ໂດຍໄດ້ເອີ້ນວ່າອັດຕາພາສີ “ວັນປົດປ່ອຍ” ແລະ ຢູ່ລະດັບແຕ່ 10 – 50% ພາສີສົມທົບຂອງ ອາເມລິກາ ໄດ້ສ້າງບັນດາຄວາມເຄັ່ງຕຶງດ້ານການຄ້າທີ່ແກ່ຍາວລະຫວ່າງ ອາເມລິກາ ແລະ ຫຼາຍພື້ນຖານເສດຖະກິດໃຫຍ່ໃນໂລກ, ກ່ອນທີ່ບັນດາຝ່າຍບັນລຸໄດ້ຂໍ້ຕົກລົງດ້ານການຄ້າຊົ່ວຄາວ.
ຄວາມໄດ້ ແລະ ສູນເສຍຂອງພື້ນຖານເສດຖະກິດ ອາເມລິກາ
ພາຍຫຼັງເວລາທີ່ທ່ານ Donald Trump ປະກາດພາສີສົມທົບເປັນເວລາເກືອບ 1 ປີ, ໂດຍອ້າງອີງຈາກກົດໝາຍວ່າດ້ວຍສິດອຳນາດການເສດຖະກິດສຸກເສີນສາກົນປີ 1977 (IEEPA), ວັນທີ 20 ກຸມພາ 2026, ສານສູງສຸດ ອາເມລິກາ ໄດ້ປະຕິເສດອັດຕາພາສີດັ່ງກ່າວ. ຫຼັງຈານັ້ນ ພຽງແຕ່ 2 – 3 ຊົ່ວໂມງ, ທ່ານປະທານາທິບໍດີ Donald Trump ປະກາດອັດຕາພາສີນຳເຂົ້າເພີ່ມເຕີມໃໝ່ແມ່ນ 10% ຕາມມາດຕາ 122 ຂອງກົດໝາຍວ່າດ້ວຍການຄ້າປີ 1974, ໃນເວລາ 150 ວັນ. ໂດຍພື້ນຖານແລ້ວ, ພາສີສົມທົບເຊິ່ງ ອາເມລິກາ ຈັດວາງໃນ 1 ປີຜ່ານມາ, ພ້ອມກັບການດັດປັບໃຫ້ແກ່ຄູ່ຮ່ວມມືລະອຽດ, ອີງຕາມບັນດາຂໍ້ຕົກລົງດ້ານການຄ້າໃໝ່ລະຫວ່າງ ອາເມລິກາ ກັບບັນດາຄູ່ຮ່ວມມືດັ່ງກ່າວ.
ຕາມນັ້ນແລ້ວ, ນັບແຕ່ການປະຕິບັດນະໂຍບາຍພາສີໃໝ່, ການຂາດດຸນການຄ້າຂອງ ອາເມລິກາ ໄດ້ຫຼຸດລົງ 24% ໃນໄລຍະເດືອນ ເມສາ 2025 - ກຸມພາ 2026 ເມື່ອທຽບໃສ່ໄລຍະດຽວກັນ. ດຸນການຄ້າສິນຄ້າ 2 ຝ່າຍຂອງ ອາເມລິກາ ໄດ້ຮັບການປົວແປງສຳລັບກວ່າ 63% ຄູ່່ຮ່ວມມື.
