(vovworld) – ຊຸດອາພອນຂອງຊາວເຜົ່າໄທດຳ ແລະ ໄທຂາວແມ່ນຄ້າຍຄືກັນ. ແຕ່ຈຸດທີ່ເປັນເອກະລັກສະເພາະນັ້ນແມ່ນ, ຜ້າປຽວ (ຜ້າຄຽນຫົວຂອງຊົນເຜົ່າໄທດໍາ) ໃນຊຸດອາພອນຂອງຜູ້ຍິງຊົນເຜົ່າໄທດຳ, ພັດມີສີສັນວັດທະນະທຳສະເພາະ ແລະ ສ້າງຄວາມປະທັບໃຈ. ຜ້າປຽວແຕ່ລະຜືນແມ່ນຕິດພັນກັບເລື່ອງລາວໃດໜຶ່ງ ໂດຍຜ່ານລວດລາຍ, ສີສັນສະແດງໃຫ້ເຫັນແນວຄິດຈິດໃຈ ແລະ ບຸກຄະລິກຂອງແມ່ຍິງແຕ່ລະຄົນ..
ຜ້າປຽວຂອງແມ່ຍິງເຜົ່າໄທດຳ
(ພາບ:ອິນເຕີແນດ)
ປະຈຸບັນ, ຊີວິດຂອງເຜົ່າໄທດຳໄດ້ມີການປ່ຽນແປງຫຼາຍຢ່າງແລ້ວ, ເຮືອນຮ້ານບໍ່ໄດ້ມຸງຫຍ້າຄືເກົ່າ, ຫາກມຸ້ງດ້ວຍດິນຂໍຫຼືສັງກະສີ. ຊຸດອາພອນປະຈຳເຜົ່າກໍ່ມີການປ່ຽນແປງຫຼາຍໃຫ້ເໝາະສົມກັບການອອກແຮງງານ, ທຳການຜະລິດປະຈຳວັນ.ເຖິງວ່າຈະມີການປ່ຽນແປງຄືແນວໃດກໍ່ຕາມ, ແຕ່ຜ້າປຽວພັນຫົວຂອງແມ່ຍິງເຜົ່າໄທດຳພັດຂາດບໍ່ໄດ້. ຜ້າປຽວແມ່ນສັນຍາລັກ, ແມ່ນຄວາມງາມຂອງແມ່ຍິງຊົນເຜົ່າໄທດຳ. ດັ່ງນັ້ນ, ນັບແຕ່ເວລາຍັງນ້ອຍ, ເຂົາເຈົ້າໄດ້ຮັບການສິດສອນວິທີປັກແສ່ວຜ້າປຽວ. ອ້ານ ເລືອງວັນທຽດ, ພະນັກງານຄົ້ນຄ້ວາຂອງຫໍພິພິດທະພັນຊົນເຜົ່າວິທະຍາ, ໃຫ້ຮູ້ວ່າ:
“ຜ້າປຽວແມ່ນຜະລິດຕະພັນທີ່ພົ້ນເດັ່ນຂອງສາວຊົນເຜົ່າໄທດຳ. ສະແດງໃຫ້ເຫັນຄວາມຊຳນານ, ຫຼັກຄວາມງາມຂອງແມ່ຍິງຊົນເຜົ່າໄທດຳ. ນອກນັ້ນຍັງສະແດງໃຫ້ເຫັນໂລກກະທັດ, ຊີວະທັດຂອງເຂົາເຈົ້າອີກດ້ວຍ. ລວດລາຍທີ່ປັກແສ່ວໃນຜ້າປຽວແມ່ນຮູບສັດທີ່ໃກ້ຊິດກັບຊີວິດຂອງມະນຸດຄື: ໂຕກວາງ, ແມງກະເບື້ອ, ໂຕນົກ, ຊ້າງ, ເສືອ, ຮູບພະຈັນ ແລະ ຕົ້ນໄມ້..“
ສາວເຜົ່າໄທດຳພ້ອມກັບຜ້າປຽວ
(ພາບ:ອິນເຕີແນດ)
