(vovworld) - ໃນຂອບເຂດການຢ້ຽມຢາມສັນຖະວະໄມຕີຫວຽດນາມ ຢ່າງເປັນທາງການ, ຕອນເຊົ້າວັນທີ 27/12, ທ່ານເລຂາທິການໃຫຍ່, ປະທານປະເທດ ສປປ ລາວ ຈູມມາລີ ໄຊຍະສອນ ແລະ ພັນລະຍາ, ພ້ອມກັບຄະນະຜູ້ແທນຂັ້ນສູງຂອງພັກ, ລັດລາວ ໄດ້ໄປຢ້ຽມຢາມແຂວງ ຮ່ວາບິ່ງ (ສະຖານທີ່ຈັດຕັ້ງກອງປະຊຸມກະກ່ຽມ, ກອງປະຊຸມໃຫຍ່ຄັ້ງທີ 2 ຂອງພັກປະຊາຊົນປະຕິວັດລາວເມື່ອປີ 1971), ພົບປະສ້າງສັນກັບພະນັກງານ ແລະ ປະຊາຊົນໃນແຂວງ ແລະ ໂອ້ລົມສົນທະນາກັບພະນັກງານ, ນັກຮົບກອງບັນຊາການທະຫານແຂວງ. ລາຍງານໂດຍຫຍໍ້ກ່ຽວກັບສະພາບການປະຕິບັດໜ້າທີ່ການເມືອງຂອງແຂວງໃນປີ 2012 ແລະ ສາຍພົວພັນມິດຕະພາບລະຫວ່າງແຂວງຮ່ວາບິ່ງ ກັບ ບັນດາທ້ອງຖິ່ນຂອງລາວ, ການນຳແຂວງຮ່ວາບິ່ງຊີ້ແຈ້ງວ່າ; ພ້ອມກັບສາຍພົວພັນມິດຕະພາບທີ່ເປັນມູນເຊື້ອລະຫວ່າງສອງປະເທດ, ແຂວງຮ່ວາບິ່ງ ມີສາຍພົວພັນແບບພິເສດ ແລະ ໃກ້ຊິດສະໜິດສະໜົມກັບແຂວງຫຼວງພະບາງ ຂອງລາວ. ທ່ານເລຂາທິການໃຫຍ່, ປະທານປະເທດລາວ ຈູມມາລີ ໄຊຍະສອນ ໄດ້ອວຍພອນບັນດາຜົນງານຮອບດ້ານເຊິ່ງອົງຄະນະພັກ ແລະ ປະຊາຊົນແຂວງບັນລຸໄດ້ໃນຊຸມປີ 2012 ຜ່ານມາ ແລະ ເນັ້ນໜັກວ່າ ສາຍພົວພັນທີ່ເປັນມູນເຊື້ອລະຫວ່າງແຂວງຮ່ວາບິ່ງ ກັບບັນດາທ້ອງຖິ່ນຂອງລາວ ເຊິ່ງນັບມື້ນັບໄດ້ຮັບການພັດທະນາຢ່າງບໍ່ຢຸດຢັ້ງ ແລະ ກ້າວເຂົ້າສູ່ລວງເລິກຢ່າງມີປະສິດທິຜົນ, ປະກອບສ່ວນຮັດແໜ້ນສາຍພົວພັນມິດຕະພາບທີ່ເປັນມູນເຊື້ອ ແລະ ຄວາມສາມັກຄີແບບພິເສດລະຫວ່າງຫວຽດນາມ - ລາວ.
ກ່ອນໜ້ານັ້ນ, ຕອນຄຳ່ວັນທີ 26/12, ຢູ່ສູນປະຊຸມສາກົນ, ຮ່າໂນ້ຍ, ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ແລະ ພັນລະຍາ ໄດ້ຈັດຕັ້ງງານລ້ຽງຢ່າງສົມກຽດ ເພື່ອຄ່ຳນັບຮັບຕ້ອນທ່ານເລຂາທິການໃຫຍ່, ປະທານປະເທດລາວ ຈູມມາລີ ໄຊຍະສອນ ແລະ ພັນລະຍາ ພ້ອມກັບບັນດາສະມາຊິກໃນຄະນະຜູ້ແທນຂັ້ນສູງ ລາວ ມາຢ້ຽມຢາມຫວຽດນາມ ຢ່າງເປັນທາງການ. ໃນບົດກ່າວຄຳເຫັນ, ທ່ານເລຂາທິການໃຫຍ່ ຫງວຽນຟູຈ້ອງ ໄດ້ຊີ້ແຈງວ່າ: ຄວາມຈິງປະຫວັດສາດກ່ວາເຄິ່ງສະຕະວັດຜ່ານມາສະແດງໃຫ້ເຫັນວ່າ: ການພົວພັນມິດຕະພາບລະຫວ່າງຫວຽດນາມ - ລາວ ແມ່ນການພົວພັນແບ່ງສຸກກແບ່ງທຸກນຳກັນ, ໄດ້ຮັບການກໍ່ຕັ້ງ, ເພີ່ມພູມຄູນສ້າງດ້ວຍເຫື້ອແຮງ ແລະ ເລືອດເນື້ອຂອງການນຳ ແລະ ປະຊາຊົນຫວຽດນາມ - ລາວ ລຸ້ນຕ່າງໆ ແລະ ໄດ້ກາຍເປັນຊັບສົມບັດອັນລ້ຳຄ່າຂອງ 2 ປະເທດ. ທ່ານເລຂາທິການໃຫຍ່ ຫງວຽນຟູຈ້ອງ ເນັ້ນໜັກວ່າ:
“ເນື່ອງໃນໂອກາດນີ້, ອີກເທື່ອໜຶ່ງ, ຕາງໜ້າໃຫ້ພັກ, ລັດ ແລະ ປະຊາຊົນຫວຽດນາມ, ພວກຂ້າພະເຈົ້າສະແດງຄວາມຮູ້ບຸນຄຸນຢ່າງເລິກເຊິ່ງຕໍ່ພັກ, ລັດ ແລະ ປະຊາຊົນລາວ ບັນດາເຜົ່າອ້າຍນ້ອງ ທີ່ຍາມໃດກໍສະຫງວນການສະໜັບສະໜູນ, ການຊ່ວຍເຫຼືອອັນໃຫຍ່ຫຼວງ ໃຫ້ແກ່ຫວຽດນາມ ໃນການຕໍ່ສູ້ປົດປ່ອຍຊາດ, ໂຮມປະເທດຊາດເປັນເອກະພາບກ່ອນນີ້ ກໍຄືໃນພາລະກິດສ້າງສາ ແລະ ປົກປັກຮັກສາປະເທດຊາດໃນປະຈຸບັນ. ພວກຂ້າພະເຈົ້າໝັ້ນໝາຍພ້ອມກັບພັກ, ລັດ ແລະ ປະຊາຊົນລາວ ປົກປັກຮັກສາສາຍພົວພັນສາມັກຄີແບບພິເສດ ຫວຽດນາມ - ລາວ ຄືດັ່ງຮັກສາແກ້ວຕາຂອງຕົນ, ປັບປຸງ ແລະ ພັດທະນາຢ່າງບໍ່ຢຸດຢັ້ງ, ເຮັດໃຫ້ສາຍພົວພັນນີ້ອຸດົມສົມບຸນ, ເລິກເຊິ່ງ ແລະ ນັບມື້ນັບສະໜິດແໜ້ນຂຶ້ນຕື່ມ.”
ສ່ວນທ່ານເລຂາທິການໃຫຍ່, ປະທານປະເທດ ລາວ ຈູມມາລີ ໄຊຍະສອນ ຂໍຂອບອົກຂອບໃຈການຕ້ອນຮັບຢ່າງສົມກຽດຂອງພັກ, ລັດ ແລະ ປະຊາຊົນຫວຽດນາມ, ສະແດງຄວາມປິຕິຊົມຊືນ ຕໍ່ໝາກຜົນຢ່າງດີງາມຂອງການເຈລະຈາ, ການພົບປະຄັ້ງຕ່າງໆ ໃນບັນຍາກາດສະໜິດສະໜົມ, ໄວ້ເນື້ອເຊື່ອໃຈເຊິ່ງກັນ ແລະ ກັນ, ແມ່ນປະກົດການທີ່ມີຊີດວິດຊີວາກ່ຽວກັບການພົວພັນມິດຕະພາບທີ່ ເປັນມູນເຊື້ອ, ບໍລິສຸດຜຸດຜ່ອງລະຫວ່າງ 2 ປະເທດ. ທ່ານເລຂາທິການໃຫຍ່, ປະທານປະເທດ ລາວ ຈູມມາລີ ໄຊຍະສອນ ຢືນຢັນວ່າ: ປີ 2012 - ປີແຫ່ງຄວາມສາມັກຄີມິດຕະພາບ ລາວ - ຫວຽດນາມ, ຫວຽດນາມ - ລາວ ໄດ້ສິ້ນສຸດແລ້ວ ແຕ່ວ່ານ້ຳໃຈມິດຕະພາບທີ່ຍິ່ງໃຫຍ່, ຄວາມສາມັກຄີແບບພິເສດ ແລະ ການຮ່ວມມືຮອບດ້ານລະຫວ່າງ 2 ປະເທດຈະຝັງເລິກໃນດວງໃຈຂອງປະຊາຊົນລາວ ແລະ ຫວຽດນາມ.
