ໂດຍນອນຢູ່ຫ່າງຈາກເທດສະບານເມືອງຮ່າຕຽນ ປະມານ 30 ກິໂລແມັດ, ໝູ່ເກາະຫາຍຕັກແປວ່າ ໂຈນສະລັັດໄດ້ຮັບຖືວ່າ ແມ່ນແກ້ວມະນີດິບຂອງພື້ນຖານທ່ອງທ່ຽວແຂວງກຽນຢາງ. ບໍ່ມີຊື່ສຽງຄືກັບເກາະຟູ້ກ໋ວກ ແລະ ໝູ່ເກາະນາມຢູ, ແຕ່ໝູ່ເກາະຫາຍຕັກ ທີ່ຂຶ້ນກັບຕາແສງຕຽນຫາຍ ໄດ້ດຶງດູດໃຈແຂກທ່ອງທ່ຽວດ້ວຍຊື່ເອີ້ນທີ່ລຶກລັບ, ຄວາມງາມທີ່ຮົກເຮື້ອ ແລະ ຊີວິດແບບລຽບງ່າຍຂອງປະຊາຊົນໃນເກາະ. ໃນຊຸມປີທີ່ຜ່ານມາ, ເທດສະບານເມືອງຮ່າຕຽນໄດ້ສຸມໃສ່ລົງທຶນດ້ານແຫຼ່ງກຳລັງເພື່ອນແນໃສ່ນຳຕາແສງຕຽນຫາຍ ແລະ ໝູ່ເກາະຫາຍຕັກກາຍເປັນສະຖານທີ່ທ່ອງທ່ຽວທີ່ດູດດື່ມຂອງຕາແສງ.
ໝູ່ເກາະຫາຍຕັກ - ສະຖານທີ່ທ່ອງທ່ຽວທີ່ດູດດື່ມ ສຳລັບແຂກທ່ອງທ່ຽວ (baomoi) |
ໝູ່ເກາະຫາຍຕັກແມ່ນຂຶ້ນກັບຕາແສງຕຽນຫາຍ, ໃນນັ້ນ, ເກາະແຈເລີ້ນຫຼືເອີ້ນວ່າ ເກາະດົກແມ່ນໃຈກາງຕາແສງຕຽນຫາຍຊຶ່ງເປັນແຫ່ງເຕົ້າໂຮມປະຊາຊົນດຳລົງຊີວິດຢ່າງໜາແໜ້ນ. ໝູ່ເກາະຫາຍຕັກປະກອບດ້ວຍເກາະດອນນ້ອຍໃຫຍ່ 16 ແຫ່ງຊຶ່ງປະຊາຊົນໄດ້ເອີ້ນດ້ວຍຊື່ທີ່ເປັນເອກະລັກສະເພາະວ່າ : ເກາະແກວເງື້ອ, ເກາະກ້ຽນວ່າງ, ເກາະແຈເລີ້ນ, ແຈວິງ, ເກາະກຸຍ, ເກາະອູ, ເກາະຮ່ອນຢາງ…
ກໍເຊັ່ນດຽວກັນກັບປະຊາຊົນຢູ່ເຂດທະເລອື່ນໆ, ປະຊາຊົນຢູ່ແຫ່ງນີ້ນັບແຕ່ໃດໆມາ, ຍັງຄົງດຳລົງຊີວິດດ້ວຍອາຊີບຈັດຫາ, ລ້ຽງປູກສິນໃນນ້ຳ. ທັງຕາແສງເກາະໃນປະຈຸບັນມີປະມານ 70 ຄອບຄົວປະກອບອາຊີບລ້ຽງປາໃນກະຊັງດ້ວຍຈຳນວນກວ່າ 200 ກະຊັງ, ຊຶ່ງຕົ້ນຕໍແມ່ນສິນທະເລທີ່ມີມຸນຄ່າສູງ. ຍ້ອນຖືກຊ້ອນຕົວໃນອ່າວຮ່າຕຽນ - ແຣກຢ້າ ແລະ ອ່າວໄທ, ດັ່ງນັ້ນບໍລະເວນທະເລນີ້ບໍ່ເຄີຍປະສົບກັບພາຍຸ, ນ້ຳທະເລຢູ່ນີ້ ຂຽວເຢັນ ແລະ ບໍ່ຖືກມົນລະພິດ, ດັ່ງນັ້ນມີຄວາມສະດວກຫຼາຍຢ່າງໃນການລ້ຽງປູກສິນໃນນ້ຳກໍຄືພັດທະນາການທ່ອງທ່ຽວ. ລຸງຮົ່ງຊວນເທີນ ຢູ່ໜ່ວຍ 5, ບ້ານຮ່ອນແຈ, ຕາແສງຕຽນຫາຍ ຊຶ່ງແມ່ນຜູ້ໄດ້ກຳເນີດ ແລະ ເຕີບໃຫຍ່ຢູ່ຕາແສງເກາະນີ້ໃຫ້ຮູ້ວ່າ : ຊຸມປີກ່ອນນີ້, ຊາວປະມົງພຽງແຕ່ເດີນທະເລໄປຫາປາເທົ່ານັ້ນ, ແຕ່ໃນປະຈຸບັນ, ແຂກທ່ອງທ່ຽວມາທ່ອງທ່ຽວຢູ່ເກາະແຫ່ງນີ້ນັບມື້ນັບຫຼາຍຂຶ້ນ. ເມື່ອເຂົາເຈົ້າມາທ່ຽວ, ເຮົາກໍໄດ້ຕ້ອນຮັບເຂົາມານອນເຮືອນຂອງຕົນ ພ້ອມທັງພາເຂົາເຈົ້າໄປຢ້ຽມຊົມການລ້ຽງປາໃນກະຊັງ, ຂີ່ເຮືອອ້ອມເກາະ, ງົມຈັບຫອຍ, ກະປູ. ຍ້ອນເຫດນີ້ເອງ, ໝູ່ເກາະຢູ່ຫ່າງໄກສອກຫຼີກນີ້ຈຶ່ງຄຶກຄື້ນມ່ວນຊື່ນຫຼາຍຂຶ້ນ. ປະຊາຊົນໃນເກາະກໍມີວຽກເຮັດງານທຳເພື່ອເພີ່ມລາຍຮັບ. ລຸງຮົ່ງຊວນເທີນ ໃຫ້ຮູ້ວ່າ :
“ ຢູ່ນີ້, ບາງຄັ້ງບາງຄາວ ມີແຂກທ່ອງທ່ຽວຢາກມາຢ້ຽມຊົມ, ເຮົາກໍຊ່ວຍເຫຼືອ. ເມື່ອມີຄະນະນັກທ່ອງທ່ຽວເຂົ້າມາທ່ອງທ່ຽວ, ທາງທ້ອງຖິ່ນກໍມີລາຍໄດ້ຕື່ມອີກ. ຍົກຕົວຢ່າງເຊັ່ນເຮັດບໍລິການການກິນ, ການຢູ່, ພ້ອມກັນນັ້ນ ປະຊາຊົນກໍມີວຽກເຮັດງານທຳ ແລະ ເພີີ່ມລາຍຮັບ ”
ຄວາມດູດດື່ມຢູ່ເກາະແຫ່ງນີ້, ທຳອິດແມ່ນກ່ຽວກັບຊື່ເອີ້ນຊຶ່ງມີພຽງແຕ່ໜຶ່ງບໍ່ມີສອງຂອງມັນ. ແຂກທ່ອງທ່ຽວເມື່ອມາແຫ່ງນີ້ເປັນຄັ້ງທຳອິດ, ສ່ວນຫຼວງຫຼາຍກໍຍ້ອນຢາກຊອກຄົ້ນຫາກ່ຽວກັບແຫ່ງທີ່ມີຊື່ເອີ້ນທີ່ແປກປະຫຼາດນີ້. ແຕ່ເມື່ອໄດ້ມາຢ້ຽມຊົມຢູ່ເກາະແຫ່ງນີ້, ໄດ້ເຫັນຄວາມງາມຂອງຫາດຊາຍຂາວທີ່ຍາວຢຽດສຸດສາຍຕາ, ແສງແດນທີ່ອົບອຸ່ນສາດສ່ອງລົງມາໜ້ານ້ຳທະເລທີ່ຂຽວເຢັນ ພ້ອມທັງໄດ້ຮັບຟັງເລື່ອງລາວເລົ່າສານສືບກັນມາກ່ຽວກັບບັນດາກອງໂຈນສະລັດທີ່ຕິດພັນກັບປະຫວັດຄວາມເປັນມາຂອງດິນແດນແຫ່ງນີ້ ກໍແມ່ນຄວາມປະທັບໃຈທີ່ສຸດສຳລັບແຂກທ່ອງທ່ຽວທັງຫຼາຍ. ອ້າຍຫງວຽນແທງຢາງ ແຂກທ່ອງທ່ຽວທີ່ມາຈາກແຂວງ ອານຢາງ ເປີດເປີຍວ່າ :
“ ເມື່ອໄດ້ຮັບຟັງການແນະນຳຂອງໝູ່ເພື່ອນກ່ຽວກັບເກາະຫາຍຕັກທີ່ຍັງຮົກເຮື້ອ, ດັ່ງນັ້ນເຮົາຢາກໄປຄົ້ນຫາເບິ່ງວ່າ ຈະເປັນແນວໃດ. ມາທ່ອງທ່ຽວຢູ່ແຫ່ງນີ້ ບໍ່ຄືກັບສະຖານທີ່ທ່ອງທ່ຽວອື່ນຄືໄດ້ພັກຢູ່ໂຮງແຮມ, ບ້ານພັກ, ໄດ້ກິນເຂົ້າໃນພັດທະຄານ. ຢູ່ນີ້ແມ່ນໄດ້ນອນໃນເຮືອນຕູບມຸງຫຍ້າທີ່ຮົກເຮື້ອ ແລະ ເຢັນສະບາຍ. ເຮົາມັກທີ່ສຸດ ”
