(vovworld)- ກອງປະຊຸມສຸດຍອດຄັ້ງທີ 7 ເຂດສາມຫລ່ຽມພັດທະນາ ກຳປູເຈຍ, ລາວ, ຫວຽດນາມ ຫາກໍດຳເນີນໄປຢູ່ນະຄອນຫລວງ ວຽງຈັນ ໄດ້ຢືນຢັນຄວາມຕັດສິນໃຈຍູ້ແຮງການພົວພັນຮ່ວມມືຮອບດ້ານລະຫວ່າງ ສາມປະເທດກວ່າອີກ. ກອງປະຊຸມກໍໄດ້ໃຫ້ຄຳໝັ້ນສັນຍາກໍ່ສ້າງເຂດສາມຫລ່ຽມພັດທະນາໃຫ້ກົມກຽວ ແລະ ວັດທະນາຖາວອນ ຜ່ານການສືບຕໍ່ເປີດກວ້າງ, ຍົກສູງປະສິດທິຜົນ, ຄຸນນະພາບການຮ່ວມມື ແລະ ຊຸກຍູ້ການພັດທະນາເສດຖະກິດສັງຄົມຢູ່ບັນດາທ້ອງຖິ່ນໃນເຂດ.
ນາຍົກລັດຖະມົນຕີ ກຳປູເຈຍ, ລາວ ແລະ ຫວຽດນາມ ລົງນາມໃນຖະແຫລງການຮ່ວມ
ພາບ:internet
|
ກອງປະຊຸມສຸດຍອດເຂດສາມຫລ່ຽມພັດທະນາ ກຳປູເຈຍ - ລາວ, ຫວຽດນາມ ດຳເນີນໄປໃນສະພາບການຮ່ວມມືອະນຸພາກພື້ນແມ່ນ້ຳຂອງເວົ້າລວມ ແລະ ລະຫວ່າງສາມປະເທດເວົ້າສະເພາະ ນັບມື້ນັບຟົດຟື້ນ ແລະ ດຶງດູດຄວາມສົນໃຈຈາກບັນດາຄູ່ຮ່ວມມືພາຍນອກ. ບົດລາຍງານຂອງຄະນະກຳມະການປະສານງານ ກຳປູເຈຍ, ລາວ - ຫວຽດນາມ ທີ່ກອງປະຊຸມໃຫ້ຮູ້ວ່າ: ການຮ່ວມມືເຂດສາມຫລ່ຽມພັດທະນາ ກຳປູເຈຍ, ລາວ - ຫວຽດນາມ ໃນຊຸມປີຜ່ານມາບັນລຸໝາກຜົນສຳຄັນຫລາຍຢ່າງໃນຫລາຍຂົງເຂດຄື: ການປ້ອງກັນຄວາມສະຫງົບ, ການເມືອງ, ເສດຖະກິດສັງຄົມ, ປະກອບສ່ວນຍົກສູງຊີວິດການເປັນຢູ່ຂອງປະຊາຊົນ ແລະ ປັບປຸງການພົວພັນຮ່ວມມືລະຫວ່າງບັນດາແຂວງ ຊາຍແດນ. ເຖິງຢ່າງໃດກໍຕາມ, ໝາກຜົນດັ່ງກ່າວບໍ່ທັນສົມກັບຄວາມສາມາດບົ່ມຊ້ອນຂອງເຂດສາມຫລ່ຽມພັດທະນາ. ເພື່ອຍູ້ແຮງວິວັດການພັດທະນາຂອງເຂດສາມຫລ່ຽມພັດທະນານີ້, ກອງປະຊຸມໄດ້ເປັນເອກະພາບຄວນມີການປະສານສົມທົບຮ່ວມລະຫວ່າງສາມປະເທດ ພ້ອມທັງສຸມໃສ່ລົງທຶນໃຫ້ແກ່ພື້ນຖານໂຄງລ່າງເພື່ອເຊື່ອມຕໍ່ບັນດາທ້ອງຖິ່ນໃນເຂດ ແລະ ກັບບັນດາແລວເສດຖະກິດ. ທ່ານ ດັ້ງຊວນກວາງ, ຮອງຫົວຫນ້າກົມລົງທຶນຕ່າງປະເທດ, ສັງກັດກະຊວງແຜນການ ແລະ ການລົງທຶນ ຫວຽດນາມ ເວົ້າວ່າ:
“ເມື່ອທຽບໃສ່ເຂດອື່ນ ພື້ນຖານໂຄງລ່າງຂອງເຂດສາມຫລ່ຽມພັດທະນາ ກຳປູເຈຍ, ລາວ - ຫວຽດນາມ ບໍ່ທັນສະດວກປານໃດ ແລະ ບໍ່ທັນຕອບສະຫນອງຄວາມຮຽກຮ້ອງຕ້ອງການຂອງການດຶງດູດການລົງທຶນໃນໄລຍະຈະມາເຖິງໄດ້. ຂ້າພະເຈົ້າຖືວ່າ ຖ້າຫາກສາມປະເທດ ກຳປູເຈຍ, ລາວ - ຫວຽດນາມ ເປັນເອກະພາບນະໂຍບາຍທີ່ກ່ຽວຂ້ອງເຖິງການຊຸກຍູ້ການລົງທຶນເຂົ້າເຂດສາມຫລ່ຽມພັດທະນາ ແລະ ໂຄງການດຳເນີນງານນຳກັນ ຈະບັນລຸປະສິດທິຜົນກວ່າ.”
ທີ່ກອງປະຊຸມ, ທ່ານນາຍົກລັດຖະມົນຕີ ຫງວຽນເຕີນຢູງ, ນາຍົກລັດຖະມົນຕີ ລາວ ທອງສິງ ທຳມະວົງ ແລະ ນາຍົກລັດຖະມົນຕີ ກຳປູເຈຍ ສົມເດັດ ຮຸນແຊນ ພ້ອມກັນຕີລາຄາສູງບັນດາຄວາມານະພະຍາຍາມພັດທະນາເສດຖະກິດ ສັງຄົມຂອງບັນດາທ້ອງຖິ່ນໃນເຂດສາມຫລ່ຽມພັດທະນາ, ຢືນຢັນຄວາມຕັດສິນໃຈຍູ້ແຮງການພົວພັນຮ່ວມມືຮອບດ້ານລະຫວ່າງສາມປະເທດບົນພື້ນຖານເສີມຂະຫຍາຍຈິດໃຈເອກະລາດ, ເປັນເຈົ້າ, ຮ່ວມມືຢ່າງສະເຫມີພາບ, ຕ່າງຝ່າຍຕ່າງມີຜົນປະໂຫຍດ ເພື່ອຄວາມວັດທະນາຖາວອນຂອງແຕ່ລະປະເທດ. ກ່ຽວກັບມາດຕະການຊຸກຍູ້ການຮ່ວມມືກໍຄືດຶງດູດການລົງທຶນເຂົ້າເຂດສາມຫລ່ຽມພັດທະນາໃນໄລຍະຈະມາເຖິງ, ທ່ານນາຍົກລັດຖະມົນຕີ ຫງວຽນເຕີນຢູງ ເນັ້ນຫນັກວ່າ:
“ເພື່ອໃຫ້ການຮ່ວມມືລະຫວ່າງສາມປະເທດ ກຳປູເຈຍ, ລາວ - ຫວຽດນາມ ບັນລຸປະສິດທິຜົນສູງ ແລະ ສົມກັບຄວາມສາມາດບົ່ມຊ້ອນຂອງເຂດສາມຫລ່ຽມພັດທະນາ ແລະ ການພົວພັນທີ່ເປັນມູນເຊື້ອອັນດີງາມລະຫວ່າງສາມປະເທດ, ລັດຖະບານ ສາມປະເທດຄວນມີບາດກ້າວເດີນຢ່າງແຮງແຂງ ແລະ ເດັດດ່ຽວກວ່າອີກ. ກອງປະຊຸມຄັ້ງກ່ອນນີ້ ພວກເຮົາໄດ້ດັດປັບການວາງແຜນກຳນົດສັງລວມໃຫ້ສອດຄອ່ງກັບສະພາບການໃຫມ່ ແລະ ຄວາມຕ້ອງການພັດທະນາຂອງເຂດສາມຫລ່ຽມພັດທະນາ. ທີ່ກອງປະຊຸມຄັ້ງນີ້ ພວກເຮົາພ້ອມກັນປຶກສາຫາລືຍົກອອກຄຳເຫັນຊີ້ນຳ, ກຳນົດທິດໃຫ້ແກ່ຄະນະກຳມະການປະສານງານ, ຈັດຕັ້ງການປຶກສາຫາລື ແລະ ຜັນຂະຫຍາຍບັນດາມາດຕະການຢ່າງມີປະສິດທິຜົນເພື່ອຍົກສູງກຳລັງຄວາມສາມາດການຜະລິດ, ລັກສະນະແກ້ງແຍ້ງ ແລະ ຄວາມສາມາດດຶງດູດການລົງທຶນ, ການຫນູນຊ່ວຍຈາກພາຍນອກຂອງ 13 ແຂວງໃນເຂດ.”
