(vovworld)- 60 ປີໄດ້ຜ່ານໄປນັບແຕ່ມື້ໄດ້ຮັບການປົດປ່ອຍ (10/10/2014), ນະຄອນຫລວງ ຮ່າໂນ້ຍ ໄດ້ຜ່ານຜ່າຄວາມຫຍຸ້ງຍາກນາໆປະການ, ສ້າງສາ ແລະ ພັດທະນາເທື່ອລະກ້າວ, ສົມກັບເປັນຫົວໃຈຂອງທັງປະເທດ, ສົມກັບນາມມະຍົດນະຄອນເພື່ອສັນຕິພາບ ຊື່ງໄດ້ຮັບການເຊີດຊູຈາກ ອົງການວັດທະນະທຳ, ວິທະຍາສາດ ແລະ ສຶກສາ ຂອງ ສປຊ (UNESCO).
ຮ່າໂນ້ຍ ຈະໄດ້ຮັບການກໍ່ສ້າງຕາມຮູບແບບກຸ່ມເຂດຕົວເມືອງ
photo:dothi.net
|
ຫວນຄືນວິວັດການສ້າງສາ ແລະ ພັດທະນາຂອງນະຄອນຫລວງ ຮ່າໂນ້ຍ ໃນຊຸມປີມໍ່ໆມານີ້, ບໍ່ພຽງແຕ່ຜູ້ທີ່ຢູ່ຫ່າງໄກຈາກ ຮ່າໂນ້ຍ ເທົ່ານັ້ນ ຫາກຍັງມີບັນດາຜູ້ພວມດຳລົງຊີວິດຢູ່ ນະຄອນຫລວງ ກໍຮູ້ສຶກປະຫລາດຕໍ່ການປ່ຽນແປງຢ່າງວ່ອງໄວຂອງ ຮ່າໂນ້ຍ. ພິເສດ ນັບແຕ່ວັນທີ 1/8/2010, ນະຄອນຫລວງ ຮ່າໂນ້ຍ ໄດ້ຮັບການເປີດກວ້າງເຂດປົກຄອງ ສ້າງບາດລ້ຽວປະຫວັດສາດ, ນຳຮ່າໂນ້ຍ ກ້າວເຂົ້າສູ່ໄລຍະພັດທະນາໃຫມ່.
ສ້າງສາຮ່າໂນ້ຍ ໃຫ້ກາຍເປັນນະຄອນສີວິໄລ, ທັນສະໄຫມ
ໃນໄລຍະ 6 ປີຜ່ານມາ, ຮ່າໂນ້ຍ ໄດ້ພະຍາຍາມແກ້ໄຂຫລາຍບັນຫາໃຫຍ່ ດ້ວຍວຽກງານຫລາຍຢ່າງ ເປັນຕົ້ນແມ່ນປະຕິບັດສຳເລັດວຽງານວາງແຜນຜັງ, ສ້າງກົງຈັກບໍລິຫານໃຫ້ສົມບູນແບບ, ຕອບສະຫນອງຄວາມຕ້ອງການເປີດກວ້າງນະຄອນຫລວງ. ນະຄອນ ຮ່າໂນ້ຍ ໄດ້ພັດທະນາທັງລວງກວ້າງ ແລະ ລວງເລິກ. ຮ່າໂນ້ຍ ໄດ້ຮັບການເປີດກວ້າງ ດ້ວຍການໂຮມແຂວງ ຮ່າໄຕ, ເມືອງເມລີງ ຂອງແຂວງ ຫວີງຟຸກ, ສ່ວນຫນຶ່ງຂອງແຂວງ ບັກນີງ ແລະ ຕາແສງຈຳນວນຫນຶ່ງຂອງແຂວງ ຮ່ວາບີງຕື່ມອີກ. ພຽງໃນໄລຍະສັ້ນ, ຢູ່ທາງທິດຕາເວັນຕົກ ແລະ ຕາເວັນຕົກສ່ຽງໃຕ້ຂອງນະຄອນ ມີກິດຈະກຳໃຫຍ່ຫລາຍແຫ່ງ ພ້ອມກັບບັນດາເຂດຊຸມຊົນທັນສະໄຫມໄດ້ຮັບການກໍ່ສ້າງຂຶ້ນຢ່າງວ່ອງໄວ, ນັ້ນແມ່ນບັນດາເສັ້ນທາງຄົມມະນາຄົມ ແລະ ລະບົບຂົວໃຫມ່ຂ້າມແມ່ນ້ຳແດງຫລາຍແຫ່ງທັນສະໄຫມ ອັນໄດ້ເຮັດໃຫ້ໂສມຫນ້າຂອງນະຄອນຫລວງມີການປ່ຽນແປງໃຫມ່ຫລາຍຢ່າງ. ທ່ານ ຟ້າມກວາງງີ້, ເລຂາຄະນະພັກນະຄອນ ຮ່າໂນ້ຍ ໃຫ້ຮູ້ວ່າ:
“ປະຈຸບັນ ນະຄອນຫລວງ ຮ່າໂນ້ຍ ມີເນື້ອທີ່ກວມເອົາ 1% ຂອງເນື້ອທີ່ທັງປະເທດແມ່ນ 3.400 ຕາລາງກິໂລແມັດ, ມີພົນລະເມືອງ 9 ລ້ານຄົນ ກວມ 10%ຈຳນວນພົນລະເມືອງຂອງທັງປະເທດ. ບັນດາການເຄື່ອນໄຫວເສດຖະກິດໄດ້ປະກອບສ່ວນ 10% ຍອດຜະລິດຕະພັນຂອງຊາດ, ລາຍຮັບກວມເອົາປະມານ 20%, ການສົ່ງອອກ ປະມານ 9%. ບັນດາຕົວເລກດັ່ງກ່າວ ພ້ອມກັບການຢັ້ງຢືນໃນລັດຖະທຳມະນູນ, ໃນກົດໝາຍວ່າດ້ວຍນະຄອນຫລວງ ໄດ້ເຮັດໃຫ້ ຮ່າໂນ້ຍ ກາຍເປັນສູນການເມືອງການປົກຄອງແຫ່ງຊາດ, ສູນວັດທະນະທຳ, ການສຶກສາ ແລະ ວິທະຍາສາດເຕັກໂນໂລຊີ, ສູນເສດຖະກິດ ການຄ້າ ແລະ ການພົວພັນກັບສາກົນ.”
ຮ່າໂນ້ຍປະຈຸບັນ
ພາບ:vietbao.vn
|
ສຸມກຳລັງເຫື່ອແຮງເພື່ອພັດທະນາເສດຖະກິດ
ພາຍຫລັງຊຸມປີທຳອິດສຸມກຳລັງເຫື່ອແຮງຕອບສະຫນອງຄວາມຕ້ອງການເປີດກວ້າງເຂດປົກຄອງນະຄອນຫລວງ, ທຸກດ້ານເສດຖະກິດສັງຄົມຂອງ ຮ່າໂນ້ຍ ພວມໃນທ່າພັດທະນາ. GDP ຂອງນະຄອນໄລຍະ 2008-2014 ບັນລຸສະເລ່ຍ 9,2%, ໃນນັ້ນ ບັນດາຂົງເຂດອຸດສາຫະກຳ, ບໍລິການ, ກະສິກຳປ່າໄມ້, ສິນໃນນ້ຳ ລ້ວນແຕ່ມີການເຕີບໂຕສູງພໍສົມຄວນ. ສະເພາະ 6 ເດືອນຕົ້ນປີ 2014, GDP ສະເລ່ຍບັນລຸ 6,4% ແລະ ຄາດວ່າ ທັງປີ ຈະບັນລຸ ກວ່າ 9%, ເພີ່ມຂຶ້ນທົບ 1,5 ເທົ່າເມື່ອທຽບໃສ່ GDP ຂອງທັງປະເທດ. ໃນຊຸມປີມໍ່ໆມານີ້, ຮ່າໂນ້ຍ ແມ່ນນະຄອນນຳຫນ້າໃນການພັດທະນາເສດຖະກິດຂອງທັງປະເທດ, ແລະ ກໍແມ່ນທ້ອງຖິ່ນນຳຫນ້າທົ່ວປະເທດໃນການກໍ່ສ້າງຊົນນະບົດໃຫມ່.
ຄຽງຄູ່ກັບການເຕີບໃຫຍ່ ແລະ ພັດທະນາເສດຖະກິດຢ່າງວ່ອງໄວ, ຮ່າໂນ້ຍ ພວມຍູ້ແຮງການຮ່ວມສຳພັນ, ຮ່ວມມືເຊື່ອມໂຍງເຂົ້າກັບເສດຖະກິດສາກົນ. ມາຮອດປະຈຸບັນ, ຮ່າໂນ້ຍ ໄດ້ສ້າງຕັ້ງການພົວພັນກັບນະຄອນຫລວງ ແລະ ນະຄອນກວ່າ 100 ແຫ່ງຂອງ 50 ປະເທດ ແລະ ເຂດແຄ້ວນໃນໂລກ. ປະຈຸບັນ ຮ່າໂນ້ຍ ແມ່ນສະມາຊິກເປັນທາງການຂອງຫລາຍອົງການສາກົນຄື: ສະຫະສະມາຄົມຕົວເມືອງໃຫຍ່ໃນໂລກ, ສະຫະສະມາຄົມເຈົ້າຄອງບັນດາປະເທດໃຊ້ພາສາຝລັ່ງ, ເຄືອຂ່າຍບັນດານະຄອນໃຫຍ່ຢູ່ ອາຊີ…
ນະຄອນຫລວງ ຮ່າໂນ້ຍ ມຸ່ງໄປສູ່ອະນາຄົດ
ເພື່ອກໍ່ສ້າງນະຄອນຫລວງ ຮ່າໂນ້ຍ ໃຫ້ນັບມື້ນັບສີວິໄລ, ທັນສະໄມ ໃນຍຸດທະສາດວາງແຜນຜັງສັງລວມພັດທະນາເສດຖະກິດສັງຄົມປີ 2020 ວິໄສທັດຮອດປີ 2030, ພ້ອມກັບການປະກາດໃຊ້ບັນດານະໂຍບາຍສ້າງເງື່ອນໄຂໃຫ້ແກ່ການພັດທະນາເສດຖະກິດ, ຮ່າໂນ້ຍ ຍູ້ແຮງການສຸມໃສ່ລົງທຶນພື້ນຖານໂຄງລ່າງຕາມທິດຄົບຊຸດ ຊື່ງຈຸດສຸມແມ່ນກໍ່ສ້າງລະບົບຄົມມະນາຄົມທັນສະໄຫມ. ທ່ານ ໂຮ່ກວາງເລີ້ຍ, ຫົວຫນ້າຄະນະໂຄສະນາສຶກສາ ຄະນະພັກນະຄອນ ຮ່າໂນ້ຍ ໃຫ້ຮູ້ວ່າ:
“ໃນການວາງແຜນຜັງ ຮ່າໂນ້ຍ ຈະໄດ້ຮັບການກໍ່ສ້າງຕາມຮູບແບບກຸ່ມເຂດຕົວເມືອງ ລວມມີບັນດາເຂດຕົວເມືອງໃຈກາງ ດ້ວຍເຂດຊຸມຊົນທັນສະໄຫມ 5 ແຫ່ງ ແລະ ບັນດາເທດສະບານອ້ອມແອ້ມ. ເຂດ ຊຸມຊົນທັນສະໄຫມ ແຕ່ລະແຫ່ງມີ ການເຄື່ອນໄຫວຕ່າງຫາກ, ເອກະລາດ, ແຕ່ຫນູນຊ່ວຍເຊິ່ງກັນ ແລະ ກັນ, ພ້ອມກັນພັດທະນາເສດຖະກິດ”
ການສະເຫລີມສະຫລອງ 60 ປີແຫ່ງວັນປົດປ່ອຍນະຄອນຫລວງ ຮ່າໂນ້ຍ ຄືວັນທີ 10/10/2014 ກໍແມ່ນໂອກາດເພື່ອໃຫ້ອຳນາດການປົກຄອງ ແລະ ປະຊາຊົນນະຄອນຫລວງ ຫວນຄືນວິວັດການສ້າງສາ ແລະ ພັດທະນາ. ບັນດາການເຄື່ອນໄຫວສະເຫລີມສະຫລອງ ກໍແມ່ນໂອກາດເພື່ອໃຫ້ບັນດາອຳນາດການປົກຄອງ ແລະ ປະຊາຊົນນະຄອນ ເຫັນໄດ້ກາລະໂອກາດ, ສິ່ງທ້າທາຍ, ບົດຮຽນອັນລ້ຳຄ່າຢ່າງຈະແຈ້ງກວ່າ ແລະ ຈາກນັ້ນ ມຸ່ງໄປສູ່ອະນາຄົດເພື່ອກໍ່ສ້າງນະຄອນຫລວງຮ່າໂນ້ຍໃຫ້ພັດທະນາແບບຍືນຍົງ ແລະ ຮອບດ້ານໃນໄລຍະຕໍ່ໄປ.