ສຳລັບແມ່ຍິງເຜົ່າໄທດຳແລ້ວ, ຜູ້ໃດກໍ່ຮູ້ປັກແສ່ວຜ້າປຽວ. ຜູ້ໃດບໍ່ຮູ້ຈະຖືກຖືວ່າຄົນຂີ້ຄ້ານ ແລະ ຜູ້ຊາຍບໍ່ມັກ, ບໍ່ຢາກເອົາເປັນເມຍ. ຜ້າປຽວບໍ່ພຽງແຕ່ສ້າງຄວາມປະທັບໃຈດ້ວຍສີສັນທີ່ຫຼາກຫຼາຍ, ບັນດາລວດລາຍທີ່ລະອຽດລະອໍເທົ່ານັ້ນ, ຫາກຍັງເຊີດຊູຄວາມງາມໃຫ້ແມ່ຍິງອີກດ້ວຍ. ຜ້າປຽວ ຍັງແມ່ນມາດຖານເພື່ອຕີລາຄາຄວາມສາມາດ, ບຸກຄະລິກຂອງແມ່ຍິງອີກດ້ວຍ. ເອື້ອຍ ມິນງວຽດ, ພະນັກງານຫໍພິພິດທະພັນຊົນເຜົ່າວິທະຍາ, ໃຫ້ຮູ້ວ່າ:
“ສຳລັບສາວຊົນເຜົ່າເມື່ອງແລ້ວ, ຫົວສິ້ນຖືກຖືວ່າແມ່ນມາດຖານເພື່ອຕີລາຄາກ່ຽວກັບບຸກຄະລິກ, ຄວາມດຸໝັ່ນ ແລະ ຄວາມສາມາດ, ສ່ວນຊາວເຜົ່າໄທດຳພັດຕີລາຄາຜ່ານຜ້າປຽວ. ຜູ້ຊາຍອີງໃສ່ການປັກແສ່ວ, ການປະດັບປະດາລວດລາຍໃນຜ້າປຽວ, ເພື່ອເລືອກເຟັ້ນ, ຕີລາຄາບຸກຄະລິກຂອງຜູ້ສາວ “.
ສາວເຜົ່າໄທດຳປັກແສ່ວຜ້າປຽວ
(ພາບ:ອິນເຕີແນດ) ນັບແຕ່ເວລາຍັງນ້ອຍ, ສາວເຜົ່າໄທດຳໄດ້ຮັບການຮຽນວິທີປັກແສ່ວ, ຕັດຫຍິບ, ຕຳຫຸກທໍໄໝ. ການຮຽນວິທີປັກແສ່ວຜ້າປຽວກໍ່ແມ່ນການຫຼໍ່ຫຼອມສີໄມ້ລາຍມືໃຫ້ແກ່ບັນດານາງສາວເຜົ່າໄທດຳ. ເມື່ອມີອາຍຸ 15, 16 ປີ, ການປັກແສ່ວ, ຕັດຫຍິບ, ຕຳຫຸກທໍ່ໄໝມີຄວາມຊຳນານແລ້ວ. ເຂົາເຈົ້າກໍ່ປັກແສ່ວຜ້າປຽວເອງ ເພື່ອກະກຽມເອົາຜົວ. ຜ້າປຽວ ແມ່ນຂອງຕ້ອນທີ່ຂາດບໍ່ໄດ້ ເພື່ອໃຫ້ເຈົ້າສາວມອບໃຫ້ຄອບຄົວຂອງຜົວເມື່ອເປັນລູກໃພ້. ຜ່ານຜ້າປຽວສາມາດເຫັນໄດ້ວ່າເຈົ້າຂອງ ຂອງມັນມີຄວາມສາມາດ, ດຸໝັ່ນຂະຫຍັນພຽນ, ມີສີໄມ້ລາຍມືຫຼືບໍ. ຜ້າປຽວແມ່ນສິ່ງທີ່ຂາດບໍ່ໄດ້ໃນຊີວິດທາງດ້າວວັດທະນະທຳ, ຈິດໃຈຂອງຊາວເຜົ່າໄທດຳ, ແມ່ນອະນຸສອນຊຸມວັນທີ່ສຳຄັນໃນຊີວິດຂອງຊາວເຜົ່າໄທດຳແຕ່ລະຄົນ. ອ້າຍທຽດ ໃຫ້ຮູ້ວ່າ:
“ບັນດາລູກໄພ້ຊົນເຜົ່າໄທດຳເຄີຍມອບຜ້າປຽວໃຫ້ແມ່ຜົວໃນວັນຫາກໍ່ເຂົ້າມາດຳລົງຊີວິດໃນຄອບຄົວຜົວ. ນອກນັ້ນເຂົາເຈົ້າກໍ່ປັກແສ່ວຜ້າປຽວໃຫ້ແກ່ຕົນເອງອີກ. ຜ້າປຽວແມ່ນຂົວຕໍ່ລະຫວ່າງບ່າວສາວຊົນເຜົ່າໄທດຳນຳກັນ“.
