ບົດລາຍງານໄດ້ປະກາດຖືກກັບຈຸດເວລາທີ່ລັດຖະບານຫວຽດນາມພວມສ້າງຍຸດທະສາດພັດທະນາເສດຖະກິດ - ສັງຄົມ ໄລຍະ 10 ປີ (2021 – 2030) ແລະແຜນການພັດທະນາເສດຖະກິດ - ສັງຄົມໄລຍະ 5 ປີ (2021 - 2025). ບົດລາຍງານໄດ້ຍົກອອກບັນດາຂໍ້ສະເໜີແນະທາງດ້ານນະໂຍບາຍຊ່ວຍໃຫ້ຫວຽດນາມຮັກສາການເຕີບໂຕທີ່ມີຄຸນນະພາບສູງຜ່ານບັນດາວິສາຫະກິດທີ່ມີຄວາມຂະຫຍັນຂັນເຄື່ອນກ່ວາເກົ່າ, ພື້ນຖານໂຄງລ່າງທີ່ມີປະສິດທິຜົນ, ແຮງງານທີ່ມີສີມື, ມຸ່ງໄປສູ່ພື້ນຖານເສດຖະກິດຂຽວກ່ວາ. ທ່ານ Ousmane Dione ຜູ້ອຳນວຍການແຫ່ງຊາດທະນາຄານໂລກປະຈຳຫວຽດນາມຖືວ່າ:

        ບົດລາຍງານສະແດງໃຫ້ເຫັນຍຸດທະສາດພັດທະນາຂອງຫວຽດນາມ ໃນທົດສະວັດຈະມາເຖິງແມ່ນ ຕ້ອງຖືເອົາການເຕີບໂຕຢ່າງມີປະສິດທິພາບເປັນຫຼັກແຫຼ່ງ. ບົນພື້ນຖານບັນດາການຕີລາຄາໃນບົດລາຍງານຫວຽດນາມ 2035, ປະສົບການໃນການພັດທະນາຂອງລັດຖະບານຫວຽດນາມ ແລະ ບັນດາບົດຮຽນທີ່ຖອດຖອນມາໄດ້ຈາກບັນດາປະເທດອື່ນ, ຫວຽດນາມຕ້ອງຮັກສາຄວາມສົມດຸມລະຫວ່າງ ການສະສົມ ແລະ ການຈັດສັນເງິນທຶນ 4 ຊະນິດຢ່າງມີປະສິດທິຜົນຄື: ທຶນພາກເອກະຊົນ, ທຶນພາກລັດ, ທຶນມະນຸດ ແລະ ທຶນທຳມະຊາດ. ຄວາມສົມດຸນນີ້ ສ່ວນຫຼາຍອີງໃສ່ກຳລັງຄວາມສາມາດໃນການປ່ຽນແປງໃໝ່ປະດິດຄິດສ້າງ ແລະ ກຳລັງຄວາມສາມາດໃນການປະຕິບັດການປະຕິຮູບລະບອບລະບຽບການ ແລະການຕະຫຼາດຂອງປະເທດຊາດ.