ແນະນຳບົດກ່ຽວຂ້ອງເຖິງການເສັງ "ເພື່ອນຮູ້ຫຍັງແດ່ກ່ຽວກັບຫວຽດນາມ" 2

ວັນພະຫັດ ທີ 23 ເມສາ ຄ.ສ. 2015 | 15:11:55

(vovworld)-ຮັບປະກັນຊີວິດສັງຄົມແມ່ນຄວາມຮຽກຮ້ອງຕ້ອງການ ແລະ ເງື່ອນໄຂທີ່ຈຳເປັນຂອງສະຖຽນລະພາບ, ການພັດທະນາຂອງປະເທດຊາດ. ປີ 2014, ໃນສະພາບການປະເທດຊາດຍັງປະສົບກັບຄວາມຫຍຸ້ງຍາກ, ແຕ່ ມີຫລາຍນະໂຍບາຍຮັບປະກັນຊີວິດສັງຄົມຂອງຫວຽດນາມ ຍັງຄົງໄດ້ຮັບການປະຕິບັດຢ່າງມີປະສິດທິຜົນ, ປະກອບສ່ວນຫັນບັນດາສິດສັງຄົມຂອງປະຊາຊົນທຸກຄົນໃຫ້ປະກົດຜົນ ເປັນຈິງ.

ຈຸດພົ້ນເດັ່ນໃນຂົງເຂດຮັບປະກັນຊີວິດສັງ ຄົມປີ 2014 ແມ່ນສະແດງໃຫ້ເຫັນຜ່ານຈຳນວນຄົນງານມີວຽກເຮັດງານທຳເພີ່ມຂຶ້ນ, ອັດຕາສ່ວນຄອບຄົວທຸກຍາກຫລຸດລົງ, ຈຳນວນຜູ້ເຂົ້າຮ່ວມປະກັນສັງຄົມໄດ້ຮັບການປັບປຸງ, ຕັດສິນເພີ່ມເງິນເດືອນໃຫ້ແກ່ຜູ້ມີຄຸນງາມຄວາມດີ, ຜູ້ອອກກິນເບ້ຍບຳນານ, ຜູ້ມີລະດັບເງິນເດືອນຕ່ຳ…

ພາບປະກອບ

ບັນດາຕົວເລກຫນ້າປະທັບໃຈ

ໃນຂົງເຂດແຮງງານ, ປີ 2014 ຄາດວ່າໄດ້ສ້າງວຽກເຮັດງານທຳໃຫ້ແກ່ຄົນງານ 1,6 ລ້ານຄົນ, ເພີ່ມຂຶ້ນ 3,7 % ເມື່ອທຽບໃສ່ປີ 2013, ໃນນັ້ນ ສົ່ງຄົນງານໄປເຮັດວຽກຢູ່ຕ່າງປະເທດປະມານ 105.000 ຄົນ, ລື່ນກາຍຄາດໝາຍທີ່ວາງອອກກວ່າ 20%. ແລະ ໃນປີຜ່ານມາ, ບັນດາຂະແຫນງການ, ທ້ອງຖິ່ນຕ່າງໆ ກໍໄດ້ຈັດຕັ້ງການປະຕິບັດບັນດານະໂຍບາຍຫລຸດຜ່ອນຄວາມທຸກຍາກ. ທະນາຄານແຫ່ງລັດ ເບີກຈ່າຍຈຳນວນເງິນ ກວ່າ 12.000 ຕື້ດົງ ເພື່ອຊື້ບັດປະກັນສຸຂະພາບໃຫ້ແກ່ຜູ້ທຸກຍາກ, ຊາວຊົນເຜົ່າສ່ວນຫນ້ອຍ, ເດັກນ້ອຍອາຍຸຕ່ຳກວ່າ 6 ປີ, ຫນູນຊ່ວຍຄອບຄົວໃກ້ຈະຖືກຈັດຢູ່ໃນລະດັບຄອບຄົວທຸກຍາກ, ນັກຮຽນ, ນັກສຶກສາ. ຫວຽດນາມ ກໍຍູ້ແຮງການປະຕິບັດນະໂຍບາຍຫນູນຊ່ວຍທີ່ດິນປຸກສ້າງເຮືອນຢູ່, ທີ່ດິນທຳການຜະລິດ, ນ້ຳສະອາດໃຫ້ແກ່ຊາວຊົນເຜົ່າສ່ວນຫນ້ອຍ, ປະຕິບັດສິນເຊື່ອບຸລິມະສິດໃຫ້ແກ່ຄອບຄົວທຸກຍາກໄດ້ກູ້ຢືມທຶນ ນັບແສນໆຄັ້ງ ດ້ວຍຈຳນວນເງິນເກືອບ 10.000 ຕື້ດົງ. ປະສິດທິຜົນຂອງສິ່ງດັ່ງກ່າວໄດ້ເຮັດໃຫ້ອັດຕາສ່ວນຄອບຄົວທຸກ ຍາກຂອງທັງປະເທດ ແລະ ບັນດາເມືອງ, ຕາແສງທຸກຍາກຫລຸດລົງຢ່າງວ່ອງໄວ. ຮອດທ້າຍປີ 2014, ອັດຕາສ່ວນຄອບຄົວທຸກຍາກຂອງທັງປະເທດ ຫລຸດລົງ 1,8-2%/ປີ ເມື່ອທຽບໃສ່ທ້າຍປີ 2013(ແຕ່ 7,8% ລົງເຫລືອພຽງ 5,8-6%), ສະເພາະບັນດາເມືອງທຸກຍາກຫລຸດລົງສະເລ່ຍ 5%/ປີ.

