ທ່ານເລຂາທິການໃຫຍ່ ໂຕເລິມ ເຂົ້າຮ່ວມການຖະແຫຼງຂ່າວສາກົນ ແລະ ຊົມເຊີຍບັນດານັກຂ່າວ

ເມື່ອກ່າວຄຳເຫັນຊົມເຊີຍ, ທ່ານເລຂາທິການໃຫຍ່ ໂຕເລິມ ຢັ້ງຢືນວ່າ ກອງປະຊຸມໃຫຍ່ຄັ້ງທີ XIV ຂອງພັກໄດ້ປະສົບຜົນສຳເລັດຢ່າງຈົບງາມ. ນີ້ແມ່ນຂີດໝາຍສຳຄັນໃນປະຫວັດສາດຂອງພັກກອມມູນິດ ຫວຽດນາມ ແລະ ມູນເຊື້ອຂອງຊາດ ຫວຽດນາມ ວິລະຊົນແຫ່ງອະລິຍະທຳນັບພັນປີ.

ບັນຍາກາດການຖະແຫຼງຂ່າວ (ພາບ: VOV)

        ທ່ານເລຂາທິການໃຫຍ່ ໂຕເລິມ ໃຫ້ຮູ້ວ່າ ບັນດາຈຸດໃໝ່ຂອງກອງປະຊຸມໃຫຍ່ລ້ວນແຕ່ອີງໃສ່ການສືບທອດ, ສະຫຼຸບບັນດາບົດຮຽນໃນປະຫວັດສາດແຫ່ງການສ້າງສາ, ປັກປັກຮັກສາປະເທດຊາດ ແລະ ເກືອບ 100 ປີພາຍໃຕ້ການຊີ້ນຳນຳພາຂອງພັກ, ການສືບຕໍ່ຂອງວິວັດທະນາການປ່ຽນແປງໃໝ່ ເຊິ່ງພັກກອມມູນິດ ຫວຽດນາມ ໄດ້ລິເລີ່ມ ແລະ ປະຕິບັດ. ທ່ານກ່າວວ່າ:

        “ຄຳຮຽກຮ້ອງພັດທະນາໃໝ່ຮຽກຮ້ອງໃຫ້ມີຈິນຕະນາການໃໝ່, ວິທີເຮັດໃໝ່. ພາລະກິດປ່ຽນແປງໃໝ່ຂອງພັກຕ້ອງເຮັດຢ່າງຕໍ່ເນື່ອງ. ກອງປະຊຸມໃຫຍ່ຄັ້ງທີ XIV ຈັດຂຶ້ນໃນສະພາບການປະຫວັດສາດສຳຄັນ, ຮຽກຮ້ອງໃຫ້ມີວິໄສທັດໃໝ່, ບໍ່ພຽງແຕ່ໃນສະໄໝນີ້ເທົ່ານັ້ນ ຫາກຍັງບືນຕົວຂຶ້ນວິໄສທັດຮອດປີ 2045 ອີກດ້ວຍ. ພ້ອມດຽວກັນນັ້ນ ຮອດປີ 2031, ເມື່ອສິ້ນສຸດສະໄໝກອງປະຊຸມໃຫຍ່ ຄັ້ງທີ XIV ຕ້ອງສະຫຼຸບໂຄງການການເມືອງເພື່ອຄົ້ນຄວ້າສ້າງໂຄງການການເມືອງໃໝ່ ແນໃສ່ສອດຄ່ອງກັບສະພາບການໃໝ່. ຄວາມຕ້ອງການພັດທະນາຂອງ ຫວຽດນາມ ໃນໄລຍະນີ້ແມ່ນຕ້ອງໄວ, ມີປະສິດທິຜົນ, ຕັ້ງໜ້າ, ສະນັ້ນ ຕ້ອງສ້າງຮູບແບບພັດທະນາໃຫ້ເໝາະສົມ.”

ທ່ານເລຂາທິການໃຫຍ່ ໂຕເລິມ ເປັນປະທານການຖະແຫຼງຂ່າວ (ພາບ: VGP)

        ກ່ຽວກັບການພົວພັນຕ່າງປະເທດ, ທ່ານເລຂາທິການໃຫຍ່ໃຫ້ຮູ້ວ່າ ເອກະສານກອງປະຊຸມໃຫຍ່ຄັ້ງທີ XIV ຂອງພັກ ໄດ້ຍົກລະດັບບົດບາດຂອງການພົວພັນຕ່າງປະເທດຂຶ້ນລະດັບສຳຄັນໃໝ່, ທຽບເທົ່າກັບການປ້ອງກັນຊາດ, ປ້ອງກັນຄວາມສະຫງົບ.

ນັກຂ່າວພາຍໃນ ແລະ ຕ່າງປະເທດເຂົ້າຮ່ວມການຖະແຫຼງຂ່າວ (ພາບ: daihoidangtoanquoc.vn)

“ພວກຂ້າພະເຈົ້າກຳນົດວ່າ ໃນສະພາບການປັດຈຸບັນ, ບັນດາປະເທດເຖິງວ່າໃຫຍ່ ຫຼື ນ້ອຍ ລ້ວນແຕ່ມີຄວາມຮັບຜິດຊອບລວມຕໍ່ກັບບັນຫາທົ່ວໂລກ, ຂ້າມຊາຍແດນເຊັ່ນ: ໄພພິບັດທຳມະຊາດ, ໂລກລະບາດ, ຄວາມປອດໄພທາງເຊີເບີ, ສົງຄາມ… ບໍ່ມີປະເທດໃດ, ເຖິງວ່າເປັນປະເທດຮຸ່ງເຮືອງເຂັ້ມແຂງແນວໃດ ກໍບໍ່ສາມາດແກ້ໄຂບັນດາບັນຫາໃຫຍ່ເຫຼົ່ານັ້ນ ດ້ວຍຕົນເອງໄດ້, ຫາກຕ້ອງມີການຮ່ວມແຮງຮ່ວມໃຈຂອງສາກົນ ຈຶ່ງສາມາດແກ້ໄຂໄດ້. ຫວຽດນາມ ຈະສືບຕໍ່ຮ່ວມແຮງຮ່ວມໃຈພ້ອມກັບບັນດາກົນໄກຫຼາຍຝ່າຍ; ສ້າງສັນຕິພາບສາກົນ, ຊ່ວຍເຫຼືອມະນຸດສະທຳ, ຮັກສາສັນຕິພາບ, ປະກອບສ່ວນຫຼາຍກວ່າອີກເຂົ້າໃນການເປັນກາງ ແລະ ເປັນຂົວຕໍ່ເພື່ອສ້າງສັນຕິພາບ”.