ທ່ານເລຂາທິການໃຫຍ່, ປະທານປະເທດລາວ ຈູມມາລີ ໄຊຍະສອນ ມີການຢ້ຽມຢາມທະນາຄານ BIDV
(ພາບ: danviet.vn)
ໃນຕອນບ່າຍວັນດຽວກັນ, ທ່ານເລຂາທິການໃຫຍ່, ປະທານປະເທດລາວ ຈູມມາລີ ໄຊຍະສອນ ມີການຢ້ຽມຢາມທະນາຄານການຄ້າຫຸ້ນສ່ວນລົງທຶນ ແລະ ພັດທະນາຫວຽດນາມ (ຫຼື BIDV), ສະມາຊິກສະຫະສະມາຄົມບັນດານັກລົງທຶນຫວຽດນາມຢູ່ ລາວ (ຫຼື AVIL). ທ່ານເລຂາທິການໃຫຍ່, ປະທານປະເທດ ຈູມມາລີ ໄຊຍະສອນ ໄດ້ຍ້ອງຍໍສັນລະເສີນບັນດານັກລົງທຶນຫວຽດນາມ ທີ່ໄດ້ປະກອບສ່ວນຢ່າງຕັ້ງໜ້າເຂົ້າໃນວິວັດການພັດທະນາເສດຖະກິດຂອງລາວ. ທ່ານເລຂາທິການໃຫຍ່, ປະທານປະເທດ ຈູມມາລີ ໄຊຍະສອນ ເນັ້ນໜັກວ່າ: ໃນໄລຍະຈະມາເຖິງ, ລາວຈະສືບຕໍ່ສະໜັບສະໜູນບັນດາໂຄງການລົງທຶນຂອງຫວຽດນາມ.
ເນື່ອງໃນໂອກາດນີ້, ບັນດາໜັງສືພິມໃຫຍ່ຂອງລາວຄື: ໜັງສືພິມປະຊາຊົນ, ໜັງສືພິມກອງທັບປະຕິວັດ, ສຳນັກຂ່າວສານແຫ່ງຊາດ, ໂທລະພາບແຫ່ງຊາດ, ວິທະຍຸກະຈາຍສຽງແຫ່ງຊາດ ໄດ້ໃຫ້ຂ່າວຢ່າງຫຼວງຫຼາຍ ແລະ ຊົມເຊີຍການຢ້ຽມຢາມຫວຽດນາມ ຂອງທ່ານເລຂາທິການໃຫຍ່, ປະທານປະເທດ ລາວ ຈູມມາລີ ໄຊຍະສອນ ພ້ອມກັບຄະນະຜູ້ແທນຂັ້ນສູງຂອງພັກ ແລະ ລັດ ລາວ ແຕ່ວັນທີ 25 – 28/12. ໜັງສືພິມສະບັບຕ່າງໆ, ວິທະຍຸ ຂອງລາວຖືວ່າ: ການຢ້ຽມຢາມຫວຽດນາມ ຂອງທ່ານເລຂາທິການໃຫຍ່, ປະທານປະເທດລາວ ມີຄວາມໝາຍຢ່າງເລິກເຊິ່ງ, ປະກອບສ່ວນເພີ່ມທະວີການຮ່ວມມື, ພັດທະນາ ເພື່ອຜົນປະໂຫຍດລວມຂອງ 2 ປະເທດ, ເພື່ອໃຫ້ 2 ຝ່າຍພ້ອມກັນແບ່ງປັນທັດສະນະຂອງຕົນກ່ຽວກັບບັນດາບັນຫາພາກພື້ນ ແລະ ສາກົນເຊິ່ງຕ່າງຝ່າຍຕ່າງມີຄວາມສົນໃຈ. ບັນດາການນຳ 2 ປະເທດລ້ວນແຕ່ຕີລາຄາສູງ ແລະ ມີຄວາມເພິງພໍໃຈຕໍ່ການພົວພັນມິດຕະພາບທີ່ເປັນມູນເຊື້ອ, ຄວາມສາມັກຄີແບບພິເສດ, ການຮ່ວມມືຮອບດ້ານ ແລະ ຄວາມໄວ້ເນື້ອເຊື່ອໃຈເຊິ່ງກັນ ແລະ ກັນຊຶ່ງຍາມໃດກໍ່ໄດ້ຮັບການຮັກສາ ແລະ ພັດທະນາຈາກ 2 ປະເທດ, ເຖິງວ່າໂລກຍັງມີການປ່ຽນແປງ ແລະ ຜັນແປ່ຢ່າງສັບສົນ. ສຳນັກຂ່າວສານແຫ່ງຊາດລາວ ໄດ້ຄັດສະເໜີຄຳເວົ້າຂອງທ່ານເລຂາທິການໃຫຍ່, ປະທານປະເທດລາວ ໂດຍເນັ້ນໜັກວ່າ: ປີແຫ່ງຄວາມສາມັກຄີມິດຕະພາບຫວຽດນາມ - ລາວ ແລະ ບັນດາການເຄື່ອນໄຫວສະເຫຼີມສະຫຼອງ 50 ປີແຫ່ງວັນສ້າງຕັ້ງການພົວພັນທາງການທູດ, ສະເຫຼີມສະຫຼອງ 30 ປີແຫ່ງວັນເຊັນສົນທິສັນຍາມິດຕະພາບແລະ ຮ່ວມມື ລາວ - ຫວຽດນາມ, ຫວຽດນາມ - ລາວ ມີຄວາມໝາຍຢ່າງເລິກເຊິ່ງປະກອບສ່ວນສຶກສາລຸ້ນຄົນຕ່າງໆຂອງ 2 ປະເທດເພື່ອຮັກສາ ແລະ ເສີມຂະຫຍາຍສາຍພົວພັນແບບພິເສດທີ່ຫາຍາກລະຫວ່າງ 2 ປະເທດ./.