ເລື່ອງຕັດສິນເພີ່ມເງິນເດືອນໃນສະພາວະເສດຖະກິດຍັງປະສົບກັບຄວາມ ຫຍຸ້ງຍາກແມ່ນການສະແດງໃຫ້ເຫັນຄວາມມານະພະຍາຍາມອັນໃຫຍ່ຫລວງ ຂອງສະພາແຫ່ງຊາດ, ລັດຖະບານໃນຄວາມພະຍາຍາມຫນູນຊ່ວຍ 3 ໝວດເປົ້າໝາຍຄື: ຜູ້ມີຄຸນງາມຄວາມດີ, ຜູ້ອອກກິນເບ້ຍບຳນານ, ຜູ້ມີລະດັບເງິນເດືອນຕ່ຳ. ທ່ານນາງ ຟ້າມທິຫາຍຈ່ວຽນ, ລັດຖະມົນຕີວ່າການກະຊວງແຮງງານ, ທະຫານເສຍອົງຄະ ແລະ ສັງຄົມຫວຽດນາມ ໃຫ້ຮູ້ວ່າ:

“ປີ 2014 ເຖິງວ່າຍັງປະສົບກັບຄວາມຫຍຸ້ງຍາກ ແຕ່ລັດຫວຽດນາມ ໄດ້ຕັດສິນສະຫງວນຈຳນວນເງິນ 11.000 ຕື້ດົງ ເພື່ອແກ້ໄຂເງິນເດືອນສ່ວນຫນຶ່ງໃຫ້ແກ່ບັນດາພະນັກງານ, ລັດຖະກອນມີລະດັບເງິນເດືອນຕ່ຳ ແລະ ຜູ້ມີຄຸນງາມຄວາມດີ. ນີ້ແມ່ນຄຳຕັດສິນມີຄວາມໝາຍວັດທະນະທຳມະນຸດ. ຍ້ອນເງື່ອນໄຂເສດຖະກິດ ແລະ ງົບປະມານຍັງຈຳກັດຢູ່ ສະນັ້ນ ພວກເຮົາຕ້ອງແກ້ໄຂເທື່ອລະກ້າວ, ກ້າວໄປເຖິງຈຸດໝາຍ ເງິນເດືອນຕ້ອງຮັບປະກັນລະດັບຄອງຊີບ.”

