ພິທີໄຫວ້ບູຊາເຈົ້າຊີວິດຮຸ່ງ ຢູ່ແຂວງຟູ້ເທາະ - ຫວຽດນາມ
(ພາບ : baophutho)
|
ການເຫຼື້ອມໄສໄຫວ້ບູຊາເຈົ້າຊີວິດຮຸ່ງຂອງຫວຽດນາມ ຫາກໍໄດ້ຮັບການຮັບຮອງເອົາຈາກອົງການ UNESCO ແມ່ນມໍລະດົກວັດທະນະທຳບໍ່ມີຮູບຮ່າງເປັນຕົວແທນຂອງມວນມະນຸດ. ນີ້ແມ່ນຄວາມເອກອ້າງທະທົງໃຈອັນໃຫຍ່ຫຼວງຂອງທົ່ວທັງຊາດ ເມື່ອປະເພນີໄຫວ້ບູຊາບັນພະບູລຸດຂອງຊາວຫວຽດນາມໄດ້ຮັບກນເຊີດຊູຈາກໂລກ. ແຕ່ພ້ອມກັບນາມມະຍົດອັນສູງສົ່ງດັ່ງກ່າວ, ກໍແມ່ນໜ້າທີ່ຮັບຜິດຊອບຢ່າງໜັກໜ່ວງທີ່ມີຕໍ່ປະເທດຊາດ ແລະ ຊາວຫວຽດນາມ, ນັ້ນແມ່ນຕ້ອງອະນຸລັກຮັກສາ ແລະ ເສີມຂະຫຍາຍວັດທະນະທຳການເຫຼື້ອມໄສ ເພື່ອໃຫ້ ບັນດາຄຸນຄ່າມໍລະດົກສາມາດແຜ່ລາມຢ່າງເລິກເຊິ່ງກ້ວາງຂວາງໃນວົງຄະນະຍາດ ແລະ ບໍ່ຖືກສູນຫາຍ ແລະ ຫັນປ່ຽນໄປຕາມການເວລາ.
ເມື່ອສຽງສັນຍານດັງຂຶ້ນຈາກບ່ອນນັ່ງຂອງປະທານກອງປະຊຸມຄັ້ງທີ່ 7 ຄະນະ ກຳມາທິການລະຫວ່າງລັດຖະບານສົນທິສັນຍາ ປີ 2003 ໂດຍຮັບຮອງເອົາຂໍ້ຕົກລົງຮັບຮອງການເຫຼື້ອມໄສໄຫວ້ບູຊາເຈົ້າຊີວິດຮຸ່ງຢູ່ແຂວງຟູ້ເທາະ ຂອງຫວຽດນາມແມ່ນ ມໍລະດົກວັດທະນະທຳບໍ່ມີຮູບຮ່າງຂອງມວນມະນຸດນັ້ນ, ສຽງຕົບມືຊົມເຊີຍຂອງບັນດາຜູ້ແທນໃນຫໍປະຊຸມໄດ້ດັງຂຶ້ນຢ່າງບໍ່ຢຸດເຊົາ. ປະຈຸບັນ, ຫວຽດນາມໄດ້ມີມໍລະດົກຕື່ມອີກແຫ່ງໜຶ່ງໄດ້ຮັບການຮັບຮອງຈາກໂລກ ແລະ ສຳຄັນກ່ວານັ້ນ, ປະເພນີໄຫວ້ບູຊາບັນພະບູລຸດທີ່ສັກສິດຂອງຂອງຊາດຫວຽດນາມໄດ້ກາຍເປັນສິ່ງທີ່ຄຸນຄ່າມີຄວາມໝາຍເປັນຕົວແທນໃນທົ່ວໂລກ. ການເຫຼື້ອມໄສໄຫວ້ບູຊາເຈົ້າຊີວິດຮຸ່ງແມ່ນມໍລະດົກວັດທະນະທຳທີ່ສັກສິດທີ່ສຸດຊຶ່ງຊາວຫວຽດນາມຫຼາຍລຸ່ນຄົນໄດ້ສຸມເຫື່ອເທແຮງຮັກສາ ແລະ ຖ່າຍທອດໃຫ້ລຸ່ນຄົນປະຈຸບັນ. ພາຍຫຼັງມໍລະດົກນີ້ໄດ້ຮັບການເຊີດຊູຈາກອົງການ UNESCO ນັ້ນ, ເລື່ອງສຳຄັນອັນດັບໜຶ່ງ ແລະ ກໍແມ່ນວິທີການແກ້ໄຂຍາວນານຊຶ່ງຫວຽດນາມຕ້ອງຍົກສູງສະຕິຄວາມຮັບຜິດຊອບໃນການອະນຸລັກຮັກສາ ແລະ ເສີມຂະຫຍາຍການເຫຼື້ອມໄສໄຫວ້ບູຊາເຈົ້າຊີວິດຮຸ່ງ. ທ່ານ ຝ້າມກ່າວຟອງ ເລຂາທິການໃຫຍ່ຄະນະກຳມະການແຫ່ງຊາດ UNESCO ຫວຽດນາມ ໃຫ້ຮູ້ວ່າ : “ ເລື່ອງບັນລຸໄດ້ນາມມະຍົດພຽງແຕ່ແມ່ນສ່ວນໜຶ່ງ, ແຕ່ການອະນຸລັກຮັກສາ ແລະ ເສີມຂະຫຍາຍມໍລະດົກຄືແນວໃດຈຶ່ງແມ່ນບັນຫາສຳຄັນ. ພິເສດແມ່ນໃນສະພາບທີ່ທີ່ຫວຽດນາມພວມມີຫັນປ່ຽນໂຄງປະກອບເສດຖະກິດ, ແມ່ນຕ້ອງນຳໃຊ້ບັນດານາມມະຍົດທີ່ບັນລຸໄດ້ເພື່ອປະກອບສ່ວນເຂົ້າໃນການພັດທະນາຂອງບັນດາທ້ອງຖິ່ນທີ່ມີມໍລະດົກເວົ້າສະເພາະ ກໍຄືຂອງທັງປະເທດເວົ້າລວມ. ຄະນະກຳມະການແຫ່ງຊາດໄດ້ຕິດຕໍ່ພົວພັນກັບບັນດາອົງການຈັດຕັ້ງສາກົນເພື່ອໃຫ້ເຂົາເຈົ້າສາມາດຊ່ວຍພວກເຮົາທາງດ້ານເຕັກນິກ, ການເງິນເພື່ອອະນຸລັກຮັກສາມໍລະດົກ. ມໍລະດົກນັ້ນຕ້ອງໄດ້ຮັບການອະນຸລັກຕາມມາດຖານ ທາງດ້ານວິທະຍາສາດ. ແລະ ເມື່ອພວກເຮົາໄດ້ຂະຫຍາຍມໍລະດົກນັ້ນ ກໍຕ້ອງເດີນຕາມທິດພັດທະນາແບບຍືນຍົງໄວ້ໃຫ້ເສັ່ນລູກເສັ່ນຫຼານໃນອະນາຄົດ ”
ເປັນທີ່ໄດ້ຮັບຊາບແລ້ວວ່າ ແຂວງຟູ້ເທາະພວມຄົ້ນຄ້ວາຍຸດທະສາດການອະນຸລັກຮັກສາທີ່ຍາວນານກ່ຽວກັບການເຫຼື້ອມໄສໄຫວ້ບູຊາເຈົ້າຊີວິດຮຸ່ງເພື່ອປະກອບສ່ວນອະນຸລັກຮັກສາ ແລະ ເສີມຂະຫຍາຍຈຸດວັດທະນະທຳຂອງຊາດ. ທ່ານຮ່າເກ້ຊານ ຮອງປະທານຄະນະກຳມະການປະຊາຊົນແຂວງຟູ້ເທາະໃຫ້ຮູ້ວ່າ : “ ກ່ອນອື່ນໝົດ ພວກຂ້າພະເຈົ້າຈະສຸມໃສ່ຍູ້ແຮງວຽກງານການໂຄສະນາກ່ຽວກັບມໍລະດົກນີ້ ເພື່ອໃຫ້ປະຊາຊົນທັງຢູ່ໃນປະເທດ ແລະ ຕ່າງປະເທດກໍຄືເພື່ອນມິດສາກົນສາມາດເຂົ້າໃຈຕື່ມອີກກ່ຽວກັບມໍລະດົກທີ່ເປັນເອກະລັກສະເພາະຂອງຫວຽດນາມ. ໃນປີທີ່ຈະມາເຖິງ, ພວກຂ້າພະເຈົ້າຈະຈະຈັດຕັ້ງພິທີໄຫວ້ບູຊາເຈົ້າຊີວິດຮຸ່ງ, ງານບຸນວິຫານຮຸ່ງ , ພ້ອມກັບພິທີຮັບໃບຢັ້ງຢືນມໍລະດົກການເຫຼື້ອມໄສໄຫວ້ບູຊາເຈົ້າຊີວິດຮຸ່ງໃຫ້ເປັນຢ່າງດີ. ໃນນັ້ນ, ສ້າງເງື່ອນໄຂອຳນວຍຄວາມສະດວກເພື່ອໃຫ້ປະຊາຊົນເຂົ້າຮ່ວມການເຄື່ອນໄຫວເຫຼື້ອມໄສຫຼາຍກ່ວາເພາະວ່າ ພວກເຂົາເຈົ້າເອງແມ່ນຜູ້ຮັກສາ ແລະ ສືບທອດຈາກຄົນລຸ່ນກ່ອນໆ ”
