(vovworld) – 4 ລະດູຢູ່ ຮ່າໂນ້ຍ ລ້ວນແຕ່ມີຈຸດທີ່ເປັນເອກະລັກສະເພາະ ແລະ ດຶງດູດໃຈ, ແຕ່ສຳລັບຜູ້ທີ່ດຳລົງຊີວິດຢູ່ຮ່າໂນ້ຍ ຫລື ມາຢ້ຽມຢາມນະຄອນຫລວງ ຮ່າໂນ້ຍແລ້ວ, ລະດູໃບໄມ້ຫລົ່ນແມ່ນລະດູສວຍງາມທີ່ສຸດໃນປີ. ແລະ ເມື່ອເວົ້າເຖິງລະດູໃບໄມ້ຫລົ່ນຢູ່ຮ່າໂນ້ຍ ຜູ້ຄົນທັງຫລາຍລ້ວນແຕ່ຄິດເຖິງດອກຕີນເປັດ. ບໍ່ຮູ້ຈັກວ່ານັບແຕ່ເວລາໃດ ລະດູໃບໄມ້ຫລົ່ນຢູ່ ຮ່າໂນ້ຍ ແລະ ດອກຕີນເປັດ ຕິດພັນນຳກັນ. ດອກຕີນເປັດກາຍເປັນສ່ວນຫນຶ່ງຂອງຮ່າໂນ້ຍ ແລະ ໃກ້ຊິດກັບປະຊາຊົນທຸກຄົນ. ຮອດທ້າຍລະດູໃບໄມ້ຫລົ່ນເມື່ອມີລົມພັດມາຄອ່ຍໆ ກໍ່ເຮັດໃຫ້ອາກາດເລີ່ມຫນາວ ແລະ ຈຸດເວລານີ້ ດອກຕີນເປັດຍິ່ງສົ່ງກີ່ນຫອມຫລາຍກວ່າ.
ດອກຕີນເປັດຢູ່ ຮ່າໂນ້ຍ
|
ບໍ່ສວຍງາມຄືດັ່ງດອກຄາຍ, ດອກຝາງ ຫລື ດອກໄມ້ຊະນິດຕ່າງໆ… ດອກຕີນເປັດ ພຽງມີສີຂາວ ແລະ ກ້ານນ້ອຍໆ ແຕ່ກີ່ນຫອມຂອງດອກຕີນເປັດແມ່ນສ້າງຄວາມປະທັບໃຈທີ່ສຸດ. ໃນໄລຍະທ້າຍລະດູໃບໄມ້ຫລົ່ນ, ຕົ້ນລະດູຫນາວ ຢູ່ ຕາມຖະຫນົນສາຍຕ່າງໃນ ຮ່າໂນ້ຍ ຄື: ກວາງຈູງ, ຫງວຽນຢູ, ກວານແທງ, ຖູ້ຍເຄ… ກີ່ນຫອມຫວນຂອງດອກຕີນເປັດຍາມໃດກໍເຮັດໃຫ້ຊາວນະຄອນຫລວງ ຮ່າໂນ້ຍ ກໍຄືແຂກມາຈາກທຸກສາລະທິດບໍ່ອາດຫລົງລືມໄດ້. ອ້າຍ ເລຕຸງເຢືອງ, ຢູ່ ຖະຫນົນ ຖູ້ຍເຄ ຮ່າໂນ້ຍ ໃຫ້ຮູ້ວ່າ:
“ເມື່ອເວົ້າເຖິງດອກຕີນເປັດ ແມ່ນຄິດເຖິງອາກາດເຢັນສະບາຍຂອງລະດູໃບໄມ້ຫລົ່ນຢູ່ ຮ່າໂນ້ຍ. ພິເສດ ເມື່ອຍ່າງຫລິ້ນຢູ່ແຄມຫນອງໃນຍາມຕອນແລງ, ຕອນຄ່ຳ, ກີ່ນຫອມຫວນຂອງດອກຕີນເປັດແມ່ນສິ່ງທີ່ບໍ່ອາດຫລົງລືມໄດ້. ເຖິງວ່າ ອາກາດມີການປ່ຽນແປງ ຫລື ຕຶກອາຄານຊັ້ນສູງຫລາຍຫລັງໄດ້ຮັບການກໍ່ສ້າງກໍຕາມ ແຕ່ກີ່ນຫອມຫວນຂອງດອກຕີນເປັດໃນລະດູໃບໄມ້ຫລົ່ນຢູ່ຮ່າໂນ້ຍ ບໍ່ປ່ຽນແປງແຕ່ຢ່າງໃດ. ກີ່ນຫອມຂອງດອກຕີນເປັດປຽບເໝືອນນ້ຳຫອມປະເພດຫນຶ່ງ.”
