(vovworld) - ຕອນບ່າຍວັນທີ 25/12, ຢູ່ຮ່າໂນ້ຍ, ທ່ານນາຍົກລັດຖະມົນຕີ ຫງວຽນເຕີນຢຸ້ງ ໄດ້ໃຫ້ການຕ້ອນຮັບຄະນະຜູ້ແທນ ຄະນະປະຈຳສະພາບໍລິຫານງານສະມາຄົມພຸດທະສາສະໜາຫວຽດນາມ ໂດຍພະມະຫາອາຈານ ທິ໋ກເຈີນທ້ຽນ, ຮອງປະທານປະຈຳສະພາບໍລິຫານງານສະມາຄົມພຸດທະສາສະໜາຫວຽດນາມ, ນຳໜ້າ. ທ່ານນາຍົກລັດຖະມົນຕີຫງວຽນເຕີນຢຸງ ອວຍພອນຜົນສຳເລັດຂອງກອງປະຊຸມໃຫຍ່ຜູ້ແທນພຸດທະສາສະໜາທົ່ວປະເທດຄັ້ງທີ 7 ອາຍຸການ 2012 – 2017, ທ່ານນາຍົກລັດຖະມົນຕີ ເນັ້ນໜັກວ່າ, ກອງປະຊຸມໃຫຍ່ສະແດງໃຫ້ເຫັນຄວາມສາມັກຄີຂອງສະມາຄົມພຸດທະສາສະໜາຫວຽດນາມ, ກໍຄືການຮ່ວມແຮງຮ່ວມໃຈພ້ອມກັບປະເທດຊາດ ຂອງພຸດທະສາສະໜາຫວຽດນາມ. ທ່ານນາຍົກລັດຖະມົນຕີ ຫວັງວ່າ ຍາມໃດສະມາຄົມພຸດທະສາສະໜາຫວຽດນາມ ກໍເສີມຂະຫຍາຍຈິດໃຈສາມັກຄີ, ມູນເຊື້ອອັນດີງາມຂອງພຸດທະສາສະໜາຫວຽດນາມ; ສືບຕໍ່ມີການປະກອບສ່ວນຢ່າງແທດຈິງເຂົ້າໃນພາລະກິດສ້າງສາ ແລະ ປົກປັກຮັກສາປະເທດ ຫວຽດນາມ ສັງຄົມນິຍົມ. ທ່ານນາຍົກລັດຖະມົນຕີ ຢືນຢັນວ່າ: ຍາມໃດພັກ, ລັດ ກໍສະໜັບສະໜູນ ແລະ ເຄົາລົບສິດເສລີໃນການເຊື່ອຖືສາສະໜາ, ສ້າງທຸກເງື່ອນໄຂສະດວກເພື່ອໃຫ້ສາສະໜາເຄື່ອນໄຫວຢ່າງດີງາມພາຍໃຕ້ກອບກົດໝາຍ... ສ່ວນພະມະຫາອາຈານ ທິ໋ກເຈີນທ້ຽນ ຢືນຢັນວ່າ, ຍາມໃດສະມາຄົມພຸດທະສາສະໜາຫວຽດນາມ ກໍພ້ອມກັບປະເທດຊາດ, ຢູ່ໃນສິນກິນໃນທຳ ເພື່ອສາສະໜາ, ເພື່ອຊາດ ແລະ ເພື່ອລັດທິສັງຄົມນິຍົມ.