(vovworld) - ໃນການຕໍ່ສູ້ອັນດຸເດືອດ, ຍາວນານ ຕະຫຼອດເວລາ 30 ປີ ເພື່ອຕ້ານສັດຕູຜູ້ຮຸກຮານ, ຍາດເອົາເອກະລາດ, ອິດສະລະພາບໃຫ້ແກ່ປະເທດຊາດນັ້ນ, ອຸໂມງກູຈີ ແມ່ນຄວາມເອກອ້າງທະນົງໃຈ, ແມ່ນສັນຍາລັກ ”ແຫ່ງຈິດໃຈທີ່ແຂງແກ່ນປຽບເໝືອນເຫຼັກກ້າ” ຂອງຊາດຫວຽດນາມ. ປະຈຸບັນ, ກູຈີໄດ້ຮັບການຮູ້ຈັກກັນດີ ແມ່ນສະຖານທີ່ທ່ອງທ່ຽວທີ່ສ້າງຄວາມດຶງດູດນັກທ່ອງທ່ຽວທັງຢູ່ພາຍໃນ ແລະ ຕ່າງປະເທດ.
ຄະນະຜູ້ແທນລາວ ຢ້ຽມຢາມ ອຸໂມງກູຈີ
|
ໂດຍຫ່າງຈາກໃຈກາງນະຄອນ ໂຮ່ຈີມິນ ໄປທາງທິດຕາເວັນຕົກສຽງເໜືອ ປະມານ 30 ກມ, ອຸໂມງ ກູຈີ ແມ່ນອຸໂມງໃຕ້ດິນມະຫັດສະຈັນໜຶ່ງດຽວຢູ່ໂລກ, ດ້ວຍຄວາມຍາວ 250 ກມ. ອຸໂມງເລິກໃຕ້ດິນແຕ່ 3-8 ມ, ສູງພໍດີໃຫ້ຄົນກົ້ມຫົວລອດໄປໄດ້. ໃນອຸໂມງຕອນທຳອິດມີນ້ຳສ້າງເພື່ອສະໜອງນ້ຳດື່ມ, ນ້ຳໃຊ້ໃຫ້ທົ່ວທັງເຂດອຸໂມງ. ລົງໄປໃນອຸໂມງ, ນັກທ່ອງທ່ຽວຍັງເຫັນມີຫ້ອງອາຫານ, ຫ້ອງນອນ, ຫ້ອງປະຊຸມ, ສຸກສາລາ, ຫ້ອງພັກຜ່ອນ, ນັບທັງເຮືອນຄົວອີກ. ທັງໝົດລ້ວນແຕ່ຢູ່ໃຕ້ພື້ນດິນ. ໃນຕະຫຼອດຊຸມເດືອນປີແຫ່ງການຕໍ່ສູ້ອັນດຸເດືອດນັ້ນ, ການເຄື່ອນໄຫວ, ຮຳ່ຮຽນ, ດຳລົງຊີວິດເກືອບທັງໝົດລ້ວນແຕ່ດຳເນີນຢູ່ໃຕ້ພື້ນດິນ ເພື່ອແນໃສ່ຫຼີກລ້ຽງການກວາດລ້າງ, ມ້າງເພທຳລາຍຢ່າງໂຫດຮ້າຍສາມານຂອງສັດຕູ. ໃນຊຸມປີອັນດຸເດືອດນັ້ນ, ອາເມລິກາໄດ້ລະດົມລົດຕັງ, ປືນໃຫຍ່, ເຮືອບິນ B 52 ນັບພັນລຳ ມາຖີ້ມລະເບີດ, ທຳລາຍອຸໂມງ ກູຈີ. ດ້ວຍ ”ປ້ອມໝັ້ນ” ນີ້, ໃນ 21 ປີ ແຫ່ງການຕໍ່ສູ້ຕ້ານ ອາເມລິກາ, ປະຊາຊົນ ກູຈີດັບສູນສັດຕູໄດ້ 20.000 ຄົນ, ທຳລາຍລົດຕັງ, ລົດຫຸ້ມເກາະໄດ້ 5000 ຄັນ, ຍິງເຮືອບິນຕົກ 250 ລຳ. ເມື່ອມາຢ້ຽມຢາມອຸໂມງກູຈີ, ນັກທ່ອງທ່ຽວສາມາດຮູ້ໄດ້ການດຳລົງຊີວິດຂອງຊາວ ກູຈີ ໃນເມື່ອກ່ອນ. ພາຍຫຼັງໄປທ່ອງທ່ຽວອຸໂມງກູຈີ, ທ່ານບົວລະພາ ທັນພິລົມ, ບັນນາທິການໃຫຍ່ໜັງສືພິມປະຊາຊົນ ໄດ້ສະແດງຄວາມຮູ້ສຶກປະທັບໃຈທີ່ສຸດວ່າ:
