(vovworld)- ຍັງພຽງອີກ 2 ມື້ເທົ່ານັ້ນ, ວິທະຍຸກະຈາຍສຽງຫວຽດນາມ ຈະຈັດພິທີສະເຫລີມສະຫລອງ 70 ປີແຫ່ງວັນສ້າງຕັ້ງ (7/9/1945-7/9/2015). ໃນ 70 ປີແຫ່ງການສ້າງຕັ້ງ ແລະ ພັດທະນາ, ວິທະຍຸກະຈາຍສຽງຫວຽດນາມ (VOV) ຍາມໃດກໍໄດ້ຮັບການສະຫນັບສະຫນູນຈາກທ່ານຜູ້ຟັງເປັນຈຳນວນຫລວງຫລາຍ, ໃນນັ້ນມີຜູ້ຟັງຫລາຍຄົນໄດ້ພ້ອມກັນສ້າງຕັ້ງສະໂມສອນຢູ່ບັນດາແຂວງ, ນະຄອນໃນທົ່ວປະເທດ.
ນັກຮົບເກົ່າ ຮ່າຟີຫາຍ, ຊື່ງແມ່ນສະມາຊິກສະໂມສອນນັກຮົບເກົ່າຟັງວິທະຍຸ ຢູ່ ນະຄອນ ຫວຽດຈີ່ ແຂວງ ຟູທໍ້ ໃຫ້ຮູ້ວ່າ: VOV ຄືດັ່ງເພື່ອນສະຫນິດສະຫນົມຂອງທ່ານນັບແຕ່ສະໄຫມສົງຄາມຈົນເຖິງໄລຍະສັນຕິພາບ. ແລະ ຈຸດເວລາຕື້ນຕັນໃຈທີ່ສຸດແມ່ນ ໄດ້ຮັບຟັງ VOV ແຈ້ງຂ່າວ ປະທານໂຮ່ຈິມີນ ເຖິງແກ່ມໍລະນະກຳ. VOV ຍາມໃດກໍຮ່ວມເດີນທາງ ແລະ ກາຍເປັນເພື່ອນສະຫນິດສະຫນົມຂອງບັນດານັກຮົບໃນສະໄຫມຕໍ່ຕ້ານ. ປະຈຸບັນ ເຖິງວ່າອາຍຸສູງແລ້ວ, ວິທະຍຸຍາມໃດກໍແມ່ນອາຫານທາງດ້ານຈິດໃຈທີ່ຂາດບໍ່ໄດ້ໃນຊີວິດປະຈຳວັນຂອງທ່ານ. ທ່ານ ຫາຍ ນິຍົມບັນດາລາຍການອອກອາກາດສົດຂອງ VOV ໂດຍສະເພາະແມ່ນລາຍການ ທີ່ມີການແລກປ່ຽນກັບຜູ້ຟັງ. ຕາມທ່ານ ຫາຍແລ້ວ, ນີ້ແມ່ນສິ່ງທີ່ໃຫມ່ອ່ຽມຂອງບັນດາລາຍການກະຈາຍສຽງ VOV ໃນປະຈຸບັນ.
“ຂ້າພະເຈົ້າເຫັນວ່າ VOV ເຜີຍແຜ່ບັນດາແຜນນະໂຍບາຍ, ນະໂຍບາຍຂອງພັກ, ລັດຢ່າງທັນການ. ພາຍຫລັງໄດ້ຮັບຟັງວິທະຍຸແລ້ວ, ພວກຂ້າພະເຈົ້າ ເຜີຍແຜ່ບັນດາແຜນນະໂຍບາຍ, ນະໂຍບາຍຂອງພັກ, ລັດ ໃຫ້ແກ່ປະຊາຊົນໃນບ້ານ ເພື່ອໃຫ້ເຂົາເຈົ້າຮັບຊາບ ກໍຄືເຜີຍແຜ່ໃຫ້ລູກຫລານຂອງຕົນ.”
ລາຍການພົບປະແລກປ່ຽນກັບຜູ້ຟັງຂອງVOV
|
ຜູ້ຟັງສາມາດຮັບຟັງລາຍການຕ່າງໆຂອງ VOV ຢູ່ທຸກບ່ອນ, ທຸກເວລາ ຢ່າງງ່າຍດາຍ ແລະ ສະດວກ. ນັ້ນແມ່ນຄຳແບ່ງປັນຂອງແມ່ຕູ້ ຫງວຽນທິຮຽນ, ສະມາຊິກຂອງສະໂມສອນຜູ້ຟັງ ວິທະຍຸ ຢູ່ ບ້ານ ເຫລື້ອ ຕາແສງ ຫວຽດຮຸ່ງ ເມືອງ ເກວຫວໍ ແຂວງ ບັກນີງ. ສຳລັບປະຊາຊົນຢູ່ເຂດຊົນນະບົດແລ້ວ, ຍາມໃດກໍຄ້າງຄາກັບ ວຽກໄຮ່ການນາ, ສະນັ້ນ ເຂົາເຈົ້າພຽງແຕ່ຮັບຟັງບັນດາລາຍການຜ່ານຄື້ນວິທະຍຸໄດ້ເທົ່ານັ້ນ. ແມ່ຕູ້ ຫງວຽນທິຮຽນ ໃຫ້ຮູ້ວ່າ: ລາຍການໃດຂອງ VOV, ແມ່ກໍຮັບຟັງໝົດ, ພິເສດແມ່ນລາຍການເວົ້າເຖິງຂົງເຂດກະສິກຳ, ຊົນນະບົດ ແລະຊາວກະສິກອນ ຫລືບັນດາລາຍການກ່ຽວຂ້ອງເຖິງແມ່ຍິງ.
