(vovworld)- ກ່າວຄຳເຫັນທີ່ວາລະໄຂກອງປະຊຸມໃຫຍ່ຄັ້ງທີ 12 ຂອງພັກກອມມູນິດຫວຽດນາມ, ທ່ານເລຂາທິການໃຫຍ່ ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູຈ້ອງ ໄດ້ຢືນຢັນຈຸດໝາຍນຳປະເທດຊາດກາຍເປັນປະເທດອຸດສາຫະກຳຕາມທິດທັນສະໄຫມໂດຍໄວ. ຈຸດໝາຍນີ້ໄດ້ຮັບການເຫັນດີເຫັນພ້ອມຈາກຜູ້ແທນຫລາຍຄົນທີ່ເຂົ້າຮ່ວມກອງປະຊຸມໃຫຍ່ຄັ້ງທີ 12 ຂອງພັກ ພ້ອມທັງຢືນຢັນ ພັກກອມມູນິດຫວຽດນາມ ໄດ້ຕີລາຄາຖືກກັບສະພາບພຶດຕິກຳຕົວຈິງກໍຄືກຳນົດທິດພັດທະນາຂອງປະເທດຊາດໃນໄລຍະຈະມາເຖິງ.
ການນຳພັກ,ລັດ,ຜູ້ແທນເຂົ້າຮ່ວມກອງປະຊຸມໃຫຍ່
ພາບ:baomoi.com
|
ຈຸດໝາຍ ຮອດປີ 2020 ແມ່ນນຳຫວຽດນາມກາຍເປັນປະເທດອຸດສາຫະກຳຕາມທິດທັນສະໄຫມ ຊື່ງໄດ້ກຳນົດຈາກກອງປະຊຸມໃຫຍ່ຄັ້ງທີ 8 ຂອງພັກ. ຄວາມຈິງ, ໃນ 20 ປີຜ່ານມາ, ທົ່ວພັກ, ທົ່ວປວງຊົນ ແລະ ທົ່ວກອງທັບ ໄດ້ມານະພະຍາຍາມສູ້ຊົນປະຕິບັດຈຸດໝາຍນີ້. ເຖິງຢ່າງໃດກໍຕາມ, ຍ້ອນຫລາຍສາຍເຫດພາວະວິໄສ, ອັດຕະວິໄສ ສະນັ້ນ ຫລາຍຄາດໝາຍ, ມາດຖານໃນຈຸດໝາຍດັ່ງກ່າວບໍ່ສາມາດບັນລຸໄດ້.
ພັກຕີລາຄາຖືກຕ້ອງກັບຄວາມຈິງ
ຕາມການຄົ້ນຄ້ວາຂອງບັນດາຜູ້ຊ່ຽວຊານແລ້ວ, ມີ 9 ຜົນງານ ແລະ 10 ຂໍ້ຈຳກັດຂອງວິວັດທະນາການຫັນເປັນອຸດສາຫະກຳ ແລະ ທັນສະໄຫມ ຢູ່ ຫວຽດນາມໃນໄລຍະຜ່ານມາ. ໃນນັ້ນ ບັນດາຜົນງານສຳຄັນທີ່ສຸດ ນັ້ນແມ່ນ ກະສິກຳ, ຊົນນະບົດ, ຊາວກະສິກອນໄດ້ຮັບຄວາມເອົາໃຈໃສ່ຊຸກຍູ້ຕາມທິດຄົບຊຸດ, ໝັ້ນຄົງ; ອັດຕາສ່ວນບັນດາຂະແຫນງອຸດສາຫະກຳ, ກໍ່ສ້າງ ແລະ ບໍລິການເພີ່ມຂຶ້ນວ່ອງໄວ. ແຕ່ບັນດາຜົນງານພົ້ນເດັ່ນດັ່ງກ່າວບໍ່ທັນພຽງພໍເພື່ອຫລຸດຜ່ອນ 10 ຂໍ້ຈຳກັດລົງເມື່ອປະເທດຊາດດຳເນີນການຫັນເປັນອຸດສາຫະກຳ ແລະ ທັນສະໄຫມ. ໃນນັ້ນ ເປັນຫນ້າສົນໃຈ ນັ້ນແມ່ນ ການຫັນປ່ຽນໂຄງປະກອບເສດຖະກິດຍັງຊັກຊ້າ ແລະ ຫລ້າຫລັງຢູ່, ການຫັນເປັນອຸດສາຫະກຳ ແລະ ທັນສະໄຫມມີທ່າອ່ຽງພັດທະນາຕາມລວງກວ້າງ, ລະດັບຄວາມໄວການປ່ຽນໃຫມ່ເຕັກໂນໂລຊີຍັງຕ່ຳ, ບໍ່ສະໝ່ຳສະເໝີ.