ໃນປີ 2015 ທີ່ຜ່ານມາ, ຕາແສງເກາະຕຽນຫາຍດຶງດູດແຂກທ່ອງທ່ຽວເຂົາມາທ່ອງທ່ຽວໄດ້ 30.000 ເທື່ອຄົນ, ອັນໄດ້ນຳລາຍໄດ້ເກືອບ 8 ຕື້ດົງມາໃຫ້ທ້ອງຖິ່ນ. ທ່ານຕັງຮົ່ງເຟືອກ ປະທານຄະນະກຳມະການປະຊາຊົນ ຕາແສງຕຽນຫາຍ ໃຫ້ຮູ້ວ່າ : ເພື່ອຂຸດຄົ້ນບັນດາຄວາມງາມໂດຍທຳມະຊາດໄດ້ດົນບັນດານໃຫ້ໝູ່ເກາະແຫ່ງນີ້, ທາງແຂວງກຽນຢາງໄດ້ເຫັນດີໃຫ້ບັນດານັກລົງທຶນເຊົ່າເກາະບາງແຫ່ງໃນ ໝູ່ເກາະຫາຍຕັກເພື່ອພັດທະນາບັນດາເຂດທ່ອງທ່ຽວທະເລ, ເຂດພັກຜ່ອນບຳລຸງສຸຂະພາບ, ເຂດກິລາທະເລ ແລະ ບັນດາການບໍລິການບັນເທິງ, ທ່ອງທ່ຽວອື່ນໆໃນເກາະຕ່າງໆ. ພ້ອມກັນນັ້ນ, ພື້ນຖານໂຄງລ່າງກໍໄດ້ຮັບການລົງທຶນໃນເກາະເຊັ່ນ: ທາງອ້ອມເກາະ, ລະບົບສະໜອງນ້ຳສະອາດ, ໃຫ້ປະຊາຊົນກູ້ຢືມທຶນເພື່ອກໍ່ສ້າງເຮືອນພັກ...ເພື່ອສ້າງທ່ວງທ່າໃຫ້ຕາແສງຕຽນຫາຍພັດທະນາການທ່ອງທ່ຽວ. ທ່ານຕັງຮົ່ງເຟືອກ ປະທານຄະນະກຳມະການປະຊາຊົນ ຕາແສງຕຽນຫາຍ ໃຫ້ຮູ້ວ່າ :
“ ໃນຈຳນວນສະຖານທີ່ເປົ້າໝາຍລົງທຶນດ້ານການທ່ອງທ່ຽວນັ້ນ, ແມ່ນມີຕາແສງຕຽນຫາຍ. ໃນອະນາຄົດຖ້າຫາກໄດ້ຮັບການລົງທຶນຢ່າງຄົບຊຸດນັ້ນ, ຂະແໜງທ່ອງທ່ຽວຂອງ ຕາແສງຕຽນຫາຍຈະພັດທະນາຢ່າງວ່ອງໄວ ”
ສະເພາະປີນີ້, ມີກິດຈະກຳໃຫຍ່ຫຼາຍແຫ່ງຈະໄດ້ຮັບການຜັນຂະຫຍາຍດຳເນີນກໍ່ສ້າງຢູ່ ຕາແສງຕຽນຫາຍເຊັ່ນ: ສູນກາງປົກຄອງຕາແສງ, ຕະຫຼາດ, ເຂດຊຸມຊົນ, ທ່າເຮືອ, ເຂດທ່ອງທ່ຽວຊີວະພາບ, ໂຮງງານກຳຈັດຂີ້ເຫຍື້ອ, ສິ່ງເສດເຫຼືອ ແລະ ຄາດວ່າໃນປີ 2017, ຕາແສງຕຽນຫາຍຍັງຈະເຊື່ອມຕໍ່ກັບຕາຂ່າຍໄຟຟ້າແຫ່ງຊາດ ຊຶ່ງຈະຊ່ວຍເພີີ່ມຄວາມງາມຢູ່ເກາະແຫ່ງນີ້. ຍ້ອນເຫດນີ້ເອງ, ໃນອະນາຄົດອັນໃກ້ໆນີ້, ການທ່ອງທ່ຽວຢູ່ໝູ່ເກາະຫາຍຕັກຈະພັດທະນາຢ່າງແຂງແຮງເພື່ອຕ້ອນຮັບແຂກທ່ອງທ່ຽວຈາກສາລະທິດ, ທັງໃກ້ ແລະ ໄກເຂົ້າມາຄົ້ນຫາ.