ເຖິງຢ່າງໃດກໍ່ຕາມ, ບໍ່ແມ່ນທຸກດັດຊະນີລ້ວນແຕ່ມີຄວາມຕັ້ງໜ້າ. ບັນດານັກຄົ້ນຄວ້າກ່ຽວກັບຜົນງານດ້ານເສດຖະກິດ ອາເມລິກາປີ 2025 ເມື່ອທຽບໃສ່ປີ 2024, ຊີ້ໃຫ້ເຫັນວ່າ ໃນຕົວຈິງ, GDP ຂອງ ອາເມລິກາ ພຽງເພີ່ມຂຶ້ນ 2,1% ໃນປີ 2025, ຕ່ຳກວ່າເມື່ອທຽບໃສ່ 2,8% ຂອງປີ 2024. ການເຕີບໂຕດ້ານວຽກເຮັດງານທຳບັນລຸ 0,5%, ຕ່ຳກວ່າ 1,2% ຂອງປີ 2024. ທ່ານ William George, ຫົວໜ້າຄົ້ນຄວ້າຂອງ ImportGenius, ບໍລິສັດຂໍ້ມູນການຄ້າແຖວໜ້າໂລກ ມີສຳນັກງານຕັ້ງຢູ່ Arizona, ອາເມລິກາ, ໃຫ້ຂໍ້ສັງເກດວ່າ:
“ດ້ວຍນະໂຍບາຍການຄ້າບໍ່ແນ່ນອນ ແລະ ມີການປ່ຽນແປງຢ່າງຕໍ່ເນື່ອງຄືໃນໄລຍະຜ່ານມາ, ບັນດາບໍລິສັດກໍ່ລັງເລໃຈສ່ວນໃດສ່ວນໜຶ່ງໃນການໃຫ້ຄຳໝັ້ນສັນຍາຢ່າງແຮງຈະຫັນປ່ຽນການຜະລິດ, ຍ້ອນນັ້ນແມ່ນບ້ວງເງິນລົງທຶນໃຫຍ່ໃນຫຼາຍປີ”.
ພາສີອາກອນກໍ່ໝາຍຄວາມວ່າລາຍຈ່າຍຂອງຜູ້ບໍລິໂພກເພີ່ມຂຶ້ນສູງກວ່າ. ເດືອນ ສິງຫາ 2025, ກົມສະສົມເງິນຕາສະຫະລັດ ອາເມລິກາ ໄດ້ຊີ້ໃຫ້ເຫັນວ່າ ປະຊາຊົນຕ້ອງຮັບຜິດຊອບຄ່າໃຊ້ຈ່າຍຈາກພາສີອາກອນ 94%. ຮອດທ້າຍປີ, ຄວາມກົດດັນມີການປົວແປງແຕ່ຍັງຄົງຢູ່ລະດັບ 86%.
ການປັບຕົວຂອງບັນດາພື້ນຖານເສດຖະກິດ
ສຳລັບໂລກ, ບັນດາການຜັນແປດ້ານການຄ້າຍ້ອນນະໂຍບາຍພາສີຂອງ ອາເມລິກາ ໄດ້ ແລະ ພວມຊຸກຍູ້ໃຫ້ບັນດາພື້ນຖານເສດຖະກິດປ່ຽນແປງຍຸດທະສາດດ້ານການຄ້າຢ່າງແຮງ, ຕາມທິດຫັນຄູ່ຮ່ວມມືເປັນຫຼາຍຮູບຫຼາຍແບບ ແລະ ຢືນຢັນຄືນໃໝ່ບົດບາດໃນບັນດາລະບົບສະໜອງທົ່ວໂລກ. ຕາມທ່ານ David Hebert, ນັກຊ່ຽວຊານດ້ານເສດຖະກິດ ຂອງສະຖາບັນຄົ້ນຄວ້າເສດຖະກິດ ອາເມລິກາ (AIER) ແລ້ວ, ເພື່ອຊົດເຊີຍການສູນເສຍຕະຫຼາດ ອາເມລິກາ, ບັນດາປະເທດໄດ້ຫຼຸດຜ່ອນຮົ້ວກີດຂວາງ ແລະ ເພີ່ມທະວີການຮ່ວມມືດ້ານການຄ້າ. ແບ່ງປັນກ່ຽວກັບທັດສະນະດັ່ງກ່າວ, ທ່ານນາງ Kari Heerman, ຫົວໜ້າພະແນກການຄ້າ ແລະ ນະໂຍບາຍເສດຖະກິດຂອງ ສະຖາບັນ Brookings ອາເມລິກາ, ຖືວ່າ:
“ພວກເຮົາບໍ່ເຫັນປະຈັກຕາການໂຕ້ຕອບໃນທົ່ວໂລກ. ພວກເຮົາບໍ່ເປີດສົງຄາມການຄ້າທົ່ວໂລກດ້ວຍອັດຕາພາສີ “ວັດປົດປ່ອຍ”, ແຕ່ພວກເຮົາເຫັນວ່າ ບັນດາຄູ່ຮ່ວມມືຂອງ ອາເມລິກາ, ດ້ວຍວິທີໃດໜຶ່ງ, ພວມມານະພະຍາຍາມດັດປັບນະໂຍບາຍພົວພັນດ້ານເສດຖະກິດກັບ ອາເມລິກາ, ເຂົາເຈົ້າໄດ້ກ້າວເຂົ້າໃກ້ກັນວ່າ ແລະ ຫ່າງຈາກກັບ ອາເມລິກາ ກວ່າ”.
ຄຳຖາມໄດ້ວາງອອກໃນປະຈຸບັນແມ່ນ ການຜັນແປດ້ານການຄ້າທົ່ວໂລກໃນໄລຍະຈະມາເຖິງຈະຄືແນວໃດ? ປະຈຸບັນ, ການປະທະກັນຢູ່ ຕາເວັນອອກກາງ ພວມແມ່ນບຸລິມະສິດແຖວໜ້າຂອງອຳນາດການປົກຄອງ ອາເມລິກາ, ເຮັດໃຫ້ບັນດາການເຈະລຈານະໂຍບາຍການຄ້າລົດໜ້ອຍລົງ. ອຳນາດການປົກຄອງ ອາເມລິກາ ພວມຮູ້ແຮງການຊອກຫາບັນດາເຄື່ອງມືດ້ານນິຕິກຳໃໝ່ ເພື່ອສືບຕໍ່ຮັກສາອັດຕາພາສີທີ່ໄດ້ຍົກອອກມາໃນປີ 2024, ພ້ອມກັນນັ້ນ ກ່າວເຕືອນບັນດາປະເທດມີແນວຄິດຍົກເລີກບັນດາຂໍ້ຕົກລົງດ້ານການຄ້າທີ່ຫາກໍ່ລົງນາມກັບ ອາເມລິກາ. ທ່ານ David Super, ສາດສະດາຈານດ້ານກົດໝາຍ ແລະ ເສດຖະກິດ, ຂຶ້ນກັບມະຫາວິທະຍາໄລ Georgetown, ໃຫ້ຂໍ້ສັງເກດວ່າ:
“ຂ້າພະເຈົ້າຄິດວ່າ ບັນດາປະເທດຕ້ອງຍົກອອກການຄັດເລືອກ. ອັດຕາພາສີເຊິ່ງທ່ານປະທານາທິບໍດີ Donald Trump ໄດ້ຍົກອອກມາໃນປີ 2025, ເຖິງວ່າແມ່ນບໍ່ຖືກຕ້ອງຕາມກົດໝາຍ, ແຕ່ຍັງມີຜົນບັງຄັບໃຊ້ເກືອບຄືວ່າໃນທັງປີ. ຖ້າປະເທດໃດໜຶ່ງຍົກເລີກຂໍ້ຕົກລົງກັບ ອາເມລິກາ, ອີກເທື່ອໜຶ່ງ ທ່ານ Donald Trump ອາດຈະຈັດວາງອັດຕາພາສີບໍ່ຖືກຕາມກົດໝາຍຕໍ່ປະເທດນັ້ນ, ເຖິງວ່າຫຼັງຈາກນັ້ນ ອັດຕາພາສີນີ້ອາດຈະຖືກປະຕິເສດອີກ. ແຕ່ປະເທດຈຳນວນໜຶ່ງບໍ່ຢາກລໍໍຖ້າແຜນການນັ້ນ, ພິເສດແມ່ນ ຖ້າຫາກເສດຖະກິດທົ່ວໂລກຊຸດໂຊມ”.
ມີປັດໃຈອື່ນອີກແມ່ນຜົນກະທົບໄລຍະຍາວນານຂອງການປະທະກັນຢູ່ ຕາເວັນອອກກາງ. ມີນັກຊ່ຽວຊານຈຳນວນໜຶ່ງຖືວ່າ ຖ້າຫາກການປະທະກັນແກ່ຍາວ, ກໍ່ໝາຍຄວາມວ່າລາຄານ້ຳມັນຈະຢູ່ລະດັບສູງ, ເສດຖະກິດຊຸດໂຊມ, ບໍ່ພຽງແຕ່ບັນດາຄູ່ຮ່ວມມືຂອງ ອາເມລິກາ ເທົ່ານັ້ນ ຫາກທັງ ອາເມລິກາ ເອງກໍ່ຈະຕ້ອງດັດປັບນະໂຍບາຍການຄ້າຢ່າງມີໄຫວພິບກວ່າ, ບໍ່ສາມາດເດັດດຽວຮັກສາອັດຕາພາສີຄືໃນເມື່ອກ່ອນອີກ.
