(vovworld) – ບັນດາຜູ້ນິຍົມປື້ມຢູ່ຮ່າໂນ້ຍສາມາດໄດ້ອ່ານປື້ມກວ່າ 15.000 ຫົວຢ່າງສະບາຍ ໃນວັນບຸນອ່ານປື້ມໂດຍບໍ່ຕ້ອງເສຍຄ່າ. ດ້ວຍຄວາມຫວັງຢາກຍົກສູງວັດທະນະທຳອ່ານປື້ມ, ພ້ອມທັງສະເຫຼີມສະຫຼອງວັນບຸນອ່ານປື້ມຄັ້ງທີ 5 ຄືວັນທີ 23/4. “ວັນບຸນອ່ານປື້ມບໍ່ຕ້ອງເສຍຄ່າ“ ໂດຍບໍລິສັດປື້ມ ທ໋າຍຮ່າ ຈັດຕັ້ງຢູ່ສູນການຄ້າ Indochina Plaza, ຮ່າໂນ້ຍ. ລາຍການໄດ້ດຶງດູດພວກເພື່ອນໜຸ່ມມາອ່ານເປັນຈຳນວນຫຼວງຫຼາຍ.
ວັນບຸນອ່ານປື້ມ
(ພາບ: ອິນເຕີແນດ)
ໃນບໍລິເວນກວ້າງຂວາງ ແລະ ປອດໂປ່ງຂອງສູນການຄ້າ Indochina Plaza ບົນຖະໜົນ ຊວນຖູຍ, ຈຳນວນຜູ້ເຂົ້າອ່ານກໍ່ຫຼາຍກວ່າມື້ທຳມະດາ. ໂດຍໄດ້ຮັບການຈັດຕັ້ງຢູ່ມໍ່ກັບມະຫາວິທະຍາໄລໃຫຍ່ຫຼາຍແຫ່ງຄື: ມະຫາວິທະຍາໄລສ້າງຄູ, ມະຫາວິທະຍາໄລການຄ້າ, ມະຫາວິທະຍາໄລສ້າງຄູພາສາຕ່າງປະເທດ… ດັ່ງນັ້ນຜູ້ມາອ່ານໃນວັນບຸນສ່ວນຫຼາຍແມ່ນນັກສຶກສາ. ຫງວຽນຮົ່ງເຖິມ, ນັກສຶກສາມະຫາວິທະຍາໄລ ຊັບພະວິຊາ, ໃຫ້ຮູ້ວ່າ:
“ໂດຍແມ່ນນັກສຶກສາຜູ້ໜຶ່ງ, ຂ້າພະເຈົ້າເຫັນວ່ານີ້ແມ່ນໂອກາດເພື່ອພົບປະແລກປ່ຽນກັບໝູ່ເພື່ອນ, ໄດ້ອ່ານປື້ມຫຼາຍຈະມີຄວາມຮູ້ຫຼາຍ. ຂ້າພະເຈົ້າມັກປື້ມຫົວນີ້ຫຼາຍ ແລະ ຈະເລືອກຊື້ເພື່ອມອບໃຫ້ເພື່ອນ. ປື້ມ ຫົວນີ້ເວົ້າເຖິງການປະພຶດຕໍ່ຂອງຜູ້ບໍລິຫານ, ການພົວພັນລະຫວ່າງຂັ້ນເທິງກັບພະນັກງານ ແລະ ຜູ້ຮ່ວມອາຊີບນຳກັນ. ຂ້າພະເຈົ້າຄິດວ່າ, ມັນມີຄວາມຈຳເປັນສຳລັບພວກຂ້າພະເຈົ້າໃນປະຈຸບັນ“.
ວັນບຸນອ່ານປື້ມແມ່ນໂອກາດເພື່ອພົບປະແລກປ່ຽນ
(ພາບ: ອິນເຕີແນດ)
ດ້ວຍປື້ມກວ່າ 15.000 ຫົວໃນງານບຸນນີ້, ມີປື້ມຫຼາຍຫົວຂາຍຫຼຸດລາຄາເຖິງ 30%, ປື້ມສ່ວນຫຼາຍແມ່ນມີລາຄາແຕ່ 5000 ເຖິງ 35.000 ດົ່ງ. ເລືອງແທງຮ່ວຽນ, ນັກສຶກສາສະຖາບັນໂຄສະນາຂ່າວສານ, ໃຫ້ຮູ້ວ່າ:
“ນີ້ແມ່ນຄັ້ງທຳອິດທີ່ນ້ອງເຂົ້າຮ່ວມວັນບຸນອ່ານປື້ມຄືແນວນີ້. ນ້ອງຄິດວ່ານີ້ແມ່ນວິທີເພື່ອໂຄສະນາປື້ມດີທີ່ສຸດ ແລະ ສົ່ງເສີມທຸກຄົນຈົ່ງມີຄວາມນິຍົມອ່ານປື້ມໃຫ້ຫຼາຍກວ່າ ນີ້ກໍ່ແມ່ນໂອກາດເພື່ອຊອກຫາປື້ມທີ່ມ່ວນໆອີກ. ຍ້ອນລາຄາປື້ມຫຼຸດລົງ, ຜູ້ອ່ານຈະຊື້ປື້ມໄດ້ຫຼາຍກວ່າ. ນ້ອງເລືອກປື້ມໄດ້ 1, 2 ຫົວແລ້ວ ແຕ່ຄິດວ່າຈະຊື້ຕື່ມ. ລາຄາປື້ມຄືແນວນີ້ແມ່ນເໝາະສົມກັບນັກສຶກສາ“.