ແລະກໍໃນປີ 2014, ຫວຽດນາມ ສືບຕໍ່ລົງທຶນກໍ່ສ້າງໃຫມ່ ແລະ ຍົກລະດັບເປີດກວ້າງໂຮງໝໍຫລາຍແຫ່ງ, ພັດທະນາສາທາລະນະສຸກເຂດທະເລໝູ່ເກາະ, ສົ່ງເສີມການພັດທະນາສາທາລະນະສຸກນອກລັດ. ບັນດາຮູບການປະກັນໄພໃຫ້ແກ່ປະຊາຊົນ ນັບມື້ນັບໄດ້ຮັບການເປີດກວ້າງ ດ້ວຍຜະລິດຕະພັນເປັນຫລາຍຮູບຫລາຍແບບ. ເປົ້າໝາຍເຂົ້າຮ່ວມປະກັນສັງຄົມ, ປະກັນສຸຂະພາບ ແລະ ປະກັນຫວ່າງງານ ນັບມື້ຶ້ນັບເພີ່ມຂຶ້ນ ແລະ ໄດ້ຊົມໃຊ້ບັນດາລະບອບນະໂຍບາຍ ແລະ ສິດຜົນປະໂຫຍດຕາມການກຳນົດ. ຈຳນວນຜູ້ເຂົ້າຮ່ວມປະກັນສັງຄົມ ບັນລຸກວ່າ 11,5 ລ້ານຄົນ. ອັດຕາສ່ວນຜູ້ເຂົ້າຮ່ວມປະກັນສຸຂະພາບບັນລຸປະມານ 72% ຍອດຈຳນວນພົນລະເມືອງ. ທ່ານ ບຸ່ຍຊີ້ເລີ້ຍ, ຮອງຫົວຫນ້າກຳມາທິການບັນດາບັນຫາສັງຄົມຂອງສະພາແຫ່ງຊາດ ຕີລາຄາວ່າ:

“ພວກຂ້າພະເຈົ້າເຫັນວ່າ ໃນປີຜ່ານມາ, ລັດຖະບານສຸມໃສ່ແກ້ໄຂນະໂຍບາຍສັງຄົມເປັນຢ່າງດີ. ພວກເຮົາສະຫງວນ 18% ງົບປະມານເພື່ອເບີກຈ່າຍໃຫ້ແກ່ສະຫວັດດີການສັງຄົມ, ນະໂຍບາຍສັງຄົມ, ຮັບປະກັນຊີວິດສັງຄົມ ແລະ ນະໂຍບາຍສຳລັບຜູ້ມີຄຸນງາມຄວາມດີ. ຈຸດພົ້ນເດັ່ນນັ້ນແມ່ນ ພວກເຮົາຮັບປະກັນນະໂຍບາຍສຳລັບຜູ້ມີຄຸນງາມຄວາມດີເປັນຢ່າງ ດີ.”

ປະຖົມປັດໄຈສະດວກໃຫ້ແກ່ປີ 2015

ປີ 2015, ຫວຽດນາມໄດ້ວາງຈຸດໝາຍສັງຄົມສຳຄັນ, ໃນນັ້ນ ອັດຕາສ່ວນຄອບຄົວທຸກຍາກຫລຸດລົງແຕ່ 1,7-2%, ສ້າງວຽກເຮັດງານທຳໃຫ້ແກ່ຄົນງານ 1,6 ລ້ານຄົນ, ອັດຕາສ່ວນຜູ້ຫວ່າງງານຢູ່ເຂດຕົວເມືອຕ່ຳກວ່າລະດັບ 4%. ເພື່ອບັນລຸບັນດາຈຸດໝາຍດັ່ງກ່າວ, ລັດຖະບານ ຈະສືບຕໍ່ສຸມໃສ່ແຫລ່ງກຳລັງໃຫ້ແກ່ການປະຕິບັດບັນດານະໂຍບາຍ ຮັບປະກັນຊີວິດສັງຄົມ, ໃນນັ້ນເອົາໃຈໃສ່ເປັນພິເສດເຖິງການສອນວິຊາຊີບ, ແກ້ໄຂວຽກເຮັດງານທຳ, ຫລຸດຜ່ອນຄວາມທຸກຍາກແບບຍືນຍົງ, ພິເສດ ແມ່ນເຂດຊົນເຜົ່າສ່ວນຫນ້ອຍ, ເຂດຫ່າງໄກສອກຫລີກ. ທ່ານນາຍົກລັດຖະມົນຕີ ຫງວຽນເຕີນຢູງ ໃຫ້ຮູ້ວ່າ:

“ການຫນູນຊ່ວຍຢ່າງແທດຈິງ ແລະ ມີປະສິດທິຜົນ ເພື່ອເພີ່ມລາຍຮັບໃຫ້ແກ່ປະຊາຊົນ, ຫລຸດພົ້ນອອກຈາກຄວາມທຸກຍາກ ຈາກການອະນຸລັກຮັກສາ, ພັດທະນາປ່າ, ຕິດພັນກັບການພັດທະນາການລ້ຽງສັດ ແລະ ຫັນຜົນລະປູກເປັນຫລາຍຮູບຫລາຍແບບ. ພ້ອມທັງປະຕິບັດບັນດານະໂຍບາຍຫນູນຊ່ວຍທີ່ມີຢູ່ແລ້ວ, ເປັນຕົ້ນກ່ຽວກັບທີ່ດິນທຳການຜະລິດ, ທີ່ດິນປຸກສ້າງເຮືອນຢູ່, ນ້ຳສະອາດ, ສາທາລະນະສຸກ, ການສຶກສາ, ພັດທະນາຂະແຫນງອາຊີບ, ສົ່ງເສີມກະສິກຳ, ປ່າໄມ້ ແລະ ໝູນໃຊ້ບັນດາຄວາມຄືບຫນ້າວິທະຍາສາດເຕັກໂນໂລຊີເຂົ້າໃນການຜະ ລິດ. ລັດຖະບານໄດ້ປຶກສາຫາລືຮ່າງດຳລັດກ່ຽວກັບບັນດານະໂຍບາຍດັ່ງ ກ່າວ ແລະ ພວມຊີ້ນຳສ້າງໃຫ້ສົມບູນແບບເພື່ອປະກາດໃຊ້ໂດຍໄວ.”

ພ້ອມກັບບັນດາມາດຕະການລະອຽດ, ກົດໝາຍສຳຄັນຫລາຍສະບັບມີຜົນສັກສິດໃນໄລຍະຈະມາເຖິງຄື: ກົດໝາຍວ່າດ້ວຍວຽກເຮັດງານທຳ, ກົດໝາຍວ່າດ້ວຍປະກັນສັງຄົມ (ສະບັບປັບປຸງ), ກົດໝາຍວ່າດ້ວຍການສອນວິຊາຊີບ ຈະແມ່ນບັນດາກອບກົດໝາຍສຳຄັນເພື່ອໃຫ້ຫວຽດນາມ ສືບຕໍ່ປະຕິບັດບັນດານະໂຍບາຍຮັບປະກັນຊີວິດສັງຄົມໃຫ້ແກ່ປະ ຊາຊົນ. ເລື່ອງຫວຽດນາມ ປະຕິບັດບັນດານະໂຍບາຍຮັບປະກັນຊີວິດສັງຄົມຢ່າງມີປະສິດທິ ຜົນ ໃນສະພາວະເສດຖະກິດຍັງປະສົບກັບຄວາມຫຍຸ້ງຍາກຫລາຍຢ່າງ ນັ້ນແມ່ນຄວາມມານະພະຍາຍາມອັນໃຫຍ່ຫລວງຂອງອຳນາດການປົກຄອງໃນ ປີ 2014. ສິ່ງດັ່ງກ່າວຢືນຢັນການສະເຫມີຕົ້ນສະເຫມີປາຍ ແລະ ບັນດາຄວາມມານະພະຍາຍາມໂດຍບໍ່ຮູ້ອິດຮູ້ເມື່ອຍ ໃນວຽກງານຮັບປະກັນຊີວິດສັງຄົມຂອງຫວຽດນາມ, ປະກອບສ່ວນສຳຄັນເພື່ອພັດທະນາປະເທດຊາດ, ຫັນບັນດາສິດສັງຄົມຂອງປະຊາຊົນທຸກຄົນໃຫ້ປະກົດຜົນເປັນຈິງ.