(vovworld)- ຮ່າງບົດລາຍງານການເມືອງຍື່ນສະເຫນີຕໍ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 12 ຂອງພັກກອມມູນິດຫວຽດນາມ ມີການປັບປຸງຄາດໝາຍກ່ຽວກັບຍຸດທະສາດ. ກ່ອນນີ້ ຄາດໝາຍວາງອອກນັ້ນແມ່ນຮອດປີ 2020 ຫວຽດນາມ ກາຍເປັນປະເທດອຸດສາຫະກຳຕາມທິດທັນສະໄຫມໂດຍພື້ນຖານ. ປະຈຸບັນ ຄາດໝາຍນີ້ໄດ້ປັບປຸງເປັນ “ສ້າງພື້ນຖານເພື່ອນຳຫວຽດນາມ ກາຍເປັນປະເທດອຸດສາຫະກຳ ແລະ ທັນສະໄຫມໂດຍໄວ”, ປະກອບຄຳເຫັນໃສ່ເນື້ອໃນນີ້, ບັນດາພະນັກງານ, ສະມາຊິກພັກ, ຜູ້ຊ່ຽວຊານດ້ານເສດຖະກິດຖືວ່າ: ນີ້ແມ່ນທັດສະນະຢ່າງຖືກຕ້ອງ, ໃກ້ຊິດຕິດແທດ ແລະ ເໝາະສົມກັບຄວາມຈິງ.
 ພາບປະກອບ:hanoi.com
|
ຄາດໝາຍຊື່ງພັກກອມມູນິດຫວຽດນາມ ວາງອອກນັບແຕ່ກອງປະຊຸມໃຫຍ່ຜູ້ແທນທົ່ວປະເທດຄັ້ງທີ 7 ປີ 1991 ນັ້ນແມ່ນ ຫວຽດນາມ ຈະກາຍເປັນ ປະເທດອຸດສາຫະກຳ ແລະ ທັນສະໄຫມ ໂດຍພື້ນຖານໃນປີ 2020 ອາດຈະບໍ່ປະຕິບັດໄດ້. ສາຍເຫດໃຫຍ່ສຸດ ນັ້ນແມ່ນ ຫວຽດນາມ ປະຕິບັດການສ້າງໂຄງປະກອບພື້ນຖານເສດຖະເກິດຄືນໃຫມ່ບໍ່ທັນສຳເລັດ, ຮັກສາຮູບແບບການເຕີບໂຕເກົ່າ ໃນໄລຍະຍາວນານ, ບໍ່ສອດຄ່ອງກັບໄລຍະແກ້ງແຍ້ງ ແລະ ເຊື່ອມໂຍງ. ມາຮອດປະຈຸບັນ, ພື້ນຖານອຸດສາຫະກຳຂອງຫວຽດນາມ ພຽງຢູ່ໃນລະດັບຜະລິດແບບຮັບຈ້າງໂດຍອີງໃສ່ອຸປະກອນດີບ, ຄ່າແຮງງານຕ່ຳ. ການເຕີບໂຕເສດຖະກິດຂອງຫວຽດນາມ ສ່ວນຫລາຍແມ່ນອີງໃສ່ແຫລ່ງທຶນ ແລະ ຊັບພະຍາກອນ.
ຍາດແຍ່ງບັນດາກາລະໂອກາດຢ່າງສຸດຂີດເພື່ອພັດທະນາ
ດຣ ເຈີນຢູລີກ, ຜູ້ຊ່ຽວຊານດ້ານເສດຖະກິດ, ສະມາຊິກສະພາແຫ່ງຊາດ (ສສຊ) ຊຸດທີ 13 ໄດ້ຊີ້ໃຫ້ເຫັນ 2 ກາລະໂອກາດ ຊື່ງຫວຽດນາມ ຄວນຍາດແຍ່ງຢ່າງສຸດຂີດເພື່ອນຳພື້ນຖານເສດຖະກິດ ຫວຽດນາມ ພັດທະນາໃນໄລຍະຈະມາເຖິງ. ນັ້ນແມ່ນ ສະພາບແວດລ້ອມເສດຖະກິດມະຫາພາກເປັນປົກກະຕິສົມຄວນ ແລະ ເງື່ອນໄຂເຊື່ອມໂຍງກໍຄືທີ່ຕັ້ງບົດບາດຂອງຫວຽດນາມ ນັບມື້ນັບສະດວກ:
“ຖ້າສັງເກດຄວາມສາມາດບົ່ມຊ້ອນ ແລະ ທີ່ຕັ້ງບົດບາດ, ພວກເຮົາອາດຈະປະຕິບັດການສ້າງໂຄງປະກອບຄືນໃຫມ່ດີກວ່າ, ແຂງແຮງກວ່າໃນໄລຍະ 5 ປີຈະມາເຖິງ ເພື່ອຍູ້ໄວວິວັດການຫັນປະເທດຊາດເປັນປະເທດອຸດສາຫະກຳໂດຍໄວ. ຂ້າພະເຈົ້າຖືວ່າ ມີບາງບັນຫາຊື່ງກອງປະຊຸມໃຫຍ່ຄັ້ງທີ 12 ຂອງພັກຄວນວາງອອກ. ທີຫນຶ່ງ ພວກເຮົາຕ້ອງສືບຕໍ່ວິວັດການປ່ຽນໃຫມ່ລະບອບນະໂຍບາຍຢ່າງແຮງ. ນີ້ແມ່ນກຳລັງຫນູນຂອງການພັດທະນາ. ທີສອງ ພວກເຮົາຕ້ອງລະດົມທຸກແຫລ່ງກຳລັງພາຍໃນປະເທດຢ່າງແຮງກວ່າ ແລະ ທີສາມ ພວກເຮົາຕ້ອງນຳໃຊ້ແຫລ່ງຊັບພະຍາກອນມະນຸດ, ນຳໃຊ້ມະນຸດຢ່າງມີປະສິດທິຜົນ.”
ດຣ ຂະແຫນງເສດຖະກິດ ຟ້າມຢາມີງ, ຮອງເລຂາທິການ ສະມາຄົມພົວພັນຕິດຕໍ່ກັບຊາວຫວຽດນາມ ອາໄສຢູ່ຕ່າງປະເທດ ຖືວ່າ ຄວນກຳນົດມາດຖານປະເທດອຸດສາຫະກຳຕາມທິດທັນສະໄຫມ, ເອົາໃຈໃສ່ເປັນພິເສດເຖິງບັນດາມາດຖານສ່ອງແສງລະດັບການພັດທະນາຂອງພື້ນຖານເສດຖະກິດ ແລະ ສັງຄົມ. ພ້ອມກັນນັ້ນ ການຫັນເປັນອຸດສາຫະກຳ ແລະ ທັນສະໄຫມໄລຍະຈະມາເຖິງ ນັ້ນແມ່ນສືບຕໍ່ຍູ້ແຮງການປະຕິບັດຮູບແບບຫັນເປັນອຸດສາຫະກຳ ແລະ ທັນສະໄຫມໃນເງື່ອນໄຂພັດທະນາເສດຖະກິດການຕະຫລາດຕາມກຳນົດທິດສັງຄົມນິຍົມ ແລະ ເຊື່ອມໂຍງເຂົ້າກັບສາກົນ ຕິດພັນກັບການພັດທະນາເສດຖະກິດພູມປັນຍາ, ນຳເອົາວິທະຍາສາດ, ເຕັກໂນໂລຊີພູມປັນຍາ ແລະ ແຫລ່ງຊັບພະຍາກອນມະນຸດຄຸນນະພາບສູງເປັນກຳລັງຫນູນ. ດຣ ຟ້າມຢາມີງ ຢືນຢັນ: ຄວນສ້າງໂຄງປະກອບເສດຖະກິດ ແລະ ໂຄງປະກອບແຮງງານຢ່າງເໝາະສົມ, ເສີມຂະຫຍາຍທ່າໄດ້ປຽບໃນການສົມທຽບ, ສະມັດຕະພາບແຮງງານ ແລະ ກຳລັງຄວາມສາມາດແກ້ງແຍ້ງສູງ, ເຂົ້າຮ່ວມເຄືອຂ່າຍການຜະລິດ ແລະ ລະບົບມູນຄ່າທົ່ວໂລກຢ່າງເລິກເຊິ່ງກວ້າງຂວາງ.
“ຄວນສ້າງບັນດາເຂດພົວພັນຕິດຕໍ່ເພື່ອຮັບໃຊ້ຕະຫລາດຕາມຮູບແບບຂອງ ສເກົາຫລີ, ໄຕ້ຫວັນ, ສິງກະໂປ. ພວກເຮົາຖອດຖອນບົດຮຽນຈາກບັນດາປະເທດດັ່ງກ່າວແຕ່ອີງໃສ່ເງື່ອນໄຂຂອງຕົນເພື່ອຫລຸດຜ່ອນຄົນງານ. ສຳລັບບັນດາພະນັກງານບັນຈຸ ຕ້ອງມີລາຍຮັບເໝາະສົມກັບວຽກງານທີ່ເຂົາເຈົ້າປະກອບໃຫ້ພື້ນຖານເສດຖະກິດ.”
ມະນຸດແມ່ນປັດໄຈຫລັກແຫລ່ງເພື່ອພັດທະນາ
ໃນແງ່ມູມອື່ນ, ສາດສະດາຈານ, ຄູສອນປະຊາຊົນ ຫວູເຢືອງນີງ, ມະຫາວິທະຍາໄລແຫ່ງຊາດ ຮ່າໂນ້ຍ ຖືວ່າ: ຢາກສ້າງສັງຄົມອຸດສາຫະກຳ ຕ້ອງມີມະນຸດເໝາະສົມກັບພື້ນຖານຜະລິດອຸດສາຫະກຳ. ຄາດໝາຍວາງອອກ ຮອດປີ 2020 ນຳ ຫວຽດນາມ ກາຍເປັນປະເທດອຸດສາຫະກຳ ຕາມທິດທັນສະໄຫມໂດຍພື້ນຖານ. ສາດສະດາຈານ, ຄູສອນ ປະຊາຊົນ ຫວູເຢືອງນີງ ຖືວ່າ:
“ຢາກກ້າວຂຶ້ນສັງຄົມອຸດສາຫະກຳ ຈຳເປັນຕ້ອງສ້າງມະນຸດມີກິລິຍາທ່າທາງແບບອຸດສາຫະກຳ. ສິ່ງສຳຄັນທີ່ສຸດ ແມ່ນການປະຕິບັດວິໄນຈາກຂັ້ນຕອນຜະລິດຕະຫລອດຮອດການດຳເນີນຊີວິດ ແລະ ໃນສັງຄົມ. ຕາມຂ້າພະເຈົ້າແລ້ວ ຄວາມອອ່ນດອ້ຍຂອງພວກເຮົາແມ່ນບັນຫານີ້. ຢາກກ້າວຂຶ້ນສັງຄົມອຸດສາຫະກຳ ຕ້ອງສ້າງມະນຸດມີຈີນຕະນາການໃນການອອກແຮງງານ, ມີກິລິຍາທ່າທາງໃນການດຳເນີນຊີວິດ.”
ເພື່ອຮັບປະກັນການປະຕິບັດຄາດໝາຍທີ່ວາງອອກຢ່າງມີໄຊ, ພັກກອມມູນິດຫວຽດນາມ ໄດ້ປັບປຸງການກຳນົດເວລາ “ຮອດປີ 2020” ເປັນ “ໂດຍໄວ”. ການປັບປຸງນີ້ບັນລຸ 2 ຄາດໝາຍ, ທັງປັບປຸງການກຳນົດເວລາຢ່າງມີໄຫວພິບໃຫ້ເໝາະສົມກັບສະພາບຕົວຈິງ, ທັງຮັກສາຄາດໝາຍກາຍເປັນປະເທດອຸດສາຫະກຳຕາມທິດທັນສະໄຫມ ເພື່ອໃຫ້ທົ່ວພັກ, ທົ່ວປວງຊົນສືບຕໍ່ສູ້ຊົນ.