກວມເອົາ 95%, ກາເຟກວມເອົາກ່ວາ 90%, ນຳ້ປາແມ່ນກ່ວາ 95%, ໝີ່ສຳເລັດຮູບກວມເອົາ 90% ແລະ ເບຍກວມເອົາ 90% ຕະຫຼາດພາຍໃນປະເທດ. ເພື່ອໃຫ້ ໝວດສິນຄ້າປະເພດ FMCG ຢືນຍົງຄົງຕົວໃນຕະຫຼາດພາຍໃນປະເທດໄດ້ນັ້ນ, ທ່ານນາງ ໂຮ່ທິກິມທວາ, ລັດຖະມົນຕີຊ່ວຍວ່າການກະຊວງອຸດສາຫະກຳ - ການຄ້າ, ຖືວ່າ: ບັນດາວິສາຫະກິດຕ້ອງຍົກສູງຄວາມສາມາດແກ່ງແຍ້ງໃນການຜະລິດປຸງແຕ່ງ, ຫລຸດຜ່ອນການອີງໃສ່ ວັດຖຸດິບທີ່ນຳເຂົ້າມາຈາກຕ່າງປະເທດເທື່ອລະກ້າວ, ຄວບຄຸມຄຸນນະພາບຜະລິດຕະພັນຢ່າງແໜ້ນແຟ້ນ. ທ່ານນາງລັດຖະມົນຕີຊ່ວຍວ່າການ ໂຮ່ທິກິມທວາ, ໃຫ້ຮູ້ວ່າ:
“ສຳລັບອົງການຄຸ້ມຄອງລັດ ຄວນສ້າງບັນດາຕະຫຼາດມີຄວາມໂປ່ງໃສກ່ວາ… ສຳລັບຜູ້ໃຊ້ສອຍຕ້ອງປົກປ້ອງຕົນເອງດ້ວຍການປະກອບຄຳເຫັນ, ກ່ຽວກັບຕົ້ນກຳເນີດຂອງສິນຄ້າ, ຍີ່ຫໍ້ສິນຄ້າ… ສຳລັບບັນດາວິສາຫະກິດຄວນຍົກສູງກຳລັງຄວາມສາມາດແກ່ງແຍ້ງຂອງຕົນ, ຕອບສະໜອງບັນດາຄວາມຮຽກຮ້ອງຕ້ອງການຂອງຜູ້ໃຊ້ສອຍ. ວິສາຫະກິດກໍຕ້ອງປົກປ້ອງຕົວເອງ, ຕໍ່ບັນດາຜະລິດຕະພັນທີ່ບໍ່ມີຄວາມກະຈ່າງແຈ້ງ, ມີການແກ່ງແຍ້ງບໍ່ໂປ່ງໃສ”
ດ້ວຍທ່າໄດ້ປຽບທີ່ຕິດພັນກັບຕະຫຼາດ, ໃນຊຸມປີມໍ່ໆມານີ້, ຄວາມຕ້ອງການນຳໃຊ້ນັບມື້ນັບສູງ,ໝວດສິນຄ້າປະເພດ FMCG ໄດ້ມີການພັດທະນາຢ່າງມີຄວາມປະທັບໃຈ ຢູ່ທັງເຂດຕົວເມືອງ ແລະ ຊົນນະບົດ. ປະຈຸບັນ, ພົນລະເມືອງຢູ່ເຂດຊົນນະບົດ ຫວຽດນາມ ກວມ 68% ໃນຍອດຈຳນວນພົນລະເມືອງ 90 ລ້ານຄົນ, ດັ່ງນັ້ນຕະຫຼາດເຂດຊົນນະບົດຍັງມີກາລະໂອກາດຫຼາຍທີ່ສຸດສຳລັບສິນຄ້າປະເພດ FMCG. ເລື່ອງການເປີດກ້ວາງຕະຫຼາດຢູ່ເຂດຊົນນະບົດແມ່ນເໝາະສົມກັບສະພາບການໃນປະຈຸບັນ, ດັ່ງນັ້ນຫຼາຍວິສາຫະກິດໄດ້ມີແຜນການສຸມໃສ່ລົງທຶນເຂົ້າບັນດາຂົງເຂດນີ້. ບັນດາວິສາຫະກິດກໍເອົາໃຈໃສ່ເຖິງການຍົກສູງຄຸນນະພາບ, ປັບປຸງຮູບແບບຜະລິດຕະພັນ, ຍູ້ແຮງການພັດທະນາຜະລິດຕະພັນໃໝ່ຍ້ອນຕະຫຼາດສິນຄ້າໃຊ້ສອຍມີການປ່ຽນແປງຢ່າງຕໍ່ເນື່ອງ. ເລື່ອງປັບປຸງ ແລະ ສ້າງບັນດາຜະລິດຕະພັນໃໝ່ບໍ່ພຽງແຕ່ເປັນການຊຸກຍູ້ຄວາມຕ້ອງການຂອງຜູ້ໃຊ້ສອຍເທົ່ານັ້ນ ຫາກຍັງຊ່ວຍໃຫ້ຕະຫຼາດຂອງໝວດສິນຄ້າປະເພດ FMCG ເຕີບໂຕຢ່າງຕໍ່ເນື່ອງອີກດ້ວຍ.