ລະຫວ່າງກາງເດືອນ 12, ບັນດາເສັ້ນທາງໃນຕາແສງ ຮົ່ງຢາງ ເມືອງ ດົງຮືງ ແຂວງ ທ໋າຍບີ່ງ ໄດ້ຮັບການປະດັບປະດາຢ່າງສວຍງາມດ້ວຍສີຫລາກຫລາຍ ເພື່ອກະກຽມຕ້ອນຮັບ ວັນບຸນ ຄຼິດສະມາດ. ອັນໄດ້ເຮັດໃຫ້ໂສມໜ້າຂອງໝູ່ບ້ານສະຫງົບງຽບທີ່ເຕັມໄປດ້ວຍສີຂຽວຂອງທົ່ງນາ, ຕົ້ນໄມ້ ມີການປ່ຽນແປງປຽບເໝືອນໄດ້ນຸ່ງເສື້ອໃຫມ່ດ້ວຍທຸກສີສັນ.
ກ່ອນ ວັນບຸນ ຄຼິດສະມາດ ເດືອນຫນຶ່ງ, ນ້ອງມາຍທິແອງ, ດ່ວານທິຊີງ ພ້ອມກັບໝູ່ເພື່ອນຫລາຍຄົນ ໄດ້ເຕົ້າໂຮມກັນຢູ່ເຮືອນຂອງອາຈານ ມາຍທິແງ່ ເພື່ອຮຽນຂັບຮ້ອງ. ເອື້ອຍ ມາຍທິແງ່ ໃຫ້ຮູ້ວ່າ: ຍ້ອນບໍ່ມີເງື່ອນໄຂ ສະນັ້ນໝູ່ຮ້ອງເພງໂດຍເອື້ອຍຮັບຜິດຊອບພຽງແຕ່ຮຽນຜ່ານແຜ່ນ CD ເທ່ົານັ້ນ.
ບໍ່ພຽງແຕ່ຮຽນຂັບຮ້ອງເທົ່ານັ້ນ, ບັນດາເພື່ອນຫນຸ່ມຢູ່ເຂດຊາວຄຼິດ ອານເລີບ ຕາແສງ ຮົ່ງຢາງ ຍັງເຂົ້າຮ່ວມວຽກງານລວມຂອງໂບດອີກດ້ວຍ. ນ້ອງ ມາຍທິແອງ ເວົ້າວ່າ:
“ພວກຫລານເຂົ້າຮ່ວມວຽກງານຕ່າງໆໃນໂບດ ແລະ ແບ່ງກັນຮັບພິດຊອບວຽກງານຕາມແຕ່ລະຫນ່ວຍ. ພວກຫລານເຫັນວ່າບັນຍາກາດໃນຊຸມມື້ນີ້ເບິກບ້ານມ່ວນຊຶ່ນຫລາຍ. ຫລານຮູ້ສຶກເອກອ້າງທະນົງໃຈແມ່ນຊາວຄຼິດ ທີ່ໄດ້ເຈືອຈານໃນບັນຍາກາດຂອງ ວັນບຸນ ຄຼິດສະມາດ.“
ເພື່ອກະກຽມໃຫ້ແກ່ ວັນບຸນ ຄຼິດສະມາດ, ເຂດຊາວຄຼິດ ອານເລີບ ໄດ້ວາງແຜນການລະອຽດ ເພື່ອຕ້ອນຮັບ ວັນບຸນ ຄຼລິດສະມາດ ຢ່າງເບິກບານມ່ວນຊື່ນ ຮຽບຮ້ອຍ ແລະສະຫງ່າຜ່າເຜີຍ. ຫົວໜ້າເຂດຊາວຄຼິດ ຫງວຽນວັນຈຽນ ໃຫ້ຮູ້ວ່າ:
“ເບິ່ງລວມແລ້ວ, ວັນບຸນ ຄຼິດສະມາດ 2011, ພໍ່ແມ່ພີ່ນ້ອງມີຄວາມເບິກບານມ່ວນຊຶ່ນ, ເພາະວ່າ ເສດຖະກິດນັບມື້ນັບດີຂຶ້ນ ແລະ ມີຄວາມເສລີໃນການເຊື່ອຖື, ເຫລືອມໃສສາສະຫນາ. ຊາວຄຼິດຢູ່ ອານເລີບ ລວມມີ 5 ວົງຕະກູນ, ເພື່ອໃຫ້ບັນດາຄອບຄົວຊາວຄຼິດໄດ້ຕ້ອນຮັບວັນບຸນຢ່າງເບິກບານມ່ວນຊຶ່ນ, ພວກຂ້າພະເຈົ້າຈະລົງແຕ່ລະຄຸ້ມບ້ານເພື່ອປະດັບປະດາ.“
ບໍ່ພຽງແຕ່ເຂດຊາວຄຼິດກະກຽມຕ້ອນຮັບ ວັນບຸນ ຄຼລິດສະມາດ ເທົ່ານັ້ນ, ປະຊາຊົນຢູ່ຕາແສງ ຮົ່ງຢາງ ກໍລໍຖ້າຕ້ອນຮັບວັນບຸນນີ້ເຊັ່ນດຽວກັນ. ຢູ່ຕາແສງ ຮົ່ງຢາງ, ຈຳນວນຊາວຄຼິດກວມ 50%. ແຕ່ໃນຊຸມມື້ນີ້, ເມື່ອມາຢ້ຽມຢາມແຫ່ງນີ້ ເຮົາ ກໍ່ບໍ່ສາມາດຈຳແນກໄດ້ຜູ້ໃດແມ່ນຊາວຄຼິດ . ທ່ານ ຫງວຽນຊວນດີ້ງ, ປະທານຄະນະກຳມະການປະຊາຊົນຕາແສງ ຮ່ົງຢາງ ໃຫ້ຮູ້ວ່າ:
“ໃນວັນບຸນສຳຄັນຕ່າງໆ, ອຳນາດການປົກຄອງລ້ວນແຕ່ມາຢື້ຢາມຖາມຂ່າວ, ອວຍພອນພໍ່ແມ່ປະຊາຊົນຊາວຄຼິດ. ແຕ່ລະປີ ໃນໂອກາດ ວັນບຸນ ຄຼິດສະມາດ ປະຊາຊົນຢູ່ທີ່ນີ້ຕ້ອນຮັບວັນບຸນຢ່າງເບິກບານມ່ວນຊື່ນ ບໍ່ມີການຈຳແນກຊາວຄຼິດ ຫລືປະຊາຊົນສາມັນ.“
ເພາະບໍ່ມີການຈຳແນກ, ສະນັ້ນ ເມື່ອໂອກາດ ວັນບຸນ ຄຼິດສະມາດວຽນມາ ບໍ່ພຽງແຕ່ປະຊາຊົນໃນຕາແສງເທົ່ານັ້ນ ຫາກປະຊາຊົນໃນຕາແສງໃກ້ຄຽງກໍເຕົ້າໂຮມກັນຢູ່ທີ່ນີ້ເປັນຈຳນວນຫລວງຫລາຍ.ໃນບໍລິເວນໂບດໃຫຍ່ຂອງເຂດຊາວຄຼິດ ອານເລີບ ດ້ວຍເນື້ອທີ່ເກືອບ 7000 ຕາລາງແມດ, ກໍ່ຄືຢູ່ຕາມເສັ້ນທາງ, ຮ່ອມທາງຕ່າງໆໃນເຂດຊາວຄຼິດ, ມີປະຊາຊົນເຕົ້າໂຮມກັນຢ່າງຄັບຄາຫນາແຫນ້ນ. ທ່ານ ຫງວຽນແທນເຕີມ ຫົວໜ້າ ເຂດຊາວຄຼິດ ອານເລີບ ໃຫ້ຮູ້ວ່າ: ເພື່ອຮັບປະກັນຄວາມປອດໄພໃຫ້ແກ່ປະຊາຊົນ, ເຂດຊາວຄຼິດ ໄດ້ສົມທົບກັບອຳນາດການປົກຄອງເຮັດວຽກງານນີ້ເປັນຢ່າງດີ.
“ ແຕ່ລະປີ, ເມື່ອໂອກາດວັນບຸນຄຼິດສະມາດວຽນມາ, ກຳລັງປ້ອງກັນຄວາມສະຫງົບຢູ່ເມືອງ ແລະ ທ້ອງຖິ່ນໄດ້ສົມທົບກັນປະຕິບັດວຽກງານຊ່ວຍເຫລືອປະຊາຊົນ, ເພື່ອຮັບປະກັນໃຫ້ເຂົາເຈົ້າໄດ້ຕ້ອນຮັບວັນບຸນດ້ວຍຄວາມເບິກບານມ່ວນຊື່ນ ແລະ ປອດໄພ“
ມາຮອດຈຸດເວລານີ້ ປະຊາຊົນຢູ່ເຂດຊາວຄິຼດອານເລີບເກືອບຄືວ່າໄດ້ສຳເລັດວຽກງານປະດັບປະດາເຮືອນຊານ ບ້ານຊ່ອງແລ້ວ. ຜູ້ໃດກໍປາຖະຫນາວ່າຈະໄດ້ຕ້ອນຮັບວັນບຸນຄຼິດສະມາດດ້ວຍຄວາມເບິກບານມ່ວນຊຶ່ນ, ປອດໄພ ແລະ ມີຄວາມຜາສຸກ.
ລານແອງ