“ຂ້າພະເຈົ້າເຫັນວ່າ ທຸກລາຍການຂອງ VOV ລ້ວນແຕ່ມີຄວາມໝາຍຢ່າງແທດຈິງ, ເປັນຕົ້ນບັນດາລາຍການຄື: ເພື່ອນຂອງຊາວກະສິກອນ ຫລື ລາຍການ ຊ່ວຍເຫລືອກັນສ້າງຄວາມຮັ່ງມີ ຂອງ VOV. ຂ້າພະເຈົ້າຮັບຟັງ ແລະ ເຜີຍແຜ່ເຖິງສະມຳຊິກທຸກຄົນໃນສະໂມສອນ. ບັນດາລາຍການນັ້ນ ໄດ້ຊ່ວຍໃຫ້ພວກຂ້າພະເຈົ້າສ້າງຄວາມຮັ່ງມີຈາກທົ່ງນາ.”
ບັນດາສະມາຊິກໃນສະໂມສອນຜູ້ຟັງວິທະຍຸ ເມືອງ ອຽນຢູງ ແຂວງ ບັກຢາງ ຍາມໃດກໍມີ ວິທະຍຸ ເຄື່ອງຫນຶ່ງຕິດໂຕ. ປ້າ ເຈີນທິເລຕວານ, ສະມາຊິກຂອງສະໂມສອນດັ່ງກ່າວໃຫ້ຮູ້ວ່າ: ປ້າຮັບຟັງວິທະຍຸໃນທຸກເວລາ. ປ້າ ມັກບັນດາລາຍການດົນຕີພື້ນເມືອງ ທີ່ອອກອາກາດເປັນປະຈຳທາງຄື້ນວິທະຍຸກະຈາຍສຽງຫວຽດນາມ.
“ພວກຂ້າພະເຈົ້າປາດຖະຫນາວ່າ ວິທະຍຸກະຈາຍສຽງຫວຽດນາມ ມີຫລາຍລາຍການມ່ວນກວ່າອີກ, ເປັນຕົ້ນແມ່ນລາຍການເພງພື້ນເມືອງ. ພວກຂ້າພະເຈົ້າກໍຫວັງວ່າ VOV ຈະອັບເດັດຂ່າວຄາວຢ່າງວ່ອງໄວ, ທັນການ ເພື່ອໃຫ້ພວກຂ້າພະເຈົ້າຮູ້ຈັກສະພາບການໃນແຕ່ລະມື້.”
ຜູ້ຟັງນັບລ້ານໆຄົນໃນທຸກແຖບຖິ່ນຂອງທົ່ວປະເທດ ຈາກເຂດຊາຍແດນຕະຫລອດຮອດເຂດໝູ່ເກາະທີ່ຫ່າງໄກ ລ້ວນແຕ່ຕິດຕາມລາຍການກະຈາຍສຽງຂອງ VOV ທຸກວັນແລະຄືນ. ບໍ່ພຽງແຕ່ພາຍໃນປະເທດເທົ່ານັ້ນ ຫາກຍັງມີຫລາຍສະໂມສອນຜູ້ຟັງວິທະຍຸກໍໄດ້ຮັບການສ້າງຕັ້ງຢູ່ຕ່າງປະເທດ ແລະ ເຂົາເຈົ້າໄດ້ສົ່ງຈົດໝາຍມາຍັງ VOV ເປັນປະຈຳ ເພື່ອສະຫນັບສະຫນູນກໍຄືປະກອບຄຳເຫັນເຮັດໃຫ້ VOV ນັບມື້ນັບພັດທະນາກວ່າອີກ. ພຽງແຕ່ມີຄວາມເຊື່ອໝັ້ນ, ຮັກແພງ VOV, ຜູ້ຟັງພາຍໃນ ແລະ ຕ່າງປະເທດ ຈຶ່ງມີອາລົມຈິດ ຄວາມສະຫນິດຕິດພັນກັບ VOV ຢ່າງເລິກເຊິ່ງ ແລະ ຍາວນານຄືແນວນັ້ນ.