ເພີ່ມທະວີການພົວພັນລະຫວ່າງກະຊວງຕຳຫຼວດຫວຽດນາມ ກັບບັນດາອົງການປະຕິບັດກົດໝາຍ ສີລັງກາ
ເຈລະຈາລະຫວ່າງກະຊວງຕຳຫຼວດຫວຽດນາມ ແລະ
ກະຊວງກົດໝາຍ ແລະ ຄວາມເປັນລະບຽບຮຽບຮ້ອຍ ສີລັງກາ
(ພາບ: cand.com.vn)
(vovworld) – ຕອນບ່າຍວັນທີ 21/07, ຢູ່ສຳນັກງານລັດຖະບານ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ໄດ້ໃຫ້ການຕ້ອນຮັບຄະນະຜູ້ແທນຂັ້ນສູງກະຊວງກົດໝາຍ ແລະ ຄວາມເປັນລະບຽບຮຽບຮ້ອຍ ສີລັງກາ ໂດຍທ່ານລັດຖະມົນຕີກະຊວງກົດໝາຍ ແລະ ຄວາມເປັນລະບຽບຮຽບຮ້ອຍ ສີລັງກາ Mallawaarachchi ເປັນຫົວໜ້າຄະນະ, ພວມຢ້ຽມຢາມ ແລະ ເຮັດວຽກຢູ່ຫວຽດນາມ. ທີ່ການຕ້ອນຮັບ, ທ່ານຮອງນາຍົກລັດຖະມົນຕີ ຫງວຽນຊວນຟຸກ ໄດ້ສະເໜີໃຫ້ກະຊວງກົດໝາຍ ແລະ ຄວາມເປັນລະບຽບຮຽບຮ້ອຍ ສີລັງກາ ສືບຕໍ່ສົມທົບກັບກະຊວງຕຳຫຼວດຫວຽດນາມ ຢ່າງແໜ້ນແຟ້ນໃນວຽກງານຕໍ່ສູ້ກັບບັນດາອົງການອາດຊະຍາກຳ, ໂດຍສະເພາະແມ່ນອາດຊະຍາກຳດ້ານເສດຖະກິດ, ສິນເຊື່ອ, ການຄ້າເອເລັກໂຕນິກ; ການປ້ອງກັນຄວາມສະຫງົບ, ຄວາມປອດໄພໃຫ້ແກ່ບັນດາຄະນະຜູ້ແທນຂັ້ນສູງ 2 ປະເທດ; ຮັບປະກັນສິດຜົນປະໂຫຍດອັນຊອບທຳໃຫ້ແກ່ພົນລະເມືອງຂອງປະເທດນີ້ອາໄສຢູ່ປະເທດອື່ນ, ສະໜັບສະໜູນເຊິ່ງກັນ ແລະ ກັນບົນເວທີປາໄສສາກົນ ແລະ ພາກພື້ນ. ທ່ານ Mallawaarachchi ໃຫ້ຮູ້ວ່າ ຈະເຮັດຈົນສຸດຄວາມສາມາດຂອງຕົນເພື່ອນຳການພົວພັນຮ່ວມມືລະຫວ່າງ ກະຊວງຕຳຫຼວດຫວຽດນາມ ກັບກະຊວງກົດໝາຍ ແລະ ຄວາມເປັນລະບຽບຮຽບຮ້ອຍ ສີລັງກາ ຂຶ້ນສູ່ລະດັບສູງໃໝ່, ນຳການພົວພັນລະຫວ່າງ 2 ປະເທດໃຫ້ບັນລຸປະສິດທິຜົນໃນການຮ່ວມມືປ້ອງກັນ, ຕ້ານອາດຊະຍາກຳ.
ກ່ອນໜ້ານັ້ນ, ພົນໂທ ດັ້ງວັນຮ໋ຽວ, ຮອງລັດຖະມົນຕີຜູ້ປະຈຳການກະຊວງຕຳຫຼວດຫວຽດນາມ ໄດ້ໃຫ້ການຕ້ອນຮັບ ແລະ ເຈລະຈາກັບຄະນະຜູ້ແທນຂັ້ນສູງກະຊວງກົດໝາຍ ແລະ ຄວາມເປັນລະບຽບຮຽບຮ້ອຍ ສີລັງກາ. ພົນໂທ ດັ້ງວັນຮ໋ຽວ ສະເໜີໃຫ້ກະຊວງຕຳຫຼວດຫວຽດນາມ ແລະ ບັນດາອົງການປະຕິບັດກົດໝາຍສີລັງກາ ຈັດຕັ້ງການຜັນຂະຫຍາຍກົນໄກການເຈລະຈາ ຫຼື ກອງປະຊຸມຂັ້ນກະຊວງ ກ່ຽວກັບຄວາມສະຫງົບລະຫວ່າງ 2 ກະຊວງ 2 ປີ/ເທື່ອໜຶ່ງຢ່າງມີປະສິດທິຜົນ.