ຫ້ອງປະຊຸມໃນອຸໂມງກູຈີ
( ພາບຈາກອີນເຕີແນດ )
|
ສຽງທ່ານບົວລະພາ ທັນພິລົມ
ໃນຈຳນວນນັກທ່ອງທ່ຽວມາຢ້ຽມຢາມອຸໂມງກູຈີນັ້ນ, ມີເພື່ອນໜຸ່ມຫຼາຍຄົນ. ເຂົາເຈົ້າມາແຫ່ງນີ້ເພື່ອຊອກຮູ້ກ່ຽວກັບການຕໍ່ສູ້, ການເສຍສະຫຼະອັນພິລະອາດຫານຂອງລຸ້ນກ່ອນໃນຊຸມປີແຫ່ງການຕໍ່ສູ້ອັນພິລະອົງອາດຂອງຊາດ. ເພື່ອນ ເຈິ່ນແອ້ງເຟືອກ, ນັກສຶກສາວິທະຍາໄລສ້າງຄູວິຈິດສິນ ນະຄອນ ໂຮ່ຈີມິນ ໄດ້ແບ່ງປັນຄວາມຕື້ນຕັນໃຈຂອງຕົນເມື່ອມາຢ້ຽມຢາມອຸໂມງ ກູຈີ.
”ນ້ອງໄດ້ຮູ້ອຸໂມງກູຈີຜ່ານປື້ມໜັງສື, ແຕ່ນີ້ແມ່ນເທື່ອທຳອິດທີ່ນ້ອງມາຢ້ຽມຢາມແຫ່ງນີ້. ເມື່ອເຫັນປະຈັກຕາອຸມົງກູຈີ, ນ້ອງຮູ້ສຶກເຄົາລົບນັກຮົບ ແລະ ປະຊາຊົນ ກູຈີຫຼາຍ, ດ້ວຍອຸປະກອນທີ່ທຳມະດາ, ງ່າຍດາຍ ແຕ່ເຂົາເຈົ້າໄດ້ສ້າງເປັນປະຫວັດສາດອັນສະຫງ່າລາສີໃຫ້ແກ່ປະເທດ. ນັ້ນກໍ່ແມ່ນຄວາມເອກອ້າງທະນົງໃຈຂອງປະຊາຊົນທົ່ວປະເທດເວົ້າລວມ ແລະ ຊາວໜຸ່ມເວົ້າສະເພາະ. ຜ່ານການຢ້ຽມຢາມຄັ້ງນີ້, ນ້ອງຫວັງວ່າລຸ້ນຕໍ່ໆໄປຈົ່ງຮູ້ບຸນຄຸນຂອງບັນດານັກຮົບທີ່ໄດ້ເສຍສະຫຼະຊີວິດ, ເລືອດເນື້ອຂອງຕົນ ເພື່ອປົກປັກຮັກສາປະເທດຊາດ”.
ສຸກສາລາໃນ ອຸໂມງກູຈີ
( ພາບຈາກອີນເຕີແນດ )
|
ມາຢ້ຽມຢາມອຸໂມງກູຈີ, ນັກທ່ອງທ່ຽວຈະມີຄວາມເຂົ້າໃຈກ່ຽວກັບຄວາມຫຍຸ້ງຍາກ, ລຳບາກຂອງບັນດານັກຮົບຫວຽດນາມ, ແລະນັກທ່ອງທ່ຽວຈະສາມາດຮູ້ໄດ້ວ່າ, ເປັນຫຍັງປະເທດຫວຽດນາມນ້ອຍໆຄືແນວນັ້ນ, ແຕ່ພັດເອົາຊະນະສັດຕູເຊິ່ງແມ່ນປະເທດໃຫຍ່ ແລະ ຮັ່ງມີກວ່າໝູ່ຢູ່ໂລກ. ການເວລາໄດ້ລ່ວງເລີຍໄປແລ້ວ, ແຕ່ອຸໂມງກູຈີຍັງຄົງໄດ້ຮັບການຮັກສາໄວ້, ດ້ວຍບັນດາໄຊຊະນະອັນພິລະອາດຫານຂອງຊາດຫວຽດນາມ