ເມື່ອກ່າວຄຳເຫັນໃນພິທີອັດກອງປະຊຸມສຸດຍອດສະຫະພັນ ອາຣັບ, ວັນທີ 04 ມີນາ (ຕາມເວລາທ້ອງຖິ່ນ), ທ່ານປະທານາທິບໍດີປະເທດເຈົ້າພາບ Abdel – Fattah el-Sissi ຖະແຫຼງວ່າ ບັນດາປະເທດເຂົ້າຮ່ວມນັ້ນ ໄດ້ຮັບຮອງເອົາແຜນການຂອງ ອີຢິບ ກ່ຽວກັບການສ້າງເຂດ ກາຊາ ຄືນໃໝ່. ແຜນການດັ່ງກ່າວຕ້ອງການງົບປະມານ 53 ຕື້ USD ມຸ່ງໄປເຖິງເປົ້າໝາຍສ້າງເຂດ ກາຊາ ຄືນໃໝ່ ເຊິ່ງບໍ່ຈຳເປັນຕ້ອງຍົກຍ້າບປະຊາຊົນຢູ່ແຫ່ງນີ້.
ໃນບົດກ່າວປາໄສທີ່ກອງປະຊຸມ, ທ່ານປະທານາທິບໍດີ Abdel – Fattah El-Sisi ໃຫ້ຮູ້ວ່າ ແຜນການຈະເລີ່ມຕົ້ນດ້ວຍໄລຍະຟື້ນຟູໂດຍໄວເພື່ອແກ້ໄຂບັນດາຄວາມຕ້ອງການມະນຸດສະທຳດ່ວນຢູ່ເຂດ ກາຊາ ແລະ ດຳເນີນໄລຍະສ້າງສາຄືນໃໝ່. ການນຳ ອີຢິບ ເນັ້ນໜັກວ່າ ແຜນການນີ້ຕ້ອງດຳເນີນພ້ອມກັນ ດ້ວຍເສັ້ນທາງຈະແຈ້ງທີ່ມຸ່ງໄປເຖິງສັນຕິພາບ, ລວມທັງທາງດ້ານການເມືອງ ແລະ ຄວາມໝັ້ນຄົງ, ໃນນັ້ນ ບັນດາປະເທດໃນພາກພື້ນເຂົ້າຮ່ວມດ້ວຍການໜູນຊ່ວຍຂອງປະຊາຄົມສາກົນ ເພື່ອບັນລຸໄດ້ມາດຕະການຍຸຕິທຳ ແລະ ຮອບດ້ານ ໃຫ້ແກ່ບັນຫາ ປາແລັດສະຕິນ. ທ່ານ El-Sisi ໃຫ້ຮູ້ວ່າ ພ້ອມກັບການຮ່ວມມືຂອງ ປາແລັດສະຕິນ, ອີຢິບ ໄດ້ສ້າງຕັ້ງຄະນະກຳມະການບໍລິຫານ ລວມມີບັນດານັກຊ່ຽວຊານ ແລະ ນັກປົກຄອງ ປາແລັດສະຕິນ ເອກະລາດ ເພື່ອຕິດຕາມກວດກາການເຄື່ອນໄຫວຊ່ວຍບັນເທົ່າທຸກຢູ່ເຂດ ກາຊາ ແລະ ຄຸ້ມຄອງເຂດດິນແດນນີ້ຊົ່ວຄາວ ເພື່ອກະກຽມໃຫ້ແກ່ເລື່ອງອຳນາດການປົກຄອງ ປາແລັດສະຕິນ ກັບຄືນເຂດ ກາຊາ.
