(vovworld) – “ພ້ອມກັນປະດິດໜ້າກາກເຈ້ຍຫວຽດນາມ, ຕ້ອນຮັບບຸນວັນເພງເດືອນ 8“ ແມ່ນຊື່ໂຄງການ ໂດຍຈິດຕະກອນ ຈາງແທງຮ່ຽນ ພ້ອມກັບນັກສຶກສາມະຫາວິທະຍາໄລ ວິຈິດສິນ ຫວຽດນາມ ລິເລິ່ມ, ທີ່ຫາກໍ່ດຳເນີນຢູ່ຫໍພິພິດຕະພັນວິຈິດສິນ ຫວຽດນາມ ນັ້ນ, ບໍ່ພຽງແຕ່ແນະນຳໃຫ້ເດັກນ້ອຍວິທີເຮັດໜ້າກາກເຈ້ຍທີ່ເປັນມູນເຊື້ອເທົ່ານັ້ນ, ຫາກຍັງມຸ່ງໄປເຖິງການຟື້ນຟູ ແລະ ເສີມຂະຫຍາຍບັນດາຄຸນຄ່າວັດທະນະທຳຂອງໜ້າກາກຫວຽດນາມ ອີກດ້ວຍ.
(ພາບ: ອິນເຕີແນດ)
ໂຄງການ“ພ້ອມກັນປະດິດໜ້າກາກເຈ້ຍຫວຽດນາມ, ຕ້ອນຮັບບຸນວັນເພງເດືອນ 8“ ໄດ້ດຶງດູດການເຂົ້າຮ່ວມຂອງເດັກນ້ອຍ 300 ກວ່າຄົນ. ຢູ່ທີ່ນີ້ພວກນ້ອງຈະໄດ້ຮຽນວິທີເຮັດໜ້າກາກເຈ້ຍ, ນຳໃຊ້ປາກກາຂົນ, ທາສີ, ລ້າງປາກກາຂົນ… ພວກນ້ອງສາມາດທາສີຕາມໃຈມັກເພື່ອສ້າງເປັນໜ້າກາກສະເພາະໃຫ້ແກ່ຕົນ. ຄຽງຂ້າງນັ້ນ, ພວກນ້ອງຍັງໄດ້ຮຽນວິທີຈຳແນກລະຫວ່າງໜ້າກາກທີ່ເປັນມູນເຊື້ອຂອງຫວຽດນາມ ແລະ ໜ້າກາກຂອງປະເທດອື່ນໆ ກໍ່ຄືໄດ້ຊອກຮູ້ບັນດາໜ້າກາກທີ່ນຳໃຊ້ໃນການເຄື່ອນໄຫວວັດທະນະທຳ, ການເຊື່ອຖືຂອງຊາວຫວຽດນາມ ອີກ. ນອກຈາກແນະນຳໃຫ້ພວກນ້ອງວິທີປະດິດໜ້າກາດເຈ້ຍຕາມໜ່ວຍແລ້ວ, ໂຄງການຍັງຈັດການໂອ້ລົມກ່ຽວກັບໜ້າກາກດ້ວຍຫົວເລື່ອງທີ່ອຸດົມສົມບຸນ, ອັນໄດ້ຊ່ວຍສ້າງຈິດສຳນຶກໃຫ້ແກ່ພວກນ້ອງ. ຄຽງຄູ່ກັນນັ້ນແມ່ນການວາງສະແດງບັນດາໜ້າກາກໂດຍຈິດຕະກອນຫຼາຍຄົນປະດິດອີກ. ໜ້າກາກທັງໝົດນັ້ນ ຈະຖືກຂາຍປະມູນເພື່ອສ້າງກອງທຶນກໍ່ສ້າງໂຮງຮຽນ, ຕູ້ປື້ມຢູ່ໂຮງຮຽນປະຖົມ ຊ໋ວຍເບົາ (ເມືອງຟູ່ອຽນ, ແຂວງເຊີນລາ). ເອື້ອຍ ກິມງອກຢຽບ, ພາລູກສາວອາຍຸ 4 ປີ ມາຮ່ວມລາຍການ, ແບ່ງປັນວ່າ:
“ມື້ນີ້ໄດ້ຮູ້ວ່າ, ມີລາຍການແຕ້ມໜ້າກາກທີ່ເປັນມູນເຊື້ອ, ດ້ວຍວັດຖຸທຳມະຊາດ. ຂ້າພະເຈົ້າເຫັນວ່າລາຍການມີປະໂຫຍດທີ່ສຸດ, ເຮັດໃຫ້ທຸກຄົນມຸ່ງໄປເຖິງການເຄື່ອນໄຫວກຸສົນ. ດັ່ງນັ້ນຈຶ່ງພາລູກມາຮ່ວມລາຍການ“.
(ພາບ: ອິນເຕີແນດ)
ໃນລາຍການ, ຈິດຕະກອນ ຈາງແທງຮ່ຽນ ຍັງແນະນຳໃຫ້ພວກນ້ອງກ່ຽວກັບປະຫວັດຄວາມເປັນມາຂອງໜ້າກາກທີ່ເປັນມູນເຊື້ອຢູ່ຫວຽດນາມ. ກ່ອນນີ້, ການເຮັດໜ້າກາກ ແລະ ບັນດາເຄື່ອງຫຼິ້ນພື້ນເມືອງໂດຍພໍ່ເຖົ້າ, ແມ່ເຖົ້າ, ພໍ່ແມ່ເດັກນ້ອຍເຮັດເອງໃນຄອບຄົວ. ຕໍ່ມາ, ການເຮັດເຄື່ອງຫຼີ້ນບໍ່ໄດ້ດຳເນີນໃນແຕ່ລະຄອບຄົວອີກ, ຫາກຫັນເປັນອາຊີບຫັດຖະກຳ. ບັນດານັກສິລະປະການເຮັດໜ້າກາກດ້ວຍຫຼາຍຮູບທີ່ແຕກຕ່າງກັນ ແລ້ວນຳໄປຂາຍ. ເພື່ອເຮັດໜ້າກາກເຈ້ຍຕ້ອນຮັບບຸນວັນເພງເດືອນ 8 ແມ່ນຕ້ອງຜ່ານຫຼາຍຂັ້ນຕອນ, ມີແຕ່ບັນດານັກສິລະປະການຈຶ່ງກຳໄດ້ເຂັດລັບ ແລະ ສອນໃຫ້ລຸ້ນຫຼັງສືບທອດເທົ່ານັ້ນ. ຜ່ານໂຄງການນີ້, ຈິດຕະກອນ ຈາງແທງຮ່ຽນ ຫວັງວ່າຈະໄດ້ຮັບການສະໜັບສະໜູນ, ການເຂົ້າຮ່ວມຂອງເດັກນ້ອຍເຍົາວະຊົນ ກໍ່ຄືປະຊາຄົມ:
“ນີ້ແມ່ນລາຍການພ້ອມກັນແບ່ງປັນຄວາມຮັກແພງ. ພວກນ້ອງມາຮ່ວມລາຍການ, ນອກຈາກໄດ້ຮູ້ກ່ຽວກັບມູນເຊື້ອວັດທະນະທຳໜ້າກາກຂອງຊາວຫວຽດນາມແລ້ວ, ຍັງໄດ້ແບ່ງປັນອາລົມຈິດກັບພວກເພື່ອນນ້ອຍຢູ່ໂຮງຮຽນປະຖົມ ຊ໋ວຍເບົາ, ແຂວງ ເຊີນລາ ອີກດ້ວຍ. ຜ່ານລາຍການນີ້, ພວກຂ້າພະເຈົ້າຢາກຊ່ວຍໃຫ້ເດັກນ້ອຍວິທີປະດິດບັນດາໜ້າກາກ, ແລະ ຮຽກຮ້ອງພວກນ້ອງສະໜັບສະໜູນປື້ມເລື່ອງ, ປື້ມຮຽນເກົ່າໃຫ້ພວກເພື່ອນນ້ອຍຢູ່ເຊີນລາ“.
(ພາບ: ອິນເຕີແນດ)
ພາຍຫຼັງສິ້ນສຸດການເຄື່ອນໄຫວຕ່າງໆຢູ່ຫໍພິພິດຕະພັນວິຈິດສິນຫວຽດນາມ ແລ້ວ, ໂຄງການຈະສືບຕໍ່ຜັນຂະຫຍາຍຢູ່ສະຖານທີ່ອື່ນໆ ເພື່ອດຶງດູດຄວາມສົນໃຈຂອງປະຊາຄົມ. ເອື້ອຍ ໂດທູເຮືອງ, ຜູ້ຕາງໜ້າຄະນະຈັດຕັ້ງໂຄງການ“ພ້ອມກັນປະດິດໜ້າກາກເຈ້ຍຫວຽດນາມ, ຕ້ອນຮັບບຸນວັນເພງເດືອນ 8“, ໃຫ້ຮູ້ວ່າ:
“ພວກຂ້າພະເຈົ້າຄາດວ່າຈະສືບຕໍ່ຈັດຕັ້ງລາຍການຢູ່ຮ້ານ ກາເຟ ລາກາ 24 ຖະໜົນ ຫຼີກວົກຊື ແລະ ຢູ່ຮ່າໂນ້ຍ Creative City ເລກ 1 ເລືອງອຽນ, ຮ່າໂນ້ຍ. ຢູ່ສະຖານທີ່ທັງສອງນີ້, ລາຍການຂອງພວກຂ້າພະເຈົ້າກໍ່ມີຈຸດໃໝ່ເມື່ອທຽບໃສ່ລາຍການຖືກຈັດຢູ່ຫໍພິພິດຕະພັນວິຈິດສິນຫວຽດນາມ“.
ໂຄງການ“ພ້ອມກັນປະດິດໜ້າກາກເຈ້ຍຫວຽດນາມ, ຕ້ອນຮັບບຸນວັນເພງເດືອນ 8“ ໄດ້ປະກອບສ່ວນເຮັດໃຫ້ບຸນວັນເພງເດືອນ 8 ມີຄວາມໝາຍຕື່ມອີກ. ຜ່ານໂຄງການ, ພວກນ້ອງບໍ່ພຽງແຕ່ເຂົ້າໃຈກວ່າກ່ຽວກັບວັດທະນະທຳທີ່ເປັນມູນເຊື້ອຂອງຊາດເທົ່ານັ້ນ, ຫາກຍັງເຂົ້າໃຈໄດ້ຄວາມໝາຍແຫ່ງການແບ່ງປັນ, ຮັກແພງອີກດ້ວຍ.