ໂດຍເສີມຂະຫຍາຍບົດບາດແມ່ນສະມາຊິກທີ່ຕັ້ງໜ້າຂອງເວທີປາໄສລັດຖະສະພາຫຼາຍຝ່າຍ,ເຂົ້າຮ່ວມ IPU – 152, ຫວຽດນາມ ສືບຕໍ່ເປັນເຈົ້າການປະກອບສ່ວນ, ປຶກສາຫາລື, ແບ່ງປັນບົດຮຽນປະສົບການ, ວາງອອກບັນດາຂໍ້ລິເລີ່ມເພື່ອແກ້ໄຂບັນດາສິ່ງທ້າທາຍລວມໃນສະພາບການໂລກປັດຈຸບັນ. ພ້ອມທັງ ປັບປຸງການພົວພັນຮ່ວມມືມິດຕະພາບທີ່ເປັນມູນເຊື້ອກັບ ຕວັກກີ ແລະ ອີຕາລີ.
ໃນສະພາບການ ຫວຽດນາມ ຫາກໍ່ປະຕິບັດສຳເລັດບັນດາເຫດການການເມືອງສຳຄັນ, ການເດີນທາງໄປປະຕິບັດງານຂອງ ທ່ານປະທານສະພາແຫ່ງຊາດ ເຈິ່ນແທັງເໝິນ ແມ່ນບາດກ້າວເພື່ອຫັນແຜນນະໂຍບາຍຍົກສູງຖານະບົດບາດຂອງປະເທດຊາດໃຫ້ເປັນອັນລະອຽດ, ຢັ້ງຢືນບົດບາດຂອງສະພາແຫ່ງຊາດໃນພື້ນຖານການທູດ ຫວຽດນາມ ສັງລວມຍຸກທັນສະໄໝ.
ຕັ້ງໜ້າການເຊື່ອມໂຍງເຂົ້າກັບສາກົນຢ່າງຮອບດ້ານ ແລະ ເລິກເຊິ່ງກວ້າງຂວາງ
ດ້ວຍຫົວຂໍ້ “ຫຼໍ່ລ້ຽງຄວາມຫວັງ, ຮັບປະກັນສັນຕິພາບ ແລະ ປົກປ້ອງຄວາມຍຸຕິທຳໃຫ້ແກ່ລຸ້ນຄົນອະນາຄົດ”, IPU – 152 ສຸມໃສ່ປຶກສາຫາລືບັນດາມາດຕະການແກ້ໄຂບັນດາສິ່ງທ້າທາຍລວມ ແລະ ກຳນົດອະນາຄົດແບບຍືນຍົງ.
ຕາມນັ້ນແລ້ວ, ທ່ານປະທານສະພາແຫ່ງຊາດ ຈະມີບົດກ່າວຄຳເຫັນທີ່ສຳຄັນ, ແບ່ງປັນວິໄສທັດຂອງ ຫວຽດນາມ ຕໍ່ກັບບັນດາບັນຫາທົ່ວໂລກ ແລະ ພາກພື້ນ, ພ້ອມທັງສະເໜີບັນດາມາດຕະການກະທຳລະອຽດ ເພື່ອແນໃສ່ຊຸກຍູ້ການຮ່ວມມືລະຫວ່າງລັດຖະສະພາ ປະກອບສ່ວນຮັກສາສັນຕິພາບ, ສະຖຽນລະພາບ ແລະ ຊຸກຍູ້ການພັດທະນາແບບຍືນຍົງ, ຄວາມວັດທະນາຖາວອນໃນທົ່ວໂລກ. ສະພາແຫ່ງຊາດ ຫວຽດນາມ ກໍຈະພ້ອມກັບລັດຖະສະພາບັນດາປະເທດ ປຶກສາຫລືກ່ຽວກັບຂັ້ນຕອນຍົກສູງປະສິດທິຜົນສ້າງກົດໝາຍ, ຕິດຕາມກວດກາ ແລະ ຊຸກຍູ້ການຮ່ວມມືຫຼາຍຝ່າຍເພື່ອຫັນບັນດາເປົ້າໝາຍລວມໃຫ້ປະກົດຜົນເປັນຈິງ.
ນັບແຕ່ເວລາກາຍເປັນສະມາຊິກຂອງ IPU ແຕ່ປີ 1979, ສະພາແຫ່ງຊາດ ຫວຽດນາມ ຍາມໃດກໍ່ແມ່ນສະມາຊິກທີ່ຕັ້ງໜ້າ ແລະ ມີຄວາມຮັບຜິດຊອບ. ສະພາແຫ່ງຊາດ ຫວຽດນາມ ໄດ້ຮັບດຳລົງຕຳແໜ່ງການນຳໃນກົນໄກຂອງ IPU ເປັນຫຼາຍຄັ້ງ. ບັນດາການປະກອບສ່ວນຂອງ ສະພາແຫ່ງຊາດ ຫວຽດນາມ ໂດຍຄະນະເລຂາທິການ ແລະ ບັນດາສະມາຊິກ IPU ຖືເປັນສຳຄັນ. ທ່ານ Martin Chungong ເລຂາທິການໃຫຍ່ IPU ເຄີຍໃຫ້ຂໍ້ສັງເກດວ່າ:
ກ່ຽວກັບການພົວພັນ ລະຫວ່າງ IPU ກັບ ຫວຽດນາມ, ອາດຢັ້ງຢືນໄດ້ວ່າ ການຮ່ວມມືໄດ້ພັດທະນາຢ່າງຕໍ່ເນື່ອງ. ແຕ່ໃນຫຼາຍປີຜ່ານມາ, ຂ້າພະເຈົ້າໄດ້ຮູ້ຈັກຫຼາຍໂຄງການຂອງສະພາແຫ່ງຊາດ ຫວຽດນາມ. ຍົກຕົວຢ່າງ, ໃນຂົງເຂດຂໍ້ມູນຂ່າວສານ, ສະພາແຫ່ງຊາດຫວຽດນາມ ໄດ້ຮັບຖືວ່າແມ່ນນຳໜ້າໃນການນຳລະບົບສຳເນົາເອກະສານກົດໝາຍລົງໃນເວັບໄຊ. ຂໍ້ລິເລີ່ມນຳໃຊ້ເຕັກໂນໂລຢີຂໍ້ມູນຂ່າວສານຂອງສະພາແຫ່ງຊາດ ຫວຽດນາມ ແມ່ນບົດຮຽນທີ່ດີໃຫ້ແກ່ສະພາແຫ່ງຊາດບັນດາປະເທດ.
ຜ່ານກົນໄກຮ່ວມມື IPU, ຫວຽດນາມ ມີໂອກາດທາບທາມທັດສະນະຂອງບັນດາປະເທດກ່ຽວກັບບັນດາບັນຫາສາກົນ, ສະແດງໃຫ້ເຫັນທັດສະນະແຫ່ງຊາດກ່ຽວກັບບັນດາຄວາມສົນໃຈລວມ, ປະກອບສ່ວນຍົກສູງຖານະບົດບາດຂອງສະພາແຫ່ງຊາດ ເວົ້າສະເພາະ ແລະ ຫວຽດນາມ ເວົ້າລວມ ບົນເວທີສາກົນ. ທ່ານ ໂດນຕວນຟອງ ອະດີດຮອງປະທານກຳມາທິການປ້ອງກັນຊາດ, ປ້ອງກັນຄວາມສະຫງົບ ແລະ ການຕ່າງປະເທດ ສະພາແຫ່ງຊາດ ຫວຽດນາມ ໄດ້ຢັ້ງຢືນວ່າ:
ສະພາແຫ່ງຊາດ ຫວຽດນາມ ໄດ້ເຂົ້າຮ່ວມທຸກກິດຈະກຳທາງການຂອງ ສະຫະພັນ ລັດຖະສະພາສາກົນຢ່າງຄົບຖ້ວນ, ຕັ້ງໜ້າ ແລະ ມີຄວາມຮັບຜິດຊອບ, ພິເສດແມ່ນບັນດາກອງປະຊຸມສະມັດຊາໃຫຍ່. ຢູ່ກອງປະຊຸມສະມັດຊາໃຫຍ່ຄັ້ງນີ້, ຫວຽດນາມ ກໍ່ໄດ້ເຂົ້າຮ່ວມປະກອບຄຳເຫັນຍົກອອກຫຼາຍຂໍ້ລິເລີ່ມໃນຄວາມມານະພະຍາຍາມລວມຂອງ ສະຫະພັນລັດຖະສະພາສາກົນ ກໍ່ຄືລັດຖະສະພາບັນດາປະເທດ, ພິເສດແມ່ນໃນການຊຸກຍູ້ສັນຕິພາບການຮ່ວມມື ແລະ ພັດທະນາ, ໃນນັ້ນມີການຊຸກຍູ້ບັນດາເປົ້າໝາຍພັດທະນາແບບຍືນຍົງ.
ຢູ່ເວທີປາໄສ IPU – 152 ຄັ້ງນີ້, ຫວຽດນາມ ກໍ່ສົ່ງສານກ່ຽວກັບປະເທດຊາດພວມກ້າວເຂົ້າສູ່ສັງກາດໃໝ່, ດ້ວຍຜົນສຳເລັດຫຼາຍຢ່າງໃນການພັດທະນາເສດຖະກິດສັງຄົມທີ່ພົ້ນເດັ່ນ, ໃນນັ້ນ ຍາມໃດປະຊາຊົນກໍ່ໄດ້ຮັບການຖືເປັນໃຈກາງ, ເປັນເປົ້າໝາຍ, ກຳລັງໜູນຂອງທຸກນະໂຍບາຍພັດທະນາ.
ຊຸກຍູ້ການຮ່ວມມືກັບ ຕວັກກີ ແລະ ອີຕາລີ
ເຂົ້າຮ່ວມ IPU – 152, ທ່ານປະທານສະພາແຫ່ງຊາດ ເຈິ່ນແທັງເໝິ້ນ ກໍ່ໄດ້ດຳເນີນການເຄື່ອນໄຫວສອງຝ່າຍຈຳນວນໜຶ່ງຢູ່ ຕວັກກີ. ນີ້ແມ່ນໜຶ່ງໃນບັນດາຄູ່ຮ່ວມມືສຳຄັນຂອງ ຫວຽດນາມ ຢູ່ພາກພື້ນຕາເວັນອອກກາງ. ໃນການພົວພັນສັງລວມ ຫວຽດນາມ - ຕວັກກີ, ການພົວພັນສະພາແຫ່ງຊາດສອງປະເທດມີການພັດທະນາຢ່າງຕັ້ງໜ້າ, ສອງຝ່າຍໄດ້ຮັກສາບັນດາການເຄື່ອນໄຫວແລກປ່ຽນຄະນະຜູ້ແທນ, ພົບປະ, ປຶກສາຫາລືຢູ່ບັນດາເວທີປາໄສລັດຖະສະພາເຊິ່ງສອງປະເທດເປັນສະມາຊິກຢ່າງເປັນປະຈຳ.
ໃນຂະນະນັ້ນ, ສຳລັບ ສ.ອີຕາລີ, ບົນພື້ນຖານການພົວພັນທາງການທູດໄດ້ສ້າງຕັ້ງແຕ່ປີ 1973 ແລະ ການພົວພັນຄູ່ຮ່ວມມືຍຸດທະສາດແຕ່ປີ 2013, ການພົວພັນສອງປະເທດພວມມີການພັດທະນາຢ່າງມີປະສິດທິຜົນໃນທຸກຂົງເຂດ. ວົງເງິນການຄ້າສອງສົ້ນເພີ່ມຂຶ້ນໃນແຕ່ລະປີຢ່າງສະໝ່ຳສະເໜີ, ປີ 2025 ບັນລຸປະມານ 7,3 ຕື້ USD, ເພີ່ມຂຶ້ນ 6,2% ເມື່ອທຽບໃສ່ກັບປີກ່ອນນັ້ນ. ອີຕາລີ ແມ່ນຄູ່ຮ່ວມມືການຄ້າໃຫຍ່ອັນດັບທີ 3 ຂອງ ຫວຽດນາມ ໃນ ສະຫະພາບ ເອີລົບ ແລະ ຫວຽດນາມ ແມ່ນຄູ່ຮ່ວມມືການຄ້າໃຫຍ່ທີ່ສຸດຂອງ ອີຕາລີ ໃນ ອາຊຽນ. ກ່ຽວກັບການທ່ອງທ່ຽວ, ໃນຍຸດທະສາດພັດທະນາການທ່ອງທ່ຽວຂອງ ຫວຽດນາມ, ອີຕາລີ ໄດ້ຮັບການກຳນົດແມ່ນໜຶ່ງໃນບັນດາຕະຫຼາດຈຸດສຸມ ແລະ ມີຄວາມສາມາດບົ່ມຊ້ອນທີ່ສຸດ. ພ້ອມທັງ ອີຕາລີ ກໍ່ແມ່ນປະເທດທີ່ມີບົດຮຽນປະສົບການໃນການພັດທະນາການທ່ອງທ່ຽວຕິດພັນກັບມໍລະດົກວັດທະນະທຳ.
ໃນສະພາບການ ຫວຽດນາມ ຫາກໍ່ບູລະນະກົງຈັກໃຫ້ສົມບູນພາຍຫຼັງການເລືອກຕັ້ງສະມາຊິກສະພາແຫ່ງຊາດຊຸດທີ XVI, ການເຂົ້າຮ່ວມ IPU – 152, ການໄປຢ້ຽມຢາມສອງຝ່າຍ ຕວັກກີ ແລະ ອີຕາລີ ຂອງທ່ານປະທານສະພາແຫ່ງຊາດ ເຈິ່ນແທັງເໝິນ ໄດ້ຢັ້ງຢືນບົດບາດ, ຖານະທີ່ຕັ້ງ ແລະ ພາບພົດສະພາແຫ່ງຊາດ ຫວຽດນາມ ບົນເວທີສາກົນ, ເພີ່ມທະວີການພົວພັນສອງຝ່າຍ ລະຫວ່າງ ຫວຽດນາມ ກັບສອງປະເທດທີ່ມີທີ່ຕັ້ງຍຸດທະສາດຢູ່ ເອີລົບ ແລະ ພາກພື້ນຕາເວັນອອກກາງ, ເປີດຫຼາຍກາລະໂອກາດກ່ຽວກັບການຄ້າ, ການລົງທຶນ ແລະ ພົບປະແລກປ່ຽນວັດທະນະທຳ, ຊຸກຍູ້ການທູດລັດຖະສະພາ, ຢັ້ງຢືນຄຳໝັ້ນສັນຍາຂອງ ຫວຽດນາມ ຕໍ່ບັນດາບັນຫາທົ່ວໂລກ.
