ຫວຽດນາມຖືເປັນສຳຄັນການພັດທະນາການພົວພັນຄູ່ຮ່ວມມືຮອບດ້ານກັບແດນມາກ
ທ່ານນາຍົກລັດຖະມົນຕີ ຫງວຽນຊວນຟຸກ
ຕ້ອນຮັບທ່ານນາງ Charlotte Laursen
(vovworld) - ຕອນບ່າຍວັນທີ 05/09, ຢູ່ຮ່າໂນ້ຍ, ທີ່ການຕ້ອນຮັບທ່ານນາງ Charlotte Laursen ເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງລາຊະອານາຈັກ ແດນມາກ ປະຈຳ ຫວຽດນາມ, ທ່ານນາຍົກລັດຖະມົນຕີ ຫງວຽນຊວນຟຸກ ອວຍພອນທ່ານນາງ Charlotte Laursen ໄດ້ຮັບການແຕ່ງຕັ້ງເປັນເອກອັກຄະລັດຖະທູດ ແດນມາກ ປະຈຳ ຫວຽດນາມ. ທ່ານນາຍົກລັດຖະມົນຕີ ຫງວຽນຊວນຟຸກ ຢືນຢັນວ່າ: ຫວຽດນາມ ຖືເປັນສຳຄັນພັດທະນາການພົວພັນຄູ່ຮ່ວມມືຮອບດ້ານກັບ ແດນມາກ. ທ່ານນາຍົກລັດຖະມົນຕີ ຫງວຽນຊວນຟຸກ ເຊື່ອໝັ້ນວ່າ ສັນຍາການຄ້າເສລີ ຫວຽດນາມ - ສະຫະພາບ ເອີລົບ (ອີຢູ) ໃກ້ຈະໄດ້ຮັບການລົງນາມຢ່າງເປັນທາງການນັ້ນ ຈະເປີດກາລະໂອກາດຮ່ວມມືໃໝ່ຫລາຍຢ່າງໃຫ້ປະຊາຄົມວິສາຫະກິດ 2 ປະເທດ. ທ່ານນາຍົກລັດຖະມົນຕີ ຫງວຽນຊວນຟຸກ ປາດຖະໜາວ່າ ແດນມາກ ສືບຕໍ່ໜູນຊ່ວຍ ODA ໃຫ້ ຫວຽດນາມ ໃນຂົງເຂດສິ່ງແວດລ້ອມ, ພ້ອມທັງສົ່ງເສີມວິສາຫະກິດ ແດນມາກ ດ້ວຍທ່າແຮງ ໃນຂົງເຂດສິ່ງແວດລ້ອມຈະລົງທຶນເຂົ້າ ຫວຽດນາມ. ທ່ານນາຍົກລັດຖະມົນຕີ ຫງວຽນຊວນຟຸກ ຖືວ່າ: ວົງເງິນການຄ້າ 2 ຝ່າຍຫາກໍ່ບັນລຸໄດ້ກ່ວາ 534 ລ້ານ USD ປີ 2015 ແມ່ນຍັງບໍ່ທັນເໝາະສົມກັບຄວາມສາມາດບົ່ມຊ້ອນເທື່ອ, ທ່ານນາຍົກລັດຖະມົນຕີ ປາດຖະໜາວ່າ 2 ຝ່າຍຈະຊຸກຍູ້ການຮ່ວມມື ເພື່ອນຳຕົວເລກດັ່ງກ່າວຂຶ້ນທົບສອງເທົ່າ.
ສ່ວນທ່ານນາງ Charlotte Laursen ໃຫ້ຮູ້ວ່າ: ໃນເດືອນ 10 ຈະມາເຖິງ, ລັດຖະມົນຕີການຕ່າງປະເທດ ແດນມາກ ອາດຈະມາຢ້ຽມຢາມ ຫວຽດນາມ ເພື່ອແນໃສ່ຊຸກຍູ້ການພົວພັນຮ່ວມມືລະຫວ່າງ 2 ປະເທດໃນຫລາຍຂົງເຂດ, ພິເສດແມ່ນຂົງເຂດການຄ້າ. ໃນຖານະຕຳແໜ່ງເປັນເອກອັກຄະລັດຖະທູດ ທ່ານນາງ Charlotte Laursen ຢືນຢັນວ່າ ຈະມານະພະຍາຍາມປະກອບສ່ວນເຂົ້າສາຍພົວພັນລະຫວ່າງ 2 ປະເທດໃນທຸກຂົງເຂດຢ່າງແທດຈິງ ແລະ ມີປະສິດທິຜົນ.