ທ່ານ ຫງວຽນດັງຕຽນ, ຜູ້ອຳນວຍການໃຫຍ່ ວິທະຍຸກະຈາຍສຽງ ຫວຽດນາມ
|
ຂໍຮຽນທ່ານຜູ້ຟັງຕ່າງປະເທດ ແລະ ຊາວຫວຽດນາມ ອາໄສຢູ່ຕ່າງປະເທດ
ປີ 2012, ໃນສະພາບການໂລກ ມີການຜັນແປຢ່າງສັບສົນຫລາຍຢ່າງ, ເສດຖະກິດໂລກພວມປະສົບກັບຄວາມຫຍຸ້ງຍາກ, ດ້ວຍລະດັບການຈະເລີນເຕີບໂຕຕຳ່. ວິກິດການຫນິ້ສາທາລະນະຢູ່ ເອີລົບ, ເຖິງວ່າໄດ້ປະກົດມີບັນດາສັນຍານອັນຕັ້ງຫນ້າກໍຕາມ ແຕ່ມາຮອດປະຈຸບັນ ຍັງຄົງແມ່ນຄວາມສ່ຽງອັນໃຫຍ່ຫລວງສຳລັບພື້ນຖານເສດຖະກິດທົ່ວໂລກ. ຫວຽດນາມ ກໍແມ່ນຫນຶ່ງໃນບັນດາປະເທດຖືກຜົນສະທ້ອນຈາກວິກິດການດັ່ງກ່າວ. ເຖິງຢ່າງໃດກໍຕາມ, ຫວຽດນາມ ໄດ້ຜ່ານຜ່າສິ່ງທ້າທາຍ ຍ້ອນປະຕິບັດບັນດານະໂຍບາຍ, ມາດຕະການເສດຖະກິດການເງິນຢ່າງໄຫວພິບ. ລະດັບຈະເລີນເຕີບໂຕເສດຖະກິດບັນລຸປະມານກວ່າ 5% ເຖິງວ່າ ຕຳ່ກວ່າເມື່ອທຽບໃສ່ປີ 2011 ກໍຕາມ ແຕ່ເສດຖະກິດມະຫາພາກຍັງຄົງຮັກສາເປັນປົກກະຕິ, ບັນດານະໂຍບາຍຮັບປະກັນຊີວິດສັງຄົມ, ການປ້ອງກັນຊາດ ປ້ອງກັນຄວາມສະຫງົບໄດ້ຮັກສາຢ່າງໝັ້ນຄົງ. ຢືດໝັ້ນແນວທາງການຕ່າງປະເທດ, ເປັນເຈົ້າການ, ເປີດກວ້າງເພື່ອສັນຕິພາບການຮ່ວມມື ແລະ ພັດທະນາ, ຫລາຍຮູບຫລາຍແບບ ແລະ ຫລາຍຝ່າຍ, ເຊື່ອມໂຍງເຂົ້າກັບສາກົນເທື່ອລະກ້າວ, ປີ 2012 ການທູດຂອງ ຫວຽດນາມ ບັນລຸໄດ້ຜົນງານສຳຄັນຫລາຍຢ່າງ, ປະກອບສ່ວນຍົກສູງບົດບາດທີ່ຕັ້ງຂອງ ຫວຽດນາມໃນເວທີສາກົນ ແລະ ພາກພື້ນ, ສ້າງສະພາບແວດລ້ອມສາກົນທີ່ສະດວກໃຫ້ແກ່ການຮ່ວມມື, ພັດທະນາ, ປະກອບສ່ວນປົກປັກຮັກສາອະທິປະໄຕຜືນແຜ່ນດິນອັນຄົບຖ້ວນ. ບັນດາແຜນນະໂຍບາຍ, ນະໂຍບາຍຂອງພັກ, ລັດ ພ້ອມກັບບັນດາກະຊວງ, ຂະແຫນງການ ແລະ ການເຄື່ອນໄຫວຂອງຂະແຫນງການທູດໄດ້ກາຍເປັນຂົວເຊື່ອມຕໍ່ກັບຊາວ ຫວຽດນາມ ອາໄສຢູ່ຕ່າງປະເທດກວ່າ 4 ລ້ານຄົນທີ່ພວມອ່ວາຍຫນ້າເມືອຫາປະເທດຊາດ.
ປີ 2012, ວິທະຍຸກະຈາຍສຽງ ຫວຽດນາມ ສືບທອດມູນເຊື້ອ ແລະ ພັດທະນາ. ໂດຍແມ່ນອົງການສື່ມວນຊົນຫລາຍຮູບການ, ຊຶ່ງລວມມີ: ວິທະຍຸ, ຫນັງສືພິມ, ໂທລະພາບ, ສື່ເອເລັກໂຕນິກ, ດ້ວຍວິທີການສື່ສານທີ່ກ້າວຫນ້າ ແລະ ທັນສະໄຫມ, ວິທະຍຸກະຈາຍສຽງຫວຽດນາມ ສືບຕໍ່ຢືນຢັນບົດບາດທີ່ຕັ້ງຂອງຕົນໃນວົງການສ່ືມວນຊົນປະຕິວັດ ຫວຽດນາມ, ໃນພາກພື້ນ ແລະ ໃນໂລກ. ບັນດາລາຍການຂອງວິທະຍຸກະຈາຍຫວຽດນາມນັບມື້ນັບຍົກສູງຄຸນນະພາບສູງ ແລະ ໃກ້ຊິດສະຫນິດສະຫນົມ, ໄວ້ເນື້ອເຊື່ອໃຈກັບທ່ານຜູ້ຟັງ. ໃນປີຜ່ານມາ ບັນດາບັນນາທິການ, ນັກຂ່າວຂອງວິທະຍຸກະຈາຍສຽງ ຫວຽດນາມ ໄດ້ພະຍາຍາມເພື່ອນຳມາໃຫ້ທ່ານຜູ້ຟັງພາບພົດຢ່າງຮອບດ້ານກ່ຽວກັບຊີວິດທາງດ້ານການເມືອງ, ເສດຖະກິດ, ວັດທະນະທຳຂອງ ຫວຽດນາມ,ແນະນຳໃຫ້ທ່ານຜູ້ຟັງກ່ຽວກັບປະເທດ ຫວຽດນາມ ທີ່ຂະຫຍັນຂັນເຄື່ອນ, ແມ່ນຈຸດນັດພົບທີ່ປອດໄພ, ແມ່ນສະຖານທີ່ລົງທຶນທີ່ໄວ້ເນື້ອເຊື່ອໃຈ, ກ່ຽວກັບຊາວຫວຽດນາມ ທີ່ກ້າຄົງອົງອາດ, ໃກ້ຊິດສະຫນິດສະຫນົມ, ຮັກແພງແຂກ. ພິເສດ, ຫນ້າເວັບ vovworld.vn ຂອງວິທະຍຸກະຈາຍສຽງ ຫວຽດນາມ, ເຖິງວ່າ ຫາກໍ່ເປີດນຳໃຊ້ໃນປີຫນຶ່ງກໍຕາມ ແຕ່ໄດ້ກາຍເປັນຂົວຕໍ່ລະຫວ່າງທ່ານຜູ້ຟັງ ແລະ ຊາວຫວຽດນາມ ອາໄສຢູ່ຕ່າງປະເທດ ກັບວິທະຍຸກະຈາຍສຽງ ຫວຽດນາມ. ທ່ານຜູ້ຟັງຕ່າງປະເທດ ແລະ ຊາວຫວຽດນາມ ອາໄສຢູ່ຕ່າງປະເທດ ສາມາດຮັບຟັງບັນດາລາຍການກະຈາຍສຽງພາສາຕ່າງປະເທດຂອງວິທະຍຸກະຈາຍສຽງຫວຽດນາມ ທັງຮັບຊົມບັນດາຄໍລຳທີ່ນິຍົມ ແລະ ຄົ້ນຫາຂໍ້ມູນຂ່າວທີ່ມີປະໂຫຍດຕ່າງໆ.
ກ້າວເຂົ້າສູ່ປີ 2013, ວິທະຍຸກະຈາຍສຽງ ຫວຽດນາມ ສືບຕໍ່ເສີມຂະຫຍາຍບັນດາຜົນງານທີ່ບັນລຸໄດ້, ປ່ຽນໃຫມ່ເນື້ອໃນ ແລະ ຮູບການສະແດງ ເພື່ອຮັບໃຊ້ທ່ານຜູ້ຟັງໃຫ້ນັບມື້ນັບດີກວ່າເກົ່າ, ເພື່ອໃຫ້ ວິທະຍຸກະຈາຍສຽງ ຫວຽດນາມ ນັບມື້ນັບໃກ້ຊິດສະຫນິດສະຫນົມ ແລະ ໄວ້ເນື້ອເຊື່ອໃຈກັບທ່ານຜູ້ຟັງກວ່າ.
ເນ່ືອງໃນໂອກາດກ້າວເຂົ້າສູ່ປີໃຫມ່, ຕາງຫນ້າໃຫ້ພະນັກງານ, ນັກຂ່າວ ວິທະຍຸກະຈາຍສຽງ ຫວຽດນາມ ຂໍອວຍພອນທ່ານຜູ້ຟັງຕ່າງປະເທດ ແລະ ຊາວຫວຽດນາມ ອາໄສຢູ່ຕ່າງປະເທດ ຈົ່ງມີສຸຂະພາບເຂັ້ມແຂງ, ວັດທະນາຖາວອນ ແລະ ມີຄວາມຜາສຸກ.