ດ່ານຊາຍແດນ ພູເກືອ
ພາບ:internet
|
ການນຳສາມປະເທດ ກຳປູເຈຍ, ລາວ - ຫວຽດນາມ ເປັນເອກະພາບກັນວ່າ: ການຮ່ວມມືເຂດສາມຫລ່ຽມພັດທະນາສືບຕໍ່ໄດ້ຮັບການຍູ້ແຮງ, ໃນນັ້ນ ບຸລິມະສິດການພັດທະນາຂະແຫນງອຸດສາຫະກຳຢາງພາລາ, ສຸມໃສ່ພັດທະນາແຫລ່ງຄົນງານມີຄຸນນະພາບສູງ ຮັບໃຊ້ບັນດາໂຄງການລົງທຶນຢູ່ເຂດສາມຫລ່ຽມພັດທະນາ. ນອກນັ້ນ ການເປັນເຈົ້າການ ແລະ ຕັ້ງຫນ້າປະຕິບັດການເຄື່ອນໄຫວສົ່ງເສີມການລົງທຶນ ແລະ ການຄ້າ, ຮັບປະກັນຄວາມສະຫງົບປອດໄພ ແລະ ຄວາມເປັນປົກກະຕີ ໃຫ້ແກ່ບັນດານັກລົງທຶນກໍຄືປະຊາຊົນຢູ່ເຂດສາມຫລ່ຽມພັດທະນາ ກໍແມ່ນຫນຶ່ງໃນບັນດາບັນຫາທີ່ໄດ້ຮັບຄວາມເອົາໃຈໃສ່ຈາກສາມປະເທດ.
ສິ້ນສຸດກອງປະຊຸມ, ນາຍົກລັດຖະມົນຕີສາມປະເທດ ໄດ້ລົງນາມໃນຖະແຫລງການຮ່ວມກ່ຽວກັບການຮ່ວມມືເຂດສາມຫລ່ຽມພັດທະນາ ກຳປູເຈຍ, ລາວ - ຫວຽດນາມ, ຢືນຢັນຄຳໝັ້ນສັນຍາຂອງລັດຖະບານສາມປະເທດໃນການຍົກສູງຄຸນນະພາບຊີວິດການເປັນຢູ່ຂອງປະຊາຊົນ 13 ແຂວງໃນເຂດ ແລະ ເຮັດໃຫ້ເຂດສາມຫລ່ຽມພັດທະນາເປັນແບບຢ່າງແຫ່ງການຮ່ວມມືສຳເລັດຜົນໃນພາກພື້ນ.
ກອງປະຊຸມສຸດຍອດເຂດສາມຫລ່ຽມພັດທະນາ ກຳປູເຈຍ, ລາວ - ຫວຽດນາມ ຖືກຈັດຂຶ້ນ 2 ປີ/ເທື່ອຫນຶ່ງ. ກອງປະຊຸມບໍ່ພຽງແຕ່ມີຄວາມໝາຍສຳຄັນສຳລັບການພັດທະນາແບບຍືນຍົງ ແລະ ການຮ່ວມມືຮອບດ້ານລະຫວ່າງສາມປະເທດເທົ່ານັ້ນ ຫາກຍັງປະກອບສ່ວນໃຫ້ແກ່ສັນຕິພາບ, ສະຖຽນລະພາບ ແລະ ວັດທະນາຖາວອນລວມຂອງອະນຸພາກພື້ນແມ່ນ້ຳຂອງ, ມຸ່ງໄປເຖິງສ້າງປະຊາຄົມອາຊຽນ ໃນປີ 2015.