ការចរចារុស្ស៊ី-អាមេរិកនៅទីក្រុងអ៊ីស្តង់ប៊ុលបានបញ្ចប់បន្ទាប់ពីរយៈពេល ៦ ម៉ោងកន្លះ
(VOVWORLD) - យោងតាមទីភ្នាក់ងារសារព័ត៌មាន Tass របស់រុស្ស៊ី កិច្ចពិភាក្សារវាងមន្ត្រីរុស្ស៊ី និងអាមេរិកនៅថ្ងៃទី ២៧ ខែកុម្ភៈ នៅទីក្រុងអ៊ីស្តង់ប៊ុល ប្រទេសទួរគី ត្រូវបានបញ្ចប់បន្ទាប់ពីរយៈពេល ៦ ម៉ោងកន្លះ។ គណៈប្រតិភូអាមេរិកដឹកនាំ ដោយឧបការីរងរដ្ឋមន្ត្រីការបរទេសអាមេរិក ទទួលបន្ទុកគោលនយោបាយរុស្សី និងអឺរ៉ុបកណ្តាល លោកស្រី Sonata Coulter។
ចំណែកភាគីរុស្ស៊ីដឹកនាំដោយលោក Alexander Darchiev ប្រធាននាយកដ្ឋានអាមេរិកខាងជើងនៃក្រសួងការបរទេសរុស្ស៊ី។ កិច្ចពិភាក្សាបានផ្តោតលើបញ្ហាទាក់ទងនឹងសកម្មភាពរបស់ស្ថានទូតនៃប្រទេសទាំងពីរនៅទីក្រុងវ៉ាស៊ីនតោន និងទីក្រុងម៉ូស្គូ។
កិច្ចពិភាក្សាបានបញ្ចប់ដោយគ្មានការថ្លែងឬការធ្វើអត្ថាធិប្បាយណាមួយទៅកាន់សារព័ត៌មាន។ យោងតាមអ្នកនាំពាក្យវិមានក្រឹមឡាំង លោក Dmitry Peskov ព័ត៌មានស្តីពីលទ្ធផលនៃកិច្ចចរចានឹងត្រូវបានផ្តល់ជូនតាមរយៈបណ្តាញផ្សេងៗគ្នា។
ថ្លែងទៅកាន់អ្នកសារព័ត៌មានមុនកិច្ចពិភាក្សានៅទីក្រុង Türkiye ក្រសួងការបរទេសអាមេរិកបានឲ្យដឹងថា កិច្ចពិភាក្សានឹងផ្តោតលើបុគ្គលិកការទូតនៅក្នុងប្រទេសនីមួយៗ ទិដ្ឋាការ និងសេវាហិរញ្ញវត្ថុធនាគារសម្រាប់បេសកកម្មការទូត មិនលើកឡើងពីអ៊ុយក្រែន ឬបញ្ហានយោបាយ និងសន្តិសុខផ្សេងទៀតឡើយ។ ទន្ទឹមនឹងនេះ រដ្ឋមន្ត្រីការបរទេសរុស្ស៊ី លោក Sergey Lavrov បានសង្កត់ធ្ងន់ថា កិច្ចពិភាក្សានឹងផ្តោតលើការបង្កើតលក្ខខណ្ឌល្អប្រសើរសម្រាប់អ្នកការទូតរុស្ស៊ីនៅអាមេរិក ក៏ដូចជាអ្នកការទូតអាមេរិកប្រចាំប្រទេសរុស្ស៊ី បន្ទាប់ពីការបណ្តេញបុគ្គលិកស្ថានរបស់ទូតគ្នាទៅវិញទៅមកជាបន្តបន្ទាប់។
កាលពីមុន ក្នុងអំឡុងពេលរដ្ឋបាលរបស់អតីតប្រធានាធិបតីអាមេរិក លោក Joe Biden ប្រទេសទាំងពីរបានបណ្តេញបុគ្គលិកស្ថានទូតរបស់គ្នាទៅវិញទៅមក ដែលបណ្តាលឱ្យទំនាក់ទំនងទ្វេភាគី “ធ្លាក់ដល់បាត”៕