ຜູ້ແທນຫລາຍທ່ານທີ່ເຂົ້າຮ່ວມກອງປະຊຸມໃຫຍ່ຄັ້ງທີ 12 ຂອງພັກ ຖືວ່າ: ເລື່ອງພັກກອມມູນິດຫວຽດນາມ ຍອມຮັບຢ່າງກົງໄປກົງມາວ່າບໍ່ສາມາດບັນລຸໄດ້ຄາດໝາຍ, ມາດຖານຫລາຍປານໃດໃນຈຸດໝາຍຮອດປີ 2020 ແມ່ນນຳຫວຽດນາມ ກາຍເປັນປະເທດອຸດສາຫະກຳຕາມທິດທັນສະໄຫມ ນັ້ນແມ່ນ ພັກສັງເກດຕົງຕໍ່ຄວາມຈິງ, ຕີລາຄາຖືກຕ້ອງກັບຄວາມຈິງ, ທ່ານ ດັ້ງກວກວີງ, ຄະນະຜູ້ແທນແຂວງ ຮ່າຕີ້ງ ຖືວ່າ:
“ນີ້ແມ່ນການຕີລາຄາຢ່າງກົງໄປກົງມາ, ເຂັ້ມງວດຂອງພັກ. ສ່ວນສາຍເຫດ ເປັນຫຍັງບໍ່ບັນລຸໄດ້ຄາດໝາຍທີ່ວາງອອກ, ພວກຂ້າພະເຈົ້າໄດ້ສະເຫນີຕ້ອງຕີລາຄາໃຫ້ລະອຽດ ຍ້ອນສາຍເຫດອັດຕະວິໄສ ຫລື ພາວະວິໄສ. ຂ້າພະເຈົ້າມີຄວາມດີໃຈເມື່ອ ພັກຕີລາຄາຖືກຕ້ອງກັບຄວາມຈິງ, ສັງເກດຕົງຕໍ່ຄວາມຈິງ, ບໍ່ຫລົບຫລີກ. ພັກເຮັດໄດ້ຄືແນວນັ້ນ ຂ້າພະເຈົ້າມີຄວາມເຊື່ອໝັ້ນວ່າ ພັກກອມມູນິດຫວຽດນາມ ຈະສືບຕໍ່ກ້າວຂຶ້ນ.”
ຕ້ອງມີວິໄສທັດຍາວນານ
ທ່ານ ເຈືອງຢາງລອງ, ຂຶ້ນກັບຄະນະຜູ້ແທນກະຊວງຕຳຫລວດ ຖືວ່າ :ຈຸດໝາຍ “ນຳຫວຽດນາມ ກາຍເປັນປະເທດອຸດສາຫະກຳຕາມທິດທັນສະໄຫມ” ແມ່ນເປົ້າໝາຍຂອງວິວັດການສູ້ຊົນຢ່າງລຽນຕິດ, ໃນນັ້ນ ມີການສືບທອດ ແລະ ພັດທະນາຜົນງານຂອງ 30 ປີແຫ່ງການປ່ຽນແປງໃຫມ່. ສະນັ້ນ ການກຳນົດທິດນະໂຍບາຍ ແລະ ມາດຕະການໃຫ້ຈຸດໝາຍນັ້ນ ຕ້ອງອີງໃສ່ພື້ນຖານວິໄສທັດຍາວນານ. ໃນສະເພາະຫນ້າ, ຂອດບຸກທະລຸສຳຄັນ ແລະ ມີລັກສະນະຕັດສິນຊີ້ຂາດ ຍັງຄົງແມ່ນການສຸມໃສ່ເຂົ້າໃນການລົງທຶນ, ຂຸດຄົ້ນແຫລ່ງຊັບພະຍາກອນມະນຸດເປັນຢ່າງດີ. ຍ້ອນແຫລ່ງຊັບພະຍາກອນມະນຸດ ແມ່ນແຫລ່ງຊັບພະຍາກອນປະກອບສ່ວນສ້າງບາດກ້າວບຸກທະລຸ. ພ້ອມກັນນັ້ນ ຕ້ອງບຸລິມະສິດພັດທະນາວິທະຍາສາດເຕັກໂນໂລຊີ ແລະ ໝູນໃຊ້ບັນດາຜົນງານວິທະຍາສາດເຕັກໂນໂລຊີຂອງມວນມະນຸດເຂົ້າໃນວິວັດທະນາການພັດທະນາຂອງປະເທດຊາດ.
“ຂົງເຂດນີ້ຕ້ອງມີບັນດາມາດຕະການຄືໄດ້ສະເຫນີໃນເອກະສານ ນັ້ນແມ່ນຕ້ອງໄປວ່ອງໄວກວ່າ ເພື່ອໝູນໃຊ້ຜົນງານດ້ານວິທະຍາສາດ, ເຕັກໂນໂລຊີຂອງໂລກຢ່າງມີປະສິດທິຜົນທີ່ສຸດ. ຜ່ານນັ້ນ ໝູນໃຊ້ຂຸດຄົ້ນຄວາມສາມາດບົ່ມຊ້ອນ, ທ່າໄດ້ປຽບໃຫ້ດີສຸດ. ເພື່ອໃຫ້ວິທະຍາສາດເຕັກໂນໂລຊີພັດທະນາຢ່າງວ່ອງໄວ ແລະ ທັນກັບບັນດາປະເທດຄື: ຈຸດໝາຍຊື່ງມະຕິກອງປະຊຸມໄດ້ວາງອອກ, ພວກເຮົາຕ້ອງຍາດແຍ່ງທຸກແຫລ່ງກຳລັງ ແລະ ຕ້ອງຍາດແຍ່ງກາລະໂອກາດ. ເພາະວ່າ ນີ້ແມ່ນ ກາລະໂອກາດທີ່ດີບໍ່ເຄີຍມີມາກ່ອນເພື່ອໃຫ້ປະເທດຊາດເຊື່ອມໂຍງເຂົ້າກັບສາກົນ ແລະ ພັດທະນາ.”
ເຫັນດີເຫັນພ້ອມກັບທັດສະນະນີ້, ທ່ານ ເວືອງກວກຕວນ, ຂຶ້ນກັບຄະນະຜູ້ແທນແຂວງ ບັກນີງ ຖືວ່າ: ເພື່ອນຳຫວຽດນາມ ກາຍເປັນປະເທດອຸດສາຫະກຳ ຕາມທິດທັນສະໄຫມ, ທົ່ວພັກ, ທົ່ວປວງຊົນ ຕ້ອງມານະພະຍາຍາມກວ່າອີກ. ຫນຶ່ງໃນບັນດາບາດກ້າວບຸກທະລຸ ນັ້ນແມ່ນຄວນເອົາໃຈໃສ່ເຖິງການເພີ່ມທະວີກຳລັງແຮງພາຍໃນ ເປັນເຈົ້າຂອງພື້ນຖານເສດຖະກິດ.
“ຕາມຂ້າພະເຈົ້າແລ້ວ, ພວກເຮົາຄວນເອົາໃຈໃສ່ເຖິງແຜນຮ່າງພັດທະນາອຸດສາຫະກິດສຳຮອງໃຫ້ແກ່ວິສາຫະກິດເລີ່ມດຳເນີນທຸລະກິດທີ່ຂຶ້ນກັບພື້ນຖານເສດຖະກິດພາກເອກະຊົນ ສ້າງກຳລັງຫນູນສ້າງເຄື່ອງໝາຍການຄ້າແຫ່ງຊາດຂອງວິສາຫະກິດເພື່ອແກ້ງແຍ້ງ. ທີສອງ ເອົາໃຈໃສ່ເຖິງກະສິກຳ, ຊາວກະສິກອນ, ຊົນນະບົດ, ຊີວິດການເປັນຢູ່ຂອງປະຊາຊົນ ແລະ ຫລຸດຜ່ອນຄວາມທຸກຍາກແບບຍືນຍົງ.”
ມາດຕະການສຳຄັນຫນຶ່ງອີກຊື່ງບັນດາຜູ້ແທນເຕື້ອງເຖິງ ນັ້ນແມ່ນ ຕ້ອງຍູ້ແຮງການສ້າງໂຄງປະກອບລັດວິສາຫະກິດຄືນໃຫມ່ ດ້ວຍຈຸດສຸມແມ່ນສ້າງໂຄງປະກອບບັນດາກຸ່ມບໍລິສັດ, ບໍລິສັດໃຫຍ່ຄືນໃຫມ່. ຕາມທ່ານ ງຽມຊວນແທ່ງ, ສະມາຊິກຄະນະຜູ້ແທນອົງຄະນະພັກກຸ່ມວິສາຫະກິດສູນກາງແລ້ວ, ປະຕິບັດສິ່ງດັ່ງກ່າວຈະຍົກສູງກຳລັງແກ້ງແຍ້ງຂອງລັດວິສາຫະກິດ. ຈາກນັ້ນ ຫລີກລ້ຽງໄດ້ສະພາບການລົງທຶນແບບກະແຈກກະຈາຍ, ລົງທຶນເຂົ້າບັນດາຂະແຫນງ, ຂົງເຂດບໍ່ແມ່ນຂະແຫນງດຳເນີນທຸລະກິດຕົ້ນຕໍຂອງວິສາຫະກິດ.
“ພວກເຮົາຄວນສືບຕໍ່ຍູ້ແຮງການສ້າງໂຄງປະກອບຫນີ້ເສຍຄືນໃຫມ່, ຮັບປະກັນຄວາມປອດໄພຫນີ້ສາທາລະນະ. ສຳລັບກຸ່ມລັດວິສາຫະກດ, ຈຸດສຸມແມ່ນສ້າງໂຄງປະກອບບັນດາກຸ່ມບໍລິສັດ, ບໍລິສັດໃຫຍ່ຄືນໃຫມ່. ນີ້ລ້ວນແຕ່ຫນ້າທີ່ສຳຄັນ. ຂ້າພະເຈົ້າເຊື່ອໝັ້ນວ່າ ພາຍຫລັງກອງປະຊຸມໃຫຍ່ຄັ້ງນີ້ ພວກເຮົາຈະປະຕິບັດຈຸດໝາຍປະຊາຊົນຮັ່ງມີ, ປະເທດຊາດເຂັ້ມແຂງຢ່າງມີໄຊ.”
ພັກກອມມູນິດຫວຽດນາມ ກຳນົດ ໃນໄລຍະ 5 ປີຈະມາເຖິງ, ຫວຽດນາມ ຕ້ອງສູ້ຊົນຢ່າງຂ້ຽວຂາດກວ່າ, ພັດທະນາເສດຖະກິດຢ່າງວ່ອງໄວ, ໝັ້ນຄົງ ເພື່ອນຳປະເທດຊາດກາຍເປັນປະເທດອຸດສາຫະກຳຕາມທິດທັນສະໄຫມໂດຍໄວ. ດ້ວຍຄວາມຕັດສິນໃຈຂອງພັກ, ຄວາມເຫັນດີເຫັນພ້ອມຂອງປະຊາຊົນ, ຈຸດໝາຍນີ້ຈະປະກົດຜົນເປັນຈິງໂດຍໄວ.