ບ້ານເກົ່າ ເດືອງເລິມຮ່າໂນ້ຍ (ພາບ: vnstudy)

ອາທິດຜ່ານມາ, ພະແນກກະຈາຍສຽງບັນດາພາສາຕ່າງປະເທດ, ວິທະຍຸກະຈາຍສຽງຫວຽດນາມ ໄດ້ຮັບຈົດໝາຍອີເມວ ຫຼາຍສະບັບ ແລະ ໂທລະສັບຫຼາຍສາຍຈາກທ່ານຜູ້ຟັງທີ່ມາຈາກຫຼາຍປະເທດ ແລະ ເຂດແຄວ້ນຄື: ແອັດສະປາຍ, ອັງກິດ, ຍີ່ປຸ່ນ, ກຳປູເຈຍ, ໄທ ແລະ ລາວ. ໃນນັ້ນມີເພື່ອນລາວຫຼາຍຄົນໄດ້ສົ່ງຈົດໝາຍມາຍັງລາຍການດ້ວຍເນື້ອໃນແບ່ງປັນຄວາມຮູ້ສຶກ, ອວຍພອນວັນມູນເຊື້ອທະຫານອາສາສະໝັກ ແລະ ນັກຊ່ຽວຊານ ຫວຽດນາມ ຊ່ວຍການປະຕິວັດລາວ. ໃນລາຍການໂອ້ລົມກັບເພື່ອນລາວມື້ນີ້ ພວກຂ້າພະເຈົ້າຂໍຄັດສະເໜີບາງຄຳເຫັນ, ເນື້ອໃນ, ກໍ່ຄືຕອບຄຳຖາມຂອງທ່ານຜູ້ຟັງທີ່ຝາກມາຍັງລາຍການໃນອາທິດຜ່ານມາ.

ທ່ານ ພັນໂທ ຈັນທະວົງ, ນັກຮົບເກົ່າລາວ ຢູ່ແຂວງ ວຽງຈັນ ໄດ້ໂທຫາລາຍການດ້ວຍເນື້ອໃນທີ່ວ່າ: “ເນື່ອງໃນໂອກາດສະເຫຼີມສະຫຼອງ 75ປີ ແຫ່ງວັນມູນເຊື້ອທະຫານອາສາສະໝັກ ແລະ ນັກຊ່ຽວຊານ ຫວຽດນາມ ຊ່ວຍການປະຕິວັດລາວ (30/10/1949 – 30/10/2024), ຂໍອວຍພອນໄຊບັນດາທະຫານອາສາສະໝັກ ຫວຽດນາມ, ອວຍພອນໃຫ້ນ້ຳໃຈສາມັກຄີແບບພິເສດ, ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງປະເທດ ເວົ້າລວມ ກໍ່ຄືກອງທັບສອງປະເທດ ເວົ້າສະເພາະ ນັບມື້ນັບພັດທະນາ. ບັນດານັກຮົບປະເທດລາວ ກໍ່ຄືປະຊາຊົນລາວ ຍາມໃດກໍ່ຈົດຈຳຄຸນງາມຄວາມດີຂອງບັນດານັກຮົບທະຫານອາສາສະໝັກ ຫວຽດນາມ ທີ່ໄດ້ຮຽງບ່າຮຽງໄຫຼ່, ກໍ່ຄືສະໜັບສະໜູນການໜູນຊ່ວຍປະຊາຊົນລາວ ໃນຊຸມປີທີ່ຕໍ່ສູ້ຢ່າງດຸເດືອດ. ພວກຂ້າພະເຈົ້າ ຈະພະຍາຍາມຈົນສຸດຄວາມສາມາດຂອງຕົນ ເພື່ອສຶກສາເຜີຍແຜ່ໃຫ້ຄົນລຸ້ນໜຸ່ມ ມີຄວາມເຂົ້າໃຈແຈ້ງກ່ຽວກັບການພົວພັນແບບພິເສດ, ປະກອບສ່ວນເພີ່ມພູນຄູນສ້າງການພົວພັນມິດຕະພາບ ລາວ - ຫວຽດນາມ ໃຫ້ນັບມື້ນັບໝັ້ນຄົງທະນົງແກ່ນ”.

