ກ່ອນນີ້ 39 ປີ(20/9/1977 – 20/9/2016), ຫວຽດນາມໄດ້ເຂົ້າເປັນສະມາຊິກສະຫະປະຊາຊາດຢ່າງເປັນທາງການ. ນີ້ແມ່ນເຫດການເປີດໄລຍະໃໝ່ໃຫ້ແກ່ນະໂຍບາຍຫັນການພົວພັນຕ່າງປະເທດເປັນຫຼາຍຮູບຫຼາຍແບບ ແລະ ຫຼາຍຝ່າຍຂອງຫວຽດນາມ. ໂດຍຜ່ານໄລຍະທາງເກືອບ 4 ທົດສະວັດ, ພ້ອມກັບການປະກອບສ່ວນຢ່າງຕັ້ງໜ້ານັ້ນ, ຫວຽດນາມກໍໄດ້ຮັບການໜູນຊ່ວຍອັນສຳຄັນຈາກອົງການນີ້, ພ້ອມກັນນັ້ນ, ທີ່ຕັ້ງບົດບາດຂອງຫວຽດນາມກໍນັບມື້ນັບຖືກຍົກສູງຂຶ້ນບົນເວທີສາກົນ.
ສຳນັກງານ ສ.ປ.ຊ ທີ່ນິວຢອກ, ສະຫະລັດອາເມລິກາ |
ໃນຕະຫຼອດ 39 ປີທີ່ຜ່ານມາ, ຫວຽດນາມຍາມໃດກໍປະຕິບັດນະໂຍບາຍການຕ່າງປະເທດເອກະລາດ ເປັນເຈົ້າຕົນເອງ, ສັນຕິພາບ, ເປີດກ້ວາງ, ຫັນການພົວພັນຕ່າງປະເທດເປັນຫຼາຍຮູບຫຼາຍແບບ ແລະ ຫຼາຍຝ່າຍ; ເພື່ອນມິດສາກົນໄດ້ເຫັນວ່າ ຫວຽດນາມໄດ້ກາຍເປັນເພື່ອນ, ເປັນຄູ່ຮ່ວມມືທີ່ໄວ້ເນື້ອເຊື່ອໃຈ, ມີຄວາມຮັບຜິດຊອບຕໍ່ປະຊາຄົມໂລກ.
ສະມາຊິກອັນຕັ້ງໜ້າ, ຄູ່ຮ່ວມມືທີ່ໄວ້ເນື້ອເຊື່ອໃຈ
39 ປີທີ່ໄດ້ເຂົ້າເປັນສະມາຊິກສະຫະປະຊາຊາດ, ຫວຽດນາມຍາມໃດກໍພະຍາຍາມເຮັດສຳເລັດໜ້າທີ່ຂອງຕົນ, ເປັນເຈົ້າການຍົກອອກຂໍ້ລິເລີ່ມຫຼາຍຂໍ້ທີ່ແທດຈິງ. ຫວຽດນາມຍາມໃດກໍສະໜັບສະໜູນບັນດາເປົ້າໝາຍແຖວໜ້າຂອງສະຫະປະຊາຊາດເຊັ່ນ: ການຮັກສາສັນຕິພາບ ແລະ ຄວາມໝັ້ນຄົງ, ຕ້ານການຊວງເສັງປະກອບອາວຸດ, ຫຼຸດກຳລັງທັບ, ສະກັດກັ້ນ ແລະ ແກ້ໄຂການຂັດແຍ້ງ, ການປະທະກັນໂດຍວັນຕິວິທີ, ເພີ່ມທະວີການພົວພັນມິດຕະພາບລະຫວ່າງບັນດາປະຊາຊາດ. ຫວຽດນາມກໍແມ່ນປະເທດທີ່ໄດ້ເຂົ້າຮ່ວມ, ເຊັນສົນທິສັນຍາສາກົນຫຼາຍສະບັບໂດຍສະຫະປະຊາຊາດຈັດຕັ້ງ.
ຜ່ານການປະກອບສ່ວນຢ່າງເປັນເຈົ້າການ, ຕັ້ງໜ້ານັ້ນ, ອິດທິພົນຊື່ສຽງຂອງຫວຽດນາມໃນອົງການຫຼາຍຝ່າຍໃຫຍ່ກວ່າໝູ່ໃນໂລກນີ້ ນັບມື້ນັບຖືກຍົກສູງຂຶ້ນ. ສິ່ງນີ້ໄດ້ສະແດງອອກຜ່ານເລື່ອງຫວຽດນາມໄດ້ດຳລົງຕຳແໜ່ງຕ່າງໆທີ່ສຳຄັນໃນສະຫະປະຊາຊາດເຊັ່ນ: ໄດ້ຮັບແຕ່ງຕັ້ງເປັນປະທານໝູນວຽນກອງປະຊຸມຫຼຸດກຳລັງທັບ, ເຂົ້າຮ່ວມການຮັກສາສັນຕິພາບ, ເປັນກຳມະການບໍ່ປະຈຳສະພາຄວາມໝັ້ນຄົງສະຫະປະຊາຊາດ ແລະ ໄດ້ຮັບແຕ່ງຕັ້ງເປັນສະມາຊິກສະພາສິດທິມະນຸດແຫ່ງສະຫະປະຊາຊາດອາຍຸການ 2014-2016 ດ້ວຍຈຳນວນບັດເຫັນດີຫຼາຍທີ່ສຸດ. ທ່ານເອກອັກຄະລັດຖະທູດ, ຫົວໜ້າຄະນະຜູ້ຕາງໜ້າຫວຽດນາມປະຈຳສະຫະປະຊາຊາດ ຫງວຽນຈຸງແທ່ງ ຢືນຢັນວ່າ :
“ ດ້ວຍການເຂົ້າຮ່ວມຢ່າງຕັ້ງໜ້າ ແລະ ໄດ້ແບ່ງປັນ, ຊຸກຍູ້ການເຈລະຈາກ່ຽວກັບບັນດາບັນຫາສະດຸ້ງໄວ, ພວກເຮົາໄດ້ປະຕິບັດບົດບາດເປັນສະມາຊິກທີ່ດີ. ມັນໄດ້ນຳບົດຮຽນທີ່ດີທີ່ສຸດມາສູ່ພວກເຮົາ, ບໍ່ພຽງແຕ່ປະກອບສ່ວນເຂົ້າໃນການພັດທະນາ, ປ່ຽນແປງໃໝ່, ເພີ່ມທະວີການຊຸກຍູ້ ແລະ ປົກປັກຮັກສາສິດທິມະນຸດຢູ່ພາຍໃນປະເທດເທົ່ານັ້ນ, ຫາກຍັງປະກອບສ່ວນບົດບາດເປັນເຈົ້າການ ແລະ ຕັ້ງໜ້າຄືດັ່ງຈິດໃຈຫວຽດນາມເປັນເພື່ອນ, ເປັນມະມາຊິກທີີ່ມີຄວາມຮັບຜິດຊອບຂອງປະຊາຄົມໂລກ ”
ທີ່ບັນດາເວທີປາໄສສະຫະປະຊາຊາດ, ຫວຽດນາມຍາມໃດກໍຕັ້ງໜ້າເຂົ້າຮ່ວມປຶກສາຫາລືເພື່ອແກ້ໄຂບັນດາບັນຫາທາງດ້ານເສດຖະກິດ, ສັງຄົມ, ວັດທະນະທຳ, ມະນຸດສະທຳທີ່ໄດ້ຮັບຄວາມສົນໃຈ, ພ້ອມທັງປະກອບສ່ວນເຂົ້າໃນການປັບປຸງບັນດາອົງການຂອງສະຫະປະຊາຊາດຕາມທິດເປີດກ້ວາງ, ກະຈ່າງແຈ້ງ, ປະຊາທິປະໄຕ ແລະ ມີປະສິດທິຜົນ.
ສິດ ແລະ ຜົນປະໂຫຍດໃນຂະບວນວິວັດພັດທະນາ
ໄລຍະທຳອິດເມ່ືອຫາກໍເຂົ້າເປັນສະມາຊິກສະຫະປະຊາຊາດ, ຫວຽດນາມໄດ້ຮັບການໜູນຊ່ວຍຢ່າງໃຫຍ່ຫຼວງໃນການແກ້ໄຂຜົນຮ້າຍຢ້ອນຫຼັງຈາກສົງຄາມ. ໃນໄລຍະພາຍຫຼັງດຳເນີນກິດຈະການປ່ຽນແປງໃໝ່, ການເຂົ້າເປັນສະມາຊິກສະຫະປະຊາຊາດໄດ້ຊ່ວຍຫວຽດນາມສາມາດຍາດແຍ່ງໄດ້ບັນດາແຫຼ່ງກຳລັງໃຫ້ແກ່ພາລະກິດປ່ຽນແປງໃໝ່, ພັດທະນາເສດຖະກິດສັງຄົມ. ໃນໄລຍະປະຈຸບັນ, ຫວຽດນາມ ແລະ ສະຫະປະຊາຊາດໄດ້ມຸ່ງໄປສູ່ການຍົກສູງຄຸນະພາບການພັດທະນາດ້ວຍການໃຫ້ບຸລິມະສິດໃນ 3 ຂົງເຂດຈຸດສຸມຄື : ການເຕີບໂຕແບບຍືນຍົງ, ເພີ່ມທະວີບັນດາການບໍລິການໂດຍຈຳເປັນທີ່ມີຄຸນນະພາບສູງ, ການຊ່ວຍເຫຼືອສັງຄົມ, ຊຸກຍູ້ການບໍລິຫານສາທາລະນະແນໃສ່ໜູນຊ່ວຍຫວຽດນາມປະຕິບັດບັນດາຍຸດທະສາດພັດທະນາຢ່າງມີປະສິດທິຜົນ. ເຖິງວ່າ ຈຳນວນເງິນຊ່ວຍເຫຼືອຂອງສະຫະປະຊາຊາດໃນ 39 ປີທີ່ຜ່ານມາມີພຽງແຕ່ 2 ຕື້ກວ່າ USD ກໍຕາມ, ແຕ່ພັດມີຄວາມໝາຍເພາະສະຫະປະຊາຊາດໄດ້ເລັ່ງໃສ່ໜູນຊ່ວຍໃນຫຼາຍຂົງເຂດທີ່ຈຳເປັນຄືການພັດທະນາເສດຖະກິດ, ກໍ່ສ້າງ, ກົດໝາຍ, ສາມາດແກ້ໄຂຫຼາຍບັນຫາສັງຄົມທີິຮີບດ່ວນ. ທ່ານເອກອັກຄະລັດຖະທູດ, ຫົວໜ້າຄະນະຜູ້ຕາງໜ້າຫວຽດນາມປະຈຳສະຫະປະຊາຊາດ ຫງວຽນຈຸງແທ່ງ ຖືວ່າ :
“ ພວກເຮົາບໍ່ປາດຖະໜາເຂົ້າຮ່ວມອາດຈະຍາດເອົາໂຄງການໃດໜຶ່ງຫຼືຄອຍຖ້າທຶນ ODA ນັ້ນ, ແຕ່ພວກເຮົາໄດ້ສ້າງສະພາບແວດລ້ອມທີ່ເປີດກ້ວາງ, ຕັ້ງໜ້າເພື່ອໃຫ້ແນວຄວາມຄິດກໍ່ສ້າງບັນດາໂຄງການ, ແຜນການຮ່ວມມືທີ່ສອດຄ່ອງ, ພ້ອມກັນມານະພະຍາຍາມເພື່ອຜັນຂະຫຍາຍບັນດາໂຄງການຮ່ວມຊຶ່ງໂລກໄດ້ຮັບຮອງເອົາ. ລະອຽດແມ່ນໂຄງການເປົ້າໝາຍພັດທະນາແບບຍືນຍົງ. ຂ້າພະເຈົ້າຄິດວ່າ ການເຂົ້າຮ່ວມຢ່າງຕັ້ງໜ້າ ກໍແມ່ນພວກເຮົາຍາດແຍ່ງໄດ້ການສະໜັບສະຫນູນຂອງສາກົນກ່ຽວກັບການຍົກສູງເຈດຕະນາດີ, ຊຸກຍູ້ຄວາມເຊື່ອໝັ້ນ, ສ້າງແນວຄວາມຄິດໃໝ່ເພື່ອເດີນຕາມຈຸດປະສົງລວມຊຶ່ງທຸກໆຝ່າຍໄດ້ຮ່ວມລົງນາມ ”
ໂດຍໄດ້ຫມູນໃຊ້ແນວຄິດການຕ່າງປະເທດຂອງປະທານໂຮ່ຈິມິນ ແລະ ແນວທາງການຕ່າງປະເທດຂອງພັກຢ່າງມີຫົວຄິດປະດິດສ້າງນັ້ນ, ການພົວພັນກັບ ສະຫະປະຊາຊາດບໍ່ພຽງແຕ່ປະກອບສ່ວນຍົກສູງທີ່ຕັ້ງບົດບາດສາກົນຂອງຫວຽດນາມເທົ່ານັ້ນ, ຫາກຍັງໄດ້ຕໍ່ສູ້ເພື່ອປົກປ້ອງບັນດາຜົນປະໂຫຍດທີ່ແທດຈິງຂອງຫວຽດນາມອີກດ້ວຍ. ຜ່ານໄລຍະ 39 ປີ, ການພົວພັນຫວຽດນາມ- ສະຫະປະຊາຊາດພວມພັດທະນາຢ່າງກ້າວກະໂດດຂັ້ນໃນທຸກໆດ້ານ ແລະ ໃນຫຼາຍລະດັບທີ່ແຕກຕ່າງກັນ, ປະກອບສ່ວນສຳຄັນເຂົ້າໃນການຮັກສາສັນຕິພາບ, ສະຖຽນລະພາບ, ການພັດທະນາໃນພາກພື້ນ ແລະ ໃນໂລກ, ອັນໄດ້ມາເຊິ່ງຄວາມເອກອ້າງທະນົງໃຈໃຫ້ແກ່ປະເທດຊາດຫວຽດນາມໃນອົງການທີ່ມີຂອບຂະໜາດໃຫຍ່ກວ່າໝູ່ໃນໂລກນີ້.