ມານະພະຍາຍາມຍົກເລີກບັດເຫລືອງຂອງ EC (ພາບ: TTXVN)

ທີ່ກອງປະຊຸມຕີລາຄາ 2 ປີແຫ່ງການຜັນຂະຫຍາຍໂຄງການ “ວິສາຫະກິດເຮັດທຸລະກິດສິນທະເລ ໄດ້ມີຄຳໝັ້ນສັນຍາຕ້ານການຂຸດຄົ້ນ IUU ດຳເນີນໄປແຕ່ວັນທີ 25 ກັນຍາ ຢູ່ ນະຄອນ ໂຮ່ຈິມີນ ການນຳກະຊວງກະສິກຳ ແລະ ພັດທະນາຊົນນະບົດ ໄດ້ຢືນຢັນວ່າ ໝາກຜົນຕັ້ງຫນ້າທີ່ສຸດ ນັ້ນແມ່ນ ຊາວປະມົງ ບໍ່ລະເມີດເຂດຂຸດຄົ້ນທີ່ຂຶ້ນກັບໄຫລ່ທະວີບ ຂຶ້ນກັບບັນດາປະເທດບ້ານໃກ້ເຮືອນຄຽງ, ນັບມື້ນັບເປັນເຈົ້າການບັນທຶກໄລຍະທາງການຫາສິນທະເລ, ປະກອບອຸປະກອນຕິດຕາມການຫາສິນທະເລ ແລະ … ກຳປັ່ນຫາປາ.

ຢູ່ ແຂວງ ກຽນຢາງ ຊື່ງແມ່ນຫນຶ່ງໃນບັນດາທ້ອງຖິ່ນແຄມທະເລຖືກຜົນສະທ້ອນຢ່າງຫນັກຫນ່ວງກວ່າໝູ່ຈາກ ບັດເຫລືອງ ຂອງ ເອີລົບ ນັບແຕ່ເມື່ອກົດໝາຍວ່າດ້ວຍສິນໃນນ້ຳປີ 2019, ດຳລັດເລກທີ 26 ແລະ ດຳລັດ ເລກທີ 42 ພ້ອມກັບັນດາເອກະສານແນະນຳປະຕິບັດເລີ່ມມີຜົນສັກສິດນັບແຕ່ຕົ້ນປີ, ແຂວງ ໄດ້ເພີ່ມທະວີການຕິດຕັ້ງອຸປະກອນຕິດຕາມການຫາສິນທະເລ, ເຊື່ອມຈອດກັບປ້ອມຕິດຕາມຢູ່ແຄມຝັ່ງ ເພື່ອຄຸ້ມຄອງບັນດາພາຫະນະອອກຝັ່ງ. ມາຮອດທ້າຍເດືອນກັນຍາ ທົ່ວແຂວງ ມີກຳປັ່ນກວ່າ 2900 ລຳໄດ້ຕິດຕັ້ງອຸປະກອນຕິດຕາມ, 92,5% ກຳປັ່ນຫາປາ ມີລວງຍາວ 24 ແມັດຂຶ້ນໄປໄດ້ຕິດຕັ້ງອຸປະກອນຕິດຕາມແລ້ວ. ພິເສດ ຄວາມຮັບຮູ້ຂອງຊາວປະມົງຕໍ່ຄວາມສຳຄັນ ຂອງບັນຫານີ້ກໍ່ໄດ້ເພີ່ມຂຶ້ນຢ່າງເຫັນໄດ້ຊັດ. ອ້າຍ ຫງວຽນແທງຄຽດ ລູກເຮືອຂອງກຳປັ່ນຫາປານອກຝັ່ງ ຢູ່ ກຽນຢາງໃຫ້ຮູ້ວ່າ:
“ຊາວປະມົງເມື່ອໄປຫາປາຢູ່ນອກຝັ່ງຕ້ອງຕິດຕັ້ງອຸປະກອນຕິດຕາມ ຮັບປະກັນຄວາມປອດໄພໃນການທຳມາຫາກິນ ຫລີກລ້ຽງການລະເມີດເຂດທະເລຕ່າງປະເທດ. ນອກນັ້ນ ບັນທຶກໄລຍະທາງຫາປາອີກເພື່ອລາຍງານຕໍ່ພະນັກງານຄຸ້ມຄອງ”

ສຳລັບວຽກງານການຄຸ້ມຄອງ, ແຕ່ລະເດືອນ ຄະນະຄຸ້ມຄອງທ່າກຳປັ່ນຫາປາ ຢູ່ ບໍລິເວນແຂວງ ກຽນຢາງ ລ້ວນແຕ່ສ້າງ ແລະ ລວບລວມບັນຊີລາຍຊື່ກຳປັ່ນທີ່ໄດ້ມອບບັນທຶກໄລຍະທາງຫາປາ, ການບັນທຶກເກັບຊື້ ແລະ ລາຍງານການຂຸດຄົ້ນສິນທະເລໃຫ້ພະແນກສິນທະເລຕາມການກຳນົດ. ຄຽງຂ້າງນັ້ນ ກຳປັ່ນທັງໝົດກ່ອນທີ່ເຂົ້າທຽບທ່າຕ້ອງລາຍງານໃຫ້ຄະນະຄຸ້ມຄອງທ່າກຳປັ່ນຫາປາ ຮັບຊາບກ່ອນຊົ່ວໂມງຫນຶ່ງ ເພື່ອກຳແຫນ້ນຂໍ້ມູນຂ່າວ ກວດກາປະລິມານການຜະລິດ, ປະເພດສິນທະເລ. ທ່ານ ໂດ໋ຊວນວີງ ຜູ້ອຳນວຍການທ່າກຳປັ່ນຫາປາ ແຂວງ ກຽນຢາງ ຢືນຢັນວ່າ:

“ເມື່ອໄດ້ຮັບຂ່າວ ພະນັກງານຄຸ້ມຄອງຈະປຽບທຽບກັບບັນຊີລາຍຊື່ກຳປັ່ນຫາປາຜິດກົດໝາຍ. ຖ້າຫາກກຳປັ່ນນັ້ນນອນໃນບັນຊີລາຍຊື່ດັ່ງກ່າວ ທ່າກຳປັ່ນຫາປາບໍ່ອະນຸຍາດໃຫ້ຂົນສິນທະເລ ພ້ອມທັງແຈ້ງໃຫ້ຫນ່ວຍກວດກາຮັບຊາບເພື່ອແກ້ໄຂຕາມການກຳນົດ”

ສຳລັບບັນດາວິສາຫະກິດເຮັດທຸລະກິດສິນທະເລ ໄດ້ເປັນເຈົ້າການປະຕິບັດຫລາຍມາດຕະການຢ່າງຂ້ຽວຂາດ ເພື່ອພະຍາຍາມຍົກເລີກ ບັດເຫລືອງ. ຕາມບົດລາຍງານ, ຮອດທ້າຍເດືອນກັນຍາ ມີກວ່າ 60 ວິສາຫະກິດເຮັດທຸລະກິດສິນທະເລ ໄດ້ມີຄຳໝັ້ນສັນຍາຕ້ານການຂຸດຄົ້ນ IUU ດ້ວຍເລື່ອງເຄົາລົບຫລັກການພຽງແຕ່ເກັບຊື້ສິນທະເລຈາກກຳປັ່ນຫາປາມີຫນັງສືອະນຸຍາດ, ບັນທຶກການຫາປາ ແລະ ໃບຢັ້ງຢືນຂອງທ່າກຳປັ່ນຫາປາ.

ເປັນທີ່ຈະແຈ້ງແລ້ວວ່າ ຄວາມມານະພະຍາຍາມຍົກເລີກ ບັດເຫລືອງຂອງຂະແຫນງສິນທະເລພວມປະຕິບັດຢ່າງຕັ້ງຫນ້າ, ບັນລຸຄວາມຄືບຫນ້າຫລາຍຢ່າງ. ເຖິງແນວນັ້ນກໍຕາມ ໃນພາຍພາກຫນ້າຍັງມີຫລາຍວຽກຕ້ອງເຮັດ. ທ່ານ ຟຸ່ງດຶກຕຽນ ຮອງລັດຖະມົນຕີກະຊວງກະສິກຳ ແລະ ພັດທະນາຊົນນະບົດ ເນັ້ນຫນັກວ່າ:

“ພວກເຮົາຍັງປະສົບຄວາມຫຍຸ້ງຍາກຫລາຍຢ່າງ ແຕ່ອາດຢັ້ງຢືນໄດ້ວ່າ ລະບົບກົດໝາຍ, ນະໂຍບາຍຂອງຫວຽດນາມ ໄດ້ສ້າງສຳເລັດສົບບູນແບບເທື່ອລະກ້າວ. ການຄຸ້ມຄອງກຳປັ່ນຫາປາກໍ່ມີຄວາມເປັນລະບຽບຮຽບຮ້ອຍ, ເປັນລະບົບ. ການແຈ້ງຕົ້ນກຳເນີດກໍ່ມີຄວາມຄືບຫນ້າດີ. ສະນັ້ນ ຖ້າຫາກທັງລະບົບການເມືອງ ພ້ອມກັບບັນດາແຂວງ, ນະຄອນ ເຂົ້າຮ່ວມວຽກງານນີ້ ພວກເຮົາຈະຍົກເລີກບັດເຫລືອງຂອງເອີລົບໂດຍໄວ.”

ດ້ວຍຄວາມຕັດສິນໃຈ ແລະ ການເຂົ້າຮ່ວມຂອງທັງລະບົບການເມືອງ, ວິສາຫະກິດ ແລະ ຊາວປະມົງ ພວກເຮົາມີພື້ນຖານເພື່ອເຊື່ອໝັ້ນວ່າ ບັດເຫລືອງ ຂອງເອີລົບ ສຳລັບສິນທະເລຫວຽດນາມ ຈະຖືກຍົກເລີກໂດຍໄວ.