ທ່ານຈັນທະວົງ ທີ່ຮັກແພງ! ພວກຂ້າພະເຈົ້າຂໍຂອບໃຈບັນດາຄຳແບ່ງປັນຂອງທ່ານກ່ຽວກັບລາຍການ ກໍ່ຄືບັນດາຄຳອວຍພອນອັນດີງາມໃຫ້ແກ່ທະຫານອາສາສະໝັກ ແລະ ນັກຊ່ຽວຊານ ຫວຽດນາມ. ຂໍອວຍພອນໃຫ້ທ່ານຈົ່ງມີສຸຂະພາບເຂັ້ມແຂງ, ສືບຕໍ່ມີການອຸທິດສ່ວນເຂົ້າໃນການກໍ່ສ້າງການພົວພັນມິດຕະພາບນີ້ໃຫ້ນັບມື້ນັບໝັ້ນແກ່ນ.

ເພື່ອນ ລຳແພງຈັນ ຢູ່ແຂວງ ຄຳມ່ວນ ໄດ້ສົ່ງຈົດໝາຍມາຍັງລາຍການດ້ວຍເນື້ອໃນ: ໂດຍແມ່ນສະມາຊິກຂອງສະພາກາແດງ ແຂວງ ຄຳມ່ວນ, ຂ້າພະເຈົ້າເຄີຍມີໂອກາດມາຝືກອົບຮົບກ່ຽວກັບວຽກງານສະພາກາແດງຢູ່ ຫວຽດນາມ. ຂ້າພະເຈົ້າໄດ້ຮູ້ວ່າ ນອກຈາກການແລກປ່ຽນຄະນະ, ການສົມທົບກັນໃນການບຳລຸງສ້າງ, ຝືກອົບຮົບພະນັກງານແລ້ວ, ກໍ່ຍັງມີການຮ່ວມມືຜັນຂະຫຍາຍບັນດາການເຄື່ອນໄຫວສັງຄົມມະນຸດສະທຳ, ການກູ້ຊ່ວຍສຸກເສີນ, ການກວດປິ່ນປົວພະຍາດແບບມະນຸດສະທຳ, ພັດທະນາບັນດາຮູບແບບການເຄື່ອນໄຫວທາງມະນຸດສະທຳໃຫ້ແກ່ລາວ ຢ່າງມີປະສິດທິຜົນ. ບັນດາສະພາກາແດງແຂວງ ທີ່ມີເສັ້ນຊາຍແດນຕິດກັບ ຫວຽດນາມ - ລາວ ກໍ່ມີຂໍ້ຕົກລົງສະເພາະ, ເພາະສະນັ້ນ ຫວຽດນາມ ແລະ ລາວ ມີຂໍ້ຕົກລົງຮ່ວມມືລະຫວ່າງບັນດາສະພາກະແດງແຂວງໃດແດ່ ແລະ ທິດທາງໃນການເຄື່ອນໄຫວຂອງສະພາກາແດງຂອງສອງປະເທດໃນໄລຍະຈະມາເຖິງແມ່ນຫຍັງ?

ເພື່ອນ ລຳແພງຈັນ ທີ່ຮັກແພງ! ການພົວພັນຮ່ວມມືລະຫວ່າງສະພາກາແດງ ຫວຽດນາມ ແລະ ສະພາກາແດງ ລາວ ມີປະຫວັດສາດມູນເຊື້ອທີ່ພິເສດມາແຕ່ຫຼາຍປີ. ນັບແຕ່ປີ 2006, ຕາມຂໍ້ລິເລີ່ມຂອງ ສະພາກາແດງ ຫວຽດນາມ, ຂໍ້ຕົກລົງຮ່ວມມືໃນໄລຍະ 2006 – 2010 ໄດ້ຮັບການລົງນາມລະຫວ່າງສະພາກາແດງສາມປະເທດ: ກຳປູເຈຍ, ລາວ ແລະ ຫວຽດນາມ. ຫຼັງຈາກນັ້ນ, ບັນດາຝ່າຍສືບຕໍ່ລົງນາມການຮ່ວມມືໃນໄລຍະຕໍ່ໄປຕາມບັນດາຂົງເຂດຄື: ຍົກສູງກຳລັງຄວາມສາມາດ, ພັດທະນາວຽກງານຈັດຕັ້ງ, ປ້ອງກັນ, ຕ້ານ, ຮັບມືກັບໄພພິບັດ, ເບິ່ງແຍງດູແລສຸຂະພາບ, ກູ້ຊ່ວຍທາງດ້ານມະນຸດສະທຳ, ແລກປ່ຽນຂໍ້ມູນ ແລະ ເພີ່ມທະວີການຮ່ວມມືລະຫວ່າງບັນດາທ້ອງຖິ່ນ ທີ່ມີເສັ້ນສາຍແດນຮ່ວມລະຫວ່າງສອງປະເທດ…

