ໃນອາທິດຜ່ານມາ, ລາຍການກະຈາຍສຽງຫວຽດນາມພາກພາສາລາວ ໄດ້ຮັບຈົດໝາຍ, email ຫລາຍສະບັບ ແລະ ໂທລະສັບຈາກທ່ານຜູ້ຟັງລາວ. ໃນຈົດໝາຍ, ບັນດາທ່ານຜູ້ຟັງລ້ວນແຕ່ສະແດງຄວາມຮູ້ສຶກເມື່ອໄດ້ຮັບຟັງແຕ່ລະຄໍລຳໃນລາຍການ ແລະ ຢາກຮູ້ຂໍ້ມູນຂ່າວກ່ຽວກັບນະຄອນຫລວງ ຮ່າໂນ້ຍ. ໃນລາຍການໂອ້ລົມກັບເພື່ອນລາວພາກນີ້, ພວກຂ້າພະເຈົ້າຂໍຄັດສະເຫນີເນື້ອໃນຈົດໝາຍບາງສະບັບ ແລະຕອບບາງຄຳຖາມຊື່ງທ່ານຜູ້ຟັງໄດ້ຝາກມາຫາລາຍການໃນອາທິດຜ່ານມາ.
ໃນຈົດໝາຍສົ່ງເຖິງລາຍການ, ເພື່ອນ ສີພອນ ຢູ່ ແຂວງ ບໍແກ້ວໄດ້ເວົ້າວ່າ: ນ້ອງຕິດຕາມບັນດາຄໍລຳໃນລາຍການກະຈາຍສຽງພາກພາສາລາວເປັນປະຈຳ, ພິເສດ ແມ່ນລາຍການຊາຍຄາອາຊຽນ. ຜ່ານຄໍລຳນີ້ ນ້ອງມີຄວາມເຂົ້າໃຈຕື່ມອີກກ່ຽວກັບການພົວພັນຮ່ວມມືລະຫວ່າງບັນດາປະເທດພາຍໃນກຸ່ມ ອາຊຽນ ກໍຄືບັນດາຈຸດວັດທະນະທຳທີ່ເປັນເອກະລັກສະເພາະຂອງບັນດາເຂດພາກຢູ່ປະເທດສະມາຊິກ ອາຊຽນຈຳນວນຫນຶ່ງ. ໃນອາທິດຜ່ານມາ, ພາຍຫລັງໄດ້ຮັບຊົມຄໍລຳ “ຊາຍຄາອາຊຽນ” ຜ່ານຫນ້າເວັບ vov5 ໂດຍຂຽນກ່ຽວກັບ“ວັນສາຍຮູບເງົາ ອາຊີຕາເວັນອອກສ່ຽງໃຕ້- ຂົວຕໍ່ພົວພັນແລກປ່ຽນວັດທະນະທຳ ອາຊຽນ” ໂດຍມີການເຂົ້າຮ່ວມຂອງບັນດາຜູ້ກຳກັບການສະແດງຫນຸ່ມ ມາຈາກ ອິນໂດເນເຊຍ, ກຳປູເຈຍ, ມຽນມາ, ໄທ ແລະ ຫວຽດນາມ. ຜ່ານບົດຂຽນນີ້, ຂ້າພະເຈົ້າໄດ້ຮູ້ວ່າ ມີຮູບເງົາມ່ວນຫລາຍເລື່ອງຂອງບັນດາຜູ້ກຳກັບການສະແດງຫນຸ່ມ ອາຊຽນ ຖືກນຳມາສາຍໃນໂອກາດນີ້ເພື່ອແນະນຳໃຫ້ຜູ້ຊົມຫວຽດນາມ. ຮູບເງົາແຕ່ລະເລື່ອງມີເນື້ອໃນ ແລະ ສານທີ່ແຕກຕ່າງກັນ, ແຕ່ທັງໝົດເຫລົ່ານັ້ນ ລ້ວນແຕ່ສ່ອງແສງບັນດາບັນຫາຕົວຈິງໃນຊີວິດການເປັນຢູ່. ຂ້າພະເຈົ້າຫວັງວ່າ ໃນໄລຍະຈະມາເຖິງ, ເຫດການວັດທະນະທຳນີ້ ຈະຖືກຈັດຂຶ້ນຢູ່ປະເທດລາວ ເພື່ອໃຫ້ຜູ້ຊົມລາວໄດ້ຮັບຊົມບັນດາຮູບເງົາມ່ວນຂອງບັນດາປະເທດອາຊຽນ.
|
ໃນຈົດໝາຍສົ່ງເຖິງລາຍການ, ເພື່ອນ ພອນທະວີ ຢູ່ ແຂວງ ສາລາວັນ ເວົ້າວ່າ: ໃນອາທິດຜ່ານມາ, ລາຍການກະຈາຍສຽງພາກພາສາລາວ ໄດ້ແນະນຳບົດທ່ີມີຫົວຂໍ້ວ່າ: “ຄຸນຄ່າປື້ມບູຮານຂອງຊາວເຜົ່າຢາວ” ແມ່ນສ້າງຄວາມປະທັບໃຈທີ່ສຸດ. ຂ້າພະເຈົ້າຮູ້ສຶກແປກປະຫລາດ, ບໍ່ຄິດວ່າ ຊາວເຜົ່າຢາວ ຢູ່ ຫວຽດນາມ ສາມາດຮັກສາມໍລະດົກວັດທະນະທຳທີ່ສຳຄັນຄືແນວນັ້ນ. ແຕ່ລະບ້ານຂອງຊາວເຜົ່າຢາວໃນເມ່ືອກ່ອນຄືດັ່ງຫໍສະຫມຸດຂະຫນາດນ້ອຍເພ່ືອຮັກສາບັນດາປື້ມບູຮານ. ແຕ່ລະວົງຕະກຸນ, ແຕ່ລະຄອບຄົວລ້ວນແຕ່ມີປື້ມປະຫວັດວົງຕະກຸນເພື່ອບັນທຶກວິວັດແຫ່ງການພັດທະນາຂອງວົງຕະກຸນຕົນ. ນອກນັ້ນ ປື້ມບູຮານ ຍັງແມ່ນເຄື່ອງມືເພື່ອສອນບົດຮຽນກ່ຽວກັບການປະພຶດໃນການພົວພັນໃນສັງຄົມ, ບັນດາຄວາມຮູ້ກ່ຽວກັບດິນຟ້າອາກາດ, ການເລືອກເຟັ້ນທີ່ດິນປູກຝັງ, ການຢາ ແລະ ການປິ່ນປົວພະຍາດຂອງຊາວເຜົ່າຢາວ. ນີ້ແມ່ນແຫລ່ງເອກະສານອັນລ້ຳຄ່າຢ່າງແທ້ຈິງ.
ນັກທ່ອງທ່ຽວໄປຢ້ຽມຢາມຄຸ້ມເມືອງເກົ່າ ຮ່າໂນ້ຍ
ພາບ:internet
|
ເພື່ອນ ບຸນເຮືອງ ຢູ່ ແຂວງ ຄຳມ່ວນ ສົ່ງອີແມວ ມາເຖິງລາຍການໂດຍແບ່ງປັນວ່າ: ໄລຍະຈະມາເຖິງ ນ້ອງພ້ອມກັບຄອບຄົວມາຢ້ຽມຢາມ ນະຄອນຫລວງ ຮ່າໂນ້ຍ. ສະນັ້ນ ເພື່ອກະກຽມໃຫ້ລາຍການທ່ອງທ່ຽວຂອງຕົນ, ນ້ອງຢາກຮູ້ກ່ຽວກັບຄຸ້ມເມືອງເກົ່າຮ່າໂນ້ຍຢ່າງລະອຽດກວ່າ. ພວກອ້າຍເອື້ອຍໃນພາກພາສາລາວຊ່ວຍນ້ອງແດ່.
ເພື່ອນບຸນເຮືອງທີ່ຮັກແພງ! ຄຸ້ມເມືອງເກົ່າຮ່າໂນ້ຍ ແມ່ນຊື່ເອີ້ນຂອງເຂດຕົວເມືອງຫນື່ງ ທີ່ມີມາແຕ່ດົນນານຢູ່ ຮ່າໂນ້ຍ. ປຊຊ ຢູ່ເຂດນີ້ ສ່ວນຫລາຍແມ່ນຜະລິດເຄື່ອງຫັດຖະກຳ ແລະ ຄ້າຂາຍສິນຄ້າ, ສ້າງເປັນບັນດາຖະໜົນທີ່ມີອາຊີບເປັນເອກະລັກສະເພາະ. ຊື່ເອີ້ນຂອງຖະໜົນສາຍຕ່າງໆຢູທີ່ນີ້ແມ່ນຕິດພັນກັບບັນດາປະເພດສິນຄ້າທີ່ໄດ້ຮັບການຜະລິດ, ຕົວຢ່າງຄື: Hàng Đường (ຮ່າງເດືອງ) ແປວ່າ ຖະໜົນນ້ຳຕານ ຂາຍປະເພດສິນຄ້າທີ່ເຮັດດ້ວຍນ້ຳຕານ, Hàng Gà (ຮ່າງກາ) ແປວ່າຖະໜົນໄກ່, ປຊຊ ຢູ່ທີ່ນີ້ຂາຍສັດປີກ, Hàng Lược (ຮ່າງເລືອກ) ແປວ່າ ຖະໜົນຫວີ ຂາຍຫວີຊະນິດຕ່າງໆ. ຄຸ້ມເມືອງເກົ່າ ຮ່າໂນ້ຍ ຂຶ້ນກັບບໍລິເວນເມືອງ ຮວານກຽມ ດ້ວຍເນື້ອທີ່ທັງໝົດປະມານ 100 ເຮັກຕາ, ມີຖະໜົນ 76 ສາຍ. ເຖິງວ່າ ບັນດາຄຸ້ມຖະໜົນເກົ່າຂອງຮ່າໂນ້ຍ ຍັງຕັ້ງຢູ່ນອກເຂດນີ້ກໍຕາມ, ແຕ່ຍ້ອນວ່າ ເຂດນີ້ມີຖະໜົນເກົ່າຫລາຍສຸດ ແລະ ຍັງຮັກສາໄດ້ບັນດາຈຸດເອກະລັກສະເພາະ ສະນັ້ນ ຄຸ້ມເມືອງເກົ່າພຽງແຕ່ໄດ້ຮັບການຮັກສາ, ປະຕິສັງຂອນເທົ່ານັ້ນ. ຖ້າມີໂອກາດມາຢາມຄຸ້ມເມືອງເກົ່າ, ແຂກທ່ອງທ່ຽວຈະໄດ້ຮັບຊົມບັນດາສະຖາປັດຕະຍະກຳທີ່ເປັນເອກະລັກສະເພາະຂອງບັນດາຫລັງຄາເຮືອນບູຮານ ຢູ່ ຖະຫນົນຮ່າງເດືອງ, ຮ່າງບາກ, ໝາໄມ… ຊື່ງໄດ້ຮັບການກໍ່ສ້າງນັບແຕ່ສັດຕະວັດທີ່ 19. ຄຸ້ມເມືອງເກົ່າຮ່າໂນ້ຍໄດ້ຮັບການສ້າງຂຶ້ນນັບແຕ່ສະໄຫມລາຊະວົງຫລີ -ເຈີນ ແຕ່ສັດຕະວັດທີ 11 ຮອດສັດຕະວັດທີ່ 15. ເຂດຊຸມຊົນດຳລົງຊີວິດ ແລະ ຄ້າຂາຍຢ່າງຄັບຄາໜາແຫນ້ນນີ້ ຕັ້ງຢູ່ທາງທິດຕາເວັນອອກຂອງກຸງເກົ່າ ທັງລອງ ຈົນເຖິງໃກ້ກັບແມ່ນ້ຳແດງ. ສະໄຫມລາຊະວົງ ຫລີ ເຈີນ, ປະຊາຊົນ ຈາກບັນດາໝູ່ບ້ານອ້ອມຂ້າງເຂດທ່ົ່ງພຽງພາກເໜືອ ໄດ້ເຕົ້າໂຮມຢູ່ເຂດນີ້ເພື່ອດຳລົງຊີວິດ, ສ້າງເປັນຄຸ້ມເມືອງທີ່ຄັບຄາຫນາແຫນ້ນທີ່ສຸດຢູ່ເມືອງຫລວງ ທັງລອງ. ປະຈຸບັນ, ຄຸ້ມເມືອງເກົ່າ ຮ່າໂນ້ຍ ແມ່ນສະຖານທີ່ທ່ອງທ່ຽວອັນດູດດື່ມ ສຳລັບນັກທ່ອງທ່ຽວຜູ້ຢາກຊອກຮູ້ກ່ຽວກັບທັງລອງ-ດົງໂດຮ່າໂນ້ຍ.
ພວກຂ້າພະເຈົ້າຂໍຂອບໃຈທ່ານຜູ້ຟັງທີ່ໄດ້ຮັບຟັງລາຍຂອງພາກພາສາລາວເປັນປະຈຳ ແລະ ປະກອບຄຳເຫັນໃຫ້ລາຍການ. ທ່ານສາມາດຮັບຟັງ ແລະ ອ່ານບັນດາລາຍການຂອງພວກເຮົາ ຜ່ານຫນ້າເວັບ: vov5.vn ຫລື vovworld.vn.
ທ່ານຜູ້ຟັງສາມາດສົ່ງຈົດໝາຍເຖິງພວກເຮົາ, ໂດຍຈ່າຫນ້າຊອງວ່າ: ວິທະຍຸກະຈາຍສຽງຫວຽດນາມ ພາກພາສາລາວ ເຮືອນເລກທີ 45 ຖະຫນົນ Ba Trieu Ha Noi, ຫລືໂທລະສັບມາໂດຍກົງກໍ່ໄດ້ຕາມເບີ: 0084-4-38256631. Email: Laovov@yahoo.com. ຂໍຂອບໃຈຫລ່ວງຫນ້າ.
ສຸດທ້າຍ, ພວກຂ້າພະເຈົ້າ ຂໍອວຍພອນໃຫ້ທ່ານຜູ້ຟັງຜູ້ອ່ານຈົ່ງມີສຸຂະພາບເຂັ້ມແຂງ ແລະ ປະສົບຜົນສຳເລັດໃນວຽກງານຂອງຕົນ.