(vovworld) – ງານວາງສະແດງ “ຕຸກກະຕາທີ່ເປັນມູນເຊື້ອຂອງຍີ່ປຸ່ນ“ ທີ່ເຂັ້ມຄົ້ນໄປດ້ວຍສີສັນວັດທະນະທຳຂອງຍີ່ປຸ່ນ ພວມດຳເນີນໄປຢູ່ຫໍພິພິດທະພັນແມ່ຍິງຫວຽດນາມ ໃນນະຄອນຫຼວງຮ່າໂນ້ຍ. ນີ້ແມ່ນການເຄື່ອນໄຫວເປີດສາກໃຫ້ປີມິດຕະພາບຫວຽດນາມ - ຍີ່ປຸ່ນໃນປີ 2013.
ເມື່ອມາຢ້ຽມຊົມທີ່ງານວາງສະແດງ, ຜູ້ຄົນທັງຫຼາຍບໍ່ພຽງແຕ່ໄດ້ເຫັນປະຈັກຕາຕຸກກະຕາທຸກປະເພດຂອງຍື່ປຸ່ນເທົ່ານັ້ນ, ຫາກຍັງເຂົ້າໃຈຕື່ມກ່ຽວກັບວັດທະນະທຳທີ່ເປັນມູນເຊື້ອຂອງຍີ່ປຸ່ນ, ເມື່ອໄດ້ນຸ່ງຊຸດອາພອນ yukata, ດ້ວຍສີສັນທີ່ສວຍງາມ ແລະ ເປັນເອກະລັກສະເພາະຂອງຜູ້ຍິງຍີ່ປຸ່ນ ໃນລະດູຮ້ອນ, ຫຼືໄດ້ເຂົ້າຮ່ວມສິລະປະພັບເຈ້ຍ Origami ແລະ ການລະຫຼີ້ນພື້ນເມືອງຕ່າງໆຂອງຍີ່ປຸ່ນ. ຫວໍຢູຍກວົກທ້າຍ, ນັກສຶກສາສະຖາບັນການເງິນຫວຽດນາມ, ແບ່ງປັນວ່າ:
“ນີແມ່ນເທື່ອທຳອິດທີ່ຂ້າພະເຈົ້າມາຢ້ຽມຢາມງານວາງສະແດງກ່ຽວກັບຍີ່ປຸ່ນ. ຂ້າພະເຈົ້າຮູ້ສຶກມ່ວນຫຼາຍ, ວັດທະນະທຳຂອງຍີ່ປຸ່ນແມ່ນມີຫຼາຍຮູບຫຼາຍສີ. ສິ່ງທີ່ສ້າງຄວາມປະທັບໃຈທີ່ສຸດໃຫ້ແກ່ນ້ອງນັ້ນແມ່ນບັນດາຕຸກກະຕາ, ເຖິງວ່າມັນມີຂະໜາດໃຫຍ່, ນ້ອຍທີ່ແຕກຕ່າງກັນກໍ່ຕາມ, ແຕ່ພັດສະແດງໃຫ້ເຫັນຄວາມຊຳນານຂອງບັນດານັກສິລະປະການ“.
ຕຸກກະຕາກວ່າ 200 ໂຕທີ່ວາງສະແດງຢູ່ຫໍພິພິດທະພັນແມ່ຍິງຫວຽດນາມນັ້ນ, ໂດຍບັນດານັກສິລະປະການຍີ່ປຸ່ນເຮັດເອງ. ບັນດາຮີດຄອງປະເພນີ, ວັດທະນະທຳ, ທັດສະນະ, ການເຫຼື້ອມໄສ ກໍ່ຄືຄວາມມຸ້ງມາດປາຖະໜາຂອງຊາວຍີ່ປຸ່ນ ລ້ວນແຕ່ຖືກສະແດງອອກຢ່າງມີຊີວິດຊີວາຜ່ານຕຸກກະຕາແຕ່ລະໂຕ. ສຳລັບຊາວຍີ່ປຸ່ນ, ຕຸກກະຕາໄດ້ກາຍເປັນພາກສ່ວນໜຶ່ງທີ່ຂາດບໍ່ໄດ້ໃນຊີວິດປະຈຳວັນຂອງເຂົາເຈົ້າ. ປ້າ Sachei Ito, ປະທານສະມາຄົມຕຸກກະຕາ Edo – Kemikomi, ໃຫ້ຮູ້ວ່າ
“ບັນດາຕຸກກະຕານີ້ມີຄວາມໝາຍຢ່າງເລິກເຊິ່ງໃນໂອກາດວັນເກີດ, ງານບຸນທີ່ເປັນມູນເຊື້ອ, ແມ່ນຂອງຂວັນມອບໃຫ້ເດັກຍິງ, ເດັກຊາຍ ເພື່ອອວຍພອນໃຫ້ພວກນ້ອງມີສຸຂະພາບແຂງແຮງ, ຮູ້ຄວາມ ແລະ ຮຽນເກັ່ງ. ນອກນັ້ນ, ຕຸກກະຕາຍັງໃຊ້ເພື່ອປະດັບປະດາ ດ້ວຍຄວາມຫວັງຄອບຄົວຈະໄດ້ຮັບທຸກສິ່ງທຸກຢ່າງທີ່ຈົບງາມອີກດ້ວຍ“
ເຂດສຳລັບສິລະປະພັບເຈ້ຍ Origami ເຖິງວ່າບໍ່ກວ້າງ, ແຕ່ຍັງຄົງດຶງດູດຜູ້ມາຊົມເປັນຈຳນວນຫຼວງຫຼາຍ. ດ້ວຍສີມືການຊ່າງຂອງຜູ້ພັບ, ເຈ້ຍ Origami ແຕ່ລະໃບ ໄດ້ກາຍເປັນຫຼາຍຮູບຕາມຄວາມສຳນຶກຂອງເຂົາເຈົ້າ. ສິ່ງດັ່ງກ່າວໄດ້ສ້າງຄວາມດຶງດູດໃຫ້ແກ່ຜູ້ຊົມ. ປ້າ ເລທິແທງ, ອາຍຸ 70 ປີ ຢູ່ກິມລຽນ, ຮ່າໂນ້ຍ, ແບ່ງປັນວ່າ:
“ນີ້ແມ່ນຄັ້ງທຳອິດທີ່ຂ້າພະເຈົ້າພັບເຈ້ຍ, ພັບຍາກຫຼາຍ, ແຕ່ພັດຈັບອົກຈັບໃຈທີ່ສຸດ. ຂ້າພະເຈົ້າພວມພະຍາຍາມພັບດອກໄມ້. ຈາກເຈ້ຍໃບໜຶ່ງກໍ່ສາມາດພັບເປັນຫຼາຍຮູບໄດ້. ຊາວຍີ່ປຸ່ນມີຫົວຄິດປະດິດສ້າງ ແລະ ສະຫຼາດສະຫຼຽວທີ່ສຸດ“.
ງານວາງສະແດງຕຸກກະຕາທີ່ເປັນມູນເຊື້ອຂອງຍີ່ປຸ່ນ ຖືກດຳເນີນແຕ່ວັນທີ 7-31/3, ໄດ້ນຳເອົາວັດທະນະທຳຍີ່ປຸ່ນມາໃຫ້ຜູ້ນິຍົມສິລະປະຫວຽດນາມ. ປ້າ ບູ່ຍທິງາ, ກຳມະການຄະນະບໍລິຫານງານສູນກາງສະຫະພັນແມ່ຍິງຫວຽດນາມ, ໃຫ້ຮູ້ວ່າ:
“ເມື່ອມາແຫ່ງນີ້, ຂ້າພະເຈົ້າຮູ້ສຶກຈັບອົກຈັບໃຈຫຼາຍ. ຕຸກກະຕາຢູ່ທີ່ນີ້ມີຫຼາຍປະເພດ. ຜ່ານນັ້ນ, ຊາວຮ່າໂນ້ຍຈະມີໂອກາດເພື່ອຊອກຮູ້ຕື່ມກ່ຽວກັບປະເທດຍີ່ປຸ່ນຜ່ານບັນດາຕຸກກະຕາ, ການລະຫຼິ້ນພື້ນເມືອງ… ຈາກນັ້ນຈະປະກອບສ່ວນເພີ່ມຄວາມເຂົ້າອົກເຂົ້າໃຈລະຫວ່າງສອງປະເທດ, ເພື່ອຊ່ວຍເຫຼືອພ້ອມກັນພັດທະນາ“
ງານວາງສະແດງ “ຕຸກກະຕາທີ່ເປັນມູນເຊື້ອຂອງຍີ່ປຸ່ນ“ ນອນໃນຂອບເຂດລາຍການເຄື່ອນໄຫວສະເຫຼີມສະຫຼອງ 40 ປີ ແຫ່ງຄວາມມິດຕະພາບຫວຽດນາມ - ຍີ່ປຸ່ນ. ນີ້ແມ່ນການເຄື່ອນໄຫວທີ່ມີຄວາມໝາຍ, ຊ່ວຍໃຫ້ລຸ້ນໜຸ່ມຫວຽດນາມມີຄວາມເຂົ້າໃຈກວ່າກ່ຽວກັບວັດທະນະທຳທີ່ດີງາມຂອງຍີ່ປຸ່ນ.