ທ່ານ ເລີມວັນຄາງ ຮອງຫົວໜ້າຄະນະຄຸ້ມຄອງໝູ່ບ້ານວັດທະນະທຳ-ທ່ອງທ່ຽວບັນດາເຜົ່າຫວຽດນາມ, ຫົວໜ້າຄະນະຈັດຕັ້ງເຫດການ ມອບໃບຢັ້ງຢືນມອບວັດຖຸພັນໃຫ້ແກ່ບັນດາຄະນະ
(ພາບ: vinaculto.vn)
|
ສັບປະດາ “ ມະຫາສາມັກຄີບັນດາເຜົ່າ - ມໍລະດົກວັດທະນະທຳຫວຽດນາມ ” ໂດຍກະຊວງວັດທະນະທຳ, ກິລາ ແລະ ທ່ອງທ່ຽວຫວຽດນາມທີ່ຈັດຂຶ້ນຢູ່ໝູ່ບ້ານ ວັດທະນະທຳ-ທ່ອງທ່ຽວບັນດາເຜົ່າຫວຽດນາມ, ຮ່າໂນ້ຍ ຫາກໍຖືກອັດລົງໂດຍມີບັນດາການເຄື່ອນໄຫວວັດທະນະທຳທີ່ອຸດົມສົມບູນ ແລະ ເຂັ້ມຂົ້ນໄປດ້ວຍສີສັນຊາດຂອງບັນດາເຂດພູດອຍ. ເຫດການພິເສດນີ້ໄດ້ສ້າງຄວາມປະທັບໃຈທີ່ດີງາມໃຫ້ແກ່ແຂກທ່ອງທ່ຽວ ແລະຊາວທ້ອງຖິ່ນ.
ສັບປະດາ “ມະຫາສາມັກຄີບັນດາເຜົ່າ - ມໍລະດົກວັດທະນະທຳຫວຽດນາມ”ຖືກ ດຳເນີນແຕ່ວັນທີ 18 ຫາ 24/11 ໄດ້ເຕົ້າໂຮມບັນດາເຈົ້າກົກເຈົ້າເຫຼົ່າ, ນາຍບ້ານ,ນັກສິລະປະການຂອງ 17 ຊົນເຜົ່າທີ່ຂຶ້ນກັບ 13 ແຂວງ ແລະ ນະຄອນ ດ້ວຍຜູ້ຕາງໜ້າໃຫ້ແກ່ບັນດາເຂດແຄ້ວນຂອງປະເທດຊາດລວມປະມານ 400 ຄົນ. ເປີດສາກໃຫ້ສັບປະດາ“ມະຫາສາມັກຄີບັນດາເຜົ່າ - ມໍລະດົກວັດທະນະທຳຫວຽດນາມ” ແມ່ນການຕັ້ງຄ້າຍປະດິດສ້າງທາງດ້ານແກະຄວັດສະຫຼັກເຂດໄຕງວຽນ ໂດຍມີການເຂົ້າຮ່ວມຂອງນັກສິລະປະການ 49 ຄົນທີ່ມາຈາກບັນດາເຜົ່າເຂດໄຕງວຽນ, ເຂົາເຈົ້າໄດ້ພ້ອມກັນສະແດງຄວາມຮັກ, ການປະດິດສ້າງ ແກະຄວັດສະຫຼັກໄມ້ດ້ວຍລວດລາຍທີ່ງາມຕາ. ບັນດານັກສິລະປະການທີ່ມີສີມືດີຂອງເຜົ່າ ເຊີດັງ, ບານາ, ຢາຣາຍ, ແຢຈຽງ, ບເຣົາ....ໄດ້ເຮັດສຳເລັດຮູບແກະຄວັດສະຫຼັກ 180 ຮູບໃນບັນດາຂົງເຂດວັດທະນະທຳ, ສິລະປະ, ຊີວິດການເປັນຢູ່, ການເຫຼື້ອມໄສ..... ທ່ານ ຟານວັນຮ່ວາງ ຫົວໜ້າຂະແໜງວິຊາການວັດທະນະທຳ ສັງກັດພະແນກ ວັດທະນະທຳ, ກິລາ ແລະ ທ່ອງທ່ຽວແຂວງ ກອນຕູມ ໃຫ້ຮູ້ວ່າ :
“ ປະຈຸບັນ ຕ້ອງປົກປັກຮັກສາປ່າ, ດັ່ງນັ້ນ ປະຊາຊົນບັນດາເຜົ່າເຂດໄຕງວຽນໄດ້ຂະຫຍາຍການປູກຕົ້ນໄມ້ອຸດສາຫະກຳ. ຮູບແກະຄວັດສະຫຼັກທີ່ເຮັດດ້ວຍໄມ້ຂອງບັນດາເຜົ່າໃນແຂວງ ກອນຕູມເວົ້າສະເພາະ ແລະ ເຂດໄຕງວຽນເວົ້າລວມ ໄດ້ຕິດພັນກັບຊີວິດປະຈຳວັນຂອງພໍ່ແມ່ປະຊາຊົນບັນດາເຜົ່າສ່ວນໜ້ອຍຄື ຮູບແກະຄວັດສະຫຼັກ ແມ່ຍິງເຈ່ຍລູກ, ພວກອ້າຍບາວ ໄຕງວຽນ ໄປລ່າສັດ...”
ພໍ່ແມ່ປະຊາຊົນບັນດາເຜົ່າຢູ່ບັນດາເຂດແຄ້ວນທີ່ແຕກຕ່າງກັນ ໄດ້ນຳເອົາບັນດາຄຸນຄ່າວັດທະນະທຳທີ່ເປັນເອກະລັກສະເພາະຂອງຕົນມາຮ່ວມໃນວັນບຸນ ມະຫາສາມັກຄີ. ງານບຸນນາງ ຮາຍ ພາວະນາໃຫ້ລະດູການຜະລິດໄດ້ຮັບຜົນດີ ໄດ້ສ່ອງແສງໃຫ້ເຫັນວັດທະນະທຳການເຫຼື້ອມໄສພື້ນເມືອງຂອງຊາວເຜົ່າໄຕໃນແຂວງ ກາວບັງ. ສ່ວນງານບຸນ ກຳເມືອງ ທີ່ມີການລະຫຼິ້ນພື້ນເມືອງຕ່າງໆຄື : ໂຍນໝາກຄອນ, ຫົດນ້ຳ.... ຂອງຊາວເຜົ່າລື້ໃນແຂວງ ລາຍເຈົາ. ນາງ ວ່າງທິມາຍ ຊາວເຜົ່າມົ້ງ ຢູ່ເມືອງກວານບະ ແຂວງ ຮ່າຢາງ ເວົ້າວ່າ :
“ ເຂົ້າຮ່ວມບັນດາງານບຸນໃຫຍ່ເຊັ່ນນີ້, ຂ້າພະເຈົ້າຮູ້ສຶກວ່າ ທຸກໆແຖບຖິ່ນໃນທົ່ວປະເທດ ແລະ 54 ຊົນເຜົ່າອ້າຍນ້ອງ ກໍລ້ວນແຕ່ໄດ້ແລກປ່ຽນ ຖອກຖອນບັດຮຽນຊຶ່ງກັນ ແລະ ກັນໃນຊາຍຄາຮ່ວມ. ພວກຂ້າພະເຈົ້າ ໄດ້ນຳເອົາບັນດາຄຸນຄ່າວັດທະນະທຳທີ່ເປັນເອກະລັກສະເພາະຂອງຕົນມາຮ່ວມໃນວັນບຸນ. ບັນດາເຫດການໃຫຍ່ເຊັ່ນນີ້, ຄວນດຳເນີນເປັນປະຈຳເພື່ອໃຫ້ບັນດາເຜົ່າໃນທົ່ວປະເທດໄດ້ເຂົ້າຮ່ວມ”
ສ່ວນທ່ານ ເລີມວັນຄາງ ຮອງຫົວໜ້າຄະນະຄຸ້ມຄອງໝູ່ບ້ານວັດທະນະທຳ-ທ່ອງທ່ຽວບັນດາເຜົ່າຫວຽດນາມ, ຫົວໜ້າຄະນະຈັດຕັ້ງເຫດການໃຫ້ຮູ້ວ່າ:
“ ພວກຂ້າພະເຈົ້າຕີລາຄາວ່າ ບັນດາການເຄື່ອນໄຫວໄດ້ຖືກດຳເນີນ ຖືກຕາມແຜນການ ແລະ ປະສົບຜົນສຳເລັດ. ມີບາງເຫດການໄດ້ຮັບຜົນສຳເລັດທີ່ດີງາມທີ່ສຸດຄື: ການວາດພາບເຖິງເຂດຕະຫຼາດບົນໜ້ານ້ຳ ພາກໃຕ້; ການແຂ່ງງົວ ໄບນຸ້ຍ ອານຢາງ ອັນໄດ້ດຶງດູດແຂກທ່ອງທ່ຽວ ແລະ ຊາວທ້ອງຖິ່ນມາຊົມຢ່າງຫຼວງຫຼາຍ”.