ໃນອາທິດທີ່ຜ່ານມາ, ລາຍການກະຈາຍສຽງພາກພາສາລາວ-ວິທະຍຸກະຈາຍສຽງຫວຽດນາມໄດ້ຮັບຈົດໝາຍ, ອີແມວ 16 ສະບັບ ແລະ ໂທລະສັບຂອງທ່ານຜູ້ຟັງຜູ້ອ່ານລາວທີ່ຝາກມາລາຍການ, ບັນດາຈົດໝາຍມີເນື້ອໃນອຸດົມສົມບູນ. ໃນນັ້ນມີບາງຄົນໄດ້ຖາມກ່ຽວກັບບົດຕ່າງໆຂອງລາຍການ, ມີບາງຄົນພັດໄດ້ຖາມກ່ຽວກັບເຂດປູສະນີຍະສະຖານທີ່ລືຊື່ຂອງຫວຽດນາມ ແລະ ພິເສດ ພວກເຮົາໄດ້ຮັບອີແມວ ແລະ ໂທລະສັບອວຍພອນຂອງຫຼາຍທ່ານ ເນື່ອງໃນໂອກາດວັນແມ່ຍິງສາກົນ ຄືວັນທີ 8/3.
ເຖິງວ່າ ວັນແມ່ຍິງສາກົນໄດ້ຜ່ານໄປແລ້ວກໍ່ຕາມ ແຕ່ພວກເຮົາຍັງໄດ້ຮັບຈົດໝາຍ, ໂທລະສັບອວຍພອນວັນແມ່ຍິງສາກົນຈາກຫຼາຍທ່ານ ຊື່ງໃນນັ້ນມີບັນດາທ່ານເຄີຍສະໜິດຕິດພັນກັບລາຍການທີ່ສຸດຄື: ທ່ານ ບົວສີ ລໍ່ສັນໄຊ ລັດຖະມົນຕີຫ້ອງວ່າການລັດຖະບານ, ທ່ານເພັດສະໝອນ, ຢູ່ສະຖາບັນການເມືອງການປົກຄອງແຫ່ງຊາດ, ທ່ານເພັດສະຫວັນຢູ່ແຂວງອັດຕະປື…. ນອກຈາກນັ້ນແລ້ວຍັງມີຜູ້ຟັງໃໝ່ຂອງລາຍການຄື: ທ່ານໄຊວົງມະຈັນ ຢູ່ພະແນກຖະແຫຼງຂ່າວ-ວັດທະນະທຳ- ແລະ ການທ່ອງທ່ຽວນະຄອນຫຼວງວຽງຈັນ, ເພື່ອນສຸວັນນົນ, ນັກສຶກສາມະຫາວິທະຍາໄລແຫ່ງຊາດລາວ. ຈົດໝາຍສ່ວນຫຼາຍລ້ວນແຕ່ມີເນື້ອໃນອວຍພອນບັນດາພະນັກງານຍິງຂອງລາຍການພາກພາສາລາວເວົ້າສະເພາະ ແລະ ພະນັກງານຍິງຂອງວິທະຍຸກະຈາຍສຽງຫວຽດນາມ ເວົ້າລວມ ຈົ່ງມີສຸຂະພາບແຂງແຮງ, ປະສົບຜົນສຳເລັດໃນໜ້າທີ່ວຽກງານ.
ພວກເຮົາມີຄວາມຕື້ນຕັນໃຈຫຼາຍ ແລະ ຂອບອົກຂອບໃຈອາລົມຈິດອັນຈິງໃຈຊື່ງບັນດາທ່ານຜູ້ຟັງສະຫງວນໃຫ້ແກ່ພວກເຮົາ. ຄຳອວຍພອນທີ່ຈິງໃຈ ແລະ ເຕັມໄປດ້ວຍຄວາມໝາຍຈາກບັນດາທ່ານຜູ້ຟັງ ຈະເປັນແຫຼ່ງລະດົມກຳລັງໃຈ, ສ້າງກຳລັງໜູນອັນໃຫ່ຍຫຼວງ ເພື່ອໃຫ້ພວກເຮົາພະຍາຍາມຜະລິດລາຍການໃຫ້ນັບມື້ນັບມ່ວນ ແລະ ດຶງດູດໃຈຜູ້ຟັງກ່ວາອີກ. ຫວັງວ່າ ໃນໄລຍະທີ່ຈະມາເຖິງ, ພວກເຮົາຈະສືບຕໍ່ໄດ້ຮັບຈົດໝາຍປະກອບຄຳເຫັນ ແລະ ຄຳຂໍຈາກບັນດາທ່ານຜູ້ຟັງຜູ້ອ່ານ.
ໃນອາທິດທີ່ຜ່ານມາ, ເພື່ອນລັດດາພອນ ໄດ້ສົ່ງອີແມວເຖິງລາຍການ ໂດຍແບ່ງປັນວ່າ: ໃນໄລຍະມໍ່ໆມານີ້, ຂ້າພະເຈົ້າເຄີຍຊົມພາບສາລະຄະດີໃນເວັບໄຊຂອງລາຍການ. ຂ້າພະເຈົ້າຮູ້ສຶກຈັບອົກຈັບໃຈຫຼາຍ ຜ່ານນັ້ນ ຂ້າພະເຈົ້າສາມາດຮູ້ຈັກເຖິງບັນດາເຂດແຄວ້ນໃນທົ່ວປະເທດຫວຽດນາມ. ພິເສດ, ໃນອາທິດທີ່ຜ່ານມາ, ຂ້າພະເຈົ້າຮູ້ສຶກຕົກສະເງີ້ເພື່ອໄດ້ຮັບຊົມພາບສາລະຄະດີກ່ຽວກັບການແຂ່ງຂັນແຕ່ງກິນຂອງລະບົບບັນດາລາຍການກະຈາຍສຽງພາກພາສາຕ່າງປະເທດ, ໂດຍ ສະເພາະແມ່ນພວກເພື່ອນໄດ້ແຕ່ງອາຫານພື້ນເມືອງລາວຫຼາຍເຍື່ອງ ເພື່ອແນະນຳໃຫ້ເພື່ອນຮ່ວມງານ ກໍຄືເພື່ອນມິດປະເທດຕ່າງໆ ກ່ຽວກັບວັດທະນະທຳດ້ານອາຫານການກິນຂອງປະເທດລາວພວກຂ້າພະເຈົ້າ. ເມື່ອເຫັນບັນດາເຍື່ອງອາຫານໂດຍພວກເພື່ອນແຕ່ງເອງ ແລະ ຈັດວາງ....ນັ້ນ, ຂ້າພະເຈົ້າຄິດວ່າ ມັນບໍ່ຕ່າງຫຍັງກັບເຍື່ອງອາຫານໂດຍຄົນລາວແຕ່ງ. ຂໍຂອບໃຈພວກເພື່ອນທີ່ໄດ້ນຳເອົາຈຸດວັດທະນະທຳອັນດີງາມຂອງອາຫານພື້ນເມືອງລາວມາສູ່ການແຂ່ງຂັນແຕ່ງກິນຂອງພວກເພື່ອນ ເພື່ອແນະນຳກັບໝູ່ເພື່ອນ.
ອາຫານລາວຈັດວາງໃນການແຂ່ງຂັນແຕ່ງກິນ
ເພື່ອນລັດດາພອນທີ່ຮັກແພງ! ຂໍຂອບໃຈເພື່ອນໄດ້ຮັບຊົມພາບສາລະຄະດີຂອງພວກເຮົາ. ໃນອາທິດທີ່ຜ່ານມາ, ເມື່ອເຂົ້າຮ່ວມການແຂ່ງຂັນແຕ່ງກິນ ພວກເຮົາມີຄວາມເອກອ້າງທະນົງໃຈທີ່ສຸດທີ່ໄດ້ແນະນຳວັດທະນະທຳອາຫານການກິນຂອງລາວກັບເພື່ອນຮ່ວມງານ. ຈົ່ງອ່ານ ແລະ ຊົມບັນດາລາຍການຂອງພວກເຮົາ, ຜ່ານນັ້ນ ແລະ ເພື່ອນຈະພົບເຫັນຫຼາຍສິ່ງຫຼາຍຢ່າງທີ່ດູດດືມໃຈກ່າວາອີກ.
ໃນຈົດໝາຍຝາກເຖິງລາຍການເມື່ອອາທິດທີ່ຜ່ານມາ, ເພື່ອນແສງອາລຸນ, ນັກສຶກສາມະຫາວິທະຍາໄລແຫ່ງຊາດລາວ ມີຄວາມສົນໃຈທີ່ສຸດຕໍ່ວັນບຸນໄຫ້ວບູຊາເຈົ້າຊີວິດຮຸ່ງຂອງປະຊາຊົນຫວຽດນາມ ແລະ ເພື່ອນຢາກໄດ້ຮັບການແນະນຳບາງຢ່າງກ່ຽວກັບວັນສຳຄັນດັ່ງກ່າວ.
ວິຫານຮຸ່ງຢູ່ແຂວງຟູທໍ້
(ພາບ: dulichphuonghoang.com)
ເພື່ອນແສງອາລຸນທີ່ຮັກແພງ, ວັນບຸນໄຫ້ວບູຊາເຈົ້າຊີວິດຮຸ່ງມີຄວາມໝາຍທີ່ສຸດສຳລັບຊາວຫວຽດນາມ ຊື່ງຖືກຈັດຂຶ້ນໃນວັນທີ 10/3 ໄລ່ຕາມຈັນທະປະຕິທິນຫວຽດນາມ. ປີນີ້, ວັນບຸນໄຫ້ວບູຊາເຈົ້າຊີວິດຮຸ່ງ ກົງກັບວັນທີ 31/3/2012. ຖ້າເພື່ອນມີຄວາມສົນໃຈ, ຈົ່ງມາຫວຽດນາມ, ໄປຢ້ຽມຢາມແຂວງຟູທໍ້ ເພື່ອນສາມາດເຫັນປະຈັກຕາພິທີຈັດງານບຸນໄຫ້ວບູຊາເຈົ້າຊີວິດຮຸ່ງ. ສ່ວນເນື້ອໃນລະອຽດເພື່ອນສາມາດອ່ານ ແລະ ຟັງໃນເວັບໄຊ: http//:vovworld.vn ເລືອກເອົາພາກພາສາລາວ.
ທ່ານຜູ້ອ່ານທີ່ເຄົາລົບ!
ລາຍການຕອບຄຳຖາມຕໍ່ທ່ານຜູ້ຟັງຂອງພວກເຮົາຂໍສີ້ນສຸດລົງພຽງເທົ່ານີ້. ຖ້າຫາກມີຄວາມສົນໃຈທ່ານສາມາດຝາກຈົດໝາຍມາລາຍການຂອງພວກເຮົາຕາມທີ່ຢູ່: ວິທະຍຸກະຈາຍສຽງຫວຽດນາມ-ພາກພາສາລາວ, ເຮືອນເລກທີ 45 ຖະໜົນບ່າຈ້ຽວ-ຮ່າໂນ້ຍ. ອີແມວ:
laovov@yahoo.com ຫລືໄທລະສັບ: 00844.38256631.