ພວກນ້ອງນັກຮຽນເມົາມົວອ່ານປື້ມ
(ພາບ: ອິນເຕີແນດ)
ວັນບຸນປື້ມຍັງດືງດູດນັກສຶກສາຕ່າງປະເທດມາຮ່ວມເປັນຈຳນວນຫຼວງຫລາຍ. ມີຫຼາຍຄົນຮູ້ສຶກຕົກສະເງີ້, ເມື່ອເຫັນລາຄາປື້ມຫຼຸດລົງຄືແນວນັ້ນ. ກິມເຕຮຸນ, ນັກສຶກສາຊາວ ສເກົາຫຼີ ໄດ້ເລືອກຊື້ປື້ມນິທານຫວຽດນາມ ບາງຫົວ.
“ຂ້າພະເຈົ້າຍັງບໍ່ທັນຮູ້ແຈ້ງເນື້ອໃນປື້ມເຫຼົ່ານັ້ນ. ແຕ່ນີ້ແມ່ນປື້ມທີ່ອ່ານງ່າຍສຳລັບຜູ້ຮຽນພາສາຫວຽດນາມຄືຂ້າພະເຈົ້າ. ຜ່ານປື້ມເຫຼົ່ານີ້, ຂ້າພະເຈົ້າສາມາດຮູ້ຕື່ມກ່ຽວກັບປະຫວັດສາດ ແລະ ວັດທະນະທຳຂອງຫວຽດນາມ“
ບໍລິເວນອ່ານປື້ມຖືກຈັດວາງຢ່າງລະອຽດລະອໍ, ອັນໄດ້ດຶງດູດຫຼາຍຄົນແວ່ຢາມ. ເອື້ອຍ ຫງວຽນກ່ຽວເວີນ, ຜູ້ນິຍົມວັດທະນະທຳອ່ານຜູ້ໜຶ່ງ, ເວົ້າວ່າ:
“ຂ້າພະເຈົ້າຄິດວ່າຄວນຈັດວາງປື້ມຄືແນວນີ້ ມັນຈະສ້າງຄວາມສະດວກໃຫ້ແກ່ຜູ້ອ່ານ. ປະຈຸບັນມີຫຼາຍຄົນມັກອ່ານປື້ມ, ແຕ່ເຂົາເຈົ້າບໍ່ມີເວລາເພື່ອໄປຊື້ປື້ມ, ອ່ານປື້ມທາງອິນເຕີແນດກໍ່ມັກ, ແຕ່ເມື່ອໄດ້ກຳມະສິດປື້ມມັນກໍ່ດີກວ່າ“
ວັນບຸນອ່ານປື້ມດຳເນີນໄປຢ່າງຟົດຟື້ນ
(ພາບ: ອິນເຕີແນດ)
ໃນ 4 ມື້ແຫ່ງ “ວັນບຸນອ່ານປື້ມໂດຍບໍ່ຕ້ອງເສຍຄ່າ“ ນັ້ນ, ພາລະກອນຂອງບໍລິສັດປື້ມ ທ້າຍຫ່າ ຮູ້ສຶກດີໃຈຫຼາຍ ເມື່ອເຫັນວ່າຜູ້ອ່ານມີຄວາມຖະນຸຖະໜອມ ແລະ ນິຍົມປື້ມຫຼາຍ.
ໃນຂອບເຂດ “ວັນບຸນອ່ານປື້ມໂດຍບໍ່ຕ້ອງເສຍຄ່າ“, ບໍລິສັດປື້ມ ທ້າຍຫ່າ ໄດ້ປຸກລະດົມລາຍການ “ບໍລິຈາກກຸສົນ, ເພື່ອກໍ່ສ້າງຕູ້ປື້ມໃນເຂດຊົນນະບົດ“. ພິເສດແມ່ນລາຍການ “ປື້ມແລກເອົາປື້ມ“. ທຸກຄົນທີ່ເຂົ້າຮ່ວມການບໍລິຈາກກຸສົນນີ້ ລ້ວນແຕ່ໄດ້ຮັບປື້ມເອເລກໂຕນິກຫົວໜຶ່ງຈາກລະບົບປື້ມເອເລກໂຕນິກ Alezaa.