ງານຕະຫຼາດນັດສາກົນຄັ້ງທີ່ 4 ຖືກຈັດຂຶ້ນທີ່ສູນຈັດງານວາງສະແດງ ຢາງວໍ້ - ຮ່າໂນ້ຍ ແຕ່ວັນທີ 17 ຫາວັນທີ 21/9 ໄດ້ກາຍເປັນວັນບຸນວັດທະນະທຳການອ່ານຂອງບັນດາຜູ້ເຮັດວຽກງານການພິມ, ພິມຈຳໜ່າຍ ແລະ ຈຳໜ່າຍຂອງບັນດາຜູ້ອ່ານ.
ງານຕະຫຼາດນັດປຶ້ມສາກົນໄດ້ດຶງດູດຜູ້ມາຊົມຢ່າງຫຼວງຫຼາຍ
(ພາບ: vanhoadoisong.com.vn)
|
ຄວາມປະທັບໃຈຂອງຜູ້ອ່ານເມື່ອເຂົ້າມາຊົມເບິ່ງໃນງານຕະຫຼາດນັດປຶ້ມສາກົນ, ນັ້ນແມ່ນບັນຍາກາດຢູ່ຕາມຫ້ອງວາງສະແດງ. ຫົວຄິດປະດິດສ້າງ, ຄວາມເປັນເອກະລັກສະເພາະ ແມ່ນສິ່ງທີ່ໝົດທຸກຄົນລ້ວນແຕ່ໃຫ້ຂໍ້ສັງເກດເມື່ອມາຊົມເບິ່ງ. ທຳອິດແມ່ນຕ້ອງເວົ້າເຖິງການປະກົດຕົວຂອງເຄື່ອງພິມ Typo ໃຫຍ່ 2 ໜ່ວຍຖືກນຳໃຊ້ແຕ່ສະໄໝຕໍ່ຕ້ານ ພ້ອມກັບຈັກພິມດີດເຄື່ອງໜຶ່ງ ແລະ ເຄື່ອງຕັດເຈັ້ຍຊຶ່ງໄດ້ເຄີຍນຳມາວາງສະແດງຢູ່ຫໍສະໝຸດແຫ່ງຊາດນັບແຕ່ຊຸມວັນໄດ້ຮັບການສ້າງຕັ້ງ. Thanh Hien ນັກສຶກສາສັງກັດມະຫາວິທະຍາໄລການຄ້າຕ່າງປະເທດຮ່າໂນ້ຍ ໃຫ້ຮູ້ວ່າ :
“ ນ້ອງມັກອ່ານປຶ້ມທີ່ສຸດ, ວັດທະນະທຳການອ່ານ ແມ່ນສິ່ງຄວນເຜີຍແຜ່ຢ່າງກ້ວາງຂວາງ ແລະ ພັດທະນາໃນແຕ່ລະຄອບຄົວ ແລະ ໂຮງຮຽນ. ນ້ອງເຫັນວ່າ ງານວາງສະແດງນີ້ນຳມາເຊິ່ງຜົນປະໂຫຍດຫຼາຍທີ່ສຸດ ແລະ ເຮັດໃຫ້ບັນດາເພື່ອນໜຸ່ມເຫັນໄດ້ວ່າ ວັດທະນະທຳການອ່ານແມ່ນສຳຄັນທີ່ສຸດ ”
ບໍ່ພຽງແຕ່ຮັບໃຊ້ບັນດາເພື່ອນໜຸ່ມມັກອ່ານປຶ້ມເທົ່ານັ້ນ, ງານຕະຫຼາດນັດປຶ້ມສາກົນ ຍັງດຶງດູດການເຂົ້າຮ່ວມຂອງຜູ້ອ່ານທີ່ມີອາຍຸສູງຫຼາຍຄົນອີກດ້ວຍ. ລຸງ Nguyen Huu Khuong ປີນີ້ມີອາຍຸ 76 ປີຢູ່ເມືອງ ຮ່ວາຍດຶກ ໃຫ້ຮູ້ວ່າ :
“ ເມື່ອມີງານວາງສະແດງປຶ້ມ, ຂ້າພະເຈົ້າລ້ວນແຕ່ໄປຊົມທຸກໆຄັ້ງ, ຂ້າພະເຈົ້າດີໃຈຫຼາຍ ເມື່ອມາຊົມງານວາງສະແດງ ໄດ້ອ່ານປຶ້ມຫຼາຍຫົວເລື່ອງຊຶ່ງຢູ່ແຫ່ງອື່ນບໍ່ມີ. ຂ້າພະເຈົ້າຢາກຊອກຫາປຶ້ມກ່ຽວກັບວັດທະນະທຳຝ່າຍຕາເວັນອອກທີ່ແທດເໝາະກັບເກັ່ນອາຍຸ ”
ສ່ວນລຸງ Nguyen Truong Vy ສະແດງຄວາມພໍໃຈຕໍ່ຄຸນນະພາບການພິມ. ລຸງເປີດເຜີຍວ່າ :
“ ຂ້າພະເຈົ້າມີຄວາມປະທັບໃຈຫຼາຍເມືອ່ມາຊົມງານຕະຫຼາດນັດປຶ້ມປີນີ້, ຂ້າພະເຈົ້າຄິດວ່າ ຕ້ອງຈັດງານຕະຫຼາດນັດເຊັ່ນນີ້ປີລະຄັ້ງໜຶ່ງ. ປີນີ້, ການຈັດພິມປຶ້ມງາມຫຼາຍ. ວັດທະນະທຳການອ່ານຂອງພວກເຮົາປະຈຸບັນ, ໄວໜຸ່ມໄດ້ ເລີ່ມກັບຄືນສູ່ໄລຍະກ່ອນ, ແຕ່ລະຄົນຊອກຫາຫົວເລື່ອງສະເພາະໃຫ້ຕົນ ອາຈະແມ່ນວັດທະນະທຳ, ການທ່ອງທ່ຽວ ຫຼື ອາຫານການກິນ....”
ນາງ Pham Thi Thanh Huong ຫົວໜ້າພະແນກ Marketing ບໍລິສັດຫຸ້ນສ່ວນປຶ້ມ ທ້າຍຮ່າ ໃຫ້ຮູ້ວ່າ :
“ບໍລິສັດຫຸ້ນສ່ວນປຶ້ມ ທ້າຍຮ່າ ມີປຶ້ມກ່ຽວກັບ 5 ຫົວເລື່ອງຕົ້ນຕໍຄື: ເສດຖະກິດ, ປຶ້ມສະຫງວນໃຫ້ແກ່ຜູ້ເປັນພໍ່ແມ່, ສາສະໜາ, ປຶ້ມສະຫງວນໃຫ້ແກ່ນັກສຶກສາ, ພວກນ້ອງອະນຸຊົນ. ເຂົ້າຮ່ວມງານຕະຫຼາດນັດປຶ້ມສາກົນຄັ້ງນີ້, ທາງບໍລິສັດມີປຶ້ມອ່ານປະມານ 1000 ຫົວ, ນອກຈາກນັ້ນຍັງມີເຄື່ອງອຸປະກອນຫຼາຍຢ່າງຮັບໃຊ້ການອ່ານອີກດ້ວຍ.”
ງານຕະຫຼາດນັດວາງສະແດງປຶ້ມຄັ້ງນີ້ ລວມມີ 160 ຮ້ານວາງສະແດງດ້ວຍປຶ້ມອ່ານກ່ວາ 30.000.000 ຫົວກ່ຽວກັບທຸກໆຂົງເຂດ. ໃນນັ້ນຮ້ານວາງສະແດງຂອງສະຖາບັນປຶ້ມ ກູບາ ກໍແມ່ນໜຶ່ງໃນບັນດາຮ້ານວາງວະແດງໄດ້ຮັບຄວາມສົນໃຈຈາກຜູ້ອ່ານທັງຫຼາຍ. ທ່ານ Alain Rey Gouzalez ຜູ້ຕາງໜ້າຮ້ານວາງວະແດງຂອງສະຖາບັນປຶ້ມ ກູບາ ໃຫ້ຮູ້ວ່າ :
“ ສະຖາບັນປຶ້ມ ກູບາ ໄດ້ນຳປຶ້ມຕ່າງໆທີ່ພິມຈຳໜ່າຍຢູ່ ກູບາ. ງານວາງສະແດງມີຄວາມປະທັບໃຈຫຼາຍ. ມີປຶ້ມອ່ານຫຼາຍຫົວຂອງສຳນັກພິມຕ່າງໆຂອງຫວຽດນາມ ແລະ ບັນດາປະເທດໃນໂລກທີ່ຈັບອົກຈັບໃຈແທ້. ຂ້າພະເຈົ້າຄິດວ່າ ງານວາງສະແດງປຶ້ມຄັ້ງນີ້ປະສົບຜົນສຳເລັດດີງາມທີ່ສຸດ ”