(vovworld) - ກ່ວາໜຶ່ງປີນັບແຕ່ເມື່ອປະຊາຄົມເສດຖະກິດ ອາຊຽນ (AEC) ໄດ້ຮັບການສ້າງຕັ້ງຂຶ້ນ. ຄວາມສະດວກທີ່ສຸດທີ່ປະຊາຄົມໄດ້ນຳມາໃຫ້ ຫວຽດນາມ ນັ້ນແມ່ນສ້າງສະພາບແວດລ້ອມສັນຕິພາບ, ສະຖຽນລະພາບ, ສ້າງພາກພື້ນເສດຖະກິດ, ການຄ້າລວມ ແລະ ພື້ນຖານການຜະລິດຮ່ວມ. ປີທຳອິດຂອງປະຊາຄົມເສດຖະກິດ ອາຊຽນ (AEC) ໄດ້ຜ່ານໄປດ້ວຍຂີດໝາຍບໍ່ໜ້ອຍ ແລະ AEC ຈະສືບຕໍ່ແມ່ນກຳລັງໜູນເພື່ອໃຫ້ ຫວຽດນາມ ປ່ຽນໃໝ່, ຮັບມື ແລະ ກ້າວຂຶ້ນ, ເຊື່ອມໂຍງຢ່າງເລິກເຊິ່ງ ກ້ວາງຂວາງເຂົ້າ AEC ໃນໄລຍະໃໝ່. ບົດຂຽນຂອງ ແອ໋ງຮ່ຽນ “ຊຸກຍູ້ການຮ່ວມມືເພື່ອປະຊາຄົມເສດຖະກິດອາຊຽນພັດທະນາ”.
AEC ໄດ້ຮັບການກຳເນີດຢ່າງເປັນທາງການນັບແຕ່ທ້າຍເດືອນ 12/2015. AEC ໄດ້ເປີດກາລະໂອກາດສຳພັດ ແລະ ເປີດກ້ວາງຕະຫຼາດພາຍໃນກຸ່ມດ້ວຍປະຊາກອນປະມານ 625 ລ້ານຄົນ ແລະ GDP ບັນລຸເກືອບ 3.000 ຕື້ USD ໃນແຕ່ລະປີ. ກ່ວາໜຶ່ງປີທີ່ຜ່ານມາ, AEC ໄດ້ສ້າງຂີດໝາຍການຮ່ວມມືຢ່າງຟົດຟື້ນ, ພິເສດແມ່ນລະຫວ່າງ ອາຊຽນ ກັບບັນດາຄູ່ຮ່ວມມືພາຍໃນກຸ່ມ ແລະ ກັບບັນດາພາກພື້ນອື່ນໆຢູ່ໃນໂລກ. ສຳລັບ ຫວຽດນາມ ແລ້ວ, AEC ໄດ້ຂີດໝາຍບາດກ້າວເຊື່ອມໂຍງເຂົ້າກັບພາກພື້ນ, ເຂົ້າຮ່ວມລະບົບສະໜອງໃນພາກພື້ນ ແລະ ທົ່ວໂລກເທື່ອລະກ້າວ, ປະກອບສ່ວນປະຕິບັດຄາດໝາຍຫັນປ່ຽນໂຄງປະກອບເສດຖະກິດ ແລະ ຫັນເປັນປະເທດອຸດສາຫະກຳ, ທັນສະໄໝ.
ພາບປະກອບ
|
AEC ສ້າງກຳລັງໜູນພັດທະນາ
ໃນ 3 ເສົ້າຄ້ຳນັ້ນ, AEC ໄດ້ຮັບຖືວ່າແມ່ນສຳຄັນທີ່ສຸດ. ການພັດທະນາຂອງ AEC ໄດ້ສ້າງປະຖົມປັດໄຈເພື່ອຊຸກຍູ້ການປະຕິບັດ 2 ເສົາຄ້ຳທີ່ຫຍັງເຫຼືອ. ຄາດໝາຍຂອງ AEC ລວມມີການສ້າງຕະຫຼາດແຫ່ງໜຶ່ງ ແລະ ຮາກຖານການຜະລິດເປັນເອກະພາບ, ເປັນພາກພື້ນເສດຖະກິດມີລັກສະນະແກ່ງແຍ້ງ, ພາກພື້ນພັດທະນາຢ່າງສະໝ່ຳສະເໝີ ແລະ ເຊື່ອມໂຍງເຂົ້າກັບພື້ນຖານເສດຖະກິດທົ່ວໂລກ. ໜຶ່ງປີທີ່ຜ່ານມາ, ນັບແຕ່ເມື່ອສ້າງຕັ້ງ AEC ນັ້ນ, ບັນດາປະເທດ ອາຊຽນ ໄດ້ເອົາໃຈໃສ່ເປັນພິເສດເຖິງການຫັນຂົງເຂດໃຫຍ່ເປັນເສລີ 3 ນັ້ນແມ່ນການຫັນເປັນເສລີໃນຂົງເຂດການຄ້າ, ການບໍລິຫານ, ການລົງທຶນ, ການເງິນ ແລະ ແຮງງານ. ລະອຽດຄື, ບັນດາປະເທດ ສະມາຊິກ ອາຊຽນ ຍູ້ໄວວິວັດທະນາການປະຕິບັດການຫລຸດຜ່ອນພາສີ, ປະຕິຮູບລະບຽບການພາສີ ແລະ ບັນດາມາດຕະການສ້າງຄວາມສະດວກໃຫ້ແກ່ດ້ານການຄ້າ. ທ່ານ ເລຮ່ວາຍຈູງ, ຮອງລັດຖະມົນຕີການຕ່າງປະເທດ ຫວຽດນາມ ໄດ້ຢືນຢັນວ່າ:
“ຜົນງານໃຫຍ່ທີ່ສຸດຂອງປະຊາຄົມເສດຖະກິດ ອາຊຽນ ນັ້ນແມ່ນກ້າວເຂົ້າສູ່ການປະຕິບັດບັນດາແຜນການທີ່ໄດ້ວາງອອກໃນຂົງເຂດເສດຖະກິດຄື ສືບຕໍ່ຊຸກຍູ້ການເຈລະຈາສັນຍາຄູ່ຮ່ວມມືເສດຖະກິດຮອບດ້ານພາກພື້ນ (RECP) ລະຫວ່າງບັນດາປະເທດຢູ່ ອາຊີ - ປາຊີຟິກ ແລະ ອາຊຽນ ກ່ຽວກັບພາກພື້ນການຄ້າເສລີ, ປະຕິບັດຂໍ້ລິເລີ່ມເຊື່ອມຕໍ່ໃນອາຊຽນ ແລະ ອາຊຽນກັບບັນດາປະຊາຄົມອື່ນໆ. ບັນດາປະເທດກໍ່ຮ່ວມມືຢ່າງເລິກເຊິ່ງກ່ວາໃນຂົງເຂດວິຊາສະເພາະຄື: ການເງິນ, ການຄ້າການລົງທຶນ, ແຮງງານ, ຊຸກຍູ້ບັນດາການເຄື່ອນໄຫວ, ພິເສດແມ່ນເຊື່ອມຕໍ່ກັບບັນດາຄູ່ຮ່ວມມືພາຍນອກ ແລະ ປະຕິບັດຂໍ້ຕົກລົງໃນຂອບເຂດຂອງປະຊາຄົມເສດຖະກິດ ອາຊຽນ.”
ເພື່ອບັນລຸໄດ້ຈຸດໝາຍສ້າງພາກພື້ນເສດຖະກິດທີ່ມີລັກສະນະແກ່ງແຍ້ງ, ໃນໄລຍະຜ່ານມາ, AEC ໄດ້ມຸ່ງໃສ່ການເຄື່ອນໄຫວຕົ້ນຕໍ 4 ຢ່າງນັ້ນແມ່ນນະໂຍບາຍແກ່ງແຍ້ງ, ປົກປ້ອງຜູ້ບໍລິໂພກອຸປະໂພກ, ປົກປ້ອງກຳມະສິດທາງປັນຍາ ແລະ ພັດທະນາພື້ນຖານສ້າງ. ໄປຄຽງຄູ່ກັນນັ້ນ, ເພື່ອສ້າງພາກພື້ນ ອາຊຽນ ໃຫ້ພັດທະນາຢ່າງສະໝ່ຳສະເໝີ, ອາຊຽນ ໄດ້ພິຈາລະນາສ້າງຍຸດທະສາດພັດທະນາວິສາຫະກິດຂະໜາດນ້ອຍ ແລະ ກາງ, ສ້າງຮ່າງລາຍການລວມໃຫ້ບັນດານັກທຸລະກິດ ອາຊຽນ ແລະ ຜັນຂະຫຍາຍຂໍ້ລິເລີ່ມເຊື່ອມໂຍງ ອາຊຽນ. ອາຊຽນ ກໍ່ເຫັນດີເປັນເອກະພາບຊຸກຍູ້ການເຈລະຈາບັນດາສັນຍາການຄ້າເສລີ 2 ຝ່າຍ ແລະ ສັນຍາຄູ່ຮ່ວມມືເສດຖະກິດຮອບດ້ານ, ເຂົ້າຮ່ວມລະບົບການສະໜອງທົ່ວໂລກຢ່າງແຮງກ່ວາ ເພື່ອແນໃສ່ເຊື່ອມໂຍງຢ່າງແຮງກ່ວາເຂົ້າພື້ນຖານເສດຖະກິດທົ່ວໂລກ.
AEC ນຳມາເຊິ່ງກາລະໂອກາດອັນໃຫຍ່ຫຼວງໃຫ້ແກ່ ຫວຽດນາມ
ການເຕີບໃຫຍ່ຂອງສະຫະສະມາຄົມຜ່ານການກຳເນີດຂອງ AEC ໄດ້ນຳເອົາຜົນປະໂຫຍດມາໃຫ້ທັງພາກພື້ນໃນນັ້ນມີ ຫວຽດນາມ. AEC ຍັງສ້າງກາລະໂອກາດສຳພັດກັບຕະຫຼາດກ້ວາງໃຫຍ່ກ່ວາໃຫ້ແກ່ ຫວຽດນາມ. ບໍ່ພຽງແຕ່ຕະຫຼາດພາຍໃນກຸ່ມ ອາຊຽນເທົ່ານັ້ນ ຫາກຍັງເປີດກ້ວາງອອກສູ່ບັນດາຕະຫຼາດນອກພາກພື້ນ ອາຊຽນ ອີກດ້ວຍ, ຍ້ອນວ່າ ປະຈຸບັນບັນດາປະເທດ ອາຊຽນ ລ້ວນແຕ່ມີບັນດາສັນຍາຮ່ວມມື, ພິເສດແມ່ນບັນດາສັນຍາກ່ຽວກັບຄວາມເສລີດ້ານການຄ້າ ສຳລັບບັນດາຄູ່ຮ່ວມືການຄ້າໃຫຍ່ໃນໂລກອີກດ້ວຍ. ແລະກໍ່ຜ່ານ AEC, ໄດ້ສ້າງເງື່ອນໄຂເພີ່ມຄວາມດຶງດູດໃຫ້ແກ່ສະພາບແວດລ້ອມແຫ່ງການລົງທຶນດຳເນີນທຸລະກິດຂອງ ຫວຽດນາມ. ຮອງສາດສະດາຈານ, ປອ ຈິ້ງທິທູເຮືອງ, ຮອງຫົວໜ້າພະແນກເສດຖະກິດ ແລະ ດຳເນີນທຸລະກິດສາກົນ, ມະຫາວິທະຍາໄລການຄ້າຕ່າງປະເທດ ຮ່າໂນ້ຍ, ຖືວ່າ:
“ກາລະໂອກາດກ່ຽວກັບຕະຫຼາດແມ່ນຈະແຈ້ງທີ່ສຸດສຳລັບບັນດາວິສາຫະກິດ ຫວຽດນາມ. ຕະຫຼາດຢູ່ນີ້ແມ່ນຕະຫຼາດມີປະຊາກອນກ່ວາ 600 ລ້ານຄົນ, ໃຫຍ່ທີ່ 3 ຢູ່ໃນໂລກ. ແລະຕະຫຼາດແຫ່ງນີ້ຢູ່ຄຽງຂ້າງພວກເຮົາ, ໝາຍຄວາມວ່າຊ່ອງຫວ່າງດ້ານພູມສາດລະຫວ່າງ ຫວຽດນາມ ກັບບັນດາປະເທດໃນພາກພື້ນບໍ່ຫ່າງໄກ ຄື ຫວຽດນາມ ກັບ ອີຢູ, ອາເມລິກາ ຫຼື ຍີ່ປຸ່ນ. ດັ່ງນັ້ນ, ວິສາຫະກິດຕ້ອງເຫັນໄດ້ຜົນປະໂຫຍດຢູ່ທີ່ນີ້”
ຄວາມມານະພະຍາຍາມເຊື່ອມໂຍງຮອບດ້ານໃນອາຊຽນ
ອາດສາມາດຢັ້ງຢືນໄດ້ວ່າ, AEC ເຊິ່ງແມ່ນເສົາຄ້ຳໃນ ອາຊຽນ ທີ່ຮັບການກຳເນີດ ແລະ ກ້າວເຂົ້າສູ່ການເຄື່ອນໄຫວ, ໄດ້ຍົກການຮ່ວມມື ແລະ ຄວາມສາມັກຄີ ອາຊຽນ ຂຶ້ນສູ່ລະດັບສູງໃໝ່. ໃນພາກພື້ນເສດຖະກິດທີ່ພັດທະນາຂະຫຍັນຂັນເຄື່ອນ, ເລື່ອງປັບປຸງການເຊື່ອມຕໍ່ລະຫວ່າງ 10 ປະເທດສະມາຊິກ ແມ່ນປັດໄຈທີ່ມີຄວາມໝາຍແຖວໜ້າສຳລັບການຮັກສາສັນຕິພາບ, ຄວາມໝັ້ນຄົງ ແລະ ສະຖຽນລະພາບພາຍໃນພາກພື້ນ ກໍ່ຄືເພີ່ມທະວີທີ່ຕັ້ງບົດບາດຂອງແຕ່ລະປະເທດ. ອາຊຽນ ພວມກາຍເປັນພາກພື້ນສຳຄັນທີ່ດຶງດູດຄວາມສົນໃຈຈາກບັນດາປະເທດຄູ່ຮ່ວມມືນອກພາກພື້ນ. ທ່ານ Haike Manning, ເອກອັກຄະລັດຖະທູດ ນິວຢີແລນ ປະຈຳ ຫວຽດນາມ ໄດ້ເນັ້ນໜັກວ່າ:
“ພວກຂ້າພະເຈົ້າຖືການພົວພັນລະຫວ່າງ ນິວຢີແລນ ແລະ ອາຊຽນ ເປັນສຳຄັນ, ໃນນັ້ນ ຫວຽດນາມ ແມ່ນສະມາຊິກທີ່ສຳຄັນຫຼາຍ. ນີວຢີແລນ ແລະ ອາຊຽນ ໄດ້ສ້າງຕັ້ງການພົວພັນຄູ່ຮ່ວມມືຍຸດທະສາດ. ສິ່ງດັ່ງກ່າວໄດ້ສະແດງໃຫ້ເຫັນຄຳໝັ້ນສັນຍາ, ຖືເປັນສຳຄັນຂອງພວກຂ້າພະເຈົ້າສຳລັບ ອາຊຽນ ໃນການກຳນົດທິດທາງພັດທະນາວັດທະນາຖາວອນ.”
AEC ເຊື່ອມໂຍງຮອບດ້ານຈະນຳມາເຊິ່ງບັນດາຜົນປະໂຫຍດບໍ່ໜ້ອຍໃຫ້ແກ່ ຫວຽດນາມ. ປີ 2017, ຫວຽດນາມ ສືບຕໍ່ເປັນເຈົ້າການສະເໜີ, ປະກອບຂໍ້ລິເລີ່ມພ້ອມກັບ ອາຊຽນ ຊຸກຍູ້ການປະຕິບັດແຜນການປະຊາຄົມເສດຖະກິດ ອາຊຽນ, ຮັດແຄບຊ່ອງຫວ່າງການພັດທະນາ, ຮັບໃຊ້ຄາດໝາຍສ້າງໂຄງປະກອບພື້ນຖານເສດຖະກິດຄືນໃໝ່ ແລະ ຫັນເປັນປະເທດອຸດສາຫະກຳ, ທັນສະໄໝ.