(vovworld) – ສົ່ງເສີມຄວາມຊິນເຄີຍໃນການອ່ານປື້ມ ແລະ ສ້າງວັດທະນະທຳອ່ານໃຫ້ແກ່ທຸກຄົນ, ແມ່ນໜຶ່ງໃນບັນດາຈຸດປະສົງຕົ້ນຕໍ່ຂອງວັນບຸນອ່ານປື້ມ ແລະ ວັດທະນະທຳອ່ານ. ວັນບຸນອ່ານປື້ມພວມກາຍເປັນວັນບຸນລວມຂອງຜູ້ອ່ານທຸກຄົນ ເມື່ອຖືກຈັດຂຶ້ນຢູ່ຫຼາຍແຂວງ, ນະຄອນ ແລະ ໄດ້ຮັບຄວາມເຫັນດີເຫັນພ້ອມຈາກຜູ້ອ່ານເປັນຈຳນວນຫຼວງຫຼາຍ.
ວັນບຸນອ່ານປື້ມຈັດຂຶ້ນຢູ່ວັນທ໋ຽວ - ກວົກຕືຢ໋າມ
(ພາບ: ອິນເຕີແນດ)
ໃນວັນບຸນອ່ານປື້ມທີ່ຈັດຂຶ້ນຢູ່ວັນທ໋ຽວ - ກວົກຕືຢ໋າມ, ຮ້ານຂາຍປຶ້ມ ແລະ ໂຮງພິມຈຳໜ່າຍ 20 ກວ່າແຫ່ງໄດ້ນຳເອົາປື້ມນັບໝື່ນຫົວ ທີ່ຂຶ້ນກັບຂົງເຂດ: ວັດທະນະທຳ, ວິທະຍາສາດ, ເຍົາວະຊົນ, ການສຶກສາ… ມາແນະນຳ ເພື່ອຮັບໃຊ້ຜູ້ອ່ານໃນທຸກເກນອາຍຸ. ໂຮງພິມຈຳໜ່າຍກິມດົ່ງ ໄດ້ສະຫງວນບ່ອນອ່ານປື້ມສະເພາະທີ່ກວ້າງປະມານ 5 ຕາລາງແມດໃຫ້ແກ່ເດັກນ້ອຍ. ເອື້ອຍ ເຈິ່ນທິຕວຽດຈິງ ໃຫ້ຮູ້ວ່າ, ເຖິງວ່າເຂດອ່ານປື້ມຍັງຄັບແຄບກໍ່ຕາມ, ແຕ່ລູກຂອງເອື້ອຍພັດນິຍົມຫຼາຍ.
“ຂ້າພະເຈົ້າເຫັນວ່າລູກມັກອ່ານປື້ມຫຼາຍດັ່ງນັ້ນຈຶ່ງພາລູກເຖິງບ່ອນອ່ານປື້ມຂອງໂຮງພິມຈຳໜ່າຍກິມດົ່ງ. ຂ້າພະເຈົ້າຫວັງວ່າຈະມີບັນດາວັນບຸນຄືດັ່ງກ່າວ, ແຕ່ຖືກຈັດຂຶ້ນຢູ່ເຂດທີ່ກວ້າງຂວາງກວ່າ ເພື່ອຮັບໃຊ້ໃຫ້ຜູ້ອ່ານໄດ້ຫຼາຍກວ່າ“.
(ພາບປະກອບ: ອິນເຕີແນດ)
ຕາມປະລິຍາເອກດ້ານການສຶກສາ ຫງວຽນຖູ້ຍແອງ, ຫົວໜ້າສະໂມສອນ “ອ່ານປື້ມພ້ອມກັບລູກ“ ແລ້ວ, ເພື່ອສົ່ງເສີມພວກນ້ອງອ່ານປື້ມ, ການແນະນຳຂອງພໍ່ແມ່ແມ່ນມີຄວາມສຳຄັນທີ່ສຸດ:
“ສຳລັບພວກເດັກນ້ອຍ, ພໍ່ແມ່ຕ້ອງແມ່ນຜູ້ຊ່ວຍໃຫ້ພວກນ້ອງໃນການຊື້ປື້ມ. ດັ່ງນັ້ນຕ້ອງມີເຂດສະເພາະເພື່ອແບ່ງປັນໃຫ້ພໍ່ແມ່ເດັກນ້ອຍກ່ຽວກັບບັນດາປື້ມທີ່ມ່ວນ ແລະ ວິທີອ່ານໃຫ້ເຂົາເຈົ້າອີກ. ຂ້າພະເຈົ້າເຫັນວ່າ, ຖ້າຫາກມີບັນດາການເຄື່ອນໄຫວຄອບຄົວຄືແນວນັ້ນ ມັນຈະມີປະສິດທິຜົນກວ່າ“.
ປະລິຍາເອກດ້ານສຶກສາວິທະຍາ ຫງວຽນຖູ້ຍແອງ ກໍ່ຖືວ່າ, ນອກຈາກເນື້ອໃນຂອງປື້ມ, ພວກນ້ອງຍັງຕ້ອງການຫຼາຍສິ່ງກວ່າອີກ, ໃນນັ້ນມີເລື່ອງແຊກຊືມເຂົ້າໂລກປື້ມ ດ້ວຍຄວາມສຳນຶກຂອງເດັກນ້ອຍ. ສິ່ງດັ່ງກ່າວບໍ່ແມ່ນເລື່ອງຍາກສຳລັບຜູ້ທີ່ມີຄວາມເອົາໃຈໃສ່ເຖິງການແນະນຳວິທີອ່ານຢ່າງຖືກຕ້ອງໃຫ້ເດັກນ້ອຍ:
“ສຳລັບປື້ມໜາ, ຂ້າພະເຈົ້າສາມາດເລືອກເຟັ້ນບາງຕອນ ທັງອ່ານທັງສະແດງອາລົມຈິດພ້ອມກັບພວກນ້ອງ. ທີສອງ, ຂ້າພະເຈົ້າສາມາດນຳເອົາຮູບພາບທີ່ສວຍງາມສົມທົບກັບດົນຕີເຂົ້າພ້ອມ, ຫຼືສາມາດຫັນເນື້ອໃນຕອນໜຶ່ງໃນປື້ມເປັນການລະຫຼິ້ນ, ເປັນຄຳທວາຍ. ເຮັດຄືແນວນັ້ນພວກນ້ອງຈຶ່ງສະແດງຄວາມສຳນຶກຂອງຕົນໄດ້“.
(ພາບປະກອບ: ອິນເຕີແນດ)
ວັນບຸນອ່ານປຶ້ມປີ 2013 ກໍ່ສ້າງເງື່ອນໄຂເພື່ອໃຫ້ຜູ້ອ່ານຊອກຫາປື້ມທີ່ມ່ວນ, ມີຄູນຄ່າ, ກໍ່ຄືສົ່ງເສີມຈິດໃຈຮຳ່ຮຽນດ້ວຍຕົວເອງ. ຕາມທ່ານ ຫງວຽນງອກບາວ, ຮອງຫົວໜ້າກົມພິມຈຳໜ່າຍ, ກະຊວງຖະແຫຼງຂ່າວ ແລະ ສື່ສານ ແລ້ວ, ແຕ່ລະຄົນສາມາດຊອກຫາທິດພັດທະນາສະເພາະ ກໍ່ຄືກຳນົດທິດທາງໃຫ້ແກ່ຕົນ ແລະ ປື້ມສາມາດເຮັດສິ່ງດັ່ງກ່າວໄດ້.
“ມີອັດສະລີຍະບູລຸດບາງຄົນ, ຈາກປື້ມຫົວໜຶ່ງໄດ້ຊ່ວຍສ້າງເປັນຈີນຕະນາການພັດທະນາ ແລະ ປື້ມກໍ່ເຮັດໃຫ້ວິຖີຊີວິດ, ວິທີນຶກຄິດຂອງເຂົາເຈົ້າປ່ຽນແປງໄປນຳ. ດັ່ງນັ້ນການເລືອກເຟັ້ນຫົວຂໍ້ “ປື້ມເຮັດໃຫ້ຊີວິດປ່ຽນແປງ“ ດ້ວຍຄວາມປາຖະໜາວ່າ, ຜູ້ອ່ານແຕ່ລະຄົນຈົ່ງເຂົ້າຮ່ວມວັດທະນະທຳອ່ານ ແລະ ເລືອກເຟັ້ນປື້ມທີ່ມີຄວາມນິຍົມໃຫ້ຕົນ ເພື່ອປະກອບສ່ວນສ້າງ ແລະ ພັດທະນາບຸກຄະລິກ, ກຳນົດທິດທາງໃຫ້ແກ່ຕົນໃນອະນາຄົດ“.
ວັນບຸນປື້ມ ແມ່ນໂອກາດເພື່ອແນະນຳປື້ມທີ່ມ່ວນເຖິງຜູ້ອ່ານ ແລະ ສ້າງຄວາມຊິນເຄີຍອ່ານປື້ມ, ຍົກສູງວັດທະນະທຳອ່ານໃຫ້ແກ່ທຸກຄົນ.