ສ້າງໂຄງປະກອບກະສິກຳຕ້ອງຕິດພັນກັບຮູບແບບເຕີບໂຕຢ່າງເໝາະສົມ
ທ່ານຮອງນາຍົກລັດຖະມົນຕີ ຈິ້ງດິ່ງຢຸງ ກ່າວຄວາມເຫັນທີ່
ການເຮັດວຽກກັບກະຊວງກະສິກຳ ແລະ ພັດທະນາຊົນນະບົດ
(ພາບ: VGP)
(vovworld) - ກ່າວຄວາມເຫັນທີ່ການເຮັດວຽກກັບກະຊວງກະສິກຳ ແລະ ພັດທະນາຊົນນະບົດ ກ່ຽວກັບການສ້າງໂຄງປະກອບຂະແໜງຄືນໃໝ່ທີ່ດຳເນີນໃນວັນທີ 25/8, ທ່ານຮອງນາຍົກລັດຖະມົນຕີ ຈິ້ງດິ່ງຢຸງໄດ້ໃສ່ໃຈວ່າ, ການສ້າງໂຄງປະກອບກະສິກຳຕ້ອງຕິດພັນກັບຮູບແບບເຕີບໂຕຢ່າງເໝາະສົມ; ຈາກການອີງໃສ່ຊັບພະຍາກອນ, ຊັບພະຍາກອນມະນຸດເປັນຕົ້ນ, ຕ້ອງຫັນໄປສູ່ຮູບແບບພັດທະນາເສດຖະກິດຕາມລວງເລິກ, ນຳໃຊ້ວິທະຍາສາດ ເຕັກໂນໂລຢີ, ຈາກນັ້ນຍົກສູງສະມັດຕະພາບ, ຄຸນນະພາບ, ມູນຄ່າຜະລິດຕະພັນກະເສດ. ທ່ານຮອງນາຍົກລັດຖະມົນຕີ ຈິ້ງດິ່ງຢຸງ ກໍ່ຊີ້ແຈ້ງວ່າ, ການສ້າງໂຄງປະກອບຂະແໜງກະສິກຳ ແມ່ນຕ້ອງຕິດພັນກັບການພັດທະນາ ແລະ ຄວາມຕ້ອງການຂອງຕະຫຼາດ; ບັນດາແຜນຮ່າງ ແລະ ແຜນການຕ້ອງຕິດພັນກັບການຮັບມືກັບການປ່ຽນແປງຂອງດິນຟ້າອາກາດ ແລະ ການພັດທະນາເສດຖະກິດຂະແໜງອາຊີບຢູ່ເຂດຊົນນະບົດ ແລະ ປົກປັກຮັກສາຊັບພະຍາກອນ ສິ່ງແວດລ້ອມ. ທ່ານຮອງນາຍົກລັດຖະມົນຕີ ຈິ້ງດິ່ງຢຸງ, ຊີ້ແຈ້ງວ່າ:
“ການສ້າງໂຄງປະກອບກະສິກຳ ແມ່ນຂົງເຂດສັບສົນ, ພວກເຮົາບໍ່ໄດ້ຟ້າວເຮັດ, ຫາກຕ້ອງມີເວລາເພື່ອເຮັດເທື່ອລະກ້າວຢ່າງໝັ້ນຄົງ. ຕ້ອງມຸ່ງໄປເຖິງບັນດາຜະລິດຕະພັນເຊິ່ງຕະຫຼາດມີຄວາມຕ້ອງການ, ຈາກນັ້ນຕ້ອງສ້າງບັນດາມາດຕະຖານຜະລິດຕະພັນເພື່ອຕອບສະໜອງຄວາມຕ້ອງການຂອງຕະຫຼາດພາຍໃນປະເທດ ແລະ ຕ່າງປະເທດ. ຄຽງຂ້າງນັ້ນ, ຕ້ອງກຳນົດບັນດາຜະລິດຕະພັນຕົ້ນຕໍ,ມີທ່າໄດ້ປຽບໃນການແກ່ງແຍ້ງ ເພື່ອສ້າງໃຫ້ມີປະລິມານສິນຄ້າຢ່າງຫຼວງຫຼາຍ, ປະກອບສ່ວນຍົກສູງກຳລັງແກ່ງແຍ້ງ ແລະ ຫຼຸດຜ່ອນລາຄາຜະລິດຕະພັນ“.