2 ຜົວເມຍລຸງ ໂງຖ້ຽນເຮີ້ນ
|
“ ຕະຫຼອດ 60 ປີມານີ້, ຍາມໃດພວກຂ້າພະເຈົ້າກໍມີຄວາມເປັນຫ່ວງ ແລະ ຄິດຮອດຄິດເຖິງ ບ້ານເກີດເມືອງນອນ, ປະເທດຊາດ. ເພາະສະນັ້ນພວກ ຂ້າພະເຈົ້າໄດ້ຮັກສາສັນຊາດຫວຽດນາມ ເພື່ອຈະກັບເມືອຫວຽດນາມເມືອ່ມີເງື່ອນ ໄຂສະດວກ ”. ນັ້ນແມ່ນຄວາມໃນໃຈ ແລະ ຄວາມມຸ່ງຫວັງຂອງຜົວເມຍລຸງ ໂງຖ້ຽນເຮີ້ນ ອາຍຸ 79 ປີ, ປະຈຸບັນພວມດຳລົງຊີວິດ ແລະ ເຮັດວຽກຢູ່ນະຄອນ Toulouse ທາງພາກໃຕ້ຝະລັ່ງ. ໃນໄລຍະທຳອິດຢູ່ຝະລັ່ງ, ລຸງແມ່ນອ້າຍຄູ ແຕ່ເພິ່ນພັດສົນໃຈກັບອາຊີບກະຈາຍສຽງ ແລະ ໃນ ກ່ວາ 30 ປີທີ່ຜ່ານມາ, ຄອບຄົວຂອງລຸງ ໂງຖ້ຽນເຮີ້ນ ໄດ້ເຮັດວຽກງານທີ່ມີຄວາມໝາຍ ນັ້ນແມ່ນໄດ້ພ້ອມກັບບັນດາຜູ້ຄົນຊາວຝະລັ່ງຮູ້ພາສາຫວຽດນາມ ສ້າງ ແລະ ຂະຫຍາຍລາຍການລາຍການກະຈາຍສຽງເປັນພາສາຫວຽດເພື່ອຮັບໃຊ້ພໍ່ແມ່ພີນ້ອງຊາວຫວຽດນາມອາໄສຢູ່ຝະລັ່ງ.
ໂດຍໄດ້ກຳເນີດ ແລະ ໃຫຍ່ຂຶ້ນຢູ່ແຂວງ ຊອກຈັງ, ແລ້ວໄປຮຽນຢູ່ຝະລັ່ງແຕ່ຄາວຍັງນ້ອຍ ແລະ ໄດ້ຕົກລົງດຳລົງຊີວິດຢູ່ຝະລັ່ງ ແລະ ໄດ້ກາຍເປັນຄູສອນເພື່ອຫາເງິນລ້ຽງຊີບ. ລຸງ ໂງຖ້ຽນເຮີ້ນ ໄດ້ເຂົ້າຮ່ວມຂະບວນການຕ້ານຝະລັ່ງ ແລະ ອາເມລິກາຮຸກຮານຫວຽດນາມຢູ່ຝະລັ່ງພ້ອມກັບພວກເພື່ອນໃນສະມາຄົມຊາວຫວຽດນາມອາໄສຢູ່ຕ່າງປະເທດ ຈົນເຖິງວັນປະເທດຊາດຍາດເອົາເອກະລາດ. ລຸງ ໂງຖ້ຽນເຮີ້ນ ເລົ່າຄືນສູ່ຟັງວ່າ :
“ ປີ 1975 ພາກໃຕ້ຫວຽດນາມໄດ້ຮັບການປົດປ່ອຍ. ແຕ່ປີ 1973, ກະຊວງສຶກສາຝະລັ່ງໄດ້ແຈ້ງໃຫ້ຊາບວ່າ ຕ້ອງຖືສັນຊາດຝະລັ່ງ, ຖ້າບໍ່ດັ່ງນັ້ນ,ຈະບໍ່ມີວຽກເຮັດງານທຳ. ນັບແຕ່ເວລານັ້ນ, ຂ້າພະເຈົ້າໄດ້ກະກຽມປະລະອາຊີບເປັນອ້າຍຄູເພື່ອຮັກສາສັນຊາດຫວຽດນາມ. ຊ່ວງເວລານັ້ນ, ເລື່ອງຮັກສາສັນຊາດຫວຽດນາມ ແມ່ນການຮັກສານ້ຳໃຈຈົງຮັກພັກດີກັບປະຊາຊົນຢູ່ພາຍໃນປະເທດ”