(ພາບ:ອິນເຕີແນດ) ຜ້າປຽວພັນຫົວຈະສ້າງຄວາມເຢືອກເຢັນໃນຍາມຮ້ອນ ແລະ ຄວາມອົບອຸ່ນໃນຍາມໜາວຈັດ... ຜ້າປຽວຍັງແມ່ນເຄື່ອງປະດັບປະດາທີ່ສຳຄັນຂອງນາງສາວຊົນເຜົ່າໄທດຳໃນຊີວິດປະຈຳວັນ, ພິເສດແມ່ນເມື່ອໄປຫຼິ້ນ ຫຼືເຂົ້າຮ່ວມງານບຸນ. ຜ້າປຽວຍັງແມ່ນເຄື່ອງເອົາໄປນຳຄົນຕາຍ ແລະ ລູກຫຼານຕ້ອງພັນຫົວດ້ວຍຜ້າປຽວໃນງານສົບ. ສຳລັບຊາວເຜົ່າໄທດຳ, ຜ້າປຽວມີບົດບາດພາທາງໃຫ້ວີນຍານຂອງຄົນຕາຍໄປສູ່ສຸຄະຕິ. ອ້າຍ ທຽດ ໃຫ້ຮູ້ວ່າ, ຜ້າປຽວຂອງຊົນເຜົ່າໄທດຳມີທີ່ຕັ້ງສຳຄັນທີ່ສຸດໃນຊີວິດຂອງເຂົາເຈົ້າ.
“ເມື່ອໃຊ້ຜ້າປຽວ ຮູ້ສຶກຄືວ່າມີເທວະດາຟ້າແຖນປົກປ້ອງໃຫ້. ຜ້າປຽວແມ່ນຜະລິດຕະພັນດ້ານວັດຖຸ ແລະ ຈິດໃຈ ໃນວົງຄະນາຍາດຊາວຊົນເຜົ່າໄທດຳ. ມັນແມ່ນຂອງຕ້ອນທີ່ສັກສິດ ເພື່ອປົກປ້ອງຈິດວີນຍານໃຫ້ບັນດານາງສາວຊົນເຜົ່າໄທດຳ“.
ເຖິງວ່າຊີວິດໃນປະຈຸບັນໄດ້ມີການປ່ຽນແປງຫຼາຍຢ່າງແລ້ວກໍ່ຕາມ, ແຕ່ຜ້າປຽວຂອງແມ່ຍິງເຜົ່າໄທດຳ ຍັງຄົງແມ່ນຜະລິດຕະພັນສິລະປະທີ່ຍອດຍິງ, ສະແດງໃຫ້ເຫັນສີໄມ້ລາຍມືຂອງສາວເຜົ່າໄທດຳ. ຜ້າປຽວກາຍເປັນຜະລິດຕະພັນດ້ານວັດທະນະທຳ ແລະ ຈິດໃຈທີ່ເຂັ້ມຄົ້ນໄປດ້ວຍສີສັນຊົນເຜົ່າໄທດຳ.