ຕາມນັ້ນແລ້ວ, 10 ແຂວງເຂດຊາຍແດນ ຫວຽດນາມ - ລາວ ໄດ້ເຊັນຂໍ້ຕົກລົງຮ່ວມມື ລວມມີ: ຜົ້ງສາລີ - ເຊີນລາ, ຫຼວງພະບາງ - ດຽນບຽນ, ຫົວພັນ - ແທັງຮວາ, ຊຽງຂວາງ - ເງະອານ, ບໍລິຄຳໄຊ - ຮ່າຕິງ, ຄຳມ່ວນ - ກວ໋າງບິ່ງ, ສະຫວັນນະເຂດ - ກວ໋າງຈິ, ສາລະວັນ - ເທື່ອທຽນ ເຫວ້, ເຊກອງ - ກວ໋າງນາມ, ອັດຕະປື - ກອນຕຸມ.

ໃນໄລຍະຈະມາເຖິງ, ສະພາກາແດງສອງປະເທດເຫັນດີເປັນເອກະພາບສະໜັບສະໜູນເຊິ່ງກັນແລະກັນ ເມື່ອເກີດໄພທຳມະຊາດ, ໄພພິບັດ, ຜ່ານການເຄື່ອນໄຫວລະດົມກຳລັງການໜູນຊ່ວຍທາງດ້ານມະນຸດສະທຳ ລະຫວ່າງສອງສະພາກາແດງແຫ່ງຊາດ, ການເຄື່ອນໄຫວກ່ຽວກກັບການໜູນຊ່ວຍວົງຄະນະຍາດ, ການຮັບມືກັບການປ່ຽນແປງຂອງດິນຟ້າອາກາດ, ໜູນຊ່ວຍຜ່ານບັນດາການເຄື່ອນໄຫວຝືກອົບຮົມ/ແລກປ່ຽນບົດຮຽນປະສົບການກ່ຽວກັບບັນດາການເຄື່ອນໄຫວ: ການເບິ່ງແຍງດູແລສຸຂະພາບ, ປິ່ນປົວເບື້ອງຕົ້ນ ແລະ ການປ້ອງກັນ, ການຕ້ານ ແລະ ຮັບມືກັບໄພພິບັດ, ຈັດຕັ້ງການແລກປ່ຽນຄະນະຜູ້ແທນລະຫວ່າງບັນດາແຂວງເຂດຊາຍແດນ; ເພີ່ມທະວີການແລກປ່ຽນລະຫວ່າງບັນດາສະພາກາແດງແຂວງທີ່ມີເສັ້ນຊາຍແດນຮ່ວມ ຫວຽດນາມ - ລາວ; ສົ່ງເສີມບັນດາສະພາກາແດງແຂວງ ພົບປະແລກປ່ຽນ, ແຮກສ່ຽວກັນ, ເຊັນຂໍ້ຕົກລົງຮ່ວມມື, ເພີ່ມທະວີການແບ່ງປັນບົດຮຽນປະສົບການ ໃນບັນດາການເຄື່ອນໄຫວມະນຸດສະທຳ.

ສ່ວນໃນອີເມວ, ເພື່ອນ ແສງຈັນ ຢູ່ແຂວງ ຫົວພັນ ໄດ້ສົ່ງຈົດໝາຍມາຍັງລາຍການຜ່ານທາງ Facebook ດ້ວຍເນື້ອໃນຄືດັ່ງນີ້: “ອາທິດຜ່ານມາ, ເມື່ອຮັບຊົມ ສາລະຄະດີພາບ ບ້ານເກົ່າ ກຶດາ - ບ່ອນເກັບຮັກສາບັນດາຈຸດວັດທະນະທຳທີ່ເປັນເອກະລັກສະເພາະຂອງເຂດທົ່ງພຽງທາງພາກເໜືອ ຫວຽດນາມ. ຂ້າພະເຈົ້າເຫັນວ່າ ບ້ານເກົ່ານີ້ງາມຫຼາຍ, ມີຫຼາຍຈຸດວັດທະນະທຳທີ່ເປັນເອກະລັກຫຼາຍຢ່າງ, ຂ້າພະເຈົ້າມັກໝູ່ບ້ານນີ້ຫຼາຍ. ດັ່ງນັ້ນ, ຢູ່ພາກເໜືອ ຫວຽດນາມ ນອກຈາກບ້ານເກົ່ານີ້ແລ້ວ ມີບ້ານເກົ່າແຫ່ງໃດອີກບໍ?”

ເພື່ອນ ແສງຈັນທີ່ຮັກແພງ! ພາກເໜືອ ຫວຽດນາມ ໄດ້ຮັບຖືວ່າແມ່ນບ່ອນເກັບຮັກສາຄຸນຄ່າທີ່ເປັນມູນເຊື້ອອັນດີງາມຂອງຊາດ ດ້ວຍຄວາມໜ້າແໜ້ນທາງດ້ານປະຫວັດສາດທີ່ເປັນໜ້າປະຈັບໃຈ. ຢູ່ພາກເໜືອຍັງມີບ້ານເກົ່າຫຼາຍແຫ່ງ ເຖິງວ່າຜ່ານຜ່າສິ່ງທ້າທາຍຫຼາຍຢ່າງໃນໄລຍະປະຫວັດສາດ ແຕ່ຍັງຮັກສາໄດ້ຄວາມງາມທາງດ້ານຄວາມເກົ່າແກ່ທີ່ມີມາແຕ່ດົນນານ. ນອກຈາກ ບ້ານເກົ່າ ກຶດາ, ມື້ນີ້ພວກຂ້າພະເຈົ້າຂໍແນະນຳບັນດາບ້ານເກົ່າອື່ນອີກໃຫ້ເພື່ອນ ຄື: ບ້ານ ເດື່ອງເລິມ (ຮ່າໂນ້ຍ), ບ້ານເຄື່ອງປັ້ນດິນເຜົາ ບາດຈ່າງ (ຮ່າໂນ້ຍ), ບ້ານ ໂທຮ່າ (ບັກຢາງ), ບ້ານພາບແຕ້ມ ດົງໂຮ່ (ບັກນິງ), ບ້ານ ໂນມ (ຮຶງອຽນ)…

ອາດເວົ້າໄດ້ວ່າແຕ່ລະບ້ານກໍ່ລ້ວນແຕ່ຮັກສາຈຸດທີ່ເປັນເອກະລັກສະເພາະຂອງເຂດພາກ, ສຳລັບຊາວ ຫວຽດນາມ ໝູ່ບ້ານແມ່ນສະຖານທີ່ເກັບຮັກສາຄວາມງາມທີ່ເປັນມູນເຊື້ອຢ່າງລຽບງ່າຍ, ສະໜິດຕິດພັນໃນວັດທະນະທຳ ຫວຽດນາມ. ບັນດາໝູ່ບ້ານທີ່ສະຫງົບສຸກ ຍັງແມ່ນສະຖານທີ່ທ່ອງທ່ຽວທີ່ຈັບອົກຈັບໃຈ ເມື່ອຢາກລົງຕົວຈິງໃນບັນຍາກາດນີ້. ຖ້າມີໂອກາດ, ຫວັງວ່າ ເພື່ອນຈະມາຢ້າມບັນດາໝູ່ບ້ານນີ້ເພື່ອຄົ້ນຫາກ່ຽວກັບໝູ່ບ້ານນີ້ຕື່ມອີກ.

ທ່ານຜູ້ຟັງທີ່ເຄົາລົບ, ດັ່ງທີ່ກ່າວມານັ້ນແມ່ນເນື້ອໃນຄຳເຫັນຂອງທ່ານຜູ້ຟັງທີ່ຝາກມາລາຍການໃນອາທິດຜ່ານມາ, ຫວັງວ່າ ທ່ານຜູ້ຟັງຈະສືບຕໍ່ຝາກຈົດໝາຍ, ອີເມວ ຫຼື ໂທລະສັບມາຫາລາຍການ ເພື່ອປະກອບຄຳເຫັນ ຊ່ວຍລາຍການຂອງພວກເຮົາໃຫ້ນັບມື້ນັບດີກວ່າເກົ່າ. ບັນດາທ່ານກໍ່ສາມາດຝາກຈົດໝາຍມາຍັງລາຍການ ໂດຍຈ່າໜ້າຊອງວ່າ: ພາກພາສາລາວ, ວິທະຍຸກະຈາຍສຽງຫວຽດນາມ, ເຮືອນເລກທີ 45 ຖະໜົນ ບ່າຈ້ຽວ, ຮ່າໂນ້ຍ ຫຼື ໂທມາໂດຍກົງກໍ່ໄດ້ ຕາມເບີໂທ 0084.243.8256631 ຫຼື ອີເມວ laovov5@gmail.com. ທ່ານຜູ້ຟັງກໍ່ສາມາດເຂົ້າເບິ່ງໃນເວັບໄຊ vovworld.vn ເພື່ອແລກປ່ຽນຄຳເຫັນ ແລະ ຕິຊົມຜ່ານບັນດາລາຍການທີ່ໄດ້ເອົາລົງໃນເວັບໄຊດັ່ງກ່າວ. ຂໍຂອບໃຈ.