ສຳລັບຊາວຮ່າໂນ້ຍ ທີ່ຫ່າງໄກເຂດດິນແດນນີ້ໃນຫລາຍປີແລ້ວ, ກີ່ນຫອມຂອງດອກຕີນເປັດ ຍາມໃດກໍຝັງເລິກໃນໃຈ ແລະ ເວົ້າເຖິງອະນຸສອນຫລາຍຢ່າງໃນລະດູໃບໄມ້ຫລົ່ນ. ເພື່ອນ ຮ່ວາງແອງ, ນັກສຶກສາພວມຮ່ຳຮຽນຢູ່ ສ.ເກົາຫລີ ໄດ້ແບ່ງປັນວ່າ:
“ໃນຄາວເປັນນັກສຶກສາຢູ່ ຮ່າໂນ້ຍ, ເມື່ອລະດູໃບໄມ້ຫລົ່ນວຽນມາ ແລະ ດອກຕີນເປັດໄດ້ເບັ່ງບານສົ່ງກີ່ນຫອມຫວນ ເຮັດໃຫ້ຂ້າພະເຈົ້າມີຄວາມຮູ້ສຶກພິເສດ. ປະຈຸບັນ ຂ້າພະເຈົ້າພວມຮ່ຳຮຽນຢູ່ຕ່າງປະເທດ ສະນັ້ນ 3 ລະດູໃບໄມ້ຫລົ່ນແລ້ວຂ້າພະເຈົ້າບໍ່ໄດ້ສູບອາກາດປອດໂປ່ງ ແລະ ບໍ່ໄດ້ດົມກີນຫອມຫວນຂອງດອກຕີນເປັດ. ຂ້າພະເຈົ້າຄິດຮອດຮ່າໂນ້ຍ ແລະ ຄິດເຖິງບັນດາອະນຸສອນໃນລະດູໃບໄມ້ຫລົ່ນຫລາຍ.”
ດອກຕີນເປັດແມ່ນສັນຍາລັກຂອງລະດູໃບໄມ້ຫລົ່ນຢູ່ຮ່າໂນ້ຍ ແລະ ກາຍເປັນແຫລ່ງທີ່ດຶງດູດການປະດິດແຕ່ງຂອງນັກກະວີ, ນັກດົນຕີ, ນັກປະພັນຫລາຍຄົນ. ພິເສດ ແມ່ນບົດເພງ “ດອກຕີນເປັດຂອງ ນັກດົນຕີ ຮົ່ງດັງ ແຕ່ງເມື່ອປີ 1978 ແມ່ນບົດເພງທີ່ສ້າງຄວາມປະທັບໃຈທີ່ສຸດ. ມາຮອດປະຈຸບັນ ບົດເພງນີ້ຍັງສືບຕໍ່ໄດ້ຮັບຄວາມນິຍົມຊົມຊອບຈາກຜູ້ຟັງເປັນຈຳນວນຫລວງຫລາຍ.
ດອກຕີນເປັດໃນຖະຫນົນສາຍຕ່າງໆຢູ່ຮ່າໂນ້ຍ
|
ເມື່ອແບ່ງປັນກ່ຽວກັບບົດເພງ “ດອກຕີນເປັດ” ຂອງຕົນ, ນັກດົນຕີ ຮົ່ງດັງ ໃຫ້ຮູ້ວ່າ:
“ບົດເພງ ດອກຕີນເປັດ ແມ່ນເວົ້າເຖິງ ຄວາມຮັກຕໍ່ນະຄອນຫລວງ ຮ່າໂນ້ຍ, ຄວາມຮັກລະຫວ່າງມະນຸດ ກັບ ທຳມະຊາດ. ເຖິງວ່າ ຂ້າພະເຈົ້າບໍ່ໄດ້ກຳເນີດຢູ່ ນະຄອນຫລວງຮ່າໂນ້ຍກໍຕາມ, ແຕ່ເມື່ອມາດຳລົງຊີວິດຢູ່ເຂດດິນນີ້ແລ້ວ, ຄວາມງາມຂອງລະດູໃບໄມ້ຫລົ່ນ, ກີ່ນຫອມຫວນຂອງດອກຕີນເປັດ, ຄວາມຮັກແພງ ແລະ ສຸພາບຮຽບຮ້ອຍຂອງຊາວຮ່າໂນ້ຍ ແມ່ນສິ່ງທີ່ດຶງດູດໃຫ້ຂ້າພະເຈົ້າປະດິດແຕ່ງບົດເພງດັ່ງກ່າວຂຶ້ນ.”
ກີ່ນຫອມຫວນຂອງດອກຕີນເປັດບໍ່ພຽງແຕ່ຈະມີຢູ່ຮ່າໂນ້ຍເທົ່ານັ້ນ, ແຕ່ ເມື່ອໄດ້ດົມກີ່ນຫອມຫວນຂອງດອກຕີນເປັດບໍ່ວ່າຈະຢູ່ແຂວງ ຫລື ນະຄອນໃດແລ້ວກໍ່ຕາມ ຫລາຍຄົນກໍ່ລ້ວນແຕ່ຄິດເຖິງ ຮ່າໂນ້ຍ, ຄິດເຖິງຖະຫນົນສາຍຕ່າງໆທີ່ເຕັມໄປດ້ວຍກີ່ນຫອມຫວນຂອງດອກຕີນເປັດ, ຄິດຮອດອາກາດຫນາວໃນຍາມຄ່ຳຄືນ ແລະ ບັນດາເຍື່ອງອາຫານສະເພາະໃນລະດູໃບໄມ້ຫລົ່ນ.