(vovworld)- ກອງປະຊຸມຄັ້ງທີ 7 ຄະນະບໍລິຫານງານສູນກາງພັກກອມມູນິດຫວຽດນາມຊຸດທີ 11 ພວມດຳເນີນໄປຢູ່ຮ່າໂນ້ຍ ເພື່ອພິຈາລະນາ, ຕັດສິນ, ໃຫ້ຄຳເຫັນຊີ້ນຳສຳລັບບາງບັນຫາສຳຄັນ. ທີ່ວາລະໄຂກອງປະຊຸມໃນວັນທີ 2/5, ທ່ານເລຂາທິການໃຫຍ່ ຫງວຽນຟູຈ້ອງ ມີບົດປາໄສທີ່ມີຫົວຂໍ້ວ່າ: “ເສີມຂະຫຍາຍນ້ຳໃຈຮັບຜິດຊອບຢ່າງສູງສຸດ, ປຶກສາຫາລື, ຕັດສິນບັນດາບັນຫາສຳຄັນສຳລັບການພັດທະນາແບບຍືນຍົງຂອງປະເທດຊາດ.”
ກ່ຽວກັບການສືບຕໍ່ປ່ຽນໃຫມ່, ປັບປຸງລະບົບການເມືອງຈາກສູນກາງລົງຮອດທ້ອງຖິ່ນໃຫ້ສົມບູນແບບ, ທ່ານເລຂາທິການໃຫຍ່ ຫງວຽນຟູຈ້ອງໃຫ້ຮູ້ວ່າ: ໃນ1 ປີຜ່ານມາ, ກົມການເມືອງໄດ້ຊີ້ນຳສະຫລຸບການປະຕິບັດມະຕິສູນກາງພັກຄັ້ງທີ 5 ຊຸດທີ 9 ກ່ຽວກັບການປ່ຽນໃຫມ່ ແລະ ຍົກສູງຄຸນນະພາບລະບົບການເມືອງຢູ່ຂັ້ນຮາກຖານຄື: ຕາແສງ, ເທດສະບານ; ສະຫລຸບການປະຕິບັດມະຕິສູນກາງພັກຄັ້ງທີ 4 ຊຸດທີ 10 ກ່ຽວກັບການປ່ຽນໃຫມ່, ບູລະນະອົງການຈັດຕັ້ງກົງຈັກພັກ, ກຳນົດທິດກ່ຽວກັບການປ່ຽນໃຫມ່ກົງຈັກລັດ, ແນວໂຮມປະເທດຊາດ ແລະ ອົງການການເມືອງສັງຄົມ, ພ້ອມທັງຮັບຟັງບົດລາຍງານຫົວເລື່ອງສະເພາະຈຳນວນຫນຶ່ງກ່ຽວກັບ: ໝາກຜົນການປະຕິບັດທົດລອງບໍ່ຈັດຕັ້ງສະພາປະຊາຊົນຢູ່ບາງເມືອງ,ຕາແສງ.. ເພື່ອສ້າງແຜນຮ່າງ “ສືບຕໍ່ປ່ຽນໃຫມ່, ປັບປຸງລະບົບການເມືອງຈາກສູນກາງລົງຮອດຂັ້ນຮາກຖານ”ໃຫ້ສົມບູນແບບ ເພື່ອຍື່ນສະເຫນີຕໍ່ສູນກາງພິຈາລະນາ, ປະກາດໃຊ້ມະຕິກ່ຽວກັບບັນຫານີ້. ສະນັ້ນ ກອງ ປະຊຸມສູນກາງຄັ້ງນີ້ຄວນສຸມໃສ່ປຶກສາຫາລື, ຕີລາຄາຢ່າງຮອບດ້ານບັນດາບັນຫາກ່ຽວຂ້ອງເຖິງການຊາບຊືມ ແລະ ຈັດຕັ້ງປະຕິບັດບັນດາມະຕິ, ບົດສະຫລຸບຂອງສູນກາງ, ຊີ້ໃຫ້ເຫັນດ້ານດີ,ດ້ານອ່ອນ, ໄຈ້ແຍກເຫດຜົນ, ສະເຫນີບັນດາທັດສະນະ, ແຜນນະໂຍບາຍ ແລະ ມາດຕະການແກ້ໄຂຂໍ້ຈຳກັດ, ຄວາມອ່ອນດ້ອຍ. ກ່ຽວກັບການປ່ຽນໃຫມ່, ເພີ່ມທະວີການຊີ້ນຳນຳພາຂອງພັກຕໍ່ວຽກງານຂົນຂວາຍປະຊາຊົນໃນສະພາບການໃຫມ່, ທ່ານເລຂາທິການໃຫຍ່ ຫງວຽນຟູຈ້ອງ ຖືວ່າ: ໃນຫລາຍປີຜ່ານມາ, ເປັນຕົ້ນນັບແຕ່ເມື່ອປະກາດໃຊ້ມະຕິສູນກາງພັກ 8b ຊຸດທີ 6, ວຽກງານມະຫາຊົນຂອງພັກສືບຕໍ່ໄດ້ຮັບການປ່ຽນໃຫມ່, ປະກອບສ່ວນສ້າງເປັນບັນດາຜົນງານທີ່ມີຄວາມໝາຍປະຫວັດສາດຂອງພາລະກິດສ້າງສາ ແລະ ປົກປັກຮັກສາປະເທດຊາດ. ບັນຫາວາງອອກນັ້ນແມ່ນ ເປັນຫຍັງໃນຈຸດເວລານີ້ຕ້ອງປຶກສາຫາລືກ່ຽວກັບການປ່ຽນໃຫມ່, ເພີ່ມທະວີການຊີ້ນຳນຳພາຂອງພັກສຳລັບວຽກງານຂົນຂວາຍປະຊາຊົນ. ທ່ານເລຂາທິການໃຫຍ່ ຫງວຽນຟູຈ້ອງ ເນັ້ນຫນັກວ່າ:
“ຕອ້ງຮັບຮູ້ໄດ້ຄວາມຫຍຸ້ງຍາກ, ສິ່ງທົດສອບ, ຂໍ້ຈຳກັດ, ອ່ອນດ້ອຍ ແລະ ສາຍເຫດ, ພວກເຮົາຕ້ອງຮັບຮູ້ຖືກກັບຈຸດໝາຍ, ຄວາມຮຽກຮ້ອງຕ້ອງການ, ທັດສະນະ, ແນວຄິດຊີ້ນຳ ແລະ ຫນ້າທີ່, ມາດຕະການເພື່ອປ່ຽນໃຫມ່, ເພີ່ມທະວີການຊີ້ນຳນຳພາຂອງພັກສຳລັບວຽກງານຂົນຂວາຍປະຊາຊົນໃນສະພາບການໃຫມ່. ບັນຫາທີ່ມີຄວາມໝາຍຕັດສິນຊີ້ຂາດເພື່ອເພີ່ມທະວີການພົວພັນສະຫນິດແຫນ້ນລະຫວ່າງພັກ ແລະ ປະຊາຊົນປະຈຸບັນ ນັ້ນແມ່ນພັກຕ້ອງສຸດຈິດສຸດໃຈ, ເບີ່ງແຍງດູແລຊີວິດການເປັນຢູ່ທາງດ້ານວັດຖຸ ແລະ ຈິດໃຈໃຫ້ແກ່ປະຊາຊົນ, ເຄົາລົບ ແລະ ເສີມຂະຫຍາຍສິດເປັນເຈົ້າຂອງປະຊາຊົນ, ປັບປຸງ, ກໍ່ສ້າງການຈັດຕັ້ງພັກ ແລະ ກົງຈັກອຳນາດການປົກຄອງໃຫ້ປອດໃສ ແລະ ເຂັ້ມແຂງ, ແກ້ໄຂປະກົດການຫຍໍ້ທໍ້ໃນໝູ່ພະນັກງານ, ສະມາຊິກພັກ, ລັດຖະກອນ ເຮັດໃຫ້ພັກສົມເປັນຜູ້ນຳພາ ແລະ ມີຄວາມຈົ່ງຮັກພັກດີຕໍ່ປະຊາຊົນ ”
ທ່ານເລຂາທິການໃຫຍ່ ຫງວຽນຟູຈ້ອງ ກ່າວຄຳປາໄສໄຂກອງປະຊຸມ
ພາບ:chinhphu.vn
|
ກ່ຽວກັບຮ່າງລັດຖະທຳມະນູນປີ 1992 ສະບັບປັບປຸງ, ທ່ານເລຂາທິການໃຫຍ່ ຫງວຽນຟູຈ້ອງ ສະເຫນີ ກອງປະຊຸມສູນກາງຕ້ອງຕິດຕາມໂຄງການການເມືອງຂອງພັກ, ບັນດາມະຕິ, ບົດສະຫລຸບຂອງກອງປະຊຸມສູນກາງພັກຄັ້ງທີ 2 ແລະ ຄັ້ງທີ 5 ກ່ຽວກັບຮ່າງລັດຖະທຳມະນູນປີ 1992 ສະບັບປັບປຸງ, ຄົ້ນຄ້ວາລະອຽດ, ປຶກສາຫາລືຢ່າງເລິກເຊິ່ງບັນດາເນື້ອໃນບົດລາຍງານອະພິປາຍ, ຮັບເອົາຄຳເຫັນ ແລະ ຮ່າງລັດຖະທຳມະນູນປີ 1992 ສະບັບປັບປຸງ ຊື່ງຄະນະກຳມະການປັບປຸງລັດຖະທຳມະນູນປີ 1992 ຍື່ນສະເຫນີ ແລະ ປະກອບຄຳເຫັນມີຄຸນນະພາບ. ຕາມທ່ານເລຂາທິການໃຫຍ່ ຫງວຽນຟູຈ້ອງແລ້ວ, ຮັບຟັງຄວາມເຫັນຂອງປະຊາຊົນຢ່າງຈິງໃຈ, ຮັບເອົາຄຳເຫັນທີ່ເໝາະສົມທັງໝົດ, ຢືດໝັ້ນບັນດາບັນຫາທີ່ມີລັກສະນະຫລັກການ, ຂຶ້ນກັບທາດແທ້ຂອງລະບອບການເມືອງ ແລະ ລັດ, ສືບຕໍ່ຢືນຢັນລັດຫວຽດນາມແມ່ນລັດແຫ່ງອຳນາດນິຕິບັນຍັດສັງຄົມນິຍົມຂອງປະຊາຊົນ, ໂດຍປະຊາຊົນ ແລະ ເພື່ອປະຊາຊົນ, ພາຍໃຕ້ການນຳພາຂອງພັກກອມມູນິດ ຫວຽດນາມ, ສິດອຳນາດແຫ່ງລັດທັງໝົດແມ່ນຂຶ້ນກັບປະຊາຊົນ. ສິດອຳນາດແຫ່ງລັດເປັນເອກະພາບ, ມີການແບ່ງງານ,ການສົມທົບ ແລະ ກວດກາລະຫວ່າງບັນດາອົງການໃນການປະຕິບັດອຳນາດນິຕິບັນຍັດ, ອຳນາດບໍລິຫານ, ອຳນາດຕຸລາການ, ພັດທະນາພື້ນຖານເສດຖະກິດການຕະຫລາດຕາມກຳນົດທິດສັງຄົມນິຍົມ.
ກ່ຽວກັບການສະຫລຸບ 1 ປີແຫ່ງການປະຕິບັດມະຕິສູນກາງພັກຄັ້ງທີ 4 ກ່ຽວກັບການກໍ່ສ້າງພັກ, ທ່ານເລຂາທິການໃຫຍ່ ຫງວຽນຟູຈ້ອງ ສະເຫນີ ຕ້ອງຖອດຖອນບົດຮຽນຢ່າງທັນການ ແລະ ມີຂໍ້ສັງເກດ, ການຕີລາຄາເປັນເອກະພາບ, ສ້າງຄວາມເຫັນດີເຫັນພ້ອມສູງ, ສ້າງເປັນພື້ນຖານເພື່ອສືບຕໍ່ຊີ້ນຳນຳພາການປະຕິບັດມະຕິດັ່ງກ່າວໃຫ້ດີກວ່າ. ຕາມທ່ານເລຂາທິການໃຫຍ່ ຫງວຽນຟູຈ້ອງແລ້ວ,ມະຕິສູນກາງພັກຄັ້ງທີ 4 ບັນລຸໄດ້ໝາກຜົນສຳຄັນໃນເບື້ອງຕົ້ນ.
“ອົງຄະນະພັກທຸກຂັ້ນ, ການຈັດຕັ້ງພັກ ແລະ ຖັນແຖວພະນັກງານ, ສະມາຊິກພັກ ໄດ້ຮັບຮູ້ຢ່າງຄົບຖ້ວນ, ເລິກເຊິ່ງກວ່າກ່ຽວກັບຄວາມສຳຄັນຂອງວຽກງານກໍ່ສ້າງພັກໃນສະພາບການໃຫມ່, ເຫັນໄດ້ລັກສະນະຮີບດ່ວນ ແລະ ຄວາມຈຳເປັນຕ້ອງສືບຕໍ່ປ່ຽນໃຫມ່ ແລະ ປັບປຸງພັກ, ເຮັດໃຫ້ພັກນັບມື້ນັບປອດໃສ, ເຂັ້ມແຂງ. ຈາກນັ້ນ ກຳນົດຢ່າງຈະແຈ້ງຄວາມຮັບຜິດຊອບຂອງຕົນຕໍ່ຊາຕະກຳຂອງພັກ, ຂອງປະເທດຊາດ, ເຊີດຊູສະຕິຕືນຕົວໃນການປະຕິບັດມະຕິ. ວິວັດການກະກຽມ ແລະ ປະຕິບັດການສຳຫລວດກວດຄືນ, ຕຳນິຕິຊົມຕົນເອງ ແລະ ຕຳນິຕິຊົມເພື່ອນສະຫາຍຕາມມະຕິສູນກາງພັກຄັ້ງທີ 4 ກາຍເປັນບັ້ນດຳເນີນຊີວິດການເມືອງຢ່າງເລິກເຊິ່ງ ແລະ ກວ້າງຂວາງໃນທ່ົວພັກຢ່າງແທ້ຈິງ.”
ທ່ານເລຂາທິການໃຫຍ່ ຫງວຽນຟູຈ້ອງ ກໍໄດ້ກຳນົດທິດບັນດາບັນຫາສຳຄັນອື່ນຄື: ສ້າງການວາງແຜນພະນັກງານຂັ້ນຍຸດທະສາດ, ການຮັບມືກັບການປ່ຽນແປງຂອງດິນຟ້າອາກາດ. ທີ່ກອງປະຊຸມຄັ້ງນີ້, ຄະນະບໍລິຫານງານສູນກາງພັກ ກໍໄດ້ປຶກສາຫາລື, ຍົກອອກການຕີລາຄາຢ່າງພາວະວິໄສ, ວິທະຍາສາດເພ່ືອກ້າວໄປເຖິງການສ້າງມະຕິຫົວເລື່ອງສະເພາະກ່ຽວກັບການປ່ຽນແປງຂອງດິນຟ້າອາກາດ, ການຄຸ້ມຄອງຊັບພະຍາກອນທຳມະຊາດ ແລະ ປົກປັກຮັກສາສິ່ງແວດລ້ອມຢູ່ຫວຽດນາມ.