(vovworld)- ໃນສະພາບ ຫວຽດນາມ ໄດ້ ແລະ ພວມເຂົ້າຮ່ວມຫລາຍສັນຍາການຄ້າເສລີສອງຝ່າຍ ແລະ ຫລາຍຝ່າຍນັ້ນ, ຂະແຫນງສົ່ງອອກສວມບົດບາດສຳຄັນໃນການພັດທະນາຂອງພື້ນຖານເສດຖະກິດຫວຽດນາມໃນອະນາຄົດ. ແລະ ເພື່ອບັນລຸໄດ້ບັນດາຜົນສຳເລັດນັ້ນ ຕ້ອງມີການປະກອບສ່ວນຂອງບັນດາທີ່ປຶກສາການຄ້າ, ຊື່ງແມ່ນຜູ້ທີ່ເປັນຂົວຕໍ່ເພື່ອໃຫ້ສິນຄ້າຫວຽດນາມ ອອກສູ່ທົ່ວໂລກ.
ທ່ານນາຍົກລັດຖະມົນຕີຫງວຽນເຕີນຢູງກ່າວຄຳເຫັນທີ່
ກອງປະຊຸມທີ່ປຶກສາດ້ານການຄ້າ
ພາບ:bnews.vn
|
ໃນ 2 ປີ ຄືແຕ່ປີ 2014-2015, ບັນດາທູດການຄ້າຫວຽດນາມ ຢູ່ໃນໂລກ ໄດ້ຜັນຂະຫຍາຍກວ່າ 600 ການເຄື່ອນໄຫວສົ່ງເສີມການຄ້າ. ໃນນັ້ນ ມີເລື່ອງປ່ຽນໃຫມ່ວຽກງານສົ່ງເສີມການຄ້າ ເມື່ອສຸມໃສ່ສົ່ງເສີມການຄ້າຢູ່ຂະແຫນງສິນຄ້າຈຳນວນຫນຶ່ງຊື່ງຫວຽດນາມ ມີທ່າແຮງ.
ເພີ່ມທະວີການເຊື່ອມຕໍ່ວິສາຫະກິດ ແລະ ທູດການຄ້າຫວຽດນາມ ຢູ່ ຕ່າງປະເທດ
ບັນດາທູດການຄ້າຫວຽດນາມ ຢູ່ ເອີລົບ, ຍີ່ປຸ່ນ, ສເກົາຫລີ ໄດ້ຕັ້ງຫນ້າສົມທົບກັບບັນດາກົມພາກພື້ນໃນການຍູ້ແຮງສົ່ງສິນຄ້າ ຫວຽດນາມ ສຳຜັດກັບບັນດາລະບົບຈຳຫນ່າຍສິນຄ້າຢູ່ບັນດາປະເທດປະຈຳຖິ່ນ ແລະຈັດຕັ້ງມື້ຂາຍສິນຄ້າ, ສັບປະດາຂາຍສິນຄ້າຫວຽດນາມຢູ່ບັນດາລະບົບຈຳຫນ່າຍສິນຄ້ານັ້ນເປັນປະຈຳໄລຍະ. ເຖິງຢ່າງໃດກໍຕາມ, ເມື່ອເຊື່ອມໂຍງ, ວິສາຫະກິດຫວຽດນາມ ຄວນມີການເຊື່ອມຕໍ່ກັບທູດການຄ້າຫວຽດນາມຢູ່ ຕ່າງປະເທດ ກວ່າອີກ, ພ້ອມທັງຄວນມີຂໍ້ມູນຂ່າວກ່ຽວກັບຕະຫລາດສົ່ງອອກ, ພິເສດ ແມ່ນບັນດາຂໍ້ມູນຂ່າວກ່ຽວກັບລາຄາ, ຄວາມຕ້ອງການ, ວັດທະນະທຳ, ຄວາມນິຍົມໃນການໃຊ້ສອຍ… ທ່ານ ເທີນດືກ, ຮອງຜູ້ອຳນວຍການໃຫຍ່ ບໍລິສັດຕັດຫຍິບ 10 ຖືວ່າ:
“ພວກຂ້າພະເຈົ້າເຄີຍເຮັດວຽກສະເພາະກັບທູດການຄ້າ ຫວຽດນາມ ຢູ່ ອາເມລິກາ, ເອີລົບ, ຍີ່ປຸ່ນ, ຊື່ງແມ່ນບັນດາປະເທດທີ່ກ່ອນນີ້ພວກຂ້າພະເຈົ້າໄດ້ສົ່ງອອກສິນຄ້າແລ້ວ, ສຳລັບຕະຫລາດ ສເກົາຫລີ ພວກຂ້າພະເຈົ້າມີຄວາມຮຽກຮ້ອງຕ້ອງການສະເພາະ. ບັນດາທູດການຄ້າ ຄວນຈັດຕັ້ງບັນດາຂະແຫນງສິນຄ້າສະເພາະ, ຄວນມີການພົບປະ, ການສຳມະນາຫລື ຈັດແບ່ງໄລຍະເວລາ, ຊັບຊ້ອນພະນັກງານຮັບຜິດຊອບແຕ່ລະຂະແຫນງລະອຽດເພື່ອໃຫ້ວິສາຫະກິດມີຂໍ້ມູນຂ່າວກ່ຽວກັບຕະຫລາດຕື່ມອີກ.”
ຕາມທ່ານ ຫງວຽນຈູງຢູງ, ທີ່ປືກສາ, ຫົວຫນ້າທູດການຄ້າຫວຽດນາມ ຢູ່ ຍີ່ປຸ່ນ ແລ້ວ, ໄລຍະຈະມາເຖິງ, ບັນດາທູດການຄ້າ ຈະເປັນເຈົ້າການໃນການຄົ້ນຄ້ວາ, ເຈລະຈາ, ຊຸກຍູ້ວຽກງານສົ່ງເສີມການຄ້າ. ສະເພາະບັນດາທູດການຄ້າ ຈະມານະພະຍາຍາມ, ເປັນເຈົ້າການກວ່າອີກ ເພື່ອຕອບສະຫນອງຄວາມຕ້ອງການຂໍ້ມູນຂ່າວ, ການຫນູນຊ່ວຍຂອງ ວິສາຫະກິດຫວຽດນາມ.
“ເລື່ອງເຊື່ອມຕໍ່ຕ້ອງມີການປ່ຽນແປງເພື່ອຫລຸດຜ່ອນວຽກງານຂອງທູດການຄ້າກັບວິສາຫະກິດແຕ່ລະແຫ່ງ. ໃນປີຜ່ານມາ ພວກຂ້າພະເຈົ້າໄດ້ວາງບັນດາຈຸດສຸມໃນການເຊື່ອມຕໍ່ລະຫວ່າງບັນດາທ້ອງຖິ່ນຂອງຫວຽດນາມ ກັບບັນດາທ້ອງຖິ່ນຂອງ ຍີ່ປຸ່ນ ເພື່ອຍາດແຍ່ງການປະກອບສ່ວນຂອງວິສາຫະກິດຂະຫນາດກາງ ແລະ ນ້ອຍໃຫ້ແກ່ພື້ນຖານເສດຖະກິດຍີ່ປຸ່ນ. ບັນຫາທີສອງ ແມ່ນເຊື່ອມຕໍ່ລະຫວ່າງບັນດາທອ້ງຖິ່ນຂອງສອງປະເທດນຳກັນເພື່ອໃຫ້ມີບັນດາຂໍ້ຕົກລົງຮ່ວມມືລະຫວ່າງບັນດາສະຫະສະມາຄົມກໍຄືວິສາຫະກິດສອງປະເທດມີວິທີສຳຜັດຢ່າງມີປະສິດທິຜົນ.”
ທູດການຄ້າພ້ອມກັບວິສາຫະກິດໃນການເຊື່ອມໂຍງ
ເມື່ອ ຫວຽດນາມ ເຂົ້າຮ່ວມສັນຍາຄູ່ຮ່ວມມືຂ້າມປາຊີຟີກ TPP, ດ້ວຍຕະຫລາດທີ່ມີພົນລະເມືອກວ່າ 750 ລ້ານຄົນຂອງ 12 ປະເທດ, ການຊ່ວຍເຫລືອຈາກບັນດາທູດການຄ້າຫວຽດນາມ ຢູ່ ຕ່າງປະເທດ ນັບມື້ນັບສຳຄັນ. ສິ່ງດັ່ງກ່າວຈະຊ່ວຍວິສາຫະກິດຫວຽດນາມຍາດແຍ່ງກາລະໂອກາດ ໂດຍ TPP ນຳມາໃຫ້ຢ່າງສູດຂີດ. ຕົວຢ່າງຄື ຢູ່ ຕະຫລາດອາເມລິກາ, ແຕ່ລະປີ ວົງເງິນສົ່ງອອກຂອງຫວຽດນາມ ໄປຍັງຕະຫລາດນີ້ບັນລຸກວ່າ 11 ຕື້ USD. ໃນນັ້ນ ເຄື່ອງຕ່ຳແຜ່ນຕັດຫຍິບກວມກວ່າ 50% ຍອດວົງເງິນສົ່ງອອກ, ເກີບຫນັງບັນລຸກວ່າ 4 ຕື້ USD. ປີ 2018, ແມ່ນປີທຳອິດປະຕິບັດສັນຍາ TPP, ຫວຽດນາມ ອາດຈະປະຢັດຈຳນວນເງິນ 1,68 ຕື້ USD ຈາກການເສຍພາສີສຳລັບເຄື່ອງຕ່ຳແຜ່ນຕັດຫຍິບ, ແລະເກີບຫນັງ ແມ່ນ 445 ລ້ານ USD. ສະນັ້ນ ຖ້າຫາກບັນດາທູດການຄ້າ, ທີ່ປຶກສາການຄ້າເສີມຂະຫຍາຍບົດບາດຂອງຕົນ, ວິສາຫະກິດ ຫວຽດນາມ ຈະມີຫລາຍຂໍ້ມູນຂ່າວກວ່າໃນການຊອກຫາຕະຫລາດ, ຊອກຮູ້ບັນດາກາລະໂອກາດ, ສິ່ງທ້າທາຍຂອງວິສາຫະກິດໃນການເຊື່ອມໂຍງ. ທ່ານ ດາວເຈີນເຍີນ ໃຫ້ຮູ້ວ່າ:
“ໄລຍະຜ່ານມາ, ທູດການຄ້າຫວຽດນາມ ຢູ່ ອາເມລິກາ ແລະ ບັນດາທູດການຄ້າຫວຽດນາມ ອື່ນຢູ່ໃນໂລກ ໄດ້ມານະພະຍາຍາມຈົນສຸດຄວາມສາມາດຂອງຕົນເພື່ອຊ່ວຍເຫລືອບັນດາວິສາຫະກິດ. ບັນດາວິສາຫະກິດຢາກໄດ້ຮັບການຫນູນຊ່ວຍຈາກທູດການຄ້າຫວຽດນາມຢູ່ຕ່າງປະເທດໃຫ້ດີກວ່າແມ່ນຕ້ອງຍົກສູງຄຸນນະພາບຜະລິດຕະພັນກວ່າອີກ ກ່ອນທີ່ພົວພັນຕິດຕໍ່ກັບທູດການຄ້າ.”
ເຂົ້າຮ່ວມບັນດາສັນຍາການຄ້າ, ວິສາຫະກິດຫວຽດນາມ ຕ້ອງປະເຊີນຫນ້າກັບບັນດາຮົ້ວກີດຂວາງ, ບັນດາກໍລະນີຮ້ອງຟ້ອງການຕ້ານການຂາຍບູບລາຄາ, ເພາະສະນັ້ນ ວິສາຫະກິດພາຍໃນປະເທດຕ້ອງການໄດ້ຮັບການຫນູນຊ່ວຍດ້ານຂໍ້ມູນຂ່າວກ່ຽວກັບຕະຫລາດສົ່ງອອກ, ບັນດານະໂຍບາຍບຸລິມະສິດສຳລັບວິສາຫະກິດ, ໃຫ້ຄຳປືກສາດ້ານກົດໝາຍ ໃນການລົງນາມໃນສັນຍາ, ຮັບຮູ້ຂໍ້ມູນຂ່າວຄູ່ຮ່ວມມືຈາກບັນດາທູດການຄ້າຫລາຍກວ່າອີກ… ທ່ານນາງ ຫງວຽນທິຮົ່ງ, ຮອງປະທານຄະນະກຳມະການປະຊາຊົນ ນະຄອນ ໂຮ່ຈິມີນ ຖືວ່າ:
“ກະຊວງອຸດສາຫະກຳ ແລະ ການຄ້າ ຫນູນຊ່ວຍບັນດາທ້ອງຖິ່ນ ແລະ ວິສາຫະກິດກ່ຽວກັບຂໍ້ມູນຂ່າວໃນການສົ່ງເສີມເປີດກວ້າງການສົ່ງອອກສິນຄ້າໄປຍັງຕ່າງປະເທດ ແລະ ດຶງດູດບັນດານັກລົງທຶນຕ່າງປະເທດ. ບັນດາວິສາຫະກິດຫວຽດນາມ ຕ້ອງການການຊ່ວຍເຫລືອຈາກບັນດາທູດການຄ້າກ່ຽວກັບບັນດາກົນໄກສົ່ງເສີມຂອງບັນດາທ້ອງຖິ່ນ ບັນດາຂໍ້ມູນຂ່າວການຄາດຄະເນກ່ຽວກັບຕະຫລາດ, ບັນດາຂໍ້ກຳນົດກ່ຽວກັບການລົງທຶນຂອງບັນດາປະເທດປະຈຳຖິ່ນ.
ບືນຕົວຂຶ້ນດ້ວຍກຳລັງແຮງພາຍໃນ, ການລົງທຶນໃນການໂຄສະນາ, ເຂົ້າຮ່ວມງານວາງສະແດງ, ການເຊື່ອມຕໍ່ການພົວພັນດ້ານການຄ້າໃຫມ່ຢູ່ບັນດາປະເທດປະຈຳຖິ່ນ ເພື່ອແນະນຳ, ໂຄສະນາສິນຄ້າ ເພື່ອໃຫ້ລູກຄ້າຕ່າງປະເທດຮູ້ຈັກເຖິງບັນດາຜະລິດຕະພັນຂອງຫວຽດນາມ ນັ້ນແມ່ນບັນດາວຽກງານທີ່ວິສາຫະກິດຕ້ອງເຮັດເມື່ອເຊື່ອມໂຍງເຂົ້າກັບພື້ນຖານເສດຖະກິດໂລກຢ່າງເລິກເຊິ່ງ ກວ້າງຂວາງ. ດ້ວຍການປະກອບກຳລັງເຫື່ອແຮງຂອງບັນດາທູດການຄ້າ ແລະ ທີ່ປຶກສາການຄ້າ, ວິສາຫະກິດຫວຽດນາມ ຈະຊອກຫາໄດ້ຕະຫລາດຫລາຍແຫ່ງ, ທິດທາງການພັດທະນາໃຫມ່ໃຫ້ແກ່ສິນຄ້າຕໍ່ຫນ້າບັນດາການແກ້ງແຍ້ງທົ່ວໂລກ.