ໂດຍຮັບຄຳເຊື້ອເຊີນຂອງ ພະບາດສົມເດັດ ພະບໍລົມ ມະນຽດ ໂນໂຮດົມ ສີຫາໂມນີ, ພະມະຫາກະສັດແຫ່ງລາຊະອານາຈັກ ກຳປູເຈຍ ທ່ານເລຂາທິການໃຫຍ່ຄະນະບໍລິຫານງານສູນກາງພັກກອມມູນິດຫວຽດນາມ ຫງວຽນຟູ໋ຈ້ອງ ໄດ້ໄປຢ້ຽມຢາມສັນທະວະໄມຕີລາຊະອານາຈັກກຳປູເຈຍທາງລັດຖະກິດ ນັບແຕ່ວັນທີ 6 – 8/12. ການຢ້ຽມຢາມໄດ້ຢືນຢັນນະໂຍບາຍສະເໝີຕົ້ນສະເໝີປາຍຂອງຫວຽດນາມ ແມ່ນພັດທະນານ້ຳໃຈສາມັກຄີມິດຕະພາບທີ່ເປັນມູນເຊື້ອ ແລະ ການຮ່ວມມືຮອບດ້ານກັບ ກຳປູເຈຍ, ຊຸກຍູ້ການປະຕິບັດສຳເລັດບັນດາສັນຍາ, ຂໍ້ຕົກລົງຮ່ວມມືລະຫວ່າງສອງປະເທດ. ເນື່ອງໃນໂອກາດນີ້, ບັນນາທິການວິທະຍຸກະຈາຍສຽງ ຫວຽດນາມມີບົດຂຽນດ້ວຍຫົວຂໍ້ວ່າ: ”ປັບປຸງນ້ຳໃຈສາມັກຄີ, ມິດຕະພາບລະຫວ່າງ ຫວຽດນາມ - ກຳປູເຈຍ”.
ສາຍພົວພັນລະຫວ່າງ ຫວຽດນາມ - ກຳປູເຈຍ ແມ່ນມີປະຫວັດທີ່ເປັນມູນເຊື້ອມາແຕ່ດົນນານ, ໄດ້ຮັບການທົດສອບຜ່ານການເວລາອັນຍາວນານ ແລະ ປະຈຸບັນພວມສືບຕໍ່ໄດ້ຮັບການຮັກສາ ແລະ ພັດທະນາ. ຄວາມໄກ້ສິດທາງດ້ານພູມສາດ, ປະຫວັດສາດ, ວັດທະນະທຳ ກໍ່ຄືຄວາມຄ້າຍຄືກັນໃນການເລືອກເຝັ້ນເສັ້ນທາງຕໍ່ສູ້ຍາດເອົາເອກະລາດແຫ່ງຊາດໃນເມື່ອກ່ອນ ແລະ ຈຸດໝາຍພັດທະນາປະເທດຊາດໃນປະຈຸບັນ ແມ່ນປັດໃຈສຳຄັນ ເພື່ອຊຸກຍູ້ສາຍພົວພັນມິດຕະພາບ, ການຮ່ວມມືຮອບດ້ານລະຫວ່າງສອງຊາດ. ຮອງລັດຖະມົນຕີ ກຳປູເຈຍ, ທ່ານ ເຈົາພະລີ, ຢືນຢັນວ່າ:
”ປະຊາຊົນ ກຳປູເຈຍ ບໍ່ສາມາດລືມການຊ່ວຍເຫຼືອຂອງຫວຽດນາມໄດ້ ແລະ ຂ້າພະເຈົ້າເຊື່ອໝັ້ນວ່າ ຄວາມສາມັກຄີລະຫວ່າງສອງຊາດ ແມ່ນອະມະຕະ. ເຖິງວ່າ ກຳປູເຈຍ ໄດ້ຮັບການປົດປ່ອຍມາເປັນເວລາ 30 ປີ ແລ້ວກໍ່ຕາມ, ແຕ່ ຫວຽດນາມ ຍາມໃດກໍ່ໃຫ້ຄວາມເອົາໃຈໃສ່ຊ່ວຍເຫຼືອກຳປູເຈຍຢູ່. ມາຮອດປະຈຸບັນ, ສອງປະເທດໄດ້ມີການຮ່ວມມືນຳກັນຢ່າງແໜ້ນແຟ້ນໃນທຸກຂະແໜງການ, ທຸກຂົງເຂດ. ພວກຂ້າພະເຈົ້າເຊື່ອໝັ້ນວ່າ ສາຍພົວພັນສາມັກຄີມິດຕະພາບລະຫວ່າງສອງປະເທດນັບມື້ນັບພັດທະນາ”.
ໃນສະພາບການໃໝ່, ທັງສອງປະເທດລ້ວນແຕ່ປະຕິບັດນະໂຍບາຍເປີດກວ້າງການພົວພັນກັບຕ່າງປະເທດ, ຫັນການພົວພັນກັບສາກົນເປັນຫຼາຍຝ່າຍ, ຫຼາຍຮູບຫຼາຍແບບ, ທັງສອງປະເທດກໍ່ຖືເປັນສຳຄັນການປັບປຸງ ແລະເພີ່ມທະວີການພົວພັນສາມັກຄີມິດຕະພາບ ແລະ ການຮ່ວມມືຢ່າງຮອບດ້ານລະຫວ່າງສອງປະເທດ. ໃນຊຸມປີມໍ່ໆມານີ້, ການນຳສອງປະເທດໄດ້ກຳນົດຂອບເຂດການພົວພັນຮ່ວມມືນັ້ນແມ່ນ ”ບ້ານໄກ້ເຮືອນຄຽງທີ່ດີງາມ, ຄວາມມິດຕະພາບທີ່ເປັນມູນເຊື້ອ, ການຮ່ວມມືຮອບດ້ານ, ໝັ້ນຄົງ ຍາວນານ” ແລະບັນດາຫຼັກການພົວພັນທີ່ວ່າ: ເຄົາລົບນັບຖືເອກະລາດ, ອະທິປະໄຕ ແລະ ຜືນແຜ່ນດິນອັນຄົບຖ້ວນຂອງກັນ; ບໍ່ແຊກແຊງເຂົ້າວຽກງານພາຍໃນຂອງກັນ; ບໍ່ນຳໃຊ້ອາວຸດ ແລະ ບໍ່ໄດ້ຂົ່ມຂູ່ຈະນຳໃຊ້ກຳລັງອາວຸດ; ບໍ່ອະນຸຍາດໃຫ້ບໍ່ວ່າກຳລັງການເມືອງ, ທະຫານໃດໆນຳໃຊ້ຜືນແຜ່ນດິນຂອງຕົນ ເພື່ອຕ້ານຄືນປະເທດອື່ນ; ຮ່ວມມືຢ່າງສະເໝີພາບ ຕ່າງຝ່າຍຕ່າງມີຜົນປະໂຫຍດ, ເພື່ອຜົນປະໂຫຍດ ຂອງປະຊາຊົນແຕ່ລະປະເທດ, ເພື່ອສັນຕິພາບ ແລະການພັດທະນາຢູ່ອາຊີຕາເວັນອອກສຽງໃຕ້ ແລະ ຢູ່ໃນໂລກ. ບົນຈິດໃຈສາມັກຄີມິດຕະພາບ ແລະ ຄວາມເຂົ້າອົກເຂົ້າໃຈເຊິ່ງກັນ ແລະກັນ ເພື່ອຜົນປະໂຫຍດລວມຂອງສອງຊາດ, ເໝາະສົມກັບກົດໝາຍຂອງແຕ່ລະປະເທດ ກໍ່ຄືທຳນຽມສາກົນ, ທັງສອງປະເທດ ໄດ້ ແລະ ພວມສົມທົບກັນຢ່າງແໜ້ນແຟ້ນ ເພື່ອແກ້ໄຂບັນດາບັນຫາທີ່ຍັງຄົງຄ້າງກ່ຽວກັບຊາຍແດນ, ຊາວຫວຽດນາມອາໄສຢູ່ ກຳປູເຈຍ, ຊາວຊົນເຜົ່າສ່ວນໜ້ອຍ ໄຕງວຽນ ຂ້າມຊາຍແດນໄປ ກຳປູເຈຍ ເທື່ອລະກ້າວໃຫ້ດີ. ສອງຝ່າຍໄດ້ເຫັນດີເປັນເອກະພາບກ່ຽວກັບຫຼັກການແກ້ໄຂສິ່ງທີ່ຍັງຄົງຄ້າງກ່ຽວກັບການຂີດເສັ້ນຊາຍແດນປັກຫຼັກໝາຍຊາຍແດນທາງບົກ ແລະ ສູ້ຊົນຈະຂີດເສັ້ນຊາຍແດນ ແລະ ປັກຫຼັກໝາຍຊາຍແດນໃຫ້ສຳເລັດກ່ອນທ້າຍປີ 2012. ໃນການຢ້ຽມຢາມ ລາຊະອານາຈັກ ກຳປູເຈຍ ຢ່າງເປັນທາງການ ເມື່ອເດືອນ 9 ຜ່ານມາ, ທ່ານປະທານສະພາແຫ່ງຊາດ ຫວຽດນາມ ຫງວຽນຊິງຮຸ່ງ ໄດ້ເນັ້ນໜັກວ່າ:
”ພວກເຮົາມີນ້ຳໃຈສາມັກຄີມິດຕະພາບຖານບ້ານໄກ້ເຮືອນຄຽງລະຫວ່າງສອງຊາດ, ສອງປະເທດຄວນສ້າງສາຍພົວພັນຮ່ວມມືລະຫວ່າງບັນດານັກລົງທຶນຫວຽດນາມ ແລະ ກຳປູເຈຍ ນຳກັນ. ຖ້າຫາກການຮ່ວມມືລົງທຶນໄດ້ຮັບການພັດທະນາເປັນຢ່າງດີ ມັນຈະສ້າງເງື່ອນໄຂເພື່ອພັດທະນາຕະຫຼາດຢູ່ ກຳປູເຈຍ ກໍ່ຄືຢູ່ ຫວຽດນາມ. ດັ່ງນັ້ນ ບັນດານັກລົງທຶນຫວຽດນາມ ແລະ ກຳປູເຈຍ ມີບົດບາດສຳຄັນທີ່ສຸດ ໃນການຊຸກຍູ້ການຮ່ວມມືທາງດ້ານເສດຖະກິດລະຫວ່າງສອງປະເທດໃນໄລຍະປະຈຸບັນ.”
ໄລ່ມາຮອດປະຈຸບັນ, ສອງຝ່າຍໄດ້ລົງນາມໃນເອກະສານນິຕິກຳ 80 ກວ່າສະບັບ ກ່ຽວກັບການຮ່ວມມືສອງຝ່າຍ, ການສ້າງກົນໄກປະສານສົມທົບທີ່ຈຳເປັນ, ເໝາະສົມກັບຄວາມຮຽກຮ້ອງຕ້ອງການພັດທະນາຂອງແຕ່ລະປະເທດ. ໃນແຕ່ລະປີ, ການນຳຂັ້ນສູງຂອງສອງປະເທດໄດ້ໄປມາຢ້ຽມຢາມເປັນປະຈຳ ອັນໄດ້ສ້າງຄວາມເຊື້ອໝັ້ນນຳກັນ. ການພົວພັນທາງດ້ານການເມືອງນັບມື້ນັບສະໜິດຕິດພັນນຳກັນ. ຄວາມໄວ້ເນື້ອເຊື່ອໃຈລະຫວ່າງສອງປະເທດ ແມ່ນພື້ນຖານ ເພື່ອພັດທະນາສາຍພົວພັນຮ່ວມມືສອງຝ່າຍທາງດ້ານເສດຖະກິດ ການຄ້າ, ການລົງທຶນ, ຄົມມະນາຄົມຂົນສົ່ງ, ກະສີກຳ - ປ່າໄມ້ - ການປະມົງ, ການທ່ອງທ່ຽວ, ການບິນ, ພະລັງງານ, ການສຶກສາ - ກໍ່ສ້າງ, ສາທາລະນະສຸກ, ວັດທະນະທຳ, ກິລາ, ວິທະຍາສາດ - ເຕັກນິກ, ການຕ່າງປະເທດ, ການປ້ອງກັນຊາດ - ປ້ອງກັນຄວາມສະຫງົບ…ຢ່າງມີປະສິດທິຜົນ. ປະຈຸບັນ, ຫວຽດນາມ ມີ 98 ໂຄງການລົງທຶນຢູ່ ກຳປູເຈຍ ດ້ວຍຍອດຈຳນວນທຶນກວ່າ 2,2 ຕຶ້ USD. ມີຫຼາຍໂຄງການພວມເຄື່ອນໄຫວຢ່າງມີປະສິດທິຜົນ ແລະ ໄດ້ຮັບການຕີລາຄາສູງຈາກລັດຖະບານ ແລະ ປະຊາຊົນ ກຳປູເຈຍ ໂດຍສະເພາະແມ່ນໂຄງການກ່ຽວກັບຂົງເຂດໂທລະຄົມມະນາຄົມ, ການບິນ, ປູກຢາງພາລາ, ທະນາຄານ… ປີ 2010, ວົງເງິນການຄ້າສອງສົ້ນ ບັນລຸ 1 ຕຶ້ USD ແລະຄາດວ່າປີນີ້ຈະບັນລຸປະມານ 2.4 ຕຶ້ USD. ເດືອນ 4 ປີນີ້, ຫວຽດນາມ ແລະ ກຳປູເຈຍ ໄດ້ຈັດຕັ້ງກອງປະຊຸມສົ່ງເສີມການລົງທຶນ, ການຄ້າ. ທີ່ກອງປະຊຸມນີ້, ປະທານຫ້ອງການອຸດສາຫະກຳ ແລະການຄ້າຫວຽດນາມ ຫວູຕ່ຽນໂລກ ໄດ້ສະແດງຄວາມປາຖະໜາວ່າ:
ບົນພື້ນຖານທິດກຳນົດຂອງສອງລັດຖະບານ,ພວກຂ້າພະເຈົ້າຈະສູມໃສ່ ແລະ ຊ່ວຍເຫຼືອບັນດາວິສາຫະກິດທີ່ສ້າງຄູ່ຮ່ວມມືຍຸດທະສາດນຳກັນ. ພວກຂ້າພະເຈົ້າຫວັງວ່າບັນດາວິສາຫະກິດຊັ້ນນຳຂອງສອງປະເທດຕ້ອງຮ່ວມມືນຳກັນ ກ່ອນທີ່ຈະໄປຊອກຫາຄູ່ຮ່ວມມືຍຸດທະສາດຢູ່ປະເທດອື່ນໆ.
ການຢ້ຽມຢາມສັນຖະວະໄມຕີລາຊະອານາຈັກ ກຳປູເຈຍ ທາງລັດຖະກິດຂອງທ່ານເລຂາທິການໃຫຍ່ພັກກອມມູນິດຫວຽດນາມ ຫງວຽນຟູ໋ຈ້ອງ ແມ່ນໂອກາດສຳຄັນ ເພື່ອຊຸກຍູ້ນ້ຳໃຈສາມັກຄີ, ນຳການພົວພັນຮ່ວມມືຮອບດ້ານລະຫວ່າງສອງປະເທດໃຫ້ພັດທະນາຢ່າງເລິກເຊິ່ງ ແລະມີປະສິດທິຜົນກວ່າອີກ ເພື່ອຜົນປະໂຫຍດລວມຂອງສອງປະເທດ. ຄຽງຂ້າງນັ້ນ, ການຢ້ຽມຢາມກໍ່ປະກອບສ່ວນຊຸກຍູ້ການຮ່ວມມືລະຫວ່າງ ຫວຽດນາມ - ກຳປູເຈຍ ໃນຂອບເຂດ ອາຊຽນ, ການຮ່ວມມືໃນຄະນະກຳມາທິການແມ່ນ້ຳຂອງ, ອະນຸພາກພື້ນແມ່ນ້ຳຂອງເປີດກວ້າງ, ໂຄງການພັດທະນາບັນດາເຂດທີ່ທຸກຍາກລະຫວ່າງຊາດ ທີ່ລຽບຕາມແລວຕາເວັນອອກ - ຕາເວັນຕົກ, ພິເສດແມ່ນໃນເຂດສາມຫຼ່ຽມພັດທະນາຂອງສາມປະເທດ ຫວຽດນາມ - ລາວ - ກຳປູເຈຍ.
ແອ໋ງຮ່ວຽນ