 នាយករដ្ឋមន្ត្រីរដ្ឋាភិបាលវៀតណាម លោក Pham Minh Chinh និងនាយករដ្ឋមន្ត្រីប៉ូឡូញលោក Donald Tusk។ (រូបថត៖ VOV) |
សេចក្តីថ្លែងការណ៍រួមបានឲ្យដឹងថា លោកនាយករដ្ឋមន្ត្រី Pham Minh Chinh និងលោកនាយករដ្ឋមន្ត្រី Donald Tusk បានសង្កត់ធ្ងន់លើភាពចាំបាច់សម្រាប់ភាគីទាំងពីរក្នុងការជំរុញកិច្ចសហប្រតិបត្តិការនយោបាយ សេដ្ឋកិច្ច ឧស្សាហកម្ម មូលដ្ឋាន និងការផ្លាស់ប្តូររវាងប្រជាជននិងប្រជាជន ឲ្យកាន់តែទូលំទូលាយ និងប្រកបដោយប្រសិទ្ធភាព ឆ្ពោះទៅលើកកំពស់ទំនាក់ទំនងវៀតណាម - ប៉ូឡូញ ឡើងកម្រិតយុទ្ធសាស្ត្រនាពេលខាងមុខ។ ភាគីទាំងពីរបានឯកភាពបង្កើនដំណើរទស្សនកិច្ចនិងជំនួបប្រាស្រ័យជាន់ខ្ពស់ទ្វេភាគីរវាងបក្សកុម្មុយនិស្ត រដ្ឋ រដ្ឋាភិបាល រដ្ឋសភា និងអាជ្ញាធរមូលដ្ឋានរបស់វៀតណាម ជាមួយរដ្ឋាភិបាលប៉ូឡូញ ដើម្បីពង្រឹងកិច្ចសហប្រតិបត្តិការនយោបាយ និងការយល់ដឹងគ្នាទៅវិញទៅមក។
ភាគីទាំងពីរបានឯកភាពជំរុញការសន្ទនារវាងក្រសួងការបរទេសនៃប្រទេសទាំងពីរ ហើយមានបំណងចង់ពង្រីកកិច្ចសហប្រតិបត្តិការលើបញ្ហាអន្តរជាតិ និងតំបន់ រួមទាំងការបង្កើតគោលនយោបាយ និងការសម្របសម្រួលជំហរ នៅវេទិកាពហុភាគីនានា ជាពិសេសក្នុងក្របខ័ណ្ឌនៃអង្គការសហប្រជាជាតិ អាស៊ាន - សហភាពអឺរ៉ុប និង ASEM។ ភាគីទាំងពីរបានសន្យាជំរុញកិច្ចសហប្រតិបត្តិការអន្តរតំបន់ តាមរយៈការពង្រឹងទំនាក់ទំនងវៀតណាម-សហភាពអឺរ៉ុប និងប៉ូឡូញ-អាស៊ាន។ វៀតណាមបានសម្តែងការគាំទ្រការចូលជាសមាជិករបស់ប៉ូឡូញចំពោះសន្ធិសញ្ញាមិត្តភាព និងកិច្ចសហប្រតិបត្តិការនៅអាស៊ីអាគ្នេយ៍ (TAC)។ ភាគីទាំងពីរបានអះអាងជាថ្មីនូវការគាំទ្រចំពោះពហុភាគីនិយម និងប្រព័ន្ធអន្តរជាតិជាមួយអង្គការសហប្រជាជាតិជាមជ្ឈភាព ព្រមទាំងសណ្តាប់ធ្នាប់អន្តរជាតិដោយផ្អែកលើគោលការណ៍ជាមូលដ្ឋាននៃច្បាប់អន្តរជាតិ រួមទាំងធម្មនុញ្ញអង្គការសហប្រជាជាតិផងដែរ។ គោលការណ៍ទាំងនេះរួមមាន ការមិនប្រើប្រាស់ ឬការគំរាមកំហែងប្រើប្រាស់កម្លាំង ការគោរពឯករាជ្យ អធិបតេយ្យភាព និងបូរណភាពដែនដីនៃប្រទេសទាំងអស់ និងការដោះស្រាយវិវាទដោយសន្តិវិធី ស្របតាមច្បាប់អន្តរជាតិ។ ភាគីទាំងពីរបានអះអាងជាថ្មីម្ដងទៀតនូវការគាំទ្រចំពោះជំហរជាគោលការណ៍របស់អាស៊ានអំពីសមុទ្រខាងកើត ដោយសង្កត់ធ្ងន់លើការគោរពច្បាប់ជាគោល និងការដោះស្រាយវិវាទដោយសន្តិវិធីស្របតាមច្បាប់អន្តរជាតិ រួមទាំងអនុសញ្ញាអង្គការសហប្រជាជាតិស្តីពីច្បាប់សមុទ្រឆ្នាំ ១៩៨២ ផងដែរ៕