ປີ1981, ອຳນາດການປົກຄອງຝະລັ່ງ ໄດ້ອະນຸຍາດໃຫ້ສ້າງຕັ້ງວິທະຍຸເສລີບາງແຫ່ງ. ປີ 1982, ໂດຍໄດ້ຮັບການຊ່ວຍເຫຼືອຈາກເພື່ອນມິດຝະລັ່ງ, ວິທະຍຸກະຈາຍສຽງແຫ່ງໜຶ່ງຂອງເຂດ Toulouse ແລະ ເຂດໃກ້ຄຽງທີ່ສະຫງວນໃຫ້ແກ່ຊາວຫວຽດນາມອາໄສຢູ່ທີ່ນີ້ໄດ້ຮັບການສ້າງຕັ້ງຂຶ້ນ. ຄິດວ່າວຽກງານທຸກຢ່າງຈະດຳເນີນໄປດ້ວຍດີ, ແຕ່ພາຍຫຼັງເຄື່ອນໄຫວເປັນເວລາພຽງສັ້ນໆເທົ່ານັ້ນ, ລາຍການກະຈາຍສຽງ ໄດ້ປະເຊີນໜ້າຄວາມທົດສອບຫຼາຍຢ່າງ. ລຸງ ໂງຖ້ຽນເຮີ້ນ ເລົ່າຄືນສູ່ຟັງວ່າ :
“ ພາຍຫຼັງ ກ່ວາ 1 ປີ, ບັນດາຜູ້ເປັນໂຄສົກ, ນັກຂ່າວຕ້ອງໄປທຳມາຫາກິນຢູ່ບ່ອນອື່ນ, ມີບາງຄົນໄປອາເມລິກາ, ບາງຄົນຍ້າຍໄປຢູ່ປາຣີ, ບາງຄົນກໍສ້າງຄອບຄອບ... ຄາວນັ້ນ ຍັງເຫຼືອແຕ່ຂ້າພະເຈົ້າ ຢູ່ວິທະຍຸກະຈາຍສຽງເທົ່ານັ້ນ. ຂ້າພະເຈົ້າໄດ້ຕັດສິນໃຈຮັກສາການເຄື່ອນໄຫວຂອງ ວິທະຍຸກະຈາຍສຽງເພາະວ່າ ມີພຽງແຕ່ວິທະຍຸກະຈາຍສຽງແຫ່ງນີ້ອອກອາກາດເປັນພາສາຫວຽດເທົ່ານັ້ນ ”
ແລະ ນັບແຕ່ນັ້ນເປັນຕົ້ນມາ, ລຸງ ໂງຖ້ຽນເຮີ້ນ ໄດ້ກາຍເປັນຜູ້ບັນນາທິການທັງເປັນໂຄສົກຂອງ ວິທະຍຸກະຈາຍສຽງແຫ່ງນີ້ ເພື່ອຮັບໃຊ້ເປົ້າໝາຍຜູ້ຟັງແມ່ນຊາວຫວຽດນາມອາໄສຢູ່ທີ່ນີ້, ພວກກຳມະກອນດຳລົງຊີວິດຢູ່ Toulouse ແຕ່ບໍ່ໄດ້ຮັບຊາບຂ່າວຄາວກ່ຽວກັບຫວຽດນາມ ແລະ ບັນດາຜູ້ຫາກໍມາຝະລັ່ງເປັນຕົ້ນ. ລຸງ ໂງຖ້ຽນເຮີ້ນ ໃຫ້ຮູ້ວ່າ
“ ໃນເບື້ອງຕົ້ນ, ຢາກມີລາຍການຂ່າວເພືອ່ອອກອາກາດນັ້ນ, ຂ້າພະເຈົ້າຕ້ອງຕິດຕາມຟັງວິທະຍຸເພື່ອເອົາຂ່າວ. ໄລຍະທຳອິດແມ່ນຫຍຸ້ງຍາກຫຼາຍ, ແຕ່ໃນໄລຍະຕໍ່ມາ, ໄດ້ມີລະບົບ ອິນເຕີເນັດ ດັ່ງນັ້ນກໍມີຄວາມສະດວກຫຼາຍຢ່າງ ” .