Rehahn Croquevielle ເຄີຍໄປເຖິງ 32 ປະເທດໃນໂລກ, ແຕ່ລາວມັກມາຫວຽດນາມເພາະຢູ່ແຫ່ງນີ້ໄດ້ເຮັດໃຫ້ລາວມີແຫຼ່ງອາລົມປະດິດຄິດສ້າງ. ໂດຍໄດ້ເລີ່ມຈາກນັກຖ່າຍຮູບສະໝັກຫຼິ້ນຢູ່ເຂດ Normandie ປະເທດຝະລັ່ງ, Rehahn Croquevielle ໄດ້ມາຫວຽດນາມຖ່າຍເອົາຮູບຫຼາຍແຜ່ນທີ່ມີຊື່ສຽງໃນໂລກ.
ນັກຖ່າຍຮູບ Rehahn Croquevielle |
ມາຫວຽດນາມເປັນຄັ້ງທຳອິດໃນປີ 2007 ໃນຂອບເຂດການເດີນທາງໄປເຮັດວຽກງານເພື່ອການກຸສົນ, ນັກຖ່າຍຮູບ Rehahn Croquevielle ໄດ້ມີຄວາມປະທັບໃຈຢ່າງແທ້ຈິງ ແລະ ຖືກດຶງດູດໃຈຍ້ອນຄວາມງາມຂອງປະເທດຊາດ ແລະ ຊາວຫວຽດນາມ. ປີ 2011 ນັກຖ່າຍຮູບ Rehahn Croquevielle ໄດ້ຕົກລົງພາຄອບຄົວມາດຳລົງຊີວິດຢູ່ຄຸ້ມເມືອງເກົ່າ ໂຫ້ຍອານໃນແຂວງ ກວາງນາມ ເພື່ອເດີນຕາມອາຊີບຖ່າຍຮູບຂອງຕົນ. Rehahn Croquevielle ໃຫ້ຮູ້ວ່າ ລາວໄດ້ເຄີຍໄປເຖິງຫຼາຍແຫ່ງຢູ່ເຂດບ້ານນາຫວຽດນາມ, ຢູ່ແຫ່ງໃດ ລາວກໍເຫັນວ່າ ຊາວທ້ອງຖິ່ນມີຈິດໃຈສະໜິດສະໜົມ, ຮັກແພງແຂກຄົນ, ດັ່ງນັ້ນ, ລາວມັກຖ່າຍຮູບກ່ຽວກັບມະນຸດຢູ່ບັນດາເຂດບ້ານນາຫວຽດນາມ. ນັກຖ່າຍຮູບ Rehahn Croquevielle ເວົ້າວ່າ :
“ ຂ້າພະເຈົ້າມັກຖ່າຍຮູບເຄິ່ງຄີງຫຼາຍກວ່າ, ເພາະວ່າ ສຳລັບຂ້າພະເຈົ້າແລ້ວ, ຮູບເຄິ່ງຄີງແມ່ນສິ່ງທີ່ຊ່ວຍພວກເຮົາກຳໄດ້ກາລະເວລານັ້ນທີ່ໄດ້ຜ່ານພົ້ນໄປແລ້ວ, ແລະ ພວກເຮົາກໍບໍ່ສາມາດຊອກຫາກາລະເວລານັ້ນໄດ້ອີກຄັ້ງໜຶ່ງ. ໃນຂະນະນັ້ນ, ເມື່ອຖ່າຍເອົາຮູບທິວທັດທຳມະຊາດນັ້ນ, ພວກເຮົາກໍສາມາດກັບຄືນບ່ອນນັ້ນເພື່ອຖ່າຍເອົາຮູບເຊັ່ນກັນ. ສຳລັບຂ້າພະເຈົ້າແລ້ວ, ຮູບເຄິ່ງຄີງຍາມໃດກໍສາມາດສະແດງໃຫ້ເຫັນເລື່ອງລາວ ກ່ຽວກັບບຸກຄົນໜຶ່ງ. ແລະ ຂ້າພະເຈົ້າຖືຕົນເອງປຽບເໝືອນຄົນໜຶ່ງໄປເກັບກຳເລື່ອງລາວເຫຼົ່ານັ້ນ ”
ໃນໄລຍະເກືອບ 10 ປີ, ນັກຖ່າຍຮູບ Rehahn Croquevielle ໄດ້ຂີ່ລັດຈັກຖ່າຍເອົາຮູບໄດ້ 50.000 ແຜ່ນ. ລາວໄດ້ເລືອດເອົາຮູບ 150 ແຜ່ນທີ່ງາມກວ່າໝູ່ເພື່ອແນະນຳໃນປຶ້ມຮູບຖ່າຍເຫຼັ້ມທຳອິດຂອງຕົນກ່ຽວກັບຫວຽດນາມທີ່ມີຊື່ວ່າ : “ ຫວຽດນາມ-ສອ່ງແສງຜ່ານຮູບຖ່າຍ ”
ນາງຫງວຽນທິທົງ ຜູ້ຊ່ວຍວຽກຂອງ ນັກຖ່າຍຮູບ Rehahn Croquevielle ໃຫ້ຮູ້ວ່າ ດ້ານຫຼັງຂອງຮູບຄິ່ງຄີງແຕ່ລະແຜ່ນທີ່ນັກຖ່າຍຮູບ Rehahn Croquevielle ໄດ້ຖ່ຍເອົານັ້ນ, ແມ່ນເລື່ອງລາວທີ່ເປັນໜ້າຕື້ນຕັນໃຈລະຫວ່າງລາວກັບບຸກຄົນໃນຮູບ. ນາງຫງວຽນທິທົງ ໃຫ້ຮູ້ວ່າ :
“ ສຳລັບ Rehahn Croquevielle ແລ້ວ, ພາຍຫຼັງຖ່າຍເອົາຮູບແຜ່ນໜຶ່ງແລ້ວ, ທຸກໆຄັ້ງ, ລາວກໍກັບຄືນຢ້ຽມຢາມບຸກຄົນໃນຮູບຖ່າຍເພື່ອຂອບໃຈ ແລະ ຍາມໃດກໍຊ່ວຍເຫຼືອບຸກຄົນທີ່ລາວໄດ້ຖ່າຍເອົາຮູບ. ລາວເວົ້າວ່າ ເມື່ອເຮັດວຽກງານຂາຍປຶ້ມ ແລະ ຮູບຖ່າຍນັ້ນ, ບັນດາຮູບຖ່າຍທີ່ລາວຂາຍອອກນັ້ນ, ລາວຢາກນຳເອົາຊີວິດທີ່ດີກວ່າໃຫ້ບຸກຄົນທີ່ລາວໄດ້ຖ່າຍຮູບ ”
ບັນດາຮູບຖ່າຍຂອງ Rehahn Croquevielle ກ່ຽວກັບຫວຽດນາມ ໄດ້ເຄີຍຖືກລົງພິມໃນວາລະສານຮູບຖ່າຍ, ເວບໄຊທີ່ມີຊື່ສຽງໃນໂລກ. ພິເສດຮູບຖ່າຍ “ຮອຍຍິ້ມລຶກລັບ” ໄດ້ບັນທຶກຮອຍຍິ້ມຂອງແມ່ຕູ້ ບຸ່ຍທິຊອງ ອາຍຸ 73 ປີ ປະກອບອາຊີບພາຍເຮືອພາແຂກທ່ອງທ່ຽວຢູ່ໂຫ້ຍອານ. ຫວ່າງແລ້ວນີ້, Rehahn Croquevielleໄດ້ຕົງລົງມອບຮູບຖ່າຍແຜ່ນນີ້ໃຫ້ຫໍພິພິທະພັນແມ່ຍິງຫວຽດນາມເປັນຂອງຂວັນ. ນາງຫງວຽນທິບິກເວີນ ຜູ້ອຳນວຍການຫໍພິພິທະພັນແມ່ຍິງຫວຽດນາມ ໃຫ້ຮູ້ວ່າ :
“ ເຖິງວ່າບໍ່ແມ່ນຄັ້ງທຳອິດທີ່ນັກຖ່າຍຮູບມອບຮູບຖ່າຍແຜ່ນນີ້, ແຕ່ຂ້າພະເຈົ້າຖືວ່າ ທີ່ແມ່ນສະຖານທີ່ເໝາະສົມທີ່ສຸດ ແລະມີຄວາມໝາຍທີ່ສຸດ. ເພາະນັກຖ່າຍຮູບ Rehahn Croquevielle ໄດ້ຖ່າຍເອົາຮູບແຜ່ນນີ້ຢູ່ຫວຽດນາມ ແລະ ສະແດງໃຫ້ເຫັນຄວາມງາມຂອງແມ່ຍິງຫວຽດນາມ, ຄວາມງາມທີ່ບໍ່ກຳນົກເຖິງອາຍຸ ”
ສຳລັບນັກຖ່າຍຮູບ Rehahn Croquevielle ແລ້ວ, ຫວຽດນາມກໍແມ່ນບ້ານເກີດເມືອງນອນແຫ່ງທີ 2 , ແມ່ນແຫຼ່ງອາລົມເພື່ອໃຫ້ລາວປະດິດຄິດສ້າງດ້ານສິລະປະ.