ຕາມທ່ານຫງວຽນຈີ້ເບັນ ຫົວໜ້າສະຖາບັນວັດທະນະທຳ ແລະ ສິລະປະຫວຽດນາມແລ້ວ, ສິ່ງສຳຄັນທີ່ບໍ່ອາດຫຼົງລືມໄດ້ແມ່ນຕ້ອງເສີມຂະຫຍາຍການເຂົ້າຮ່ວມຂອງວົງຄະນະຍາດເຂົ້າໃນການອະນຸລັກຮັກສາມໍລະດົກ. ທ່ານກ່າວວ່າ : “ ສຳລັບມໍລະດົກວັດທະນະທຳບໍ່ມີຮູບຮ່າງເປັນຕົວແທນຂອງມວນມະນຸດ, UNESCO ຍາມໃດກໍເອົາໃຈໃສ່ເຖິງບັນດາມໍລະດົກຊຶ່ງໄດ້ຮັບການອະນຸລັກຮັກສາ , ເສີມຂະຫຍາຍ ແລະ ຖ່າຍທອດໃນວົງຄະນະຍາດຄືແນວໃດ. ເຂົາເຈົ້າຮຽກຮ້ອງໃຫ້ວົງຄະນະຍາດຕ້ອງເປັນເຈົ້າຂອງວັດທະນະທຳບໍ່ມີຮູບຮ່າງ ”
ຕາມທ່ານນາງ ຫງວຽນທິມິນຫຼີ ຜູ້ອຳນວຍການສູນຄົ້ນຄ້ວາ ແລະ ເສີມຂະຫຍາຍມໍລະດົກ ສັງກັດສະມາຄົມມໍລະດົກຫວຽດນາມແລ້ວ, ສິ່ງທີ່ສຳຄັນກ່ວາໝູ່, ນັ້ນແມ່ນຕ້ອງຍົກສູງສະຕິຄວາມຮັບຮູ້ຂອງປະຊາຊົນທຸກຊັ້ນວັນນະ, ເປັນຕົ້ນແມ່ນໄວໜຸ່ມ ກ່ຽວກັບບັນດາຄຸນຄ່າຂອງມໍລະດົກເພື່ອໃຫ້ທຸກໆຄົນສາມາດເຂົ້າໃຈຢ່າງເລິກເຊິ່ງ ແລະ ສະແດງຄວາມເຊື່ອໝັ້ນຕໍ່ວັດທະນະທຳການເຫຼື້ອມໄສຊຶ່ງວົງຄະນະຍາດໄດ້ເລືອກເຟັ້ນ ແລະ ເຄົາລົບນັບຖື. ຕາມທ່ານນາງ ຫງວຽນທິມິນຫຼີ ເວົ້າວ່າ :
“ ຕ້ອງສົມທົບ, ສົນທະນາກັບໄວໜຸ່ມ ຍ້ອນຂ້າພະເຈົ້າຖືວ່າ ພວກໄວໜຸ່ມ ເຂົາເຈົ້າບໍ່ເຂົ້າໃຈຫຼາຍປານໃດກ່ຽວກັບບັນດາພິທີກຳ ແລະ ການປັບປຸງ ຊຶ່ງເຂົາເຈົ້າຕ້ອງເຂົ້າຮ່ວມໃນປະເພນີນັ້ນ. ແລະ ພວກເຮົາຕ້ອງຜູກຮັດປະເພນີທີ່ມີຄວາມໝາຍເຫຼົ່ານັ້ນກັບປະເພນີປະຈຳວັນຢູ່ໃນຄອບຄົວ, ນັ້ນແມ່ນປະເພນີໄຫວ້ບູຊາບັນພະບູລຸດ ”
ເພື່ອອະນຸລັກຮັກສາ ແລະ ເສີມຂະຫຍາຍ ມໍລະດົກວັດທະນະທຳພິເສດຂອງໂລກ ຄືການເຫຼື້ອມໄສໄຫວ້ບູຊາເຈົ້າຊີວິດຮຸ່ງນັ້ນ, ໃນສະເພາະໜ້າ, ແຂວງຟູ້ເທາະຈະສຸມໃສ່ຈັດຕັ້ງງານບຸນວິຫານຮຸ່ງປີ 2013 ໃຫ້ເປັນຢ່າງດີ. ໃນຍາວນານ, ແຂວງຟູ້ເທາະ ຈະສ້າງໂຄງການດຳເນີນງານດ້ວຍການເຄື່ອນໄຫວໂຄສະນາເຜີຍແຜ່ ມໍລະດົກວັດທະນະທຳໃໝ່ຂອງໂລກທັງຢູ່ພາຍໃນ ແລະ ຕ່າງປະເທດ.