ຂະແໜງພາສີສ້າງຄວາມ ສະດວກໃຫ້ແກ່ການ ເຄື່ອນໄຫວດ້ານການຄ້າ, ຊຸກຍູ້ໃຫ້ການເຄື່ອນໄຫວຂາເຂົ້າຂາອອກ
ທ່ານນາຍົກລັດຖະມົນຕີ ຫງວຽນເຕີນຢຸງ
ເຮັດວຽກກັບການນຳຫຼັກແຫຼ່ງກົມໃຫຍ່ພາສີ
(ພາບ: thanhnien.com.vn)
(vovworld) – ຕອນບ່າຍວັນທີ 09/07, ທ່ານນາຍົກລັດຖະມົນຕີ ຫງວຽນເຕີນຢຸງ, ທ່ານຮອງນາຍົກລັດຖະມົນຕີ ຫວູດຶກດາມ ພ້ອມກັບການນຳບາງກະຊວງ, ຂະແໜງການສູນກາງ ໄດ້ມີການເຮັດວຽກກັບການນຳຫຼັກແຫຼ່ງກົມໃຫຍ່ພາສີ ກ່ຽວກັບວຽກງານຄຸ້ມຄອງ ແລະ ປະຕິຮູບລະບຽບການບໍລິຫານພາສີ. ສະຫຼຸບການເຮັດວຽກ, ທ່ານນາຍົກລັດຖະມົນຕີ ຫງວຽນເຕີນຢຸງ ໄດ້ຕີລາຄາສູງຄວາມມານະພະຍາຍາມຂອງຂະແໜງພາສີໃນຊຸມປີຜ່ານມາ, ປະກອບສ່ວນຢ່າງໃຫຍ່ຫຼວງເຂົ້າໃນຜົນງານລວມຂອງປະເທດ, ພິເສດແມ່ນຂະແໜງຫັນເປັນທັນສະໄໝຕາມທິດປະຕິບັດບັນດາມາດຕະຖານ, ທຳນຽມ ແລະ ຄຳໝັ້ນສັນຍາສາກົນ, ຕອບສະໜອງຄວາມຮຽກຮ້ອງກ່ຽວກັບການເຊື່ອມໂຍງ, ສ້າງຄວາມສະດວກໃຫ້ແກ່ການເຄື່ອນໄຫວດ້ານການຄ້າ, ຊຸກຍູ້ການເຄື່ອນໄຫວຂາເຂົ້າ, ຂາອອກຂອງທົ່ວປະເທດ… ຊີ້ນຳບັນດາໜ້າທີ່ໃນໄລຍະຈະມາເຖິງ, ທ່ານນາຍົກລັດຖະມົນຕີ ຫງວຽນເຕີນຢຸງ ຮຽກຮ້ອງໃຫ້ຂະແໜງຕ້ອງສຸມໃສ່ກໍ່ສ້າງຂະແໜງພາສີໃຫ້ທັນສະໄໝ, ເທົ່າທຽມກັບປະເທດຕ່າງໆໃນພາກພື້ນ, ໃນນັ້ນນຳເຕັກໂນໂລຊີຂໍ້ມູນຂ່າວສານເຂົ້າໃນການເຄື່ອນໄຫວຂອງຂະແໜງ. ໃນຕໍ່ໜ້າ, ຂະແໜງພາສີສືບຕໍ່ຮັບປະກັນ ແລະ ສ້າງຄວາມສະດວກໃຫ້ແກ່ການເຄື່ອນໄຫວຂາເຂົ້າ, ຂາອອກຂອງວິສາຫະກິດ, ເພີ່ມທະວີການຄຸ້ມຄອງລັດກ່ຽວກັບພາສີ, ຮັບປະກັນການຮັກສາຄວາມສະຫງົບດ້ານເສດຖະກິດ ແລະ ຜົນປະໂຫຍດແຫ່ງຊາດ. ທ່ານນາຍົກລັດຖະມົນຕີ ຫງວຽນເຕີນຢຸງ ສະເໜີໃຫ້ຂະແໜງ ຈັດຕັ້ງການຜັນຂະຫຍາຍການປະຕິບັດກົນໄກປະຕູດຽວອາຊຽນ ແລະ ກົນໄກພາສີປະຕູດຽວແຫ່ງຊາດ ໃຫ້ຖືກຕາມຄຳໝັ້ນສັນຍາກັບອາຊຽນ, ປະຕິຮູບບໍ່ພຽງແຕ່ເທົ່າທຽມກັບປະເທດຕ່າງໆໃນພາກພື້ນເທົ່ານັ້ນ ຫາກຍັງເທົ່າທຽມກັບບັນດາປະເທດເອີລົບ, ອາເມລິກາອີກດ້ວຍ.