ທ່ານຜູ້ຟັງທີ່ເຄົາລົບ!
ຂຶ້ນຕົ້ນລາຍການຕອບຈົດໝາຍຂອງທ່ານຜູ້ຟັງລາຍການທຳອິດໃນປີ 2012, ພວກເຮົາຂໍສະແດງຄວາມຂອບອົກຂອບໃຈຢ່າງເລິກເຊິ່ງມາຍັງບັນດາທ່ານຜູ້ຟັງທີ່ໄດ້ຕິດຕາມຮັບຟັງລາຍການຂອງພວກເຮົາເປັນປະຈຳ, ສົ່ງຈົດໝາຍ ອີແມວ ປະກອບຄຳເຫັນໃຫ້ແກ່ລາຍການ ແລະ ເຂົ້າຮ່ວມບການເສັງໂດຍວິທະຍຸກະຈາຍສຽງຫວຽດນາມປຸກລະດົມໃນໄລຍະຜ່ານມາ. ນີ້ແມ່ນກຳລັງຫນູນເພື່ອຊ່ວຍພວກເຮົາສ້າງລາຍການໃຫ້ນັບມື້ນັບດູດດື່ມກວ່າ.
ທ່ານຜູ້ຟັງທີ່ເຄົາລົບ! ໃນປີຜ່ານມາ ລາຍການກະຈາຍສຽງພາກພາສາລາວ ໄດ້ຮັບຈົດໝາຍ, ອີແມວກວ່າ 163 ສະບັບ ແລະ ໂທລະສັບຈາກທ່ານຜູ້ຟັງ ຊຶ່ງແມ່ນພະນັກງານ, ນັກຮົບເກົ່າ, ນັກສຶກສາກໍຄືປະຊາຊົນລາວຫລາຍຄົນ, ຊາວຫວຽດນາມອາໄສຢູ່ທຸກແຖບຖິ່ນຂອງລາວ, ຢູ່ ຫວຽດນາມ ແລະ ບາງປະເທດ. ໃນຈົດໝາຍ, ອີແມວກໍຄືໂທລະສັບ, ທ່ານຜູ້ຟັງສ່ວນຫລາຍລ້ວນແຕ່ໃຫ້ຂໍ້ສັງເກດກ່ຽວກັບລາຍການ, ສະແດງຄວາມຮູ້ສຶກເມື່ອໄດ້ຮັບຟັງບັນດາຄໍລຳໃນລາຍການ.
ໃນໄລຍະປະຕິບັດງານຢູ່ຫວຽດນາມ, ທ່ານນາງ ສູນທອນ ໄຊຍະຈັກ, ອະດິດເອກອັກຄະລັດຖະທູດ ສປປ ລາວປະຈຳຫວຽດນາມ ກໍຍາດເວລາຕິດຕາມລາຍການຂອງພວກເຮົາເປັນປະຈຳ. ເມື່ອໃຫ້ຂໍ້ສັງເກດກ່ຽວກັບລາຍການ, ທ່ານນາງ ສູນທອນ ໄຊຍະຈັກ ໄດ້ເວົ້າວ່າ: ວິທະຍຸກະຈາຍສຽງຫວຽດນາມເວົ້າລວມ ແລະ ພາກພາສາລາວເວົ້າສະເພາະ ແມ່ນກະບອກສຽງສຳຄັນໃນການໂຄສະນາເຜີຍແຜ່ຜົນສຳເລັດ, ບັນດາທິດທາງ, ແນວທາງຂອງ ສປປ ລາວໃຫ້ແກ່ປຊຊ ຫວຽດນາມ ແລະ ຊາວໂລກຮັບຮູ້. ໃນໄລຍະຜ່ານມາ, ວິທະຍຸຫວຽດນາມ ໄດ້ເຮັດຈົນສຸດຄວາມສາມາດຊ່ວຍເຫລືອພວກຂ້າພະເຈົ້າໃນການໂຄສະນາດ້ວຍເນື້ອໃນອຸດົມສົມບູນ ແລະ ແທດເຖິງຕົວຈິງ.
ໃນຈົດໝາຍສົ່ງເຖິງລາຍການ, ເພື່ອນສົມດີ ຢູ່ ແຂວງ ຊຽງຂວາງ ໄດ້ຂຽນວ່າ: ຂ້າພະເຈົ້າພວມຮຽນຢູ່ຂະແຫນງສື່ມວນຊົນ, ສະນັ້ນ ຂ່າວຄາວແມ່ນອາຫານດ້ານຈິດໃຈທີ່ຂາດບໍ່ໄດ້ໃນຊີວິດປະຈຳວັນຂອງຂ້າພະເຈົ້າ. ກ່ອນນີ້ ຢາກຮູ້ຂ່າວຄາວກ່ຽວກັບຫວຽດນາມ ຂ້າພະເຈົ້າຕ້ອງຊັບຊ້ອນເວລາເພື່ອຕິດຕາມລາຍການພາກພາສາລາວຜ່ານຄື້ນກະຈາຍສຽງ, ແຕ່ເມື່ອໄດ້ຮູ້ວ່າ ລະບົບກະຈາຍສຽງພາກພາສາຕ່າງປະເທດ ມີຫນ້າເວັບສະເພາະ, ຂ້າພະເຈົ້າດີໃຈຫລາຍ ຍ້ອນມັນສ້າງຄວາມສະດວກທີ່ສຸດສຳລັບວຽກງານຂອງຂ້າພະເຈົ້າ,ບໍ່ພຽງແຕ່ຊ່ວຍໃຫ້ຂ້າພະເຈົ້າອັບເດັດຂໍ້ມູນຂ່າວ ຫລາຍຢ່າງເທົ່ານັ້ນ ຫາກຍັງຝຶກຝົນດ້ານພາສາຕ່າງປະເທດອີກດ້ວຍ.
ນອກນັ້ນ ໃນຈົດໝາຍ, ອີແມວສົ່ງເຖິງວິທະຍຸກະຈາຍສຽງຫວຽດນາມ, ບັນດາທ່ານຜູ້ຟັງກໍສະແດງຄວາມປາດຖະຫນາຢາກຊອກຮູ້ບາງບັນຫາກ່ຽວກັບບັນດາຂົງເຂດທາງດ້ານວັດທະນະທຳ, ສັງຄົມ, ເສດຖະກິດ ຢູ່ ຫວຽດນາມອີກດ້ວຍ.
ອີກຄັ້ງຫນຶ່ງພວກເຮົາຂໍຂອບອົກຂອບໃຈບັນດາທ່ານຜູ້ຟັງທີ່ໄດ້ຮ່ວມເດີນທາງພ້ອມກັບພວກເຮົາໃນປີຜ່ານມາ.
ຕໍ່ໄປ, ພວກເຮົາຂໍຂັດສະເຫນີເນື້ອໃນຈົດໝາຍໃນບາງສະບັບທີ່ທ່ານຜູ້ຟັງສົ່ງເຖິງລາຍການໃນອາທິດຜ່ານມາ.
ຈົດໝາຍຂອງເພື່ອນຄຳພັນຈາກແຂວງ ບໍ່ແກ້ວ ສົ່ງເຖິງລາຍການໄດ້ເວົ້າວ່າ: ໃນອາທິດຜ່ານມາ ລາຍການມີບົດສາລາຄະດີກ່ຽວກັບຕະຫລາດສະແຕມ ຮ່າໂນ້ຍ ໄດ້ສ້າງຄວາມປະທັບໃຈໃຫ້ແກ່ຂ້າພະເຈົ້າ. ຕະຫລາດສະແຕມ ບໍ່ພຽງແຕ່ເພື່ອຊື້ຂາຍສະແຕມເທົ່ານັ້ນ ຫາກຍັງແມ່ນແຫ່ງເພື່ອໃຫ້ຜູ້ສະສົມສະແຕມແລກປ່ຽນ, ໂອ້ລົມສົນທະນາ ແລະ ຮັບຊົມສະແຕມອີກດ້ວຍ ຜ່ານນັ້ນ ຈະເກັບກຳເອົາບັນດາຄວາມຮູ້ກ່ຽວກັບວັດທະນະທຳ, ປະຫວັດສາດ, ສິລະປະທີ່ເປັນເອກະລັກສະເພາະໄດ້, ຂ້າພະເຈົ້າປາດຖະຫນາວ່າ ຈະມີໂອກາດມາຢ້ຽມຢາມ ຮ່າໂນ້ຍ ເພື່ອເຫັນປະຈັກຕາຕະຫລາດສະແຕມທີ່ເຕັມໄປດ້ວຍຄວາມປະທັບໃຈນີ້.
ທ່ານ ບຸນທັນ ຢູ່ ແຂວງ ວຽງຈັນ ໄດ້ສົ່ງຈົດໝາຍມາຫາລາຍການໂດຍແບ່ງປັນວ່າ: ຂ້າພະເຈົ້າຕິດຕາມລາຍການພາກພາສາລາວຂອງວິທະຍຸກະຈາຍສຽງຫວຽດນາມເປັນປະຈຳ ແລະ ແຕ່ລະປີ ເມື່ອໂອກາດບຸນປີໃຫມ່ປະຈຳຊາດຂອງຫວຽດນາມວຽນມາ ຂ້າພະເຈົ້າກໍໄດ້ຮັບຟັງບັນດບົດແນະນຳຮີດຄອງປະເພນີຕ້ອນຮັບບຸນເຕັດ, ບັນຍາກາດຂອງບຸນເຕັດ, ພິເສດແມ່ນບັນດາງານບຸນຢູ່ ຫວຽດນາມ. ເຖິງຢ່າງໃດກໍຕາມ ຢູ່ຫວຽດນາມມີເທົ່າໃດງານບຸນ ແລະ ໄລຍະຈັດງານບຸນແມ່ນເວລາໃດຂ້າພະເຈົ້າບໍ່ທັນຮູ້ເຖິງ. ຫວັງວ່າ ພວກອ້າຍເອື້ອຍບັນນາທິການໃນລາຍການພາກພາສາລາວ ຊ່ວຍໃຫ້ຂ້າພະເຈົ້າເຂົ້າໃຈກ່ຽວກັບບັນຫານີ້ແດ່.
ງານບຸນນະມັດສະການວັດເຮືອງ
ທ່ານ ບຸນທັນ ທີ່ຮັກແພງ! ປະຈຸບັນ ຢູ່ ຫວຽດນາມ ມີກວ່າ 7.966 ງານບຸນ, ໃນນັ້ນ ງານບຸນປະເພນີກວມ 88,36%, ງານບຸນປະຫວັດສາດກວມ 4,16%, ງານບຸນສາສະຫນາກວມ 6,28%, ນອກນັ້ນມີ 10 ງານບຸນແມ່ນເຊື່ອມເຂົ້າຈາກຕ່າງປະເທດ ສ່ວນຍັງເຫລືອແມ່ນງານບຸນອື່ນ. ດ້ວຍປະຫວັດສາດກວ່າ 4 ພັນ ປີ, ຫວຽດນາມ ມີພື້ນຖານທາງດ້ານວັດທະນະທຳເຂັ້ມຂົ້ນໄປດ້ວຍຫລາຍສີສັນ ແລະ ງານບຸນ ແມ່ນການດຳເນີນຊີວິດທາງດ້ານວັດທະນະທຳທີ່ເປັນເອກະລັກສະເພາະຢູ່ ຫວຽດນາມ. ງານບຸນເກືອບຄືວ່າຖືກຈັດຂຶ້ນຢູ່ທຸກແຖບຖິ່ນຂອງປະເທດຊາດ. ງານບຸນຢູ່ຫວຽດນາມ ຍາມໃດກໍໃຫ້ທຸກຄົນຄິດເຖິງກົກເຄົ້າເຫງົ້າກໍ, ມຸ້ງມີໃຈບຸນໃຈກຸສົນ ເພື່ອແນໃສ່ສ້າງຊີວິດອີ່ມໜຳສຳລານ ແລະ ສະຫງົບສຸກວ່າ. ງານບຸນປະເພນີ ຢູ່ ຫວຽດນາມ ເຄີຍຈັດຂຶ້ນໃນລະດູບານໃຫມ່ ແລະ ງານບຸນຈຳນວນຫນຶ່ງແມ່ນຈັດຂຶ້ນໃນລະດູໃບໄມ້ຫລົ່ນ ຊຶ່ງແມ່ນສອງລະດູທີ່ສວຍງາມກວ່າໝູ່ໃນປີ ພ້ອມທັງກໍແມ່ນເວລາຊາວກະສິກອນມີເວລາຫວ່າງ. ໃນຈຳນວນງານບຸນຢູ່ຫວຽດນາມ ນັ້ນ ຕ້ອງເວົ້າເຖິງບັນດາງານບຸນທີ່ສຳຄັນສຳລັບທຸກຄອບຄົວຢູ່ຫວຽດນາມ, ນັ້ນແມ່ນບຸນປີໃຫມ່ປະຈຳຊາດ, ງານບຸນເຂົ້າປະດັບດິນ ແລະ ບຸນວັນເພງເດືອນ 8. ໃນໄລຍະມໍ່ໆມານີ້ ມີງານບຸນຈຳນວນຫນຶ່ງໄດ້ຮັບຄວາມເອົາໃຈໃສ່ ຈາກລັດ ແລະ ປະຊາຊົນຄື: ງານບຸນວິຫານຮູ່ງ, ວັນບຸນຄຼິດສະມາດ, ວັນບຸນວິສາຂະບູຊາ ແລະອື່ນໆ.
ທ່ານຜູ້ຟັງທີ່ເຄົາລົບ! ພວກຂ້າພະເຈົ້າມີຄວາມເບິກບານມ່ວນຊື່ນເມືອ່ໄດ້ຮັບຈົດໝາຍ, ອີແມວ ແລະ ໂທລະສັບຈາກທ່ານຜູ້ຟັງ. ຫວັງວ່າ ໃນໄລຍະຈະມາເຖິງ ທ່ານຜູ້ຟັງຈະສືບຕໍ່ສົ່ງຈົດໝາຍເຖິງລາຍການພາກພາສາລາວໃຫ້ນັບມື້ນັບຫລາຍກວ່າ. ຂໍອວຍພອນແດ່ທ່ານຜູ້ຟັງຈົ່ງມີສຸຂະພາບເຂັ້ມແຂງ ແລະ ປະສົບຜົນສຳເລັດໃນວຽກງານຂອງຕົນ.
ທ່ານສາມາດຕິດຕາມລາຍການຂອງພວກເຮົາຜ່ານຫນ້າເວັບ: vovworld.vn ຫລືສາມາດສົ່ງຈົດໝາຍຖິງລາຍການຜ່ານທີ່ຢູ່: ລາຍການກະຈາຍສຽງພາກພາສາລາວ ເຮືອນເລກທີ 45 ຖະໜົນ ບ່າຈ້ຽວ ຮ່າໂນ້ຍ
ໂທລະສັບ:00843 8256631. email. laovov@hotmail.com