(vovworld)-ໃນອາທິດຜ່ານມາ, ລາຍການກະຈາຍສຽງພາກພາສາລາວ ສືບຕໍ່ຮັບຈົດໝາຍ, ອີແມວຫລາຍສະບັບ ແລະ ໂທລະສັບຈາກຜູ້ຟັງລາວ. ໃນລາຍການພາກນີ້ ພວກເຮົາຂໍຄັດສະເຫນີເນື້ອໃນຈົດໝາຍບາງສະບັບຊື່ງທ່ານຜູ້ຟັງຜູ້ຊົມໄດ້ສົ່ງເຖິງລາຍການໃນອາທິດຜ່ານມາ.
ທ່ານ ບຸນມີ ຢູ່ ແຂວງ ບໍລິຄຳໄຊ ສົ່ງຈົດໝາຍມາຍັງລາຍການໂດຍເວົ້າວ່າ: ຂ້າພະເຈົ້າເຄີຍຕິດຕາມພາກຂ່າວໃນຫນ້າເວັບ vovworld.vn ຂອງວິທະຍຸກະຈາຍສຽງຫວຽດນາມ, ເພາະວ່າ ລາຍການຂ່າວແມ່ນອຸດົມສົມບູນ, ອັບເດັດ ແລະ ພິເສດ ມີຂ່າວຕ່າງປະເທດຫລາຍພໍສົມຄວນ. ນອກນັ້ນ ຂ້າພະເຈົ້າມັກອ່ານບັນດາຄໍລຳຄື: ວັດທະນະທຳ, ຄົ້ນຫາຫວຽດນາມ, ສີສັນ 54 ຊົນເຜົ່າ, ຊົນນະບົດໃຫມ່.. ໃນນັ້ນ ລາຍການ ຊົນນະບົດໃຫມ່ ຂ້າພະເຈົ້າເຂົ້າອ່ານເປັນປະຈຳ. ຜ່ານລາຍການນີ້ ຂ້າພະເຈົ້າໄດ້ຮູ້ຈັກວ່າ ຢູ່ເຂດຊົນນະບົດຫລາຍແຫ່ງຂອງຫວຽດນາມ ໄດ້ມີການປ່ຽນແປງຫລາຍຢ່າງແລ້ວ, ພິເສດ ພື້ນຖານໂຄງລ່າງນັບມື້ນັບໄດ້ຮັບການກໍ່ສ້າງທັນສະໄຫມກວ່າ. ປະຊາຊົນຢູ່ເຂດຊົນນະບົດຫວຽດນາມ ມີຄວາມເຫັນດີເຫັນພ້ອມກັບໂຄງການກໍ່ສ້າງຊົນນະບົດໃຫມ່ໂດຍລັດຖະບານວາງອອກ ແລະ ມີຫລາຍຄອບຄົວໄດ້ປະກອບທີ່ດິນ, ຊັບສິນເພື່ອປະກອບສ່ວນກໍ່ສ້າງບ້ານເກີດເມືອງນອນໃຫ້ນັບມື້ນັບສວຍງາມກວ່າ. ນີ້ກໍແມ່ນແບບຢ່າງເພື່ອໃຫ້ພວກຂ້າພະເຈົ້າທາບທາມ ແລະ ຮ່ຳຮຽນຕາມ.
ໃນຈົດໝາຍສົ່ງເຖິງລາຍການ, ເພື່ອນ ບົວໄລ ຢູ່ ແຂວງ ວຽງຈັນ ເວົ້າວ່າ: ຂ້າພະເຈົ້າແມ່ນຜູ້ມັກຖ່າຍຮູບ ແລະ ຮຽບຮຽງບັນດາຮູບພາບກ່ຽວກັບທິວທັດທຳມະຊາດທີ່ສວຍງາມ, ສະນັ້ນ ຂ້າພະເຈົ້າເຄີຍຊົມພາບສາລະຄະດີໃນຫນ້າເວັບ vov5.vn. ຍ້ອນຄ້າງຄາກັບວຽກງານ ສະນັ້ນ ຂ້າພະເຈົ້າບໍ່ທັນມີໂອກາດໄປຢ້ຽມຢາມຫວຽດນາມ ເທື່ອ, ແຕ່ຜ່ານພາບສາລະຄະດີ ຂ້າພະເຈົ້າໄດ້ຮັບຊົມຮູບພາບກ່ຽວກັບທັດສະນີຍະພາບທີ່ສວຍງາມຫລາຍແຫ່ງຢູ່ຫວຽດນາມ ກໍ່ຄືບັນດາຮູບພາບທີ່ສ່ອງແສງເຖິງຊີວິດການເປັນຢູ່ຂອງປະຊາຊົນຫວຽດນາມ. ຜ່ານບັນດາພາບສາລະຄະດີຂອງ vov 5 ໄດ້ຊ່ວຍໃຫ້ຂ້າພະເຈົ້າຮຽບຮຽງຮູບພາບທີ່ສວຍງາມນັບມື້ນັບອຸດົມສົມບູນກວ່າ.
ທ່ານຈັນທີ ຢູ່ ເມືອງ ໂພນໂຮງ ແຂວງ ວຽງຈັນ ສົ່ງອີແມວເຖິງລາຍການ ໂດຍແບ່ງປັນວ່າ: ກ່ອນນີ້ ຂ້າພະເຈົ້າມີໂອກາດໄດ້ເຮັດວຽກກັບບັນດາເພື່ອນຫວຽດນາມ ໃນເວລາຫລາຍປີ. ເຖິງວ່າ ພາສາຫວຽດ ຂ້າພະເຈົ້າບໍ່ຮູ້ຫລາຍປານໃດກໍຕາມ, ແຕ່ບັນດາບົດເພງຂອງຫວຽດນາມ ຂ້າພະເຈົ້າມັກຮັບຟັງທີ່ສຸດ. ເພາະສະນັ້ນ ລາຍການເພງຊື່ງພາກພາສາລາວໄດ້ອອກອາກາດໃນເວລາ 30 ນາທີ່ຫລັງພາກຂ່າວ ຂ້າພະເຈົ້າ ມັກທີ່ສຸດ. ບັນດາທຳນອງເພງໃນລາຍການໄດ້ຊ່ວຍໃຫ້ຂ້າພະເຈົ້າບັນເທົາຄວາມອິດເມື່ອຍພາຍຫລັງເຮັດວຽກໃນມື້ຫນື່ງ.
ໃນອາທິດ, ທ່ານ ວອນຄຳ ຢູ່ແຂວງ ຫົວພັນ ໂທລະສັບມາຫາລາຍການ ໂດຍເວົ້າວ່າ: ໂດຍແມ່ນປະຊາຊົນຜູ້ຫນຶ່ງທີ່ດຳລົງຊີວິດຢູ່ແຂວງ ຫົວພັນ ແລະ ໄດ້ຮັບການກວດ, ປິ່ນປົວພະຍາດໂດຍບໍ່ເສຍຄ່າ ຈາກທ່ານໝໍຫນຸ່ມ, ຊື່ງແມ່ນຊາວຫນຸ່ມອາສາສະໝັກຫວຽດນາມ. ມາຮອດປະຈຸບັນ ພະຍາດຂອງຂ້າພະເຈົ້າຄ່ອຍໆຖືກຫາຍໄປແລ້ວ, ສຸຂະພາບຟື້ນຟຸເປັນຢ່າງດີ. ເນື່ອງໃນໂອກາດສະເຫລີມສະຫລອງວັນສ້າງຕັ້ງຄະນະຊາວຫນຸ່ມກອມມູນິດໂຮ່ຈິມີນ ຄືວັນທີ 26/3, ຂ້າພະເຈົ້າຂໍສົ່ງຄຳຂອບອົກຂອບໃຈ ແລະ ອວຍພອນໃຫ້ຊາວຫນຸ່ມຫວຽດນາມ ເວົ້າລວມ, ຊາວຫນຸ່ມອາສາສະໝັກເວົ້າສະເພາະ ຈົ່ງມີສຸຂະພາບເຂັ້ມແຂງ, ຮ່ຳຮຽນເປັນຢ່າງດີ ແລະ ນັບມື້ນັບມີວຽກງານທີ່ມີປະໂຫຍດຫລາຍຢ່າງ, ປະກອບສ່ວນໃຫ້ແກ່ພາລະກິດສ້າງສາປະເທດຫວຽດນາມ ກໍຄືປະກອບສ່ວນເພີ່ມພູນຄູນສ້າງສາຍພົວພັນແບບພິເສດຫວຽດນາມ - ລາວ.
ພາບປະກອບ:internet
|
ທ່ານຜູ້ຟັງທີ່ເຄົາລົບ! ທີ່ທ່ານຫາກໍຮັບຟັງແມ່ນເນື້ອໃນຈົດໝາຍບາງສະບັບຊື່ງທ່ານຜູ້ຟັງໄດ້ສົ່ງເຖິງລາຍການພາກສາລາວໃນອາທິດຜ່ານມາ. ພວກເຮົາ ຂອບອົກຂອບໃຈພວກທ່ານທີ່ໄດ້ຕິດຕາມ, ຍາດເວລາສົ່ງຈົດໝາຍປະກອບຄຳເຫັນເຖິງລາຍການ. ຫວັງວ່າ ໃນໄລຍະຈະມາເຖິງ, ທ່ານຜູ້ຟັງຈະສືບຕໍ່ຕິດຕາມລາຍການຂອງພວກເຮົາອອກທາງອາກາດກໍຄືທາງອິນເຕີແນັດ ແລະ ປະກອບຄຳເຫັນໃຫ້ລາຍການນັບມື້ນັບຫລາຍກວ່າ. ຂໍອວຍພອນທ່ານຜູ້ຟັງທຸກຄົນມີສຸຂະພາບເຂັ້ມແຂງ ແລະ ປະສົບຜົນສຳເລັດໃນວຽກງານຂອງຕົນ.
ທ່ານສາມາດຮັບຟັງ ແລະ ຊົມລາຍການຜ່ານຫນ້າເວັບ vovworld.vn ຫລື vov5.vn ແລະ ຢ່າລືມສົ່ງຈົດໝາຍໃຫ້ພວກຂ້າພະເຈົ້າຜ່ານທີ່ຢູ່:
ລາຍການພາກພາສາລາວ- ວິທະຍຸກະຈາຍສຽງຫວຽດນາມ
45 Ba Trieu, Ha Noi. Email: laovov@yahoo.com