ຫວຽດນາມ-ອາເມລິກາຊຸກຍູ້ການຮ່ວມມືດ້ານປ້ອງກັນຊາດ2ຝ່າຍ
ທ່ານ Frank A. Rose ແລະ ພົນໂທ ຫງວຽນຈີ໋ວີ້ງ
|
(vovworld) – ຕອນເຊົ້າວັນທີ 13/7, ຢູ່ຮ່າໂນ້ຍ, ພົນໂທ ຫງວຽນຈີ໋ວີ້ງ, ລັດຖະມົນຕີຊ່ວຍວ່າການກະຊວງປ້ອງກັນປະເທດ ຫວຽດນາມ ໄດ້ໃຫ້ການຕ້ອນຮັບທ່ານ Frank A. Rose, ຜູ້ຊ່ວຍວຽກລັດຖະມົນຕີວ່າການກະຊວງການຕ່າງປະເທດ ອາເມລິກາ ຮັບຜິດຊອບກົມຄວບຄຸມ ແລະ ກວດກາອາວຸດ, ເນື່ອງໃນໂອກາດທ່ານພວມມີການຢ້ຽມຢາມ ແລະ ເຮັດວຽກຢູ່ ຫວຽດນາມ. ພົນໂທ ຫງວຽນຈີ໋ວີ້ງ ຕີລາຄາສູງບົດບາດຂອງ ອາເມລິກາ ໃນພາກພື້ນ ແລະ ປາດຖະໜາຢາກຮ່ວມມືກັບ ອາເມລິກາ ໂດຍອີງໃສ່ຫຼັກການເຄົາລົບກົດບັດ ສປຊ, ກົດໝາຍສາກົນ, ເຄົາລົບລະບົບການເມືອງ, ເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງແຕ່ລະປະເທດ, ຕີລາຄາສູງເລື່ອງ ອາເມລິກາ ຍົກເລີກສ່ວນໜຶ່ງຂອງຄຳສັ່ງຂວ້ຳບາດອາວຸດ ສຳລັບ ຫວຽດນາມ ໃນຂົງເຂດຄວາມໝັ້ນຄົງທາງທະເລ. ທ່ານພົນໂທ ຫງວຽນຈີ໋ວີ້ງ ເນັ້ນໜັກວ່າ: ຫວຽດນາມ ປາດຖະໜາຢາກໃຫ້ ອາເມລິກາ ຍົກເລີກຄຳສັ່ງຂວ້ຳບາດດ້ານອາວຸດຢ່າງສົມບູນສຳລັບ ຫວຽດນາມ, ປະກອບສ່ວນແທດຈິງຊຸກຍູ້ການພົວພັນຄູ່ຮ່ວມມືຮອບດ້ານ ຫວຽດນາມ - ອາເມລິກາ. ພົນໂທ ຫງວຽນຈີ໋ວີ້ງ ສະເໜີວ່າ: ໄລຍະຈະມາເຖິງ, 2 ຝ່າຍສືບຕໍ່ຜັນຂະຫຍາຍການພົວພັນຕາມຈິດໃຈຄູ່ຮ່ວມມືຮອບດ້ານໂດຍປະມຸກລັດ 2 ປະເທດສ້າງຕັ້ງເມື່ອປີ 2013, ບົດບັນທຶກຊ່ວຍຈຳກ່ຽວກັບການຮ່ວມມືດ້ານປ້ອງກັນຊາດ 2 ຝ່າຍ (MOU) ເຊັນກັນເມື່ອປີ 2011 ແລະ ຖະແຫຼງການວິໄສທັດຮ່ວມກ່ຽວກັບການພົວພັນດ້ານປ້ອງກັນຊາດເຊັນກັນເມື່ອປີ 2015, ຕາມທິດແທດຈິງ, ມີປະສິດທິຜົນ, ເໝາະສົມກັບຄວາມສາມາດ ແລະ ຄວາມຕ້ອງການຂອງແຕ່ລະຝ່າຍ. ທ່ານ Frank A. Rose ຢັ້ງຢືນຈະເຮັດຈົນສຸດຄວາມສາມາດຂອງຕົນພ້ອມກັບກອງທັບ 2 ປະເທດເພີ່ມທະວີຕາມບັນດາເນື້ອໃນທີ່ໄດ້ກຳນົດໃນ MOU ແລະ ຖະແຫຼງການວິໄສທັດຮ່ວມກ່ຽວກັບການພົວພັນຮ່ວມມືດ້ານປ້ອງກັນຊາດເຊັນກັນປີ 2015, ສຸມໃສ່ຮ່ວມມືແກ້ໄຂຜົນຮ້າຍຢ້ອນຫຼັງຈາກສົງຄາມ, ການເຄື່ອນໄຫວຮັກສາສັນຕິພາບຂອງ ສປຊ, ຄວາມໝັ້ນຄົງທາງທະເລ ແລະ ການຮ່ວມມືດ